Xikwembu Xa Swi Hlamula Swikhongelo
Korneliyo a a ri wanuna loyi a a khongela hi mbilu hinkwayo nkarhi ni nkarhi leswaku Xikwembu xi n’wi komba tintswalo. Tlhandla-kambirhi, u tirhise xikhundla xa yena xa ku va ndhuna ya vuthu hi ndlela leyinene. Hi ku ya hi Bibele “a a nyikela tinyiko to tala ta tintswalo” eka vanhu lava pfumalaka.—Mintirho 10:1, 2.
HI NKARHI wolowo, vandlha ra Vukreste a ri vumbiwe hi vapfumeri lava nga Vayuda, vaproselita ni Vasamariya. Korneliyo a ri munhu wa Matiko la nga yimbangiki naswona a nga ri xiphemu xa vandlha ra Vukreste. Xana sweswo swi vula leswaku swikhongelo swa yena a swi hundzuke swa hava? Doo! Yehovha Xikwembu u n’wi twile Korneliyo a tlhela a xiya mintirho ya yena leyi a yi endla hi mbilu hinkwayo.—Mintirho 10:4.
Hi nkongomiso wa ntsumi, Korneliyo u hlanganisiwe ni vandlha ra Vukreste. (Mintirho 10:30-33) Hikwalaho ka sweswo, yena ni ndyangu wa yena va ve ni lunghelo ro va vo sungula eka Vamatiko lava nga yimbangiki ku amukeriwa evandlheni ra Vukreste. Yehovha Xikwembu u swi vone swi fanerile ku nghenisa ntokoto wa Korneliyo erungulweni ra Bibele. A swi kanakanisi leswaku u endle ku hundzuka ko tala leswaku vutomi bya yena byi pfumelelana ni mimpimanyeto ya Xikwembu hi ku helela. (Esaya 2:2-4; Yohane 17:16) Ntokoto wa Korneliyo wu fanele wu va xikhutazo lexikulu eka vanhu va tinxaka hinkwato namuntlha, lava lavaka ku tsakeriwa hi Xikwembu. Xiya swin’wana swa swikombiso swa kona.
Swikombiso Swa Manguva Lawa
Wansati un’wana wa le Indiya a a lava nchavelelo lowukulu. Leswi a tekiweke a ri ni malembe ya 21, a a ri ni vana vambirhi. Kambe endzhakunyana ka ku tswariwa ka n’wana wa vumbirhi, nuna wa yena u lovile. Hi xitshuketa, loko a ri ni malembe ya 24 hi vukhale, u ve noni leyi nga ni n’wana wa nhwanyana wa tin’hweti timbirhi hi vukhale ni n’wana wa jaha wa tin’hweti ta 22. A swi hlamarisi leswi a a lava nchavelelo! Xana a ta wu kuma kwihi? Hi vusiku byin’wana a a tshikileleke swinene ivi a khongela a ku, “Tatana la nge matilweni, ndzi kombela u ndzi chavelela hi Rito ra wena.”
Mixo lowu tlhandlameke, u ve ni muendzi. A a ri Mbhoni ya Yehovha. Siku rero ntirho wa yona wa yindlu ni yindlu wu yi fambele ximatsi hikuva vanhu vo tala a va yi amukelanga emakaya ya vona. Leswi a a yi karhele naswona yi hele matimba, se a yi lava ku ya ekaya, kambe yi susumeteleke ku nghena eka muti wun’we ntsena. Kwalaho hi kona laha yi kumeke noni leyi ya ha riki yitsongo. Yi yi amukerile naswona yi teke buku leyi hlamuselaka Bibele. Wansati loyi u kume nchavelelo lowukulu hi ku hlaya buku yoleyo ni le ka bulo ra yena ni Mbhoni. U dyondze hi xitshembiso xa Xikwembu xo pfuxa vafi ni hi Mfumo wa Xikwembu, lowu nga ta endla misava yi va paradeyisi ku nga ri khale. Xa nkoka ngopfu, u tive Xikwembu xi ri xin’we xa ntiyiso, Yehovha, a tlhela a xi rhandza, lexi hlamuleke xikhongelo xa yena.
