Xana U Dyela eTafuleni Rihi?
“A swi endleki leswaku mi dya etafuleni ra Hosi ni le tafuleni ra mademona.”—1 VAKORINTO 10:21.
1. I matafula wahi lama vekiweke emahlweni ka hina, naswona muapostola Pawulo u nyikela xitsundzuxo xihi malunghana na wona?
MARITO lawa ma huhuteriweke ya muapostola Pawulo ma kombisa leswaku ku vekiwe matafula mambirhi yo fanekisela emahlweni ka vanhu. Tafula rin’wana ni rin’wana ri hlawulekisiwa hi muxaka wa swakudya swo fanekisela leswi vekiweke ehenhla ka rona, naswona hinkwerhu ka hina hi dya eka rin’wana ra wona. Hambi swi ri tano, loko hi rhandza ku tsakisa Xikwembu, hi nge dyi etafuleni ra xona, loko hi hala tlhelo hi pambulanyana etafuleni ra mademona. Muapostola Pawulo u tsundzuxile a ku: “Loko vamatiko va gandzela, va gandzela mademona, a va gandzeli Xikwembu. Kutani a ndzi lavi leswaku mi va ni vunakulobye ni mademona. A swi endleki leswaku mi nwela exinwelweni xa Hosi ni le xinwelweni xa mademona. A swi endleki leswaku mi dya etafuleni ra Hosi ni le tafuleni ra mademona.”—1 Vakorinto 10:20, 21.
2. (a) Hi rihi tafula ra Yehovha leri a ri ri kona emasikwini ya Israyele wa khale, naswona i vamani lava a va hlanganyela emagandzelweni ya xinakulobye? (b) Ku dya etafuleni ra Yehovha swi vula yini namuntlha?
2 Marito ya Pawulo ma hi tsundzuxa hi magandzelo ya xinakulobye lawa Vaisrayele va khale a va ma nyikela ehansi ka Nawu wa Yehovha. Altari ya Xikwembu a yi vuriwa tafula, naswona loyi a a tisa xifuwo leswaku xi ta nyikeriwa tanihi gandzelo a ku vuriwa leswaku u ni xinakulobye na Yehovha ni vaprista. Hi ndlela yihi ke? Xo sungula, Yehovha a a hlanganyela eka gandzelo leri hikuva a ku xuviwa ngati ehenhla ka altari ya yena, naswona a ku hisiwa mafurha hi malangavi lawa a ma huma eka yona. Xa vumbirhi, muprista a a hlanganyela hi leswi yena (ni ndyangu wakwe) a a dya xifuva lexi oxiweke ni nenge wa xinene wa xifuwo lexi nyikeriweke. Xa vunharhu, loyi a nyikeleke gandzelo a a hlanganyela hi ku dya nyama leyin’wana hinkwayo. (Levhitika 7:11-36) Namuntlha ku dya etafuleni ra Yehovha swi vula ku n’wi gandzela hi ndlela leyi a lavaka yona, hi laha swi kombisiweke ha kona hi Yesu ni vaapostola vakwe. Leswaku hi endla leswi, hi fanele hi dya swakudya swa moya leswi Yehovha a swi nyikelaka hi ku tirhisa Rito ni nhlengeletano yakwe. Vaisrayele, lava a va ri ni xinakulobye xo hlawuleka na Yehovha etafuleni rakwe, a va arisiwa ku nyikelela mademona magandzelo ematafuleni ya wona. Vaisrayele va moya ni vanghana va vona va “tinyimpfu tin’wana” na vona va arisiwa hi Xikwembu ku endla leswi fanaka.—Yohane 10:16.
