Xiviko Xa Vahuweleri Va Mfumo

Ntiyiso Wa Bibele Wu Hlanganisa Ndyangu

NAMUNTLHA, eswiphen’wini swo tala swa misava, vun’we bya ndyangu i nchumu wa nkarhi lowu hundzeke. Hambi swi ri tano, Bibele yi paluxa xihundla lexi lavekaka leswaku ku fikeleriwa vun’we bya ndyangu. Xiya marito ya Yesu lama nge: “Un’wana ni un’wana la yingisaka marito ya mina lawa, a va a famba ha wona, ú ta fana ni wanuna lowo tlhariha la akeke yindlu ya yena eribyeni.” (Matewu 7:24) Magidi ya mindyangu exikarhi ka Timbhoni ta Yehovha ma fikelele vun’we hi ku tirhisa marito lawa ni hi ku tirhisa Bibele tanihi masungulo yo aka ndyangu lowu hlanganeke swinene. Yin’wana na yona yi fikelela vun’we byo tano, hi laha ntokoto lowu landzelaka wu kombaka ha kona.

Loko Daniel a ha tirha evuthwini le Furwa, mufundhisi wa mavuthu u ringanyete leswaku Daniel a xava Bibele, kutani u yi xavile, naswona u sungule ku yi hlaya nkarhi na nkarhi. Hi ku famba ka nkarhi u cinceriwe eTahiti. Masocha lawa a ma tirha na Daniel a ma ri Masavata, man’wana ma ri Mamormon. Hi xitalo mabulo ya vona a ma talela emhakeni ya vukhongeri. Siku rin’wana murhangeri lonkulu wa mavuthu u tivise Daniel eka nsati wa yena, loyi a a ri un’wana wa Timbhoni ta Yehovha. U dzumbe ndzhenga hinkwawo a hlamula swivutiso swo tala swa Daniel naswona u n’wi hlanganise ni rin’wana ra mavandlha ya kwalaho ya Timbhoni ta Yehovha le Tahiti. Hi xihatla u sungule dyondzo ya Bibele ya nkarhi na nkarhi.

Vatswari va Daniel lava a va tshama le Furwa a va ri Makhatoliki lama hisekaka swinene. Tata wa yena a a ri mutsundzuxi exikolweni, naswona a ri mulanguteri wa dyondzo ya vukhongeri exikolweni xa Khatoliki. Hi ku rhandza ku avelana ni vatswari va yena hi swilo swa nkoka swa moya leswi a a swi dyondza, Daniel u sungule ku katsa timhakanyana ta Bibele emapapileni lawa a a va tsalela wona.

Eku sunguleni mana wa Daniel swi n’wi tsakisile, kambe u hlamarisiwe hi ku kuma vito leri nge Yehovha eka rin’wana ra mapapila ya n’wana wa yena. Endzhaku ka masikunyana, u twe nongonoko wa xiya-ni-moya lowu a wu hlamusela Timbhoni ta Yehovha tanihi “mpambukwa lowu nga ni khombo.” U tsalele Daniel a n’wi kombela ku hatla a dlaya vuxaka byakwe hinkwabyo na Timbhoni. Hambi swi ri tano, Daniel u ye emahlweni a endla nhluvuko eka dyondzo yakwe ya Bibele naswona hi xihatla u endle malunghiselelo yo tshika ntirho wa vusocha, a tlhelela eFurwa.

Loko a tlhelele ekaya, Daniel a a heta madyambu man’wana ni man’wana—nkarhi wun’wana ku fikela ni vusiku swinene—a bula nkarhi wo leha ni mana wa yena hi Bibele. Eku heteleleni u pfumele ku famba na Daniel eHolweni ya Mfumo. Loko a a ye ro sungula etidyondzweni, swi n’wi tsakisile swinene lerova a sungula ku va ni dyondzo ya yena n’wini ya Bibele nkarhi na nkarhi. U endle nhluvuko hi xihatla naswona u khuvuriwile endzhakunyana.

Tata wa Daniel a a ri munhu la twisisaka kambe a a tinyiketele ngopfu eka mintirho leyi a yi thwaseleke ni mintirho ya vukhongeri. Hambi swi ri tano, siku rin’wana u yise nsati wakwe na Daniel entsombanweni wa muganga. A ku ri July 14, naswona emianakanyweni a langutele ku vona ku tlangeriwa ka Siku ra ku wa ka khokholo ra Bastille edorobeni ra kwalaho. Loko a ha yimile u navele ku ya vona endzeni ka holo ya ntsombano. Ku hleleka ni ku rhula loku a ku voneke exikarhi ka vanhu va Yehovha swi n’wi tsakisile, naswona loko a ri karhi a hundza ekusuhi ni tindzawulo to hambana-hambana ta ntsombano, un’wana ni un’wana a a n’wi vita “makwerhu.” U rivale hinkwaswo hi ku tlangeriwa ka Siku ra Ku Wa ka Khokholo ra Bastille naswona u tshame ku kondza ku hela ntsombano. U kombele dyondzo ya Bibele naswona u endle nhluvuko hi xihatla eku dyondzeni ka ntiyiso. Kambe loko a ya a dyondza a a ya a titwa a nga ha tiphini hi ntirho wa yena, hikwalaho loko a ri ni malembe ya 58, u tshike ntirho lowu wa yena. Sweswi havanharhu endyangwini va tinyiketerile ni ku khuvuriwa naswona va tirhela Yehovha swin’we hi vun’we.

I ntiyiso wa Bibele lowu hlanganiseke ndyangu wa ka va Daniel. Wu nga hlanganisa ni mindyangu yin’wana loko yi wu dyondza ni ku wu tirhisa hi mbilu hinkwayo.