Ndlela Yo Hlela Layiburari Ya Swa Le Tilweni

SHEREZADE, xinhwanyetana lexi tlhariheke xa le Spain, a xi ri na mune wa malembe loko mudyondzisi wa xona a byela tlilasi leswaku va ta ya penda swifaniso swa “Tatana Khisimusi.” Kan’we-kan’we Sherezade u kombele ku khomeriwa. U hlamusele leswaku ripfalo rakwe a ri n’wi pfumeleli ku endla sweswo.

Hi ku hlamarisiwa hi ku ala loku, mudyondzisi u n’wi byele leswaku swi fana ni ku penda xifaniso xa xipopana, naswona a ku ri hava lexi hoxeke eka swona. Sherezade u hlamurile: “Loko ku ri xipopana ntsena, a ndzi ta tsakela ku tidirowela xipopana loko u swi tsakela.”

Siku rin’wana tlilasi yi byeriwe ku penda mujeko wa tiko. Nakambe Sherezade u kombele ku endla swin’wana. Loko a hlamusela, u byele mudyondzisi hi timhaka ta Xadraka, Mexaka na Abedi-Nego.—Daniyele 3:1-28.

Endzhakunyana mudyondzisi u bele mana wa Sherezade riqingho a phofula ku hlamala ka yena. U te: “N’wana wa wena u vulavule na mina ko talanyana hi ta ripfalo rakwe. Xana swa tshembisa? Xinhwanyetana xa malembe yo ringana ni ya xona xi ndzi hlamusela leswaku ripfalo ra xona ra xi karhata! Vona, a ndzi pfumelelani ni leswi u n’wi dyondzisaka swona, kambe ndza ku tiyisekisa leswaku wa humelela. Naswona ndzi lava ku ku tivisa leswaku ndzi n’wi xixima swinene n’wana wa wena.”

Xana xinhwanyetana xa malembe ya mune hi vukhale xi nga ri kuma njhani ripfalo leri leteriweke hi Bibele? Mana wa yena, Marina, u hlamusela leswaku Sherezade u ni layiburari ya yena ya swa le tilweni ekamareni ra yena. Layiburari leyi yi katsa tikopi takwe ta Xihondzo xo Rindza leti a ti khwatihateke, tibuku takwe to chumayela ha tona, ni tibuku hinkwato ta Sosayiti ya Watchtower leti humesiweke ku sukela loko a velekiwile. Lexi a xi rhandzaka ngopfu elayiburari ya yena i khasete ya My Book of Bible Stories, leyi a yi yingiselaka madyambu man’wana ni man’wana loko a ri kari a landzelela ebukwini ya yena. Hi tona timhaka leti ta Bibele leti n’wi pfuneke ku endla swiboho leswi boxiweke laha henhla.

Xana layiburari leyi hleriweke kahle ya swa le tilweni yi nga ku pfuna wena ni vana va wena? Hikwalaho ka yini layiburari ya le kaya yi ri ya nkoka?

“Layiburari A Hi Xikhavisi”

Henry Ward Beecher u te: “Layiburari a hi xikhavisi, kambe hi xin’wana xa swilo swa nkoka evuton’wini.” Handle ko kanakana, ku lava ku va hinkwerhu ka hina hi na swona “swilo [leswi] swa nkoka evuton’wini,” hambi loko hi nga swi tivi. Hikwalaho ka yini swi ri tano? Hikuva hambi loko hi ri na Bibele ntsena, hi ni xin’wana lexi nga vuriwaka layiburari.

Bibele hakunene i layiburari ya nkoka ya swa le tilweni. Hi lembe-xidzana ra vumune, Jerome u vumbe xivulwa xa Xilatini lexi nge Bibliotheca Divina (Layiburari ya Xikwembu) a hlamusela nhlengeleto lowu heleleke wa tibuku leti huhuteriweke leti hi ti vitanaka Bibele. Yehovha u hi lunghiselele layiburari leyi yo kwetsima leswaku yi hi nyika mpfuno lowu lavekaka, swiletelo ni switsundzuxo. A hi fanelanga ku yi tekela ehansi. Ku va ni Bibele hinkwayo ntsena swi vula leswaku hi ni layiburari leyikulu swinene ku tlula leyi malandza yo tala ya Xikwembu a ma ri na yona eminkarhini leyi hundzeke.

