Xivangelo Xa Leswaku Timbhoni Ta Yehovha Ti Tshama Ti Hitekile

“Hitekani ke, hikuva a mi tivi siku leri Hosi ya n’wina yi nga ta ta ha rona.”—MATEWU 24:42.

1. Xana xitsundzuxo lexi nge “hitekani” xi tirha eka vamani?

EKA nandza un’wana ni un’wana wa Xikwembu—lontshwa kumbe lonkulu, loyi a ha ku tinyiketelaka kumbe loyi a nga ni malembe yo tala evutirhelini—xitsundzuxo lexi xa Bibele xa tirha: “Hitekani”! (Matewu 24:42) Ha yini leswi swi ri swa nkoka?

2, 3. (a) Hi xihi xikombiso lexi Yesu a xi hlamuseleke kahle, naswona xana ku hetiseka ka vuprofeta ku kombise yini? (b) Hi swihi swiyimo leswi Matewu 24:42 yi vulavulaka ha swona, leswi ringaka ku tiya ka ripfumelo ra hina, naswona njhani?

² Eku heleni ka vutirheli byakwe la misaveni, Yesu u vhumbhe xikombiso xa vukona byakwe ematimbeni ya Mfumo. (Matewu, tindzima 24 na 25) U hlamusele nkarhi wa vukona byakwe bya vuhosi—naswona swiendlakalo leswi hetisisaka vuprofeta swi kombisa leswaku u vekiwe ku va Hosi ematilweni hi 1914. U tlhele a kombetela eka xiyimo lexi enkarhini wolowo a xi ta ringa ku tiya ka ripfumelo ra hina. A a vulavula hi nkarhi lowu a a ta va Muavanyisi, a lovisa mafambiselo ya sweswi ya swilo eka nhlomulo lowukulu lowu Yesu a vuleke leswi ha wona: “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le matilweni, hambi a ri N’wana; swi tiviwa hi Tatana ntsena.” A a ri karhi a tsundzuka sweswo loko a ku: “Hitekani ke, hikuva a mi tivi siku leri Hosi ya n’wina yi nga tata ha rona.”—Matewu 24:36, 42.

³ Leswi hi nga ri tiviki siku ni nkarhi lowu nhlomulo lowukulu wu nga ta sungula ha wona, swi vula leswaku loko hi tivula Vakreste, hi fanele ku hanya tanihi Vakreste va ntiyiso siku rin’wana ni rin’wana. Xana ndlela leyi u hanyaka vutomi bya wena ha yona yi ta endla leswaku Hosi yi ku amukela loko nhlomulo lowukulu wu fika? Kumbe loko ku fika rifu ku sungula, xana yi ta ku tsundzuka tanihi munhu loyi a tirheleke Yehovha hi ku tshembeka ku fikela eku heleni ka vutomi bya wena bya sweswi?—Matewu 24:13; Nhlavutelo 2:10.

Vadyondzisiwa Vo Sungula Va Lwele Ku Tshama Va Hitekile

4. Xana hi nga dyondza yini eka xikombiso xa Yesu xa ku hiteka emoyeni?

⁴ Yesu Kreste hi byakwe u veke xikombiso lexinene ngopfu xa ku hiteka emoyeni. U khongele nkarhi na nkarhi ni hi matimba eka Tata wakwe. (Luka 6:12; 22:42-44) Loko a langutane ni miringo, a a titshege swinene hi nkongomiso wa Matsalwa. (Matewu 4:3-10; 26:52-54) A nga pfumelanga ku hambukisiwa entirhweni lowu Yehovha a n’wi aveleke wona. (Luka 4:40-44; Yohane 6:15) Xana vanhu lava a va tilanguta tanihi valandzeri va Yesu a va ta hiteka hi ndlela yoleyo?

5. (a) Ha yini vaapostola va Yesu va ve ni swiphiqo emhakeni ya ku tshama va tiyile emoyeni? (b) Hi wihi mpfuno lowu Yesu a wu nyikeke vaapostola vakwe endzhaku ka ku pfuka kakwe?