3. Swi nga endlisa ku yini leswaku munhu a va ni nandzu wo dya etafuleni ra mademona esikwini ra hina?
3 Xana munhu a nga va ni nandzu wa ku dya etafuleni ra mademona hi ndlela yihi esikwini ra hina? Hi ku seketela xin’wana ni xin’wana lexi vengiwaka hi Yehovha. Tafula ra mademona ri katsa mavunwa hinkwawo ya mademona, lama kunguhateriweke ku hi kanganyisa ni ku hi endla hi fularhela Yehovha. Xana i mani loyi a lavaka ku tata mbilu ni mianakanyo yakwe hi chefu yo tano? Vakreste va ntiyiso va ala ku hlanganyela emagandzelweni lawa vanhu vo tala namuntlha va ma nyikelaka swikwembu swa nyimpi ni swa rifuwo.—Matewu 6:24.
Ku Papalata ‘Tafula Ra Mademona’
4. Hi xihi xivutiso lexi hinkwerhu hi langutaneke na xona, naswona ha yini hi nga swi lavi ku dya etafuleni ra mademona hi nga swi lemuki?
4 Xivutiso lexi hinkwerhu hi langutaneke na xona xi ri, Xana ndzi dya etafuleni rihi? Hi nge wu balekeli ntiyiso wa leswaku hi boheka ku dya etafuleni ro karhi. (Ringanisa Matewu 12:30.) A hi swi lavi ku tikuma hi dya etafuleni ra mademona hi nga swi lemuki. Ku endla tano swi nga hi vangela ku lahlekeriwa hi musa wa Xikwembu xa ntiyiso ni lexi hanyaka, ku nga Yehovha. Hi hala tlhelo, ku dya etafuleni ra Yehovha ntsena swi hi yisa evuton’wini lebyi nga heriki lebyi tsakisaka! (Yohane 17:3) Ku ni xiga lexi nge munhu u hanya hi leswi a dyaka swona. Kutani un’wana ni un’wana loyi a lavaka ku tshama a hanye kahle emirini ni le mianakanyweni u fanele ku tivonela eka leswi a swi dyaka. Tanihi leswi swakudya leswi nga akiki miri swo tala mafurha swi nga hi pfuniki ku hlayisa rihanyo hambi loko swi cheriwe swinyunyuteri swo nandzihisa, ni vunwa bya misava leyi lebyi fambisanaka ni mianakanyo ya mademona i swakudya leswi nga pfuniki nchumu leswi nga ta onha miehleketo ya hina.
5. Hi nga swi papalata njhani ku amukela tidyondzo ta mademona namuntlha?
5 Muapostola Pawulo u vhumbhe leswaku emasikwini ya makumu, vanhu a va ta hambukisiwa hi “tidyondzo ta mademona.” (1 Timotiya 4:1) Tidyondzo to tano ta mademona a ti kumeki evupfumerini bya vukhongeri bya mavunwa ntsena, kambe ti hangalasiwa swinene ni hi tindlela tin’wana. Hi xikombiso, hi fanele hi kambisisa tibuku ni timagazini leti hi rhandzaka ku ti hlaya hina ni vana verhu, minongonoko ya thelevhixini leyi hi yi langutaka, ni mintlango ni tibayiskopo leti hi ti hlalelaka. (Swivuriso 14:15) Loko hi hungasa hi ku hlaya ntsheketo, xana ntsheketo wa kona wu hlamusela madzolonga ya vukarhi, rimbewu leri nga riki enawini kumbe swiendlo swa vungoma? Loko hi hlaya mhaka leyi nga riki ntsheketo leswaku hi kuma dyondzo yo karhi, xana mhaka ya kona yi hlamusela filosofi kumbe mahanyelo ‘lama nga fambelaniki na Kreste’? (Vakolosa 2:8) Xana mhaka ya kona yi lo mbamberiwa ntsena, kumbe yi seketela mintlawa ya misava ya ntshamisano? Xana yi khutaza ku tikarhatela ku va ni rifuwo lerikulu? (1 Timotiya 6:9) Xana i buku leyi dyondzisaka tidyondzo ta ku avana leti nga fambelaniki na Kreste, yi swi dyondzisa hi ndlela leyi tumbeleke? Loko nhlamulo ku ri ina, kambe hi hambeta hi hlaya kumbe ku hlalela swilo swo tano, hi le khombyeni ra ku dya etafuleni ra mademona. Namuntlha, ku ni madzana ya magidi ya tibuku leti tlakusaka tifilosofi ta misava leti vonakaka ti pfuna swinene ni ku va enkarhini. (Eklesiasta 12:12) Kambe vunwa lebyi hinkwabyo entiyisweni a hi byintshwa; naswona a byi pfuni nchumu, tanihi leswi vunwa lebyi Sathana a byi byeleke Evha hi mano byi nga n’wi pfunangiki nchumu.—2 Vakorinto 11:3.