Enkarhini lowu matsalwa yo durha yo tsariwa hi voko a ka ha ri wona ntsena lawa a ma kumeka, a hi mangani makaya lawa a ma ri ni Bibele leyi heleleke. Loko Pawulo a navele ku dyondza Matsalwa hi nkarhi wo hetelela wa ku khotsiwa ka yena eRhoma, u kombele Timotiya le Asia Minor ku n’wi tisela tibuku-songwa—kumbexana swiphemu swin’wana swa Matsalwa ya Xiheveru. (2 Timotiya 4:13) Hambi swi ri tano, emasinagogeni a ku vekiwe tibuku-songwa leti hlengeletiweke, naswona Yesu Kreste na muapostola Pawulo va tirhise tilayiburari leti entirhweni wa vona wo chumayela. (Luka 4:15-17; Mintirho 17:1-3) Lexi tsakisaka, sweswi Matsalwa ma kumeka hi ku olova swinene ku tlula leswi a ma ri xiswona eka lembe-xidzana ro sungula.

Hikwalaho ka ku endliwa ka muchini wo kandziyisa, namuntlha ku lava ku va malandza hinkwawo ya Xikwembu—ku nga khathariseki ririmi ra vona—va nga kuma Bibele hinkwayo hi nxavo lowunene. Nakambe hi ni mpfuno wo hlawuleka wo engetela “layiburari” leyi yo kwetsima. Hi nkarhi lowu tlulaka lembe-xidzana, “nandza la tshembekaka, wo tlhariha” a a tirha hi ku hiseka a phamela swakudya swa moya hi nkarhi wa kona.—Matewu 24:45-47.

Kambe a swi koteki leswaku hi ri tirhisa kahle rungula leri ra nkoka loko hi nga lunghiseleli layiburari ya munhu hi xiyexe ya swa le tilweni. Xana sweswo swi nga endliwa njhani? Kavula, goza ro sungula i ku kuma tibuku leti lavekaka eka layiburari yo tano. Leswi swa fanela, tanihi leswi swi nga ta hi pfuna ku hatla hi kuma rungula leri kongomeke leri hi ri lavaka leswaku hi ahlula swiphiqo ni ku hlamula swivutiso swa Bibele.

I Tibuku Tihi Leti Ndzi Ti Lavaka?

Xana u tshama u tivutisa leswaku u nga xi lulamisa njhani xiphiqo xa ku vulavurisana evukatini bya wena, kumbe u nga va pfuna njhani vana va wena leswaku va ku e-e eka swidzidzirisi? Xana u nga n’wi pfuna njhani munghana loyi a nga ni gome? Xana u nga byi hlamusela kahle vumbhoni lebyi hi nga na byona bya leswaku Xikwembu xi kona, ni leswaku hikwalaho ka yini xi pfumelela vuhomboloki? Xana xivandzana xa ribungu xa Nhlavutelo ndzima 17 xi yimela yini?

Swivutiso leswi ni swin’wana swo tala swi nga hlamuleka loko u ri ni layiburari leyi eneleke ya swa le tilweni. Sosayiti ya Watchtower yi humese tibuku, tibroxara ni swihloko swa timagazini leswi hlamuselaka nxaxamelo lowu heleleke wa timhaka ta Matsalwa. Ku engetela kwalaho, tibuku leti ti hlamusela timhaka ta mindyangu, ti aka ripfumelo ra hina eka Xikwembu ni le Bibeleni, ti hi pfuna ku antswisa vutshila bya hina byo chumayela ni ku hi pfuna ku twisisa vuprofeta bya Bibele.

To tala ta tibuku leti kandziyisiweke hi Sosayiti eka malembe ya 20 lama hundzeke ta ha kumeka. Loko wa ha ku amukela ntiyiso, swi nga va swa nkoka leswaku u kuma tibuku to tano hinkwato leti kumekaka hi ririmi ra wena. Tibuku ta nkoka ta tinhlamuselo, to tanihi Insight on the Scriptures na Comprehensive Concordance, na tona ti humesiwile hi tindzimi to hambana-hambana. Hambi swi ri tano, ku kuma tibuku leti i goza ro sungula.

Hlela Layiburari Ya Wena!