⁵ Minkarhi yin’wana, hambi vaapostola va Yesu a va tsekatseka. Hikwalaho ka ku hiseka ku tlurisa ni mianakanyo leyi hoxeke, va khomiwe hi tingana. (Luka 19:11; Mintirho 1:6) Va nga si dyondza ku tshembela eka Yehovha hi ku helela, miringo yo tano yi va pfilunganyile. Xisweswo, loko Yesu a khomiwa, vaapostola vakwe va balekile. Endzhakunyana, hi vusiku byebyo, Petro, hi ku chava, u landzule Kreste hi ku phindha-phindha a ku a nga n’wi tivi. Vaapostola a va nga si xi twisisa xitsundzuxo xa Yesu lexi nge: ‘Tshamani mi hitekile, mi khongela nkarhi hinkwawo.’ (Matewu 26:41, 55, 56, 69-75) Endzhaku ka ku pfuxiwa kakwe, Yesu u tiyise ripfumelo ra vona hi Matsalwa. (Luka 24:44-48) Naswona loko swi tikomba onge van’wana a va ta byi veka endzhaku vutirheli lebyi va rhwexiweke byona, Yesu u va tiyise nhlana leswaku va languta swilo leswi nga swa nkoka swinene.—Yohane 21:15-17.

6. Xana i mintlhamu yihi yimbirhi leyi Yesu a tsundzuxeke vadyondzisiwa vakwe leswaku va yi xiya?

⁶ Emahlweninyana, Yesu a a tsundzuxe vadyondzisiwa vakwe leswaku va nga vi xiphemu xa misava. (Yohane 15:19) Nakambe a a va layile leswaku va nga tshuki va tikiselana, kambe va fanele va tirhisana tanihi vamakwavo. (Matewu 20:25-27; 23:8-12) Xana va yi yingisile ndzayo leyi? Xana va wu veke emahlweni ntirho lowu a va nyikeke wona?

7, 8. (a) Xana rhekhodo leyi endliweke hi Vakreste va lembe xidzana ro sungula yi kombisa njhani leswaku va yingise xitsundzuxo xa Yesu? (b) Ha yini ku hiteka emoyeni swi ve swa nkoka?

⁷ Loko vaapostola va ha hanya, a va sirhelela vandlha. Matimu ma kombisa leswaku Vakreste vo sungula a va nga ngheni etimhakeni ta tipolitiki ta Mfumo wa Rhoma, naswona a va nga ri na yona mintlawa ya vafundhisi leyi tlakukeke. Hi hala tlhelo, a va ri vahuweleri va Mfumo wa Xikwembu lava chivirikaka. Eku heleni ka lembe xidzana ro sungula, se a va nyikele vumbhoni eMfun’weni hinkwawo wa Rhoma, va endla vadyondzisiwa eAsia, Yuropa ni le Afrika N’walungu.—Vakolosa 1:23.

⁸ Hambi swi ri tano, mintirho yoleyo entirhweni wo chumayela a yi nga vuli swona leswaku a ku nga ha ri na xilaveko xa ku tshama va hitekile emoyeni. Ku ta ka Yesu loku vhumbhiweke a ka ha ri ekule swinene. Naswona loko vandlha ri nghena eka lembe xidzana ra vumbirhi C.E., ku tlhekeke swiyimo leswi ngheniseke vumoya bya Vakreste ekhombyeni. Njhani?

Lava Tshikeke Ku Tshama Va Hitekile

9, 10. (a) Endzhaku ka ku fa ka vaapostola, hi swihi swiendlakalo leswi kombiseke leswaku vunyingi bya lava tivulaka Vakreste a va nga hitekanga? (b) I matsalwa wahi lama kombisiweke eka ndzima leyi lawa a ma ta va ma pfune Vakreste va tshama va tiyile emoyeni?

⁹ Van’wana lava ngheneke evandlheni va sungule ku phofula ripfumelo ra vona hi ku ya hi filosofi ya Magriki, ku endlela leswaku leswi va swi chumayelaka swi amukeleka eka vanhu va misava. Hakatsongo-tsongo, tidyondzo ta vuhedeni, tanihi Vunharhu-un’we ni ku nga fi ka moya-xiviri loku munhu a velekiweke na kona, swi ve xiphemu xa Vukreste lebyi thyakisiweke. Leswi swi vange ku cukumetiwa ka ntshembo wa mfumo wa gidi ra malembe. Hikwalaho ka yini? Lava amukeleke ripfumelo ra moya-xiviri lowu nga fiki va gimete hi leswaku ku fuma ka Kreste a ku ta kumiwa exivandleni xa moya hi moya-xiviri lowu nga ta hambeta wu hanya loko miri wa munhu wu file. Kutani va vone ku nga ri na xilaveko xa ku hitekela vukona bya Kreste ematimbeni ya Mfumo.—Ringanisa Vagalatiya 5:7-9; Vakolosa 2:8; 1 Vatesalonika 5:21.