6. Loko Sathana a hi hlohlotela ku ringa swakudya swakwe swa vudemona leswi nga akiki emirini, hina hi fanele hi angula njhani hi ku kongoma?
6 Hikwalaho, loko Sathana a hi kucetela ku ringa swakudya swa yena swa vudemona leswi nga pfuniki nchumu, xana hi fanele hi angurisa ku yini? Hi fanele hi angula hi laha Yesu a anguleke ha kona loko a ringiwa hi Sathana leswaku a hundzula maribye a ma endla vuswa. Yesu u hlamule a ku: “Ku tsariwile leswi: ‘Munhu a nga ka a nga hanyi hi vuswa ntsena, kambe ú ta hanya hi marito hinkwawo lama humaka enon’weni wa Xikwembu.’” Naswona loko Diyavulosi a tshembise ku nyika Yesu “mimfumo hinkwayo ya misava ni ku dzuneka ka yona” loko a nkhinsamela Sathana a n’wi gandzela, Yesu u te: “Suka Sathana, hikuva ku tsariwile leswi: ‘U ta gandzela Hosi, Xikwembu xa wena, u tirhela xona ntsena.’”—Matewu 4:3, 4, 8-10.
7. Ha yini hi tixisa loko hi anakanya leswaku hi nga dya etafuleni ra Yehovha ni le tafuleni ra mademona kambe swi hi fambela kahle?
7 Tafula ra Yehovha ni tafula leri lunghiseleriweke hi valala vakwe va mademona ma nga ka ma nga fambisani! Kavula swi tshama swi ringetiwa! Tsundzuka Vaisrayele va khale emasikwini ya muprofeta Eliya. Vanhu a va vula leswaku va gandzela Yehovha, kambe a va kholwa leswaku swikwembu swin’wana, tanihi Bali, a swi tikomba swi ta va nyika rifuwo. Eliya u ye emahlweni ka vanhu a ku: “Mi ta khuta hi milenge mimbiri ku yisa kwihi šana? Loko Yehova ši ri Šikwembu [xa ntiyiso, NW], ṅwi lanḍeni; kambe loko Baal ši ri Šikwembu, ṅwi lanḍeni!” Entiyisweni Vaisrayele a va “khuta hi milenge mimbiri.” (1 Tihosi 18:21) Eliya u ntlhontlhe vaprista va Bali leswaku va kombisa vukwembu bya xikwembu xa vona. Xikwembu lexi a xi ta xikisa ndzilo hi le tilweni wu hisa gandzelo a xi ta va xona Xikwembu xa ntiyiso. Hambi va tikarhate swinene, vaprista va Bali va hlulekile. Kutani Eliya u khongerile a ku: “Yehova, nḍi hlamule! Tiko leri ri ta tiv̌a leŝaku wena Yehova u Šikwembu [xa ntiyiso, NW].” Xikan’we-kan’we ndzilo lowu humaka eka Yehovha wu xikile hi le tilweni wu hisa gandzelo ra xifuwo leri nga cheleteriwa mati. Hi ku susumetiwa hi xikombiso lexi nga erivaleni xa vukwembu bya Yehovha, vanhu va yingise Eliya, kutani va dlaya vaprofeta hinkwavo va Bali lava a va ri 450. (1 Tihosi 18:24-40) Swi tano ni namuntlha, hi fanele hi xiya Yehovha tanihi Xikwembu xa ntiyiso, ivi hi ya dya etafuleni ra yena ntsena, loko hi nga si sungula ku endla tano.