Ku kuma buku leyi lavekaka i swa nkoka ku tlula ku tiva ntsena leswaku u na yona kun’wana. Loko hi boheka ku heta nkarhi wo tala hi ri karhi hi lava buku ya tinhlamuselo leyi hi lavaka ku tirhisa yona, swi nga endleka leswaku mhaka ya kona yi sungula ku hi phirha. Hi tlhelo rin’wana, loko tibuku ta hina ti tshama ti xaxametiwe kahle, endhawini leyi faneleke, hi ta susumeteleka swinene ku endla ndzavisiso wa munhu hi xiyexe.

Loko swi koteka, swa pfuna ku veka nhlayo leyikulu ya tibuku ta swa le tilweni endhawini yin’we. Loko hi tsandzeka ku xava vuhiri bya tibuku lebyi heleleke, hakanyingi hi nga tiendlela byona hi nxavo wa le hansi swinene, naswona a byi lavi ndhawu yikulu. Ku fikelela layiburari hi ku olova na swona i swa nkoka. Tibuku leti hlayisiwaka ehenhla ka silingi hi ntolovelo a ti tirhisiwi ngopfu, naswona ti va ni ritshuri.

Goza leri landzelaka i ku hlela tibuku. Ku heta nkarhinyana u paka tibuku hi ndlela leyi hlelekeke swa pfuna.

Ku vuriwa yini hi loko swirho swo tala swa ndyangu wa wena swi nga ri Timbhoni ta Yehovha? Hambi leswi u nga ta ka u nga swi koti ku hlela layiburari ya wena hi laha u tsakelaka ha kona, u nga va ni vuhiri ekamareni ra wena lebyi nga ni tibuku tin’wana ta Matsalwa.

Layiburari Ya Swa Le Tilweni Yi Nga Ku Pfuna Ku Kula eMoyeni

Loko tibuku ti pakiwe kahle, hi ta lava ku simeka endlelo leri nga ta hi pfuna ku kuma rungula. Rungula leri hi ri tsundzukaka ri nga va ri hoxile, naswona hina hi hexe swi nga endleka hi nga swi tivi ngopfu leswi tameriweke hi buku yin’wana ni yin’wana elayiburari ya hina ya swa le tilweni. Hambi swi ri tano, rungula hinkwaro leri nga elayiburari ri kumeka hi ku olova. Loko Watch Tower Publications Index yi kumeka hi ririmi ra hina, yi nga hi pfuna ku kuma rungula leri kongomeke ra kwalomu ka mhaka yin’wana ni yin’wana hi xinkadyana.

Julián, loyi a heteke malembe yo hlaya a tirha tanihi phayona ro hlawuleka tlhelo a ri nkulu, u hlamusela leswaku Index i ya nkoka eku dyondziseni ka mufana wa yena lontsongo ku endla dyondzo ya munhu hi xiyexe. “Jairo, loyi a nga ni malembe ya nkombo hi vukhale, siku rin’wana u vuye hi le xikolweni ivi a ndzi vutisa, ‘Tatana, xana Sosayiti yi vule yini hi ti-dinosaur?’ Hi ye eka Index hi ku kongoma ivi hi languta rito ‘dinosaurs.’ Hi ku hatlisa hi kume Awake! leyi hlamuselaka mhaka yoleyo. [February 8, 1990] Hi siku rero, Jairo u sungule ku yi hlaya. Ana se wa swi tiva leswaku layiburari ya hina ya swa le tilweni yi ni rungula leri pfunaka eka kwalomu ka mhaka yin’wana ni yin’wana. Mina hi ndzexe, ndza tiyiseka swinene leswaku loko vana va hina va tolovela ku yi tirhisa kahle layiburari ya swa le tilweni, swi va pfuna ku kula emoyeni. Va dyondza ku anakanya, naswona ku tlula kwalaho, va kuma leswaku dyondzo ya munhu hi xiyexe yi va leyi tsakisaka.”