¹⁰ Xiyimo lexi xi tiyisiwe hi swiendlakalo swin’wana. Van’wana lava a va tivula valanguteri va Vakreste va sungule ku tirhisa mavandlha ya vona tanihi ndlela yo kuma ndhuma. Va sungule ku languta mianakanyo ni tidyondzo ta vona tanihi leswi ringanaka ni Matsalwa kumbe ku tlula wona. Loko nkarhi wu pfuleka, kereke leyi ya vugwinehi yi tinyiketele emfun’weni wa tipolitiki ni ku wu tirhela.—Mintirho 20:30; 2 Petro 2:1, 3.

Vuyelo Bya Ku Hiteka Loku Engetelekeke

11, 12. Ha yini Vuhundzuluxi bya Maprotestente byi nga kombisanga ku vuya evugandzerini bya ntiyiso?

¹¹ Endzhaku ka malembe xidzana yo tala ya tihanyi ta Kereke ya Rhoma Khatoliki, Vahundzuluxi van’wana va vulavule hi xivindzi eka lembe xidzana ra vu-16. Kambe leswi a swi nga vuli ku vuya evugandzerini bya ntiyiso. Ha yini swi nga vanga tano?

¹² Hambi leswi mintlawa yo hambana-hambana ya Maprotestente yi chupuleke ematimbeni ya Rhoma, yi rhwale tidyondzo ni swiendlo leswikulu swa vugwinehi—mhaka ya ku va ni mufundhisi ni vanhu va kereke, ni ku pfumela eka Vunharhu-un’we, ku nga fi ka moya-xiviri ni ku xanisiwa hi laha ku nga heriki endzhaku ka rifu. Naswona, ku fana ni Kereke ya Rhoma Khatoliki, va hambete va va xiphemu xa misava, va hlangana ni minhlangano ya tipolitiki. Kutani va ale ku langutela kwihi na kwihi ka ku ta ka Kreste tanihi Hosi.

13. (a) I yini lexi kombisaka leswaku vanhu van’wana a va teka Rito ra Xikwembu ri ri ra risima? (b) Hi lembe xidzana ra vu-19, hi xihi xiendlakalo lexi tsakiseke van’wana lava tivulaka Vakreste? (c) Ha yini van’wana va hele matimba?

¹³ Kambe, Yesu a a vhumbhe leswaku endzhaku ka ku fa ka vaapostola, vadyandzhaka va ntiyiso va Mfumo (lava a va faniseke ni mavele) a va ta kula swin’we ni Vakreste va nomu ntsena (kumbe mfava) ku fikela enkarhini wa ntshovelo. (Matewu 13:29, 30) Namuntlha hi nga ka hi nga va longoloxi hi ku kongoma, lava N’wini a a va languta tanihi mavele. Kambe swi le rivaleni leswaku eka malembe xidzana ya vu-14, ya vu-15 ni ya vu-16, a ku ri ni vanhu lava peteke vutomi ni ntshunxeko wa wona ekhombyeni leswaku va hundzuluxela Bibele hi ririmi ra vanhu lava tolovelekeke. Van’wana va amukele Bibele tanihi Rito ra Xikwembu, va tlhela va ala Vunharhu-un’we tanihi lebyi nga riki kona ematsalweni. Van’wana va ale dyondzo ya ku nga fi ka moya-xiviri ni ku xanisiwa endzilweni wa tihele tanihi leswi nga twananiki nikatsongo ni Rito ra Xikwembu. Nakambe, eka lembe xidzana ra vu-19, hi ku dyondza Bibele hi laha ku engetelekeke, mintlawa ya le United States, Jarimani, Nghilandi ni le Russia yi sungule ku kombisa ntshembo wa leswaku nkarhi wa ku vuya ka Kreste a wu ri kusuhi. Kambe swo tala leswi a va swi languterile swi va hete matimba. Hikwalaho ka yini? Ngopfu-ngopfu a swi vangiwa hi leswi a va titshega ngopfu hi vanhu, kambe Matsalwa va nga ma tshembi kahle.