“Nandza La Tshembekaka” U Lunghiselela Swakudya eTafuleni Ra Yehovha
8. Hi wihi nandza loyi Yesu a vhumbheke leswaku a a ta n’wi tirhisa ku phamela vadyondzisiwa vakwe swakudya swa moya hi nkarhi wa vukona byakwe, naswona nandza loyi i mani?
8 Hosi Yesu Kreste u vhumbhe leswaku hi nkarhi wa vukona bya yena “nandza la tshembekaka, wo tlhariha” a a ta phamela vadyondzisiwa vakwe swakudya: “Ku katekile nandza loyi a nga ta kumiwa a ri karhi a endlisa sweswo, siku n’wini wa yena a vuyaka. Ndzi tiyisile ndzi ri ka n’wina, ú ta vekiwa ku va mulanguteri wa rifuwo hinkwaro ra n’wini wa yena.” (Matewu 24:45-47) Nandza loyi u kumeke a ri ntlawa wa Vakreste lava totiweke, lava tinyiketeleke, hayi munhu un’we ntsena. Ntlawa lowu wu veke swakudya leswinene swa moya etafuleni ra Yehovha leswaku swi dyiwa hi masalela lama totiweke na hi “ntshungu lowukulu.” Ntshungu lowukulu, lowu sweswi wu tlulaka mune wa timiliyoni wu khomisana ni masalela lama totiweke eku seketeleni ka vuhosi bya vuako hinkwabyo bya Yehovha Xikwembu ni Mfumo wa yena lowu a nga ta kwetsimisa vito rakwe ha wona.—Nhlavutelo 7:9-17.
9. Ntlawa wa nandza a wu ri karhi wu tirhisa yini ku phamela Timbhoni ta Yehovha swakudya swa moya, naswona nkhuvo wa vona wa swakudya swa moya wu hlamuseriwa njhani hi vuprofeta?
9 Ntlawa lowu wa nandza lowo tshembeka a wu ri karhi wu tirhisa Watch Tower Bible and Tract Society ku phamela Timbhoni hinkwato ta Yehovha swakudya swa moya. Vanhu va Yehovha va dya va xurha, kasi Vujagana ni mafambiselo lawa hinkwawo ya swilo bya fa hi ndlala, tanihi leswi byi pfumalaka swakudya swa moya leswi hanyisaka. (Amosi 8:11) Loku i ku hetiseka ka vuprofeta bya Esaya 25:6, leyi nge: “Yehova wa tinyimpi o ta lungisela matiko hikwawo e nṭhav̌eni leyi, e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, le’ti kumiwaka henhla ka šisese; ti ri tinyama le’ti noneke, le’ti teleke, ni mafura, ni tivinyo ta khale le’ti tengisiweke.” Hi laha tindzimana 7 na 8 ti kombisaka ha kona, nkhuvo lowu wa swakudya wu ta ya emahlweni hi laha ku nga heriki. I nkateko lowukulu swonghasi eka hinkwavo lava nga enhlengeletanweni leyi vonakaka ya Yehovha sweswi, naswona wu ta hambeta wu va nkateko lowukulu swonghasi ni le nkarhini lowu taka!
Tivonele Eka Swakudya Swa Tafula Ra Mademona Leswi Nga Ni Chefu
10. (a) I swakudya swa muxaka muni leswi nyikeriwaka hi ntlawa wa nandza wo homboloka, naswona hi xihi xikongomelo xa wona? (b) Ntlawa wa nandza wo homboloka wu ma khoma njhani khale ka malandza-kulobye?
