Ku Tirha Ni Nhlengeletano Leyi Hluvukaka Swinene

HI KU VULA KA ROBERT HATZFELD

Namutlha vanhu vo tala swinene va pfulela thelevhixini hi ku tshikilela kunupu va ri ekule leswaku va hlalela mahungu ya ni madyambu eka thelevhixini leyi kombisaka hi mivala hinkwayo, va nga swi languti tanihi xihlamariso. Kambe, swi tikomba onge a ko va tolo ntsena loko ndza ha ri mufana wa malembe ya 12 hi vukhale ndzi honole mahlo ndzi languta bayiskopo leyi a yi kombisa xifaniso lexikulu swinene xa wanuna loyi a a ri karhi a vulavula!

U NGA ha anakanya leswaku a hi mahungu ya nkoka. Kambe entiyisweni eka mina a swi languteka swi fana ni masingita ya manguva lawa le ndzhaku hi 1915, emasikwini yo sungula ya bayiskopo ya swifaniso swo basa ni swa ntima leswi a swi nga vulavuli. Ku humelele wanuna la chavisekaka wa malebvu ivi a ku: “Photo-Drama of Creation yi nyikeriwa hi I.B.S.A., International Bible Students Association.” Ku ringana tiawara timbiri leti landzeleke hi kombiwe xitori xa Bibele. Rungula ra xona ra Matsalwa a ri twisiseka ni ku phyuphyisa. Kambe, a ku ri bayiskopo leyi nga ni swifaniso leswi tshuka-tshukaka, leyi hlanganisiweke ni ti-slide ta mivala ni rungula leri fambisanaka ni xifaniso leri kokeke nyingiso wa mina hakunene.

A ndzi nga swi tekeli enhlokweni hi nkarhi wolowo, kambe ku hisekela ka mina vutshila byebyo byo hlawuleka loko ndza ha ri muntshwa a ku ri masungulo ya ntirho-vutomi wa mina eka nhlengeletano leyi hluvukaka swinene emisaveni.

Masiku Yo Sungula

Hi 1891 tata wa mina u suke le Dillenburg, eJarimani, a ya laha ku tshamaka Majarimani, eAllegheny, Pennsylvania, U.S.A. Endzhaku u hlangane ni wanhwana kwalaho, endyangwini wa Majarimani, naswona va tekanile. Ndzi tswariwe hi July 7, 1903, naswona ndzi kurisiwe ndzi ri karhi ndzi vulavula Xijarimani na Xinghezi. Ku nga si sungula Nyimpi yo Sungula ya Misava hi 1914, ntungu wa rifuva wu dlaye vatswari va mina ivi ndzi sala ndzi ri xisiwana. Kokwana wa xinuna u dlawe hi vuvabyi byo oma rihlanguti hi nkarhinyana wolowo.

Hahani Minna Boemer, hi tintswalo u ndzi yise endyangwini wa yena. U te: “Ndzi ni ntlhanu wa vana. Ndzi nga ha va na un’wana kambe.” Hambi leswi a ndzi kumbuka vatswari va mina, Hahani Minna u ndzi khome kahle.

Hahani a ku ri khale a ri xirho xa Vandlha ra Allegheny ra Swichudeni swa Bibele (hi laha Timbhoni ta Yehovha a ti tiviwa ha kona emasikwini wolawo). Emahlweni ka 1909, Makwerhu C. T. Russell, loyi a a ri muungameri wa Sosayiti ya Watch Tower hi nkarhi wolowo, a a hlanganyela na vandlha rero na yena. Hahani Minna a a famba na mina eminhlanganweni. Hambi leswi ndyangu wa ka hina a wu nga khomisani kahle eku chivirikeleni ka ku dyondza kumbe ku chumayela hi nkarhi wolowo, hinkwaswo leswi a hi swi twa eminhlanganweni hi swi rungulele ni vanhu lava a hi va tiva, hi xitshuketa.

A ku ri nkarhi lowu laha “Photo-Drama” yi ndzi hlamariseke swinene. Tanihi leswi a ndzi navela ku lunghisa michini, maendlelo lamantshwa yo lunghiselela swifaniso leswi fambisanaka ni mpfumawulo ma ndzi tsakisile swinene, hi laha a swi ri ha kona hi swifaniso leswi hatlisisiwaka. Ku hlalela ku pfuleka ka swiluva a swi nyanyula!

