Wa Tsundzuka Xana?

Xana u anakanyisise ha yona minkandziyiso ya sweswinyana ya Xihondzo xo Rindza? Loko swi ri tano, swi ta ku tsakisa ku tsundzuka leswi landzelaka:

▫ Hi kwihi ku hambana lokukulu exikarhi ka vanhu ni swiharhi?

Ku hambana lokukulu ku vangiwa hi xivumbeko, matimba ni matirhelo ya byongo. Matirhelo yo tala ya mianakanyo ya swiharhi ma hleriwe hi endlelo leri vuriwaka vutlharhi bya rintumbuluko. Leswi a swi tano eka vanhu. Xikwembu xi nyike vanhu vuswikoti byo tihlawulela. (Swivuriso 30:24-28)—4/15, tluka 5.

▫ Vuyimbeleri a byi teka xiphemu xihi evugandzerini bya le tempeleni bya Vaisrayele?

Vuyimbeleri, ngopfu-ngopfu vayimbeleri, a va ri ni xiphemu xa nkoka evugandzerini, ku nga ri ku kandziyisa timhaka ta nkoka ta Nawu, kambe a va tisa moya lowu faneleke wa vugandzeri. Byi pfune Vaisrayele leswaku va gandzela Yehovha hi ku hiseka. (1 Tikronika 23:4, 5; 25:7)—5/1, matluka 10, 11.

▫ I nkhathalelo wa muxaka muni lowu vana va wu lavaka ku sukela evuhlangini?

Vatswari nkarhi hinkwawo va fanele va khathalela n’wana loyi a ha ku velekiwaka. Pawulo u tsarile a ku: “Ku sukela evuhlangini bya wena, u toloverile matsalwa layo Hlawuleka, lama kotaka ku ku letela, ma ku ponisa.” (2 Timotiya 3:15) Kutani nkhathalelo wa vatswari lowu Timotiya a wu kumeke, ku sukela evuhlangini, a wu hlanganisa swilo swa moya.—5/15, tluka 11.

▫ Hi tihi tindlela ta mune ta vumbhoni leti kombisaka leswaku Bibele yi tamele rungula ra Xikwembu leri yaka eka vanhu hinkwavo?

(1) Ku kumeka. Bibele yi kumeka eka vaaki va tiphesente ta kwalomu ka 98 va misava hinkwayo. (2) Ntiyiso wa matimu. Bibele yi tamele mintiyiso ya matimu, ematshan’wini ya mintsheketo yo pfumala vumbhoni. (3) Ku pfuna ka yona. Swileriso ni misinya ya yona ya milawu swi andlala ndlela yo hanya ha yona leyi pfunaka lava va yi namarhelaka. (4) Vuprofeta. I buku leyi hlamuselaka hi vuenti leswi nga ta humelela enkarhini lowu taka.—6/1, matluka 8, 9.

▫ Hi byihi vutihlamuleri lebyi fambisanaka ni ku tiva vukhongeri bya ntiyiso?

Loko se hi byi vonile vukhongeri bya ntiyiso, hi fanele hi lwela ku hanya hi ku pfumelelana na byona. I ndlela yo hanya ha yona. (Pisalema 119:105; Esaya 2:3)—6/1, tluka 13.

▫ Ha yini dyondzo ya wena n’wini ya Bibele yi ri ya nkoka swinene?

Malandza hinkwawo ya Xikwembu ma fanele ku lwela ku pfuxeta ntsako ni matimba ya wona siku na siku hi ku kuma timhaka letintshwa kumbe leti enteke ta ntiyiso wa Rito ra Xikwembu. Hi ndlela leyi ma ta tshama ma hanyile emoyeni.—6/15, tluka 8.

▫ Rito “xidyoho” ri vula yini hi laha ri tirhisiwaka ha kona eBibeleni?

Hi swivumbeko swa wona swa maendli marito ya Xiheveru na Xigriki lawa hi ntolovelo ma tirhisiwaka eBibeleni ku vula “xidyoho” ma vula “ku hupa,” leswi vulaka ku ba etlhelo kumbe ku ka u nga fikeleli pakani, yinhla kumbe nchumu wo karhi. Mpatswa wo sungula wa vanhu wu pfumale ku kwetsima ka Xikwembu, wu hupa xikongomelo xa ku vumbiwa ka wona hi xifaniso xa Xikwembu. Hi marito man’wana, va dyohile. (Genesa 2:17; 3:6)—6/15, tluka 12.

▫ Ha yini ku nga ri vutlharhi nikatsongo ku hlaya tibuku ta vagwinehi?

Tibuku tin’wana ta vugwinehi ti vulavula mavunwa hi ku “nandzihisa marito” ni hi “marito . . . ya vuxisi.” (Varhoma 16:17, 18; 2 Petro 2:3) Matsalwa hinkwawo ya vagwinehi kahle-kahle i yo xopaxopa swihoxo ni ku onha. Ku hava lexi ma akaka ha xona.—7/1, tluka 12.

▫ Xana Greece a yi seketela xidemokrati?

Xidemokrati xa Greece ya khale, a xi tirhisiwa ntsena emadorobeni ma nga ri mangani ya tiko, naswona hambi eka wona a ku ri vavanuna ntsena lava a va endla nhlawulo. Leswi a swi vula leswaku mune-xa-ntlhanu xa vaaka-tiko a va nga nghenisiwi. Byebyo a ku nga ri byona nikatsongo vulawuri bya vaaki hinkwavo!—7/1, tluka 16.

▫ I yini lexi endlaka vukati bya Vakreste byi humelela?

Loko wanuna ni nsati wa yena va xixima langutelo ra Xikwembu hi xiboho xa vukati ni loko va tikarhatela ku hanya hi ku landza misinya ya milawu ya Rito ra xona. (Vaefesa 5:21-33)—7/15, tluka 10.

▫ Dyondzo ya n’wina ya ndyangu yi nga va leyi tsakisaka hi ndlela yihi?

Endla leswaku vana hinkwavo va hlanganyela. Vana ni langutelo lerinene ni ku va la akaka, u va bumabumela swinene vana va wena loko va hlanganyela. U nga hlanganisi mhaka ntsena, kambe ringeta ku fikelela timbilu ta vana va wena.—7/15, tluka 18.

▫ I yini leswi kombisiwaka hi marito lama nge: “Siku vanhu va nga ta ku: ‘Ku rhurile, ku hava xo karhata’”? (1 Vatesalonika 5:3)

Xiya leswaku Bibele a yi vuli leswaku matiko ma ta fikelela ‘ku rhula ni nsirhelelo.’ Kambe ma ta va ma vulavula ha kona hi ndlela yo hlawuleka, ma phofula ntshembo ni ku tiyiseka loku ma nga si tshamaka ma va na kona. Minkarhi yo fikelela ku rhula ni nsirhelelo yi ta vonaka yi ri kusuhi ku tlula rini na rini.—8/1, tluka 6.

▫ Vula tindlela tinharhu leti Yehovha a kombisaka ku olova ha tona.

Yehovha u kombise ku tiyimisela ka yena ku rivalela. (Pisalema 86:5) A a tiyimisele ku hundzula goza leri a ri kunguhateke loko ku humelela swiyimo leswintshwa. (Vona Yonasi ndzima 3.) Nakambe, Yehovha u tikombise a ri la olovaka eku tirhiseni ka vuhosi byakwe. (1 Tihosi 22:19-22)—8/1, matluka 12-14.