Swivutiso Swa Vahlayi

Tanihi leswi Yesu a humeke eka Yese na Davhida, ha yini a vitaniwa “rimitsu” ra vakokwa wakwe Yese na Davhida?

Hi ntolovelo u anakanya leswaku rimitsu ra murhi kumbe ra ximilana ri va kona ku sungula ku nga si va ni nsinya ni marhavi. Kutani swi tikomba onge a swi ta fanela loko Yese (kumbe n’wana wakwe Davhida) a a vuriwa rimitsu leri Yesu a humeke eka rona. Kambe hambi Esaya 11:10 yi vhumbhe leswaku Mesiya loyi a taka u ta va “rimiṭu ra [Yese],” naswona Varhoma 15:12 yi tirhise vuprofeta lebyi eka Yesu Kreste. Endzhaku ka sweswo Nhlavutelo 5:5 yi n’wi vitane “nghala ya rixaka ra Yuda, rimitsu ra Davhida.” Swi kona swivangelo leswi endlaka leswaku a vitaniwa hi ndlela leyi.

Hakanyingi Bibele yi tirhisa ximilana, xo kota murhi, hi ndlela yo fanekisela. Minkarhi yin’wana leswi swi vangiwa hi leswi loko mbewu yi huma ivi yi kula, timitsu ti humelelaka ku nga si va ni nsinya, marhavi laman’wana, kumbe mihandzu, leswi hinkwaswo swi titshegeke hi timitsu. Hi xikombiso, Esaya 37:31 yi hlayekisa xileswi: “Loko ŝi ri le’ŝi seleke ŝa yindlu ya Yuda, le’ŝi nga ta pona ŝi ta mila kambe timiṭu e hansi, ŝi ta v̌eka mihanḍu e henhla.”—Yobo 14:8, 9; Esaya 14:29.

Loko ku va ni xiphiqo erimitswini, murhi hinkwawo wa khumbeka. (Ringanisa Matewu 3:10; 13:6.) Malakiya u swi veke kahle loko a tsale a ku: “Siku le’ri taka ri ta v̌a hisa, ku v̌ula Yehova wa mav̌andla, a ku nga ha [siyiwi] rimiṭu, kumbe rirav̌i.” (Malakiya 4:1) Nhlamuselo yi le rivaleni—ku heriseriwa makumu. Vatswari (timitsu) va ta herisiwa, swin’we ni vana (marhavi).a Leswi swi kandziyisa vutihlamuleri lebyi vatswari va nga na byona eka vana va vona lavatsongo swinene; ku va ni vumundzuku lebyi nga heriki bya vana lava ha riki hansi ka vatswari, byi titshege hi xiyimo xa vatswari emahlweni ka Xikwembu.—1 Vakorinto 7:14.

Nhlamuselo ya Esaya 37:31 na Malakiya 4:1 yi kombisa kahle leswaku marhavi (ni mihandzu eswirhabyanini) swi hanyisiwa hi rimitsu. Lexi hi xona xilotlelo xo twisisa leswaku Yesu i “rimiṭu ra [Yese]” ni “rimiṭu ra Davida,” hi ndlela yihi.

Hi tlhelo ra nyama, Yese na Davhida a va ri vakokwa wa Yesu; a va ri timitsu, yena a ri rhavi. Esaya 11:1 yi vule leswi hi Mesiya loyi a taka: “Kutani rav̌i ri ta huma e nsinyeni wa [Yese], hluke ri ta huma e timiṭwini ta wona, ri ta v̌eka mihanḍu.” Hi ku fanana, eka Nhlavutelo 22:16, Yesu u ri yena i “wa rixaka ra yena [Davhida].” Kambe u tlhela a tivitana “rimitsu ra Davhida.” Ha yini?

Xivangelo xin’wana xa leswaku Yesu a va “rimitsu” ra Yese na Davhida hi leswaku ha yena rixaka ra vona ri hambeta ri hanya. Ku hava munhu loyi namuntlha a nga kombisaka leswaku yena i wa nyimba ya Levhi, Dan, kumbe hambi ya Yuda, kambe hi nga tiyiseka leswaku rixaka ra Yese na Davhida ra hanya hikuva Yesu sweswi wa hanya etilweni.—Matewu 1:1-16; Varhoma 6:9.

Nakambe Yesu u kume xikhundla xa ku va Hosi ya le tilweni. (Luka 1:32, 33; 19:12, 15; 1 Vakorinto 15:25) Leswi swi byi kombisa kahle vuxaka bya yena na vakokwa wakwe. Hi ndlela ya vuprofeta, Davhida u vitane Yesu, Hosi yanga.—Pisalema 110:1; Mintirho 2:34-36.

Eku heteleleni, Yesu Kreste u nyikiwe matimba ya ku va Muavanyisi. Hi nkarhi wa ku ta ka yena hi Gidi ra Malembe, mikateko ya gandzelo ra Yesu yi ta kumiwa na hi Yese na Davhida. Vutomi bya vona emisaveni byi ta titshega hi Yesu, loyi a nga ta va “Tatana l’a nga riki na ku hela” eka vona.—Esaya 9:6.

Hikwalaho ke, hambi leswi Yesu a humeke erixakeni ra Yese na Davhida, leswi a nga va swona ni leswi a nga ta ha swi endla swi n’wi endla a fanelekela ku vitaniwa “rimiṭu ra [Yese]” ni “rimitsu ra Davhida.”

[Nhlamuselo ya le hansi]

[Laha Xifaniso Xi Humaka Kona eka tluka 31]

Pictorial Archive (Near Eastern History) Est.