Hi 1916 hi tsemiwe nhlana hi rifu ra Makwerhu Russell. Tanihi leswi a hi tshama le Allegheny, hi ve kona enkosini wakwe eHolweni ya Carnegie. Leyi a ku ri holo leyi Makwerhu Russell a phikizaneke na E. L. Eaton eka yona hi 1903. Ndzi twile timhaka ta mufundhisi loyi wa Kereke ya Methodist Episcopal loyi a tlhontlheke C. T. Russell leswaku va ya phikizana masiku ya tsevu hi ku tshemba leswaku u ta onha dyondzo ya Bibele ya Makwerhu Russell. Ematshan’wini ya sweswo, ku vuriwe leswaku Russell ‘u teke phayiphi ya mati a tima tihele.’ Sara Kaelin, mukhalipotiya la tivekaka le Pittsburgh, a a va tiva swinene va ka Russell. Enkosini u vone Maria Russell a veka swiluva endzeni ka bokisi ku ri ni marito lama nge, “Eka Nuna Wanga La Rhandzekaka.” Hambi leswi a a hambane na yena malembenyana eku sunguleni, Maria a ha n’wi tiva a ri nuna wakwe.

Loko malembe ma ri karhi ma hundza, ndzi ve ni malunghelo yo tala yo dyondza vutshila lebyi a ndzi ta byi tirhisela ntirho-vutomi wa nkarhi lowu taka. Malume wa mina loyi a a ri muhlayisi wa mina, a ri muaki. Hi nkarhi wa ku wisa ka mina exikolweni, u ndzi pfumelele ku tirha ni vatirhi vakwe va gezi hi cinca gasi etindlwini letikulu ta khale hi nghenisa gezi. Hi 1918, swichudeni exikolweni xa hina swi ake muchini lowu nga nyawuriki wo rhumela marungula hi xiya-ni-moya. A hi hlangana ni madyambu leswaku hi dyondza ni ku endla minkambisiso ya gezi na xikoka-nsimbhi ehandle. Hi 1926, mina ni nakulorhi hi kunguhate ku hetisisa norho wa vuhlangi—ku tirha eswikepeni ni ku rhendzeleka ni misava. Hi tsarise exikolweni xa Nhlangano wa Xiya-ni-moya wa le Amerika leswaku hi tirha ku rhumela marungula hi xiya-ni-moya.

Vutomi Lebyintshwa eBethele

Xikolo xa xiya-ni-moya lexi hi ngheneke eka xona a xi ri eDorobeni ra New York, kutani a ndzi tsemakanya nambu ndzi ya eBrooklyn eminhlanganweni ya Swichudeni swa Bibele, leyi a yi khomeriwa eholweni leyi hirhiweke ya Tempele ya khale ya Vamason. Enkarhini wolowo, a ko va ni vandlha rin’we ntsena edorobeni hinkwaro ra le New York. Loko vamakwerhu va le Bethele (kaya ra yindlu-nkulu ra ndyangu wa Swichudeni swa Bibele) va tive leswaku a ndzi dyondzela ku kuma mpfumelelo wo tirhisa xiya-ni-moya, va te: “Ha yini u ya elwandle? Hi na xitichi xa xiya-ni-moya laha naswona xi lava mufambisi.” Va ndzi kombele leswaku ndzi ya ehofisini leswaku hi ya burisana. A ndzi nga tivi nchumu hi Bethele handle ka leswaku i yindlu-nkulu ya Swichudeni swa Bibele.

Vamakwerhu va burisane na mina, kutani va ndzi khutaza leswaku ndzi heta xikolo, ndzi kuma phepha ra mpfumelelo, kutani ndzi ya eBethele. Endzhaku ka loko ndzi thwasile, ematshan’wini yo khandziya xikepe lexi a xi tsemakanya malwandle, ndzi longe swiambalo swa mina swi nga ri swingani ivi ndzi nghena exitimeleni ndzi ya eBethele. Hambi leswi a ndzi tinyiketele eka Yehovha naswona ndzi hlanganyela entirhweni wo chumayela malembe yo hlayanyana, a ndzi nga si khuvuriwa ku kondza ku va December 1926, mavhiki mambirhi endzhaku ko fika eBethele. Leswi a swi tolovelekile enkarhini wolowo.