10 Swakudya swa tafula ra mademona swi ni chefu. Hi xikombiso, xiya swakudya leswi phameriwaka hi ntlawa wa nandza wo homboloka ni vagwinehi. A swi xurhisi naswona a swi aki; a swi tenganga. A swi nge vi leswi tengeke, hikuva vagwinehi va tshike ku dya etafuleni ra Yehovha. Hikwalaho, xin’wana ni xin’wana lexi va xi kumeke hi ku va ni vumunhu lebyintshwa xi nyamalarile. A va susumetiwi hi moya lowo kwetsima, kambe hi rivengo lerikulu. Va ni xikongomelo xin’we ntsena—ku ba khale ka malandza-kulobye, hi laha Yesu a vhumbheke ha kona.—Matewu 24:48, 49.
11. C. T. Russell u tsale yini malunghana ni ku tihlawulela ka munhu ka swakudya swa moya, naswona u va hlamusele njhani lava fularheleke tafula ra Yehovha?
11 Hi xikombiso, le ndzhaku hi 1909, muungameri wa nkarhi wolowo wa Sosayiti ya Watch Tower, C. T. Russell, u tsale malunghana ni lava va fularheleke tafula ra Yehovha ivi va sungula ku xanisa khale ka malandza-kulobye. The Watch Tower ya October 1, 1909, yi te: “Hinkwavo lava tihambanisaka na Sosayiti ni mintirho ya yona, lava ematshan’wini ya ku tiaka kumbe ku aka van’wana eripfumelweni ni ku hlakulela mihandzu ya moya, va vonakaka va endla leswi hambaneke ni sweswo—va ringeta ku onha Ndlela leyi a va famba ha yona eku sunguleni, naswona handle ko swi xiya, va khomiwa hi vurhongo hakatsongo-tsongo, va tivavisa va vavisa ni van’wana lava a va ri ni moya lowu fanaka wa ku phikizana. . . . Loko van’wana va ehleketa leswaku va nga kuma swakudya leswinene kumbe swo antswa ematafuleni man’wana, kumbe va nga tilunghiselela swakudya leswinene kumbe swo antswa—a va endle ku rhandza ka vona. . . . Kambe hambi leswi hi tshikaka un’wana ni un’wana a tiyela laha a rhandzaka kona leswaku a ya kuma swakudya na ku vonakala loku nga ta n’wi enerisa, swa hlamarisa leswi lava va vaka valala va hina va tekaka ndlela leyi hambanaka swinene. Ematshan’wini yo tiya nhlana va ku, ‘Se ndzi kume leswi ndzi rhandzaka swona; salani kahle!’ va kombisa vukarhi, mona, rivengo, madzolonga, ‘ku nga mintirho ya nyama ni ya diyavulosi’ hi ndlela leyi nga si tshamaka yi voniwa eka vanhu va misava. Va vonaka va ngheniwe hi rihuhu, rihuhu-mbyana ra Sathana. Van’wana va vona va hi hlasela, ivi va hi lumbeta va ku hi hina hi nga va hlasela. Va tiyimisele ku vula ni ku tsala mavunwa lamakulu ni ku tiyimisela ku endla swilo swa hava.”
12. (a) Vagwinehi va ma ba njhani malandza-kulobye? (b) Ha yini swi ri ni khombo ku hlaya matsalwa ya vagwinehi leswaku hi enerisa torha ra hina ra vutivi?
