Xiviko Xa Vahuweleri Va Mfumo
“Alelani Diyavulosi, Kutani U Ta Mi Siya A Tsutsuma”
YHI LEMBE-XIDZANA ro sungula, ntlawa wa vanhu lava tinyiketeleke va le Efesa “lowu a wu tirha swa masalamusi,” wu amukele rungula ra Vukreste, kutani wu hisa tibuku ta wona ta masalamusi erivaleni. (Mintirho 19:19) Nxavo wa tibuku leti a wu ri 50 000 wa timali ta silivhere. Loko nhlamuselo ya Bibele yi vulavula hi denari, ku nga mali ya silivhere ya le Rhoma, kumbexana yi ve kwalomu ka R127 600!
Namuntlha ku ni vanhu vo tala lava nkarhi lowu hundzeke a va ri ni tibuku ta vungoma, kambe va kombiseke ku tiyimisela loku fanaka ni lokuya ka Vaefesa va khale. Vona ntokoto lowu landzelaka lowu humaka eCanada.
Kwalomu ka ntlhanu wa malembe lama hundzeke, un’wana wa Timbhoni ta Yehovha a a chumayela hi yindlu na yindlu, loko eka yindlu yin’wana wansati la vuriwaka Nora a n’wi kokela endlwini. Endzhaku ko heta malembe yo tala a lava swilo swa moya, Nora a a hlengelete madzana ya tibuku ta vukhongeri ni ta vungoma, kambe a a lava ku tiva leswi Bibele yi swi vulaka hi ntshembo wa vafi. Mbhoni leyi yi n’wi nyike xiphephana lexi nge Hi Wihi Ntshembo Wa Varhandziwa Lava Feke? Swivutiso swa Nora swi hlamuriwile, kutani u amukele swikhokhelo swa timagazini ta Xihondzo xo Rindza na Xalamuka!
Endzhakunyana u rhurhile, kutani a nga ha hlangani ni Timbhoni ta Yehovha. Hambi swi ri tano u ye emahlweni a kuma timagazini eposweni eka adirese ya yena leyintshwa. U ode ni tibuku tin’wana leti sekeriweke eBibeleni leti boxiweke eka timagazini. Endzhaku ka nkarhinyana, un’wana wa Timbhoni ta Yehovha u te ekaya ka yena. Hi ku tsakisiwa hi leswi Mbhoni liya a yi n’wi hlamula hi ku tirhisa Bibele, Nora u yi amukerile, a tlhela a yi rhamba ku vuya nakambe va ta yisa bulo emahlweni.
Hambi swi ri tano, Mbhoni liya swi yi tikerile ku kuma Nora nakambe. Yi endle maendzo yo vuyela hi minkarhi yo hambana-hambana ya siku na hi minkarhi yo hambana-hambana ya vhiki, kambe yi nga n’wi kumi. Hambi swi ri tano, hi ku famba ka nkarhi ku phikelela ka yona ku hakeriwile, naswona yi tshovele ntshovelo lowunene. Dyondzo ya Bibele ya nkarhi na nkarhi yi sunguriwile, leyi hikwalaho ka ku sindzisa ka Nora yi khomiweke ka nharhu hi vhiki. Swilo leswi a ri karhi a swi dyondza swi n’wi susumetele ku swi byela vanghana va yena ni swirho swa ndyangu, laha vuyelo bya kona ku veke na vanhu vanharhu lava kombeleke tidyondzo ta Bibele eka Timbhoni ta Yehovha.
Hi dyondzo ya yena Nora u dyondze leswaku ku ni vukhongeri bya mavunwa ni vaprofeta va mavunwa, ni leswaku i ndlela yin’we ntsena leyi yisaka evuton’wini. U hete malembe yo tala a lava tinhlamulo ta swivutiso swa yena evukhongerini byo hemba, kambe endzhaku ko dyondza hi leswi Bibele yi swi vulaka hi mademona, u endle ku fana ni Vaefesa lavaya va khale lava boxiweke eka Mintirho 19:19. U basise layiburari ya yena, naswona hi masiku ma nga ri mangani u lahle tibuku to tlula gidi leti vulavulaka hi vungoma ni tidyondzo ta mavunwa. Exikarhi ka tibuku leti a ti lahleke, sete yin’we leyi a yi ri na tibuku ta mune a yi tlula R2 100 hi nxavo!
Handle ko kanakana, hikwalaho ko hlundzukisiwa hi swiendlo swa Nora, mademona ya n’wi karhatile kwalomu ka mavhiki mambirhi. Hambi swi ri tano, mimoya leyi yo biha a yi swi kotanga ku n’wi heta matimba leswaku a nga ha yi emahlweni ni dyondzo ya yena ya Bibele ni ku tihlanganisa ni nhlengeletano ya manguva lawa ya Yehovha.
Mintokoto yo tano yi kombisa ntiyiso wa marito ya Bibele lama nge: “Titsongahateni emahlweni ka Xikwembu Alelani Diyavulosi, kutani ú ta mi siya a tsutsuma.”—Yakobo 4:7.