Yi ri na swirho swa 150, Bethele a yi tele emasikwini wolawo. A ku tshama vavanuna va mune ekamareni rin’we. Ndzi sungule ku tolovelana ni vunyingi bya vona, tanihi leswi hinkwerhu ka hina a hi dya, hi tirha ni ku etlela endhawini yin’we, nakambe hinkwerhu a hi hlanganyela evandlheni rin’we eDorobeni ra le New York. Kaya lerintshwa ra Bethele ri hetiwe le 124 Columbia Heights hi 1927, kutani a hi kota ku tshama hi ri vambirhi ekamareni rin’we.

Nakambe hi 1927 fektri leyintshwa yi pfuriwile le 117 Adams Street. Ndzi pfunete ku rhurhisa nhundzu yi suka fektri ya khale ya le 55 Concord Street. Ku tlhandlekela eka switirho swa xiya-ni-moya, efektri a ku ri ni tikhexe, michini yo gandlisa, michini yo hlantswa swiambalo, swilo swo tshivela ndzilo—loko swi tirha hi tintambhu ta gezi, a ndzi tirha eka swona.

Hambi swi ri tano, Bethele a yi nga ri fektri ntsena. Buku yin’wana ni yin’wana, xiphephana xin’wana ni xin’wana, magazini wun’wana ni wun’wana, a wu endliwa hi ntlawa wa malandza yo titsongahata, lama tirhaka hi matimba. Xikongomelo xa vona a ku nga ri ku kuma ndhuma emisaveni. Kambe, a va lava ntsena leswaku ntirho wa Hosi wu endliwa—naswona a ku ri ni swo tala swo swi endla!

Ku Tolovelana Na Makwerhu Rutherford

Ndzi vuyeriwe swinene hi ku va na lunghelo ro tirha na Joseph F. Rutherford, muungameri wa vumbirhi wa Sosayiti. A a ri munhu lonkulu, a lehe ku tlula 1,83 wa timitara, a nga nyuhwelanga kambe a vumbeke kahle. Vunyingi bya vamakwerhu lavatsongo va le Bethele a va n’wi chava loko va nga si n’wi tolovela. Nkarhi na nkarhi a ri eku dyondzeni, a lunghiselela timhaka leti a ti ta tsariwa.

Makwerhu Rutherford a ri ni misavu. A ku ri ni vamakwerhu vambirhi va xisati lava dyuhaleke endyangwini wa Bethele lava a va ri kona Makwerhu Russell a ha hanya. A va tshama va khanyanise tinghohe, va anakanya leswaku a swi nga lulamanga ku hlekela ehenhla hambi loko ku ri ni lexi hlekisaka. Nkarhi wun’wana hi nkarhi wa swakudya swa ni nhlikanhi, Makwerhu Rutherford a a hlamusela mhaka leyi a yi ta hlekisa un’wana ni un’wana, ku nga leswi a swi siringa vamakwerhu lava vambirhi. Hambi swi ri tano, nakambe a a tala ku rhangela emabulweni ya nkoka ya Bibele hi nkarhi wa swakudya.

Makwerhu Rutherford a a ri musweki lonene, naswona a tsakela ku swekela vanakulobye swakudya. Siku rin’wana lava tirhaka ku sweka eBethele va tshovelele marhambu ya huku loko va ri karhi va yi tsemelela. U nghene ekhixini kutani a va komba ndlela leyinene yo tsemelela huku. A a nga ma rhandzi marhambu lama tshoveleriweke eswakudyeni swakwe!

A ndzi tala ku va na Makwerhu Rutherford loko a nga khomekanga, tanihi le xitichini xa hina xa xiya-ni-moya xa WBBR, kumbe ekamareni rakwe ro dyondzela eka rona eXihlaleni xa Staten. A a ri munhu wa tintswalo, naswona a a tirhisa leswi a swi dyondzisa. A a nga languteli swo tala eka van’wana leswi yena swi nga n’wi tsandzaka ku swi endla. Ku hambana ni vanhu lava nga riki na mhaka etinhlengeletanweni tin’wana to tala ta vukhongeri, Makwerhu Rutherford a a ri xikombiso lexinene hi tlhelo ra moya ni ra mahanyelo. A hanyela Mfumo wa Yehovha hakunene.

