Lunghiselelo Lerintshwa Ra Tilayiburari Ta Tiholo Ta Mfumo

Se swi hlaya malembe mavandlha emisaveni hinkwayo ma ri karhi ma vuyeriwa hi ku tirhisa tilayiburari ta wona ta Tiholo ta Mfumo, leti khale a ti vuriwa layiburari ya Xikolo xa Vutirheli bya le Tilweni. Enkarhini lowu hundzeke, a swi vonaka swi laveka leswaku vandlha rin’wana ni rin’wana ri va ni layiburari ya rona. Hambiswiritano, tanihi leswi Tiholo ta Mfumo to tala se ti tirhisiwaka hi mavandlha yo tlula rin’we, lawa man’wana ya wona ma vulavulaka tindzimi timbe, swi vonaka swi antswa leswaku ririmi rin’wana ni rin’wana leri tirhisaka Holo ya Mfumo ri va ni layiburari ya rona leyi hlelekeke kahle eHolweni ya Mfumo, leyi nga ta tirhisiwa hi mavandlha hinkwawo. Eka miako ya Tiholo ta Mfumo leyi nga ni tiholo to tlula yin’we, holo yin’wana ni yin’wana yi fanele yi va ni layiburari ya ririmi rin’wana ni rin’wana ra mavandlha lama tirhisaka holo leyi.

Ku languteriwe leswaku lunghiselelo leri ri ta pfuna ku londzovota ndhawu ni mali. Tlhandlakambirhi, ku hlanganisa tilayiburari ta mavandlha mambirhi kumbe ku tlula swi ta endla leswaku ku va ni layiburari yo antswa. Loko tilayiburari leti ti hlanganisiwile, tikopi leti engetelekeke ta tibuku, ti nga hlayisiwa kun’wana, kutani ti tirhisiwa loko ku akiwa Tiholo letintshwa ta Mfumo. Loko Holo ya Mfumo yi ri na khompyuta leyi nga ni Watchtower Library eka CD-ROM, van’wana va ta pfuneka swinene.

Eka layiburari yin’wana ni yin’wana ya Holo ya Mfumo, makwerhu un’we, ngopfu-ngopfu un’wana wa valanguteri va Xikolo xa Vutirheli bya le Tilweni, hi yena a nga ta langutela layiburari ya kona. Nkarhi na nkarhi u fanele a engetela minkandziyiso leyi faneleke eka leyi nga kona, a yi fungha kahle endzeni, a kombisa leswaku nkandziyiso wa kona i wa layiburari ya Holo ya Mfumo. Lembe ni lembe u fanele a kamba loko ku nga ri na buku leyi kayivelaka elayiburari ni ku tiyiseka leswaku minkandziyiso yi le xiyin’weni lexinene. Minkandziyiso leyi nga eka tilayiburari leti a yi fanelanga yi humesiwa eHolweni ya Mfumo.

Hinkwavo lava hlanganyelaka evandlheni va yi tlangela swinene layiburari ya Holo ya Mfumo. Onge hinkwerhu hi nga kombisa leswaku ha ri tlangela lunghiselelo leri hi ku khathalela layiburari ni ku yi tirhisa leswaku hi kambisisa “vutivi bya Xikwembu.”—Swiv. 2:5.