Ndlela Leyi A Va Xalamuke Ha Yona

14. Hlamusela ndlela yo dyondza Bibele leyi tirhisiweke hi C. T. Russell ni vanghana vakwe.

¹⁴ Kutani, hi 1870, Charles Taze Russell kun’we ni van’wana va vanghana vakwe va vumbe ntlawa wa dyondzo ya Bibele eAllegheny, Pennsylvania. A ku nga ri vona vo sungula ku twisisa ntiyiso wa Bibele lowu va wu kumeke, kambe loko va ri karhi va dyondza, a va swi endla mukhuva ku kambisisa matsalwa hinkwawo hi vukheta eka swivutiso leswi tlakusiweke.a Xikongomelo xa vona, a ku nga ri ku kuma tindzimana to seketela mianakanyo ya vona ya khale, kambe a va lava ku tiyisekisa leswaku va endla swiboho leswi fambisanaka ni swilo hinkwaswo leswi Bibele a yi swi vula emhakeni yo karhi.

15. (a) I yini leswi van’wana va swi xiyeke, handle ka Makwerhu Russell? (b) I yini lexi fungheke Swichudeni swa Bibele tanihi leswi hambaneke na vona?

¹⁵ Emahlweni ka vona, van’wana a va swi lemukile leswaku Kreste u ta vuya a nga vonaki tanihi moya. Van’wana a va swi xiyile leswaku xikongomelo xa ku vuya ka Kreste, a ku nga ri ku hisa misava ivi a kukula vanhu hinkwavo, kambe ematshan’weni ya sweswo, a ku ri ku ta katekisa mindyangu ya misava. A ku ri na van’wana va nga ri vangani lava xiyeke leswaku lembe ra 1914 a ri ta fungha ku hela ka Minkarhi ya Vamatiko. Kambe eka Swichudeni swa Bibele leswi hlanganyelaka na Makwerhu Russell, tinhla a ti nga ri ta bulo ra vukhongeri. A va hanya hi ku landza mintiyiso leyi, naswona va yi twarise emisaveni hinkwayo hi mpimo lowu a wu nga si tshama wu va kona eka nguva yoleyo.

16. Hi lembe ra 1914, ha yini Makwerhu Russell a tsarile a ku: “Hi le ka nguva ya ku ringiwa”?

¹⁶ Hambi swi ri tano, a va fanele va tshama va hitekile. Hikwalaho ka yini? Hi xikombiso, hambi leswi a va swi tiva leswaku 1914 a ri funghiwile hi vuprofeta bya Bibele, a va nga swi tivi leswaku kahle-kahle a ku ta endleka yini hi lembe rero. Leswi swi va tisele ndzingo. Eka Xihondzo xo Rindza xa Xinghezi xa November 1, 1914, Makwerhu Russell u tsarile: “A hi tsundzukeni leswaku hi le ka nguva ya ku ringiwa. . . . Loko ku ri ni xivangelo xo karhi lexi endlaka un’wana a hambana ni Hosi ni Ntiyiso wa Yona, ni ku tshika ku tikarhatela Ndlela ya Hosi, kutani ku rhandza ka Xikwembu loku nga embilwini a hi kona loku ku n’wi susumeteleke ku tsakela Hosi, kambe u susumetiwe hi swin’wana; kumbexana ntshembo wa leswaku nkarhi a wu komile; ku tinyiketela ka yena a ku ri ka nkarhi wo karhi ntsena.”

17. Xana A. H. Macmillan ni van’wana va ku hlayise njhani ku tiya emoyeni?

¹⁷ Van’wana va tshike ntirho wa Yehovha enkarhini wolowo. Kambe A. H. Macmillan yena a nga tshikanga. Endzhaku ka malembe yo tala, u pfumele hi ku tshembeka a ku: “Nkarhi wun’wana ku langutela ka hina ka nkarhi wo karhi a ku nga ri swona leswi Matsalwa a ma swi vula.” I yini lexi n’wi pfuneke ku tshama a tiyile emoyeni? Hi laha a vuleke ha kona, u lemukile leswaku “loko ku langutela koloko ku nga hetisekanga, sweswo a swi swi hundzulanga swikongomelo swa Xikwembu.” U engeterile: “Ndzi dyondze leswaku hi fanele ku amukela swihoxo swa hina kutani hi hambeta hi kambisisa Rito ra Xikwembu leswaku hi ta kuma ku voningeriwa kun’wana.”b Hi ku titsongahata, Swichudeni sweswo swa Bibele swo rhanga swi pfumelele Rito ra Xikwembu ri lulamisa langutelo ra swona.—2 Timotiya 3:16, 17.