Minkarhi Yo Nonon’hwa Ya Swa Timali

Malembe ma nga ri mangani endzhaku ka loko ndzi fike eBethele, misava yi nghene eka Xiphiqo Lexikulu xa Timali. Timakete ta timali ti hohlokile hi laha swi endlekeke ha kona hi minxavo ya swixavisiwa. Mintirho a yi kala, ni mali leyi kumekaka a yi nga nyawuli. Bethele a yi fambisiwa hi mali ya minyikelo, naswona Yehovha a tiyisekisa leswaku nkarhi hinkwawo ku va ni mali leyi eneleke yo khathalela ntirho. A hi kalanga hi pfumala swakudya, hambi leswi a hi nga swi tsakeli hinkwaswo. A hi hanya hi ku londzovota hi laha hi nga kotaka ha kona, naswona vamakwerhu lava nga tshamiki eBethele a va hi pfuna hi swilo leswi vonakaka hi laha va kotaka ha kona.

Hi 1932, Makwerhu Robert Martin, mulanguteri la tshembekaka wa fektri ya hina u file. Nathan Knorr wa malembe ya 27 hi vukhale u n’wi sivile. A ri ri jaha ra vutshila swinene. A ndzi tsundzuki ku ri na munhu loyi a a vilela hi ku va a ri mulanguteri wa le fektri. Vamakwerhu van’wana vo tshembeka, tanihi John Kurzen, George Kelly, Doug Galbraith, Ralph Leffler, na Ed Becker—lava hinkwavo a ku ri vatirhirhi-kulorhi lava rhandzekaka—va tinyiketele ku tirhisa vuswikoti ni vutshila bya vona entirhweni wa Mfumo.—Ringanisa Eksoda 35:34, 35.

Ku Tirha Eka Xiya-ni-moya

Nhlengeletano ya hina a yi tiyimisele hi ku helela ku hangalasa mahungu lamanene hi tindlela tihi na tihi leti a ti koteka. Misava hinkwayo a yi lava ku twa hi Mfumo, kambe a ho va magidi ma nga ri mangani ntsena. Tirhelo ra vutlharhi ra xiya-ni-moya a ra ha ku sungula endzhaku ka Nyimpi yo Sungula ya Misava. Hambi swi ri tano, vamakwerhu lava twisisaka va vone leswaku endlelo leri ro vulavurisana a ku ri leswi Yehovha a swi lunghiseleleke enkarhini wolowo. Kutani hi 1923, va sungule ku aka xitichi xa xiya-ni-moya xa WBBR eXihlaleni xa Staten, xi ri yin’wana ya tindlu ta ntlhanu ta vuhaxi ta le Dorobeni ra New York.

Minkarhi yin’wana a ndzo va ndzexe mulanguteri wa xitichi xa hina. A ndzi tshama kwale Xihlaleni xa Staten, kambe ndzi heta tiawara tinharhu ndzi ri eka xikwekwetsu ni le xitimeleni ndzi kongome efektri ya le Brooklyn leswaku ndzi ya endla ntirho wa gezi kumbe wo lunghisa swin’wana. Leswaku hi endla xitichi xa hina xa xiya-ni-moya xi tirha hi ndlela leyi faneleke, hi nghenise janareta yo tirha hi mafurha. Le Xihlaleni xa Staten hi tlhele hi va ni swihlovo swa hina vini swa mati ni ntanga lowu a wu phamela swakudya swa vatirhi va nga ri vangani kwalaho, ku katsa ni ndyangu wa Bethele le Brooklyn.

