Hakelo Ya Yobo—Xihlovo Xa Ntshembo
“Yehova a katekisa mahetelelo ya Yobo e ku tlurisa ku sungula ka yena.”—YOBO 42:12.
1. Xana Yehovha u va endlela yini vanhu vakwe, hambi loko miringo yi va tsanisa swinene?
YEHOVHA “[u] hakela lava [n’wi] lavaka.” (Vaheveru 11:6) Nakambe u tiyisa vanhu vakwe lava tinyiketeleke leswaku va nyikela vumbhoni hi xivindzi, hambi loko miringo yi va tsanisa ku kota lava feke. (Yobo 26:5; Nhlavutelo 11:3, 7, 11) Sweswo swi ve tano eka Yobo loyi a xaniseka. Hambi leswi a hehliweke hi vachaveleri vanharhu va mavunwa, a nga miyetiwanga hi ku chava vanhu. Ematshan’weni ya sweswo, u nyikele vumbhoni hi xivindzi.
2. Hambi leswi ti langutaneke ni nxaniso ni ku nonon’hweriwa, xana Timbhoni ta Yehovha ti yi hlule njhani miringo ya tona?
2 Timbhoni ta Yehovha to tala ta namuntlha ti langutane ni nxaniso wo tano lowukulu ni ku nonon’hweriwa ku fikela ekusuhi ni ku fa. (2 Vakorinto 11:23) Hambi swi ri tano, ku fana na Yobo va kombise ku rhandza Xikwembu ni ku kombisa ku lulama. (Ezekiyele 14:14, 20) Nakambe va hume emiringweni ya vona va tiyimisele ku tsakisa Yehovha, va ri ni matimba ya ku nyikela vumbhoni hi xivindzi, va tele hi ntshembo wa ntiyiso.
Yobo A Nyikela Vumbhoni Hi Xivindzi
3. Xana Yobo u nyike vumbhoni bya njhani eku vulavuleni kakwe ko hetelela?
3 Eku vulavuleni kakwe ko hetelela, Yobo u nyikele vumbhoni lebyikulu swinene ku tlula lebyi a byi nyikeleke eku sunguleni. U pfale milomu ya vachaveleri vakwe va mavunwa. Hi marito lama tlhavaka, u te: “U pfunise ku yini la nga riki na matimba!” (Yobo 26:2) Yobo u dzunise Yehovha, loyi matimba yakwe ma lengeletaka xirhendzevutana xa hina xa misava ehenhla ka hava ni ku andlala mapapa lama tikaka hi mati ehenhla ka misava. (Yobo 26:7-9) Kambe, Yobo u vule leswaku swihlamariso swo tano ‘ko va vuhandle bya tindlela ta Yehovha ntsena.’—Yobo 26:14.
4. Xana Yobo u vule yini hi vutshembeki, naswona ha yini a tiphofule hi mukhuva wolowo?
4 Hi ku tiyiseka hi ku tshembeka kakwe, Yobo u te: “Nḍi ta tiya nḍi tiv̌ula l’a pfumalaka nanḍu nḍi konḍa nḍi fa.” (Yobo 27:5) Hi ku hambana ni swihehlo leswi tisiweke eka yena, a nga endlanga nchumu lexi a xi lulameriwa hi leswi swi n’wi humeleleke. Yobo a a swi tiva leswaku Yehovha a nga swi yingisi swikhongelo swa vagwinehi kambe u hakela vahlayisi va vutshembeki. Leswi swi nga ha hi tsundzuxa leswaku ndzoviso wa Armagedoni wu ta susa lavo biha endhawini ya vona naswona a va nge ri balekeli voko ra Xikwembu leri nga tsetseleliki. Ku fikela enkarhini wolowo, vanhu va Yehovha va ta famba hi vutshembeki bya vona.—Yobo 27:11-23.
5. Xana Yobo u byi hlamusele njhani vutlharhi bya ntiyiso?
5 Anakanya hi vavanuna vanharhu lava a va ri ni vutlharhi bya misava va ri karhi va yingisela loko Yobo a kombisa leswaku munhu u tirhise vutshila byakwe leswaku a kuma nsuku, silivhere ni rifuwo rin’wana emisaveni ni le lwandle. U te: “V̌utlhari byi tlula ngopfu tiperla.” (Yobo 28:18) Vachaveleri va Yobo va mavunwa a va nga ta byi xava vutlharhi bya ntiyiso. Byona byi huma eka Mutumbuluxi wa moya, mpfula, rihati ni ku dzindza ka tilo. Hakunene, “šitšhav̌o ša Hosi, hi byona v̌utlhari; ku papalata ŝo biha, hi kona ku twisisa.”—Yobo 28:28.
6. Ha yini Yobo a vulavule hi vutomi byakwe byo rhanga?
6 Ku nga khathariseki maxangu yakwe, Yobo a nga tshikanga ku tirhela Yehovha. Ematshan’weni yo fularhela La-nge-henhla-henhla, wanuna loyi wa vutshembeki a a navela ‘vuxaka bya Xikwembu’ bya nkarhi lowu hundzeke. (Yobo 29:4) Yobo a a nga titlakusi hi ku vula leswaku u ‘lwele lava xanisekaka, a tiambexa ku lulama, ni leswaku a ri tatana wa xiviri eka swisiwana.’ (Yobo 29:12-16) Kambe, a a rungula swilo leswi endlekeke evuton’wini byakwe tanihi nandza wo tshembeka wa Yehovha. Xana wena u na yona rhekhodo yo tano yo saseka? Ina, nakambe Yobo a paluxa vunwa bya swihehlo leswi endliweke hi vakanganyisi vanharhu lava tikurisaka.
7. Xana Yobo a a ri munhu wa muxaka muni?
7 Yobo u ve xihlekiso eka lavatsongo ka yena ‘lava vatata wa vona a nga ta kala a va tshamisisa ni timbyana ta ntlhambi wakwe.’ A a nyenyiwa ni ku tshwuteleriwa marhi. Hambi leswi a ri nhlomulweni lowukulu, Yobo a nga tweriwanga vusiwana. (Yobo 30:1, 10, 30) Hambi swi ri tano hikwalaho ka leswi a a tinyiketele hi ku helela eka Yehovha, a ri ni ripfalo leri baseke naswona u kote ku vula a ku: “Šikwembu a ši nḍi v̌eke šikalweni le’šo lulama, ši ta kuma leŝaku nḍi hav̌a nanḍu!” (Yobo 31:6) Yobo a a nga ri muoswi kumbe mukunguhati wa xikungu, naswona a nga tsandzekanga ku pfuna vapfumari. Hambi leswi a a fuwile, a a nga tshembeli eka rifuwo ra swilo leswi vonakaka. Ku tlula kwalaho, Yobo a nga swi gandzelanga swikwembu swa hava hi ku tinyiketela eka swilo leswi nga hanyiki, swo tanihi n’weti. (Yobo 31:26-28) Hi ku tshembela eka Xikwembu, u veke xikombiso lexinene tanihi muhlayisi wa vutshembeki. Ku nga khathariseki ku xaniseka kakwe hinkwako ni vukona bya vachaveleri va mavunwa, Yobo u yime a tiyile, a nyikela vumbhoni lebyinene. Loko marito yakwe ma fika emakumu, u tshembele ka Xikwembu tanihi Muavanyisi ni Muhakeri wa yena.—Yobo 31:35-40.
Ku Vulavula Ka Elihu
8. Xana Elihu a ri mani, naswona u xi kombise njhani xichavo ni xivindzi?
8 Elihu a ri kusuhi, ku nga ntukulu wa Buzi n