18. Ku hiteka ka Vakreste ku ve ni vuyelo lebyi engetelekeke emhakeni ya ku nga vi wa misava hi ndlela yihi?

¹⁸ Emalembeni lama landzeleke, xilaveko xa leswaku va tshama va hitekile a xi hungutekanga. Kunene, a va swi tiva leswaku Vakreste a va nga fanelanga va va xiphemu xa misava. (Yohane 17:14; Yakobo 4:4) Hi ku pfumelelana ni sweswo, a va hlanganyelanga ni Vujagana eku seketeleni ka Ntwanano wa Matiko tanihi xitirho xa politiki xa Mfumo wa Xikwembu. Kambe mhaka ya vukala-tlhelo bya Vukreste va yi twisise kahle loko ku fika lembe ra 1939.—Vona Xihondzo xo Rindza xa Xinghezi xa November 1, 1939.

19. Hi byihi vuyelo bya vulanguteri bya vandlha lebyi tisiweke hi ku va nhlengeletano yi tshama yi hitekile?

¹⁹ A va nga ri na wona ntlawa wa vafundhisi, hambi leswi vakulu van’wana lava hlawuriweke a va anakanya leswaku ntirho wa vona a ku ri ku dyondzisa ntsena evandlheni. Hambi swi ri tano, hi ku tiyimisela ku fambisana ni Matsalwa, nhlengeletano yi kambisise xiphemu xa vakulu hi ku ya hi Matsalwa, yi swi endla nkarhi na nkarhi hi Xihondzo xo Rindza. Ku cinca ka ku hleriwa ka swilo a ku endliwa hi ku pfumelelana ni leswi Matsalwa a ma swi kombisa.

20-22. Xana nhlengeletano hinkwayo yi hambete njhani yi hlomiseriwa ku hetisisa ntirho lowu vhumbhiweke wa ku huwelela Mfumo emisaveni hinkwayo?

²⁰ Nhlengeletano hinkwayo a yi hlomiseriwa ku hetisisa ntirho lowu Rito ra Xikwembu ri vuleke leswaku wu ta endliwa enkarhini wa hina. (Esaya 61:1, 2) Xana mahungu lamanene a ma ta chumayeriwa ku fikela kwihi enkarhini wa hina? Yesu u te: “Evhangeli yi fanele ku rhanga yi twarisiwa ematikweni hinkwawo.” (Marka 13:10) Hi ku ya hi langutelo ra munhu, hakanyingi ntirho wolowo a wu tikomba wu nga ta koteka.

²¹ Kambe, hi ku tshembela eka Kreste tanihi Nhloko ya vandlha, ntlawa wa nandza lowo tshembeka, wa vutlharhi, wu ye emahlweni. (Matewu 24:45) Hi ku tshembeka ni hi matimba va kombe vanhu va Yehovha ntirho lowu faneleke wu endliwa. Ku sukela hi 1919 ku ya emahlweni, ku kandziyisiwe ngopfu vutirheli bya nsimu. Eka vo tala, a swi nga olovi ku famba hi yindlu na yindlu va vulavula ni vanhu van’wana. (Mintirho 20:20) Kambe swihloko leswi dyondziwaka swo tanihi lexi nge “Ku Katekile Lava Nga Chaviki” (hi 1919) ni lexi nge “Tiya U Va Ni Xivindzi” (hi 1921) swi pfune van’wana leswaku va sungula ntirho lowu, hi ku tshemba Yehovha.

²² Xirhambo xa 1922, lexi nge “twarisani, twarisani, twarisani Hosi ni mfumo wa yona” xi nyike xikhutazo lexi a xi laveka leswaku ntirho lowu wu vekiwa emahlweni hi laha ku faneleke. Ku sukela hi 1927 ku ya emahlweni, vakulu lava a va nga byi amukeli vutihlamuleri bya Matsalwa a va susiwa. Enkarhini wolowo, vayimeri va Sosayiti lava famba-fambaka, maphiligiremu, a va averiwe ku va vakongomisi va ntirho va swifundzha, va letela vahuweleri entirhweni wa nsimu. A hi hinkwavo lava a va kota ku phayona, kambe hi mahelo-vhiki vo tala a va tirha siku hinkwaro ensin’wini, va sungula ni mpundzu swinene, va wisanyana va dya swa ku miyeta nyoka, kutani va ya emahlweni ni ntirho ku kondza dyambu ri rhenga. Yoleyo a yi ri minkarhi ya nkoka ya ntirho wa swa le tilweni, naswona ha pfuneka swinene hi ku kambela ndlela leyi Yehovha a a kongomisa vanhu vakwe ha yona. U hambeta a endla sweswo. Hi mikateko ya yena, ntirho wo chumayela mahungu lamanene ya Mfumo lowu simekiweke wu ta fikelela makumu hi laha ku humelelaka.