Ku kondza ku va na mpfuno wun’wana endzhaku, vutihlamuleri bya ntirho wa xiya-ni-moya byi wu hungute swinene nkarhi wa ku va kona ka mina eminhlanganweni ni le ntirhweni wa nsimu. A ku ri hava nkarhi wa ku tihungasa, kumbe maendzo ya mahelo-vhiki handle ka nkarhi wa hina wo wisa wa lembe na lembe. Un’wana u tshame a ndzi vutisa a ku: “Hikwalaho ka xiyimiso xo tano lexi lavaka nkarhi wo tala swinene, xana u tshama u anakanya hi ku suka eBethele?” Ndzi hlamule hi ku tshembeka ndzi ku: “E-e.” Ku vile lunghelo ni ntsako ku tshama ni ku tirha ni vunyingi bya vamakwerhu va xinuna ni va xisati lava tinyiketeleke. Naswona minkarhi hinkwayo a ku ri na ntirho lowu a wu fanele ku endliwa, ni swiavelo swin’wana leswintshwa leswi a swi fanele ku endliwa.

A hi humesa ni ku haxa tidrama leti tsakisaka hi xiya-ni-moya. Tanihi leswi a ku nga ri na swilo swo hlawuleka swo rhekhoda, hi boheke ku simeka endlelo ra hina vini. Hi endle muchini lowu a wu ta endla mpfumawulo wa rimoyana, kumbe moya wa xihuhuri xa matimba. Mpfumawulo wa swiphemu swa swikhamba swa khokhonati leswi baka mapulangi a wu twala ku ri hanci leyi tsutsumaka eswitarateni swa maribye. Drama yin’wana ni yin’wana a yi tlanga hi ndlela leyi tsakisaka. Naswona vanhu a va yingisela. Emasikwini wolawo lawa a ma nga ri na swihungasi swo tala, vanhu vo tala a va tshama ehansi va rhiya tindleve.

Hi va-1920 ni le ku sunguleni ka va-1930, Sosayiti yi endle matimu hi xiya-ni-moya lexi a xi haxa nongonoko wun’we hi ku tirhisa nhlayo leyikulu ya switichi swa xiya-ni-moya. Xisweswo, mahungu ya Mfumo ma fikelele timiliyoni emisaveni hinkwayo.

Gramafoni

Exikarhi ka va-1930 ni le ku sunguleni ka va-1940 hi endle michini yo rhekhoda ni switirho swin’wana swa mpfumawulo. Hi ku tirhisa muchini wo hlawuleka wo tsema, a hi tsema tirhekodo to sungula leti humaka eka tidiskete to rhetela bya xivoni leti endliweke hi mhula ya tinyoxi. Kutani a hi kambisisa swinene rhekhodo yo sungula yin’wana ni yin’wana hi muchini wo kota ku vona swilo leswitsongo, hi kota ku tiyiseka leswaku a yi na swihoxo. Loko ku ri na swihoxo, nongonoko wo rhekhoda a wu tlhela wu endliwa naswona ti tlhela ti tsemiwa hi ku tirhisa muchini wo tsema. Kutani a hi rhumela rhekhodo yo sungula leyi endliweke hi mhula eka khampani yo rhekhoda, leyi a yi humesa tirhekhodo ta gramafoni ni ta mpfumawulo.

Xiendlakalo xin’wana lexi nyanyulaka lexi ndzi xi tsundzukaka swinene a ku ri nkulumo ya Makwerhu Rutherford hi 1933 leyi a yi ku “Makumu Ya Lembe Ro Kwetsima Ra Ku Rhula Ni Ntshamiseko.” Mupapa u vule leswaku lembe rero ri ta va “lembe ro kwetsima,” naswona hi ku tirhisa vuhaxi bya xiya-ni-moya na gramafoni, hi swi paluxile hi kombisa leswaku a ku na nchumu xo kwetsima lexi a xi ta humelela ha rona. Ku hetisisa mhaka leyi, Hitler u sungule ku fuma lembe lero hi ku seketeriwa hi Kereke ya Khatoliki, kutani mintshembo yihi na yihi ya ku rhula yi nyamalarile.

Le United States, nhlangano wa Catholic Action wu simekiwile leswaku wu endla leswi kereke yi swi lavaka. Va tirhise vavanuna lava nghenaka kereke ya vona leswaku va vumba tihuvo ta vahleri va maphepha-hungu, timagazini ni tibuku leti dumeke. Va nghenelele eka tipolitiki ni ku tshembisa ku khirha xitichi xihi na xihi lexi haxaka tinkulumo ta hina ta Bibele. Vunyingi bya Timbhoni byi hlaseriwile hi mintlawa ya Catholic Action, ngopfu-ngopfu ekusuhi na New Jersey. Wolawo a ku ri masiku lama nyanyulaka!

