Timbhoni Ta Yehovha eMisaveni Hinkwayo—Bahamas

MATIKO Lama Khomisaneke ya Bahamas—ku nga ntlawa wa swihlala ni swihlala-ntsongo swa 3 000—ma xaxamelane ku fana ni vuhlalu ku ringana tikhilomitara ta 900 etlhelo ka lwandle ra wasi exikarhi ka Florida na Cuba. Exikarhi ka vaaki va rona va 267 000 ku ni ntlawa wa vayimbeleri lowu kulaka wa vahuweleri va Mfumo. Risimu ra vona ro dzunisa ri hi tsundzuxa Esaya 42:10-12 leyi nge: “Yimbelelani Yehova e risimu le’rinṭŝha, yimbani ŝiḍuniso ŝa yena e makuṅwini ya misav̌a, ṅwina mi fambaka lwandle, na ṅwina mi hanyaka ka rona, ṅwina ŝihlale ni v̌aaki v̌a ŝona. . . . E tinṭhav̌eni a ku biwe mikulungwana! A ku ḍunisiwe Yehova, a ku v̌uriwe ŝihlaleni e ku ḍuneka ka yena!”

Ripfumelo Lerintshwa Ri Ringiwa

Hi July 1992 phayona ra nkarhi hinkwawo (muchumayeri wa Mfumo wa nkarhi hinkwawo) ri fambisele n’wamabindzu loyi a ri tolovelane na yena buku yo pfuneta ku dyondza Bibele leyi nge U Nga Hanya Hi Masiku aParadeyisini eMisaveni. Endzhaku ka loko wanuna loyi a hlaye buku leyi, u tibyele a ku, ‘Lebyi i vukhongeri lebyi ndzi faneleke ku byi kambisisa hi vukheta.’ Tisonto timbirhi leti landzeleke, u ve kona eminhlanganweni eTiholweni ta Mfumo timbirhi to hambana ta Timbhoni ta Yehovha. Kutani ku sunguriwe dyondzo ya Bibele na yena. Hambi swi ri tano, endzhaku ka mavhiki ya tsevu ntsena a sungule tidyondzo ta yena ta Bibele, ku pfuke mphikamakaneta leyi a yi ta ringa ripfumelo ra yena lerintshwa—minkhuvo ya ku tlangela siku ro velekiwa.

Ndyangu wa n’wamabindzu loyi a wu yi rhandza swinene minkhuvo yo tano, kambe rirhandzu ra yena ra Rito ra Xikwembu ri n’wi susumetele ku ya emahlweni ni tidyondzo ta yena ta Bibele. Loko vutivi bya yena bya ntiyiso wa Matsalwa byi ya byi engeteleka, ni ku twisisa ka yena minkhuvo ya siku ro velekiwa ni tiholideyi ta misava ni ndlela leyi Yehovha a ti langutaka ha yona ku engetelekile.

Loko nsati wa wanuna loyi a hlele xinkhubyana xa Father’s Day, hi ku titsongahata u ale ku va kona eka xona. Hambi swi ri tano, u titwe onge nuna wakwe a nga ha n’wi rhandzi, naswona u tikarhatela ngopfu vukhongeri bya yena ku tlula yena ni ndyangu wakwe. U hlamusele hi musa leswaku ku tirhisa leswi a a swi dyondza eBibeleni a swi n’wi pfuna ku hundzuka a va nuna ni tatana lonene. Eku heteleleni, nsati wakwe u tlangele rirhandzu ra yena ra ntiyiso wa Matsalwa naswona a pfumela ku dyondza Bibele. Sweswi u khoma dyondzo ya Bibele ni ndyangu wa yena. Naswona vona ntsako lowu a veke na wona hi ku va kona eNtsombanweni wa Muganga wa “Dyondzo Ya Xikwembu” lembe leri nga hundza! Nsati wakwe ni n’wana wakwe wa wanhwana a va ri kona, naswona va n’wi vone a khuvuriwa.

Vahlapfa Va Twa Risimu Lerintshwa

Magidi ya vahlapfa va Mahaiti va hlangana ni vanhu va Mabahama. Na vona va fanele ku twa risimu lerintshwa ra ntiyiso wa Mfumo. Timbhoni leti tshamaka le Bahamas ti tlangele ku fika ka mimpatswa mimbirhi ya Mahaiti ya le Amerika. Vanhu lava va pfune ku tiyisa mintlawa leyi ya ha ku simekiwaka ya Mahaiti eswihlaleni swa Grand Bahama na Abaco.

Leswaku ku endliwa mpfuno lowu engetelekeke wa Vahaiti lava tsakelaka rungula ra Mfumo, ntsombano wo sungula wa muganga wa ririmi ra Xicreole lowu nga si tshamaka wu khomiwa le Bahamas wu ve kona ku sukela hi July 31 ku ya ka August 1, 1993. Lava veke kona a va ri 214, naswona ku khuvuriwe vanhu vanharhu lava ha ku tinyiketelaka. Vunyingi bya Vahaiti lava dyondzeke ntiyiso le Bahamas ku sukela kwalaho va tlhelele exihlaleni xa ka vona kumbe va ya tshama kun’wana ku endlela ku tatisa Timbhoni ta kwalaho va yimbelelela Yehovha swidzuniso.

[Bokisi leri nga eka tluka 8]

XIVIKO XA TIKO

Lembe Ra Ntirho Ra 1993a

NHLONHLORHI YA LAVA NYIKELEKE VUMBHONI: 1 294

MPIMANYISO: Mbhoni yin’we eka vanhu va 197

LAVA VEKE KONA EXITSUNDZUXWENI: 3 794

AVHAREJI YA VAHUWELERI VA MAPHAYONA: 186

AVHAREJI YA TIDYONDZO TA BIBELE: 1 715

NHLAYO YA LAVA KHUVURIWEKE: 79

NHLAYO YA MAVANDLHA: 22

HOFISI YA RHAVI: NASSAU

[Nhlamuselo ya le hansi]

[Xifaniso lexi nga eka tluka 9]

Holo yo sungula ya Mfumo, ni hofisi ya rhavi kun’we ni kaya ra varhumiwa

[Xifaniso lexi nga eka tluka 9]

Timbhoni ti twarisa mahungu lamanene hi ku hiseka

[Xifaniso lexi nga eka tluka 9]

Milton G. Henschel na Nathan H. Knorr va ri ni varhumiwa le Nassau, kwalomu ka malembe ya 45 lama hundzeke

[Xifaniso lexi nga eka tluka 9]

Hofisi leyintshwa ya rhavi, leyi nyiketeriweke hi February 8, 1992