Fausto, tata wa Sherezade loyi a boxiweke eku sunguleni, u kholwa leswaku u nga sungula ku dyondzisa vana ku tirhisa layiburari ya swa le tilweni va ha ri vatsongo. Wa hlamusela: “Ana se hi sungurile ku kombisa Sherezade wa malembe ya ntsevu ndlela leyi Index yi tirhisiwaka ha yona. Tanihi leswi a nyanyuriwaka hi ntshembo wa Paradeyisi ya laha misaveni, hi sungule ku n’wi komba rito ‘paradise’ eka Index, kutani hi languta eka swihloko swa Xihondzo xo Rindza leswi kombisiweke. Hi ntolovelo a hi n’wi komba swifaniso ntsena. Hambi swi ri tano, hi ndlela yoleyo u dyondze leswaku Index i xilotlelo xo kuma rungula elayiburari ya hina ya le kaya. Hi swi tivile leswaku u yi twisisile yinhla loko siku rin’wana a vuye hi le xikolweni ni xivutiso xa ku tlangela Easter. U vutise mana wa yena a ku: ‘Ha yini hi nga languti eka Index?’”

Ku nga khathariseki malembe ya hina, Bibele yi hi khutaza ku “[kambisisa] hinkwaswo, [hi] tiya eka leswinene.” (1 Vatesalonika 5:21) Leswi swi lava leswaku hi kambisisa leswi Matsalwa ma swi vulaka. (Mintirho 17:11) Loko hi ri ni layiburari ya swa le tilweni leyi hleriweke kahle, ndzavisiso wo tano wu nga va lowu tsakisaka. Nkarhi wun’wana ni wun’wana loko hi tirhisa layiburari ya hina hi laha ku humelelaka loko hi lunghiselela nkulumo, ku kuma ndzayo leyi faneleke yo hlangavetana ni xiphiqo, kumbe ku kambisisa mhaka leyi tsakisaka, swi ta hi komba nkoka lowukulu wa layiburari ya hina.

Vatswari va Sherezade va ri: “Endyangwini wa Vukreste, layiburari ya swa le tilweni entiyisweni a hi xikhavisi!”

[Bokisi leri nga eka tluka 30]

XANA U NGA TI XAXAMETA NJHANI TIBUKU TA WENA?

Ku hava milawu leyi bohaka yo hlela tibuku ta wena. Hambi swi ri tano, swiyenge leswi landzelaka swi yi kombisa kahle ndlela leyi u nga hlelaka tibuku ta wena hi ku ya hi leswi ti swi tameleke.

1. Tibuku leti nga ni nhlamuselo ya ndzimana hi ndzimana ya swiphemu swin’wana swa Bibele

(Swikombiso: Nghwazi Leyi Tshameke Yi Hanya, Nhlavutelo—Ku Chaputa Ka Yona Loku Hlamarisaka Ku Tshinele!, “The Nations Shall Know That I Am Jehovah”—How?, “Your Will Be Done on Earth”)

2. Tibuku leti hlamuselaka ta vutomi bya ndyangu

(Swikombiso: Ku Endla Vutomi Bya Ndyangu Wa Wena Byi Tsakisa, Swivutiso Leswi Vantshwa Va Swi Vutiska—Tinhlamulo Leti Tirhaka, Buku Yanga Ya Timhaka Ta Bibele)

3. Tibibele ni tibuku ta tinhlamuselo

(Swikombiso: New World Translation of the Holy Scriptures—With References, Tibibele tin’wana, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, xihlamusela-marito lexinene)

4. Tibuku leti tirhisiwaka sweswi eDyondzweni ya Buku ya Vandlha ni le Xikolweni xa Vutirheli bya le Tilweni

5. Tikhasete ni tivhidiyo

6. Tivholumo ta Xihondzo xo Rindza na Xalamuka!

7. Matimu ya Timbhoni ta Yehovha

(Swikombiso: Yearbooks of Jehovah’s Witnesses, Timbhoni Ta Yehovha I Vahuweleri Va Mfumo Wa Xikwembu)

8. Tibuku ni tibroxara leti hi ti tirhisaka nkarhi na nkarhi evutirhelini bya hina

(Swikombiso: U Nga Hanya Hi Masiku aParadeyisini eMisaveni, Reasoning From the Scriptures, Life—How Did It Get Here? By Evolution or by Creation?, Ku Lavisisa Ka Vanhu Xikwembu, United in Worship of the Only True God)

[Xifaniso lexi nga eka tluka 31]

Sherezade ana se i xichudeni lexinene xa Bibele

[Xifaniso lexi nga eka tluka 31]

Hambi leswi a nga ntsongo, mufana loyi u tirhisa layiburari ya swa le tilweni