12 Ina, vagwinehi va humesa tibuku leti soholotaka timhaka, ti vula mintiyiso leyi nga helelangiki ni ku vula vunwa lebyi kongomeke. Va tlhela va kombisa ku vilela emintsombanweni ya Timbhoni, va ringeta ku phasa lava nga lemukiki nchumu. Hikwalaho, swi nga va ni khombo ku pfumelela torha ra hina ra vutivi ri hi susumetela ku hlaya tibuku to tano kumbe ku yingisela marito ya vona lama nga akiki! Hambi loko hi nga ha vona onge hina a hi nge phasiwi, khombo rona ra ha ri kona. Ha yini? Phela tibuku tin’wana ta vagwinehi ti vulavula mavunwa hi ku “nandzihisa marito” ni hi ‘marito ya vuxisi.’ (Varhoma 16:17, 18; 2 Petro 2:3) Xana a hi swona leswi a wu ta swi langutela etafuleni ra mademona? Naswona hambi leswi vagwinehi va nga ha vulaka mintiyiso etimhakeni tin’wana, hakanyingi va yi soholota hi xikongomelo xo kucetela van’wana leswaku va fularhela tafula ra Yehovha. Matsalwa ya vona hinkwawo kahle-kahle i yo xopaxopa swihoxo ni ku hohlosa! Ku hava lexi ma akaka ha xona.
13, 14. Hi yini mihandzu ya vagwinehi ni vunwa bya vona?
13 Yesu u te: “Mi ta va tiva hi [mihandzu, NW] ya vona.” (Matewu 7:16) Kutani hi yihi mihandzu ya vagwinehi na tibuku ta vona? Vunwa bya vona byi funghiwa hi swilo swa mune. (1) Mano. Vaefesa 4:14 yi ri hi lava “kanganyisaka van’wana ni ku va hambukisa hi mano ya vona.” (2) Vutlharhi byo tinyungubyisa. (3) Ku pfumala rirhandzu. (4) Ku pfumala ku tshembeka hi tindlela to hambana-hambana. Hi swona leswi tirhisiweke ku sweka swakudya leswi nga etafuleni ra mademona, leswi hinkwaswo swi kunguhateriweke ku tsanisa ripfumelo ra vanhu va Yehovha.
14 Ku ni mhaka yin’wana nakambe. Xana vagwinehi va tlhelele kwihi? Hi ntolovelo va tlhelela emunyameni wa Vujagana ni tidyondzo ta byona, tanihi dyondzo ya leswaku Vakreste hinkwavo va ya etilweni. Tlhandla-kambirhi, vo tala va sungula ku honisa xiyimo lexi tiyeke xa Matsalwa malunghana ni ngati, vukala-tlhelo ni xilaveko xo nyikela vumbhoni hi Mfumo wa Xikwembu. Kambe hina hi balekele munyama wa Babilona Lonkulu, naswona a hi swi lavi ku tlhelela eka wona. (Nhlavutelo 18:2, 4) Tanihi malandza ya Yehovha lama tshembekaka, ha yini hi lava ku kambisisa vunwa bya vanhu lava va fularheleke tafula ra Yehovha, lava sweswi va rhukanaka lava va hi pfunaka ku amukela ‘marito lama hanyisaka’?—2 Timotiya 1:13.
15. Hi wihi nsinya wa nawu wa Bibele lowu hi pfunaka ku teka ndlela ya vutlharhi loko hi twa hi ta swihehlo leswi vagwinehi va swi endlaka?
15 Van’wana va nga ha lava vuxokoxoko hi swihehlo leswi endliwaka hi vagwinehi. Kambe hi fanele ku amukela nsinya wa nawu lowu nga eka Deteronoma 12:30, 31. Laha Yehovha u tsundzuxe Vaisrayele hi ku tirhisa Muxe ehenhleni ka leswi a va fanele ku swi papalata loko va hlongole vaaki va vahedeni va Tiko leri Tshembisiweke. “Tšhav̌a ku phasiwa e ntlhaṅwini hi ku lanḍa mitila ya wona (loko kutani ma herisiwile mahlweni ka wena) ni ku lav̌a ŝikwembu ŝa wona, hi laha u nga ta ku: Šana matiko lawa ma tirelisa ku yini ŝikwembu ŝa wona šana? Nḍi ta endla kukotisa wona, na mina. U nga ṭhuki u endlela Yehova, Šikwembu ša wena hi ŝeŝo.” Ina, Yehovha Xikwembu wa swi tiva leswaku ri njhani torha ra vanhu ra ku tiva. Tsundzuka Evha na nsati wa Lota! (Luka 17:32; 1 Timotiya 2:14) Hi nga tshuki hi yingisa leswi vuriwaka kumbe ku endliwa hi vagwinehi. Ku ri na sweswo, a hi tinyiketeleni ku aka vanhu ni ku dya etafuleni ra Yehovha hi ku tshembeka!