Ntirho Lowu TsakisakaWa Le Nsin’wini

Exikarhi ka va-1950, nhlayo leyi kulaka ya vahuweleri va Mfumo a yi fikelela vanhu vo tala etindlwini ta vona. Leswi swi tikombe swi tirha swinene ku tlula xiya-ni-moya eku pfuneni ka vanhu leswaku va twisisa ntiyiso wa Bibele. Kutani hi 1957 ku kunguhatiwe ku xavisa xitici xa WBBR, ivi hi yisa nyingiso wa hina eku ndlandlamuxeni ka ntirho wa vurhumiwa ematikweni laman’wana.

Hi 1955, ndzi averiwe eVandlheni ra Bedford le Brooklyn laha a ndzi fambisa Dyondzo ya Xihondzo xo Rindza nkarhi na nkarhi. Nakambe Sosayiti a yi ndzi rhuma tanihi xivulavuri lexi famba-fambaka en’walungwini wa New York, Pennsylvania, Connecticut na le New Jersey. Loko ndzi averiwe eVandlheni ra Bedford, ndzi tibyele ndzi ku, ‘Ndzi ni malembe yo tlula 50 hi vukhale. Swa antswa ndzi hlanganyela hi laha ndzi nga kotaka ha kona entirhweni wa nsimu sweswi. Endzhaku ndzi nga ha helela hi ntamu ivi ndzi nga ha wu tsakeli swinene.’

Endzhaku ko tirha malembe wolawo hinkwawo endhawini ya vutshila byo haxa mbewu ya Mfumo hi xiya-ni-moya, ndzi swi kume wu ri ntsako lowukulu ku byala ni ku cheleta timbewu ta ntiyiso wa Bibele hi ku kongoma evanhwini. Ndzi tiphine swinene hi ku tirha ni vandlha leri. Vamakwerhu vo hambana-hambana va ndzi endle xirho xa ndyangu wa vona, va ndzi endla ndzi titwa ndzi ri ekaya. Vana van’wana lava a va ri lavatsongo hi nkarhi wolowo, lava sweswi va kuleke, va ha ndzi vitana kokwana la rhandzekaka. Ku ringana malembe ya 30 hi tiphine swin’we hi vutirheli bya le nsin’wini, ku kondza swiphiqo swa milenge ni mikondzo ya mina swi ndzi endla ndzi nga ha swi koti ku khandziya switepisi kumbe ku ngirimela. Hi 1985, ndzi rhurhele eVandlheni ra Brooklyn Heights, leri hlanganyelaka eBethele hi koxe.

Loko nhlengeletano ya Yehovha yi kula swinene, mina hi ndzexe ndzi ve ni lunghelo ra ku vona mikateko yakwe emasin’wini mambe loko ndzi va kona emintsombanweni leyikulu ya Timbhoni ta Yehovha ematikweni ya le kule. Phela ndzi kote ku rhendzeleka ni misava hinkwayo! Ku sukela hi va-1950, van’wana exikarhi ka hina vatirhi va le Bethele va endzele tindhawu ta le London, Paris, Rhoma, Nuremberg na Copenhagen. A hi famba hi xihaha-mpfhuka, xikepe na xitimela. Kavula, hi nkarhi wa maendzo lawa a hi vona swilo swo tala, kambe nchumu wo tsakisa ku tlula hinkwaswo a ku ri ku vona mintshungu ya vamakwerhu lava a va hi amukela hi mandla mambirhi. Endzhaku ka makume ya malembe ku pfuleke maendzo yo tlhelela le Vuxeni, Yuropa Vupela-dyambu, naswona sweswinyana ku pfuleke ya le Yuropa Vuxa. Mintsombano yo hlamarisa ya le Poland, Jarimani na Czechoslovakia a yi hlawulekile. Vona ndlela leyi ndyangu wa hina wa le tilweni wu kuleke ha yona hi mpfhuka ndzi va xiphemu xa wona!

