Bokisi Ra Swivutiso

◼ I tibuku tihi leti faneleke ti vekiwa elayiburari ya Xikolo xa Vutirheli bya le Tilweni?

Ku humesiwe tibuku to tala swinene ta swa moya leswaku ku pfuneka vanhu va Xikwembu. Tanihi leswi vahuweleri vo tala va nga riki na tona tibuku leti hinkwato emakaya ya vona, layiburari ya Xikolo xa Vutirheli bya le Tilweni leyi nga eHolweni ya Mfumo yi ni tibuku to endla ndzavisiso leti swi nga ha endlekaka ti nga kumeki. Xisweswo, yi fanele yi va ni vuhundzuluxeri byo hambana-hambana bya Bibele, tibuku ta Sosayiti ta sweswinyana, tikopi ta Vutirheli Bya Hina Bya Mfumo, tivholumo ta Xihondzo xo Rindza ni Xalamuka!, (hi Xinghezi) ni ti-Watch Tower Publications Index. Ku engetela kwalaho, ku fanele ku va ni xihlamusela-marito lexinene xa sweswinyana. Loko ti kumeka, tinsonga-vutivi, tiatlilasi kumbe tibuku leti vulavulaka hi ririmi ni matimu ti nga pfuna. Hambiswiritano, hi fanele hi tikarhatela ku kuma tibuku leti humesiweke hi “nandza la tshembekaka, wo tlhariha.”—Mt. 24:45.

Etimhakeni tin’wana ku vikiwe leswaku a ku hlayisiwa tibuku leti nga fanelangiki elayiburari ya Xikolo xa Vutirheli bya le Tilweni. Swi ta va swi nga fanelanga ku hlayisa tinovhele, tibuku leti hlamuselaka Bibele hi ndlela yo xopa-xopa swinene kumbe tibuku leti vulavulaka hi filosofi ni vungoma. Layiburari ya Xikolo xa Vutirheli bya le Tilweni yi fanele yi va ni tibuku leti nga ta pfuna lava yi tirhisaka leswaku va hambeta va endla nhluvuko emoyeni.—1 Tim. 4:15.

Mulanguteri wa xikolo hi yena a nga ni vutihlamuleri malunghana ni layiburari leyi, kambe makwerhu un’wana a nga averiwa ku n’wi pfuna leswaku va yi langutela. U fanele a tiyiseka leswaku layiburari yi tshama yi ri enkarhini, a kuma tibuku letintshwa hi ku hatlisa loko ti kumeka. Buku yin’wana ni yin’wana yi fanele yi tsariwa vito ra vandlha ra yona endzeni ka xifunengeto. Lembe na lembe ku fanele ku kamberiwa tibuku loko ti lava ku lunghisiwa kumbe ku laveka leswaku ku xaviwa tin’wana.

Un’wana ni un’wana a nga hoxa xandla eku hlayiseni ka layiburari. Hi fanele hi khoma ni ku tirhisa tibuku leti hi vukheta. Vana a va fanelanga va pfumeleriwa ku tlanga hi tona, kumbe ku ti tsalatsala. Mfungho lowu langutekaka wu nga ha vekiwa wu vula leswaku tibuku a ti fanelanga ti humesiwa endzeni ka Holo ya Mfumo.

Leswi ku vumbiwaka mavandlha yo tala lamantshwa nkarhi na nkarhi, swi le rivaleni leswaku tilayiburari to tala hi letitsongo. Vahuweleri van’wana lava nga ni tibuku ta hina ta khale va nga ha nyikela ha tona evandlheni. Vakulu va nga ha oda tivholumo ta Sosayiti ta Xihondzo xo Rindza leti tlheleke ti kandziyisiwa. Hi ndlela leyi, layiburari ya Xikolo xa Vutirheli bya le Tilweni yi ta pfuna swinene eku pfuneni hinkwavo leswaku va hakuta rifuwo leri fihliweke ra Rito ra Xikwembu, leri nyikaka vutivi, vutlharhi ni ku twisisa.—Swiv. 2:4-6.