Nora, la tshamaka edorobeni ra George, eAfrika Dzonga, u hlawule n’hweti yo karhi leswaku a ta hlanganyela entirhweni wo chumayela wa nkarhi hinkwawo. Loko a nga si sungula u khongele hi mbilu hinkwayo eka Yehovha leswaku a n’wi pfuna a kuma munhu la tsakelaka ku dyondza Bibele hakunene. Eka nsimu leyi a averiweke ku yi tirha a ku ri ni muti wa munhu loyi a tshamela ku hlongola Nora loko a ya eka wona. Hi xivindzi Nora u nghene emutini wolowo nakambe. Lexi n’wi hlamariseke hi leswaku u kume se ku tshama munhu un’wana la vitaniwaka Noleen. Tlhandla-kambirhi, Noleen ni mana wa yena a va khongela eka Xikwembu leswaku xi va pfuna va twisisa Bibele. Nora u ri: “Loko ndzi va byela leswaku ndzi nga dyondza na vona Bibele, va swi tsakerile.” Noleen ni mana wa yena va endle nhluvuko hi xihatla. Hi ku famba ka nkarhi, ha vambirhi va sungule ku hlanganyela na Nora entirhweni wa ku hanyisa hi tlhelo ra moya.
Xikombiso xin’wana lexi kombisaka matimba ya xikhongelo i xa mpatswa lowu tshamaka eAfrika Dzonga le doroba-nkulu ra Joni. Evusikwini bya Mugqivela wun’wana hi 1996, a ku sele katsongo leswaku Dennis na Carol va dlaya vukati. Leswi se a va tsandzekile va bohe ku khongela leswaku va kuma mpfuno, kutani va khongele hi ku phindha-phindha kukondza ku va vusiku swinene. Hi mixo wa siku leri tlhandlameke hi awara ya khume-n’we, Timbhoni timbirhi ta Yehovha ti gongondzile. Dennis u va hlamurile ivi a va byela ku yima ku kala a vitana nsati wa yena. Kutani Dennis a lemukisa Carol leswaku loko o amukela Timbhoni, swi nga endleka swi nga olovi ku ti hlongola. Carol u byele Dennis leswaku va khongelele mpfuno kutani swi nga endleka ku ri nhlamulo ya Xikwembu ya swikhongelo swa vona. Kutani Timbhoni ti amukeriwile naswona dyondzo ya Bibele yi sunguriwile hi buku leyi nge Vutivi Lebyi Yisaka eVutin’wini Lebyi Nga Heriki. Dennis na Carol va nyanyuriwile hi leswi va swi dyondzeke. Hi ndzhenga wa siku rero, va ye eka nhlangano wa vona wo sungula eHolweni Ya Mfumo ya Timbhoni ta Yehovha ya kwalaho. Hi ku tirhisa vutivi lebyi a va byi dyondza eBibeleni, Dennis na Carol va kume ntlhantlho wa swiphiqo swa vukati bya vona. Sweswi i vadzunisi va Yehovha lava tsakeke ni lava khuvuriweke naswona nkarhi ni nkarhi va byela vaakelani va vona hi ripfumelo ra vona leri sekeriweke eBibeleni.
Ku Vuriwa Yini Hi Loko U Titwa U Nga Ku Fanelekeli Ku Khongela?
Vanhu van’wana va nga ha titwa va nga ku fanelekeli ku khongela hikwalaho ko tikhoma ko biha. Yesu Kreste u hlamusele hi munhu wo tano, ku nga muluvisi la sandziwaka. Loko a nghena exivaveni xa tempele, munhu loyi u titwe a nga ku fanelekeli ku ya endhawini leyi tolovelekeke yo khongelela eka yona. “A a yime ekule . . . a a tshamela ku tiba xifuva xa yena, a ku, ‘Xikwembu xanga, vana ni nsovo eka mina ndzi nga mudyohi.’” (Luka 18:13) Hi ku ya hi Yesu, munhu loyi u twiwile. Leswi swi kombisa leswaku hakunene Yehovha Xikwembu u ni tintswalo naswona u lava ku pfuna vadyohi lava hundzukaka hi mbilu hinkwayo.
