Swivutiso Swa Vahlayi

Xana i swinene ku amukela nsawutiso kumbe vutshunguri byin’wana bya neleta ya vutshunguri leyi nga ni ntsutsu lowu humaka engatini ya munhu?

Hi ku kongoma Mukreste un’wana ni un’wana u fanele a tihlawulela emhakeni leyi.

Malandza ya Xikwembu kahle-kahle ma lava ku yingisa nkongomiso lowu kumekaka eka Mintirho 15:28, 29, wa leswaku ma papalata ngati. Hi laha ku faneleke, Vakreste a va nge yi dyi nyama leyi nga halatiwangiki ngati kumbe swilo leswi endliweke swo fana ni tisoseji leti nga ni ngati. Kambe nawu wa Xikwembu wa ha tirha ni le ka xivandla xa vutshunguri. Timbhoni ta Yehovha ti khoma khadi leri vulaka leswaku a va wu amukeli ‘mpompelo wa ngati, ngati hi vuyona, tisele to tshwuka, tisele to basa, swiphepherhele swa le ngatini kumbe plasma ya ngati.’ Kambe, ku vuriwa yini hi mintlhavelo ya serum leyi nga ni tiproteyini leti nga vuriki nchumu ta ngati?

Timbhoni i khale ti swi vonile leswaku leyi i mhaka ya xiboho xa munhu hi xiyexe, ku ya hi ripfalo ra un’wana ni un’wana leri leteriweke hi Bibele. Leswi swi hlamuseriwe kahle eka “Swivutiso Swa Vahlayi” eka Xihondzo xo Rindza xa June 1, 1990, leyi hlamuseleke leswaku dokodela a nga ha bumabumela ntlhavelo wa serum eka munhu loyi a khomiweke hi mavabyi yo karhi. Swiaki swa matimba swa mintlhavelo yo tano a hi swa plasma ya ngati hi ku kongoma kambe i swisirheleli swa miri swa plasma ya ngati leyi humaka eka lava va koteke ku hlula vuvabyi byebyo. Vakreste van’wana lava va voneke onge va nga amukela ntlhavelo wo tano hi mbilu yo basa, va xiye leswaku swisirheleli swa miri swa suka eka ngati ya waxisati la tikeke swi hundzela engatini ya xihlangi lexi nge mbelekweni yakwe. “Swivutiso Swa Vahlayi” swa yi boxa mhaka leyi, ni leswaku ntsutsu wun’wana wu suka eka wansati la tikeke wu hundzela eka xihlangi.

Vo tala va kuma leswi swi pfuna, tanihi leswi mirhi yin’wana leyi nga endliwangiki hi ngati yi nga ha vaka ni ntsutsunyana wa plasma lowu tirhisiweke kumbe wu cheriweke ku tiyisanyana swichela-chelana loko ya ha endliwa. Hi ntolovelo ntsutsunyna wutsongo wa tirhisiwa ni le ka mintlhavelo ya tihomoni leti endliweke hi munhu EPO (erythropoietin). Timbhoni tin’wana ti amukele ntlhavelo wa EPO hikuva wu nga hatlisisa ku vumbeka ka tisele to tshwuka ta ngati kutani swi rhulisa mbilu ya dokodela la nga vonaka onge mpompelo wa ngati wa laveka.

Vutshunguri byin’wana byi nga ha tirhisiwa enkarhini lowu taka, lebyi nga ni ntsutsunyana wutsongo hi xiringaniso tanihi leswi tikhampani leti endlaka mirhi ti endlaka mirhi leyintshwa kumbe ku ncica maendlelo ya leyi yi nga kona. Xisweswo Vakreste va nga ha lava ku tiva leswaku xana ku ni ntsutsu wa ngati emurhini kumbe enthlavelweni wun’wana lowu dokodela a wu bumabumelaka. Loko va kanakana kumbe va tshemba leswaku ntsutsu wa ngati wu kona va nga vutisa dokodela wa vona.

Tanihi laha swi vuriweke ha kona, Timbhoni to tala a ti swi alanga ku amukela ntlhavelo lowu nga ni ntsutsunyana wuntsongo. Hambi swi ri tano, la lavaka ku dyondza hi laha ku eneleke emahlweni ko endla xiboho xa munhu hi xiyexe, u fanele ku kambisisa nhlamuselo leyi nga eka “Swivutiso Swa Vahlayi” eka Xihondzo xo Rindza xa June 1, 1990.