Nkongomiso Wa Xikwembu

Leswi a swi vonaka swi ri magoza matsongo lama tekiweke hi nhlengeletano endzhaku swi vonake swi ri magoza lamakulu. Loko hi ri karhi hi tirhisa tindlela leti a ta ha ku simekiwa, ku nga switirho swo hi pfuna ku veka vumbhoni, i mani a a kota ku vona ku andza lokonghasi ka ha ri emahlweni? Hi ye emahlweni hi ripfumelo, hi amukela ku kongomisiwa hi Yehovha.

Nhlengeletano leyi leyi hluvukaka a yi nga kanakani ku tirhisa vutshila lebyintshwa lebyi a byi ri kona kumbe ku tumbuluxa vutshila bya yona n’wini leswaku byi pfuneta ensin’wini ya misava hinkwayo. Exikarhi ka tindlela leti a ti tirhisiwa ku yisa ku huweleriwa ka Mfumo emahlweni a ku ri ku chumayela hi yindlu na yindlu, ku tirhisiwa ka switichi swo tala swa xiya-ni-moya, ku veka vumbhoni hi ku tirhisa gramafoni, ni nongonoko wo fambisa tidyondzo ta Bibele emakaya ya vanhu. Ku simeka michini ya hina yo kandziyisa eminkarhini yo sungula ni ku tirhisa endlelo ra sweswi ra phototypesetting leri lawuriwaka hi tikhomphyutara ni vugandlisi bya offset hi tindzimi leto tala, a hi ntirho wutsongo. Xikolo xa Bibele xa Gilead xa Watchtower, Xikolo xa Vutirheli bya le Tilweni ni mintsombano ya nkarhi na nkarhi hinkwaswo swi endle xiphemu eku kwetsimiseni ka Yehovha Xikwembu ni N’wana wakwe. Ri vile lunghelo ra mina ku tivonela hi ndzexe ni ku hoxa xandla eka swiendlakalo leswi hinkwaswo.

Swi le rivaleni eka mina leswaku nhlengeletano ya Yehovha leyi kongomisiwaka hi moya emisaveni yi kuma vukongomisi eka leswi faneleke ku endliwa ni maendlelo ya kona. Nhlengeletano yakwe evuakweni hinkwabyo, ya swivumbiwa leswi vonakaka ni leswi nga vonakiki, yi tirha swin’we.

A ndzi kalanga ndzi tisola hi ku tshika makungu ya mina tanihi jaha leri a ri lava ku tluta emalwandle. Phela swiendlakalo leswi tsakisaka ni swa nkoka emisaveni swi humelela kona laha nhlengeletanweni ya Yehovha! Kutani riendzo ra mina egondzweni ro ‘vitaneriwa ehenhla’ ri funghiwe hi mintsako leyo tala ni mikateko naswona a ku vanga na ku tisola.—Vafilipiya 3:13, 14.

Ndzi tala ku byela vantshwa leswaku va tsundzuka 1914—ku nga, Pisalema 19:14, leyi nge: “Wa nga amukela marito ya nomu wa mina, ni ku anakanya ka mbilu ya mina, wena Yehova, ribye ra mina ni mulweri wa mina!” Hi lava ku tsakisa Yehovha eka hinkwaswo ni ku khongela hi laha Davhida a endleke ha kona: “Yehovha! Nḍi kombe tindlela ta wena, u nḍi dyonḍisa mikhuv̌a ya wena. Nḍi fambise ntiyisweni wa wena, u ri kari u nḍi dyonḍisa; hikuv̌a hi wena Šikwembu ša ku hlayiseka ka mina; hi masiku, nḍi ku ṭhembile.” (Pisalema 25:4, 5) Marito wolawo ma vula swo tala. Ku ma tsundzuka swi nga hi pfuna leswaku hi famba endleleni leyo lulama, hi ya etlhelweni lero lulama, hi fambisana ni nhlengeletano ya Yehovha leyi hluvukaka.

[Xifaniso lexi nga eka tluka 23]

Makwerhu Rutherford a a tsakela ku swekela vanakulobye swakudya

[Xifaniso lexi nga eka tluka 25]

Robert Hatzfeld a ri endhawini yo fambisa xitichi xa xiya-ni-moya xa WBBR

[Xifaniso lexi nga eka tluka 26]

Xifaniso xa sweswinyana xa Makwerhu Hatzfeld