Anakanya hi jaha ra le Afrika Dzonga leri vuriwaka Paul. Loko a ha ri mufana, Paul a a famba ni mana wakwe eminhlanganweni ya Vukreste. Kambe loko a ri exikolweni xa le henhla, u sungule ku tolovelana ni vantshwa lava nga landzeriki tindlela ta Xikwembu. Endzhaku ko heta xikolo, u tirhe evuthwini ra Afrika Dzonga eka mfumo wa khale wa xihlawuhlawu. Kutani hi xitshuketa, xigangu xakwe xi n’wi tshika. Ndlela leyi nga enerisiki ya ku hanya yi vangele Paul ntshikilelo lowukulu. U ri: “Vusiku byin’wana, ndzi khongele eka Yehovha ndzi kombela mpfuno, hambileswi ku hundzeke malembe ndzi nga si khongela Xikwembu hi mbilu hinkwayo.”
Endzhakunyana ka xikhongelo lexi, mana wa Paul u n’wi rhambele ku ya eXitsundzuxweni xa lembe na lembe xa rifu ra Kreste. (Luka 22:19) Paul u hlamarisiwe hi xirhambo xa mana wa yena, hikuva yena a ri munhu wo biha naswona a a nga yi rhandzi Bibele. U ri: “Ndzi teke xirhambo lexi tanihi nhlamulo ya Yehovha eka xikhongelo xa mina naswona ndzi titwe ndzi fanele ku teka goza.” Ku sukela kwalaho ku ya emahlweni Paul u sungule ku va kona eminhlanganweni hinkwayo ya Vukreste. Endzhaku ka tin’hweti ta mune a dyondza Bibele, u fanelekele nkhuvulo. Tlhandla-kambirhi, u tshike tidyondzo ta yena ta vunjhiniyara ivi a hlawula ntirho wo hlanganyela nkarhi hinkwawo entirhweni wo chumayela. Namuntlha, Paul i wanuna la tsakeke, a nga ha tshikileriwanga hi vutomi bya yena bya nkarhi lowu hundzeke. Se u ni malembe ya 11 a ri karhi a tirha erhavini ra Sosayiti ya Watch Tower eAfrika Dzonga.
Hakunene, hi musa Yehovha Xikwembu u hlamula swikhongelo naswona “hi [ye]na muhakeri wa lava va [n’wi] lavaka hi mbilu hinkwayo.” (Vaheveru 11:6) Ku nga ri khale siku lerikulu ra Yehovha ri ta fika naswona ri ta herisa vubihi hinkwabyo. Sweswi, Yehovha u hlamula swikhongelo swa vanhu va yena lava kombelaka matimba ni nkongomiso loko va ri karhi va hiseka entirhweni wa nkoka wa ku nyikela vumbhoni. Xisweswo, timiliyoni ta vanhu lava humaka eka tinxaka hinkwato va tisiwa evandlheni ra Vukreste naswona va katekisiwa hi vutivi bya Bibele lebyi yisaka evuton’wini lebyi nga heriki.—Yohane 17:3.
[Xifaniso lexi nga eka tluka 5]
Xikhongelo lexi sukaka embilwini xa Korneliyo xi endle leswaku a endzeriwa hi muapostola Petro
[Xifaniso lexi nga eka tluka 6]
Xikhongelo swi pfune vo tala leswaku va langutana ni minkarhi yo nonon’hwa
[Xifaniso lexi nga eka tluka 7]
Swa laveka ku khongelela mpfuno wo twisisa Bibele
Vatekani va nga khongelela mpfuno wa leswaku va kota ku tiyisa vukati bya vona