Ha Yini Va Endla Tano?
1 Malunghana na Kreste a ku vhumbiwe leswaku ‘ku hisekela yindlu ya Xikwembu ku n’wi dyile.’ (Ps. 69:9) Ku hiseka ka Yesu malunghana ni vugandzeri bya Yehovha bya ntiyiso swi n’wi susumetele ku rhangisa vutirheli. (Lk. 4:43; Yoh. 18:37) Ku hiseka loku fanaka ko vula vumbhoni malunghana ni ntiyiso ku kombisiwa hi vutirheli bya Timbhoni ta Yehovha namuntlha. Eka lembe ra ntirho leri hundzeke, vanhu va nhlayo-xikarhi ya 645 509 va hlanganyele entirhweni wa vuphayona n’hweti yin’wana ni yin’wana. Hi ku landza ku tinyiketela ka hina eka Xikwembu, un’wana ni un’wana wa hina u fanele a anakanyisisa hi xikhongelo loko a ta kota ku lulamisa swiyimo swakwe leswaku a va phayona ra nkarhinyana kumbe phayona ra nkarhi hinkwawo.—Ps. 110:3; Ekl. 12:1; Rhom. 12:1.
2 Tanihi leswi hi hanyaka emisaveni leyi hi vutianakanyi yi rhangisaka swilo leswi vonakaka, vo tala emisaveni swa va nonon’hwela ku twisisa leswaku ha yini munhu a fanele a tikarhata swinene evutirhelini kambe a nga kumi mali ni ku dzunisiwa. Ha yini maphayona ma endla tano? Ma swi tiva leswaku ma hlanganyela entirhweni wo ponisa vutomi. Hi ku susumetiwa hi rirhandzu leri enteke ra Yehovha ni munhu-kulobye, ma titwa ma ri ni vutihlamuleri lebyikulu byo pfuneta ku ponisa vutomi. (Rhom. 1:14-16; 1 Tim. 2:4; 4:16) Mpatswa lowu phayonaka wu hlamule kahle wu ku: “Ha yini hi ri maphayona? Xana hi nga swi kota ku n’wi hlamusela kahle Yehovha leswaku ha yini hi nga ri maphayona?”
3 Makwerhu un’wana wa xisati u tsale leswi malunghana ni xiboho xa yena xo sungula ntirho wa vuphayona: “Mina ni nuna wa mina hi kunguhate ku hanya hi muholo wun’we, leswi vulaka ku tshika swilo leswi nga bohiki. Kambe, Yehovha u hi katekisile swinene, a nga hi tshikanga hi ri evuswetini kumbe eku pfumaleni. . . . Ndzi kume xivangelo lexinene xo hanya—ku nga ku pfuna lava pfumalaka leswaku va tiva leswaku Yehovha, Xikwembu xa ntiyiso, a nga kule ni lava n’wi lavaka.” Hi ku vona xihatla xa minkarhi leyi, maphayona ma eneriseka hi swilaveko swa vutomi loko hi ku hiseka ma ri karhi ma lava rifuwo ra moya leri nga ta tshama hilaha ku nga heriki.—1 Tim. 6:8, 18, 19.
4 Loko swiyimo swa wena swi ku pfumelela, ha yini u nga hlanganyeli ni madzana ya magidi ya vamakwerhu va xinuna ni va xisati lava nga entirhweni wa vuphayona? Hi ndlela yoleyo u nga kuma ntsako lowu va nga na wona.