I Tafula Ra Yehovha Ntsena Leri Nga Ta Tshama Hi Masiku
16. (a) Ku nga ri khale ku ta humelela yini hi Sathana, mademona yakwe ni tafula ro fanekisela leri matiko ya misava ma dyaka eka rona? (b) Ku ta humelela yini hi vanhu hinkwavo lava hambetaka va dya etafuleni ra mademona?
16 Ku nga ri khale, nhlomulo lowukulu wu ta fika wu nga languteriwanga, wu hatlisa wu chaputa hi ‘nyimpi ya siku lerikulu ra Xikwembu xa Matimba Hinkwawo.’ (Nhlavutelo 16:14, 16) Wu ta chaputa loko Yehovha a lovisa mafambiselo lawa ya swilo ni tafula ro fanekisela leri matiko ya misava a ma dya eka rona. Yehovha u ta tlhela a herisa nhlengeletano hinkwayo leyi nga vonakiki ya Sathana Diyavulosi ni mavandla ya yona ya mademona. Lava va hambeteke va dya etafuleni ra moya ra Sathana, ku nga tafula ra mademona, va ta boheka ku va kona etafuleni ra swakudya swa xiviri, ku nga ri leswaku va ta eku dyeni, kambe hi vona va nga ta hundzuka swakudya swo hlawuleka—ku ya eku lovisiweni ka vona!—Vona Ezekiyele 39:4; Nhlavutelo 19:17, 18.
17. I mikateko yihi leyi kumiwaka hi lava va dyaka etafuleni ra Yehovha ntsena?
17 I tafula ra Yehovha ntsena leri nga ta tshama hi masiku. Lava va dyaka eka rona hi ku tlangela va ta hlayiseka naswona va ta va ni lunghelo ro dya kona hi laha ku nga heriki. A va nge he chavisiwi hi ku kayivela kwihi na kwihi ka swakudya. (Pisalema 67:6; 72:16) Va ta tirhela Yehovha Xikwembu eParadeyisini va ri ni rihanyo leri hetisekeke! Eku heteleleni marito lama nyanyulaka ya Nhlavutelo 21:4 ma ta hetiseka hi ndlela leyi xiyekaka: “Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.” Tanihi leswi ku nga ta va ku nga ha ri na swihinga, vuhosi bya Yehovha Xikwembu byi ta va kona evuakweni hinkwabyo hi laha ku nga heriki, loko tintswalo leti nga heriki ta Xikwembu ti chululeriwa vanhu lava kutsuriweke lava akeke emisaveni ya Paradeyisi. Leswaku hi kuma hakelo leyi, hinkwerhu ka hina a hi tiyimiseleni ku dya etafuleni ra Yehovha ntsena, leri taleke hi swakudya leswi fuweke swa moya!
A Wu Ta Hlamurisa Ku Yini Ke?
◻ Hi nga swi papalatisa ku yini ku kanganyisiwa hi tidyondzo ta mademona?
◻ Ha yini hi ta ka hi nga swi koti ku dya etafuleni ra Yehovha ni ra mademona kambe swi hi fambela kahle?
◻ I swakudya swa muxaka muni leswi phameriwaka hi vagwinehi?
◻ Ha yini swi ri ni khombo ku lava ku tiva hi ta swihehlo swa vagwinehi?
◻ Hi yihi mihandzu ya vagwinehi?
[Xifaniso lexi nga eka tluka 10]
Tafula ra Yehovha ri tele hi swakudya leswi fuweke swa moya