Xana U Tshama U Hitekile?

23. Malunghana ni rirhandzu ra Vukreste ni ku hambana ni misava, xana hina hi nga swi kombisisa ku yini leswaku hi tshama hi hitekile?

²³ Hi ku landza nkongomiso wa Yehovha, nhlengeletano yakwe yi hambeta yi hi tsundzuxa leswaku hi tivonela eka swiendlo ni mavonelo, leswi swi nga hi endlaka xiphemu xa misava, kutani hi va ekhombyeni ra ku hundza na yona. (1 Yohane 2:17) Hikwalaho, hina hi fanele hi hiteka hi landzela nkongomiso wa Yehovha. Yehovha nakambe u hi letela malunghana ni mhaka ya ku tshamisana ni ku tirhisana swin’we. Nhlengeletano yakwe yi hi pfunile hi kula hi ku twisisa leswi rirhandzu ra Vukreste ri vulaka swona hakunene. (1 Petro 4:7, 8) Ku tshama hi hitekile swi lava leswaku hi lwela ku tirhisa ndzayo leyi, ku nga khathariseki leswi hi nga hetisekangiki.

24, 25. Hi tihi timhaka ta nkoka leti hi faneleke hi tshama hi hitekile eka tona, hi ri karhi hi langutele yini?

²⁴ Nkarhi hinkwawo, nandza lowo tshembeka, wa vutlharhi wa hi tsundzuxa: “Ṭhemba Yehova hi mbilu ya wena hikwayo, u nga tiṭhembi ku tlhariha ka wena.” (Swivuriso 3:5) “Mi nga tshiki ku khongela.” (1 Vatesalonika 5:17) Hi tsundzuxiwe leswaku hi dyondza ku endla swiboho swa hina hi ku landza Rito ra Xikwembu, hi endla rito leri ri va ‘rivoningo emilengeni ya hina ni ku vonakala endleleni ya hina.’ (Pisalema 119:105) Hi rirhandzu, hi khutaziwe leswaku evuton’wini bya hina hi rhangisa ku chumayela mahungu lamanene ya Mfumo wa Xikwembu, ku nga ntirho lowu Yesu a vhumbheke leswaku wu ta endliwa namuntlha.—Matewu 24:14.

²⁵ Kambe, nandza lowo tshembeka, wa vutlharhi u hitekile hakunene. Na hina hi fanele hi tshama hi hitekile. Hi ku endla tano, onge hi nga kumeka hi ri exikarhi ka lava amukeriwaka hi N’wana wa munhu loko a ta eku avanyiseni.—Matewu 24:30; Luka 21:34-36.

[Tinhlamuselo ta le hansi]

Mpfuxeto

◻ Hi laha swi kombisiweke ha kona eka Matewu 24:42, ha yini hi fanele hi tshama hi hitekile?

◻ Yesu ni valandzeri vakwe va lembe xidzana ro sungula va tshame njhani va hitekile emoyeni?

◻ Ku sukela hi 1870, hi swihi swiendlakalo leswi veke kona hikwalaho ka leswi malandza ya Yehovha ma tshameke ma hitekile?

◻ I yini lexi nga ta kombisa leswaku hi tshama hi hitekile?

[Swifaniso leswi nga eka tluka 23]

Yesu a a khomekile nkarhi hinkwawo hi ntirho lowu a averiweke hi Tata wakwe. U tlhele a khongela hi matimba

[Xifaniso lexi nga eka tluka 24]

Charles Taze Russell emalembeni yakwe yo hetelela

[Xifaniso lexi nga eka tluka 25]

Vahuweleri va Mfumo vo tlula 4 700 000 va gingiriteka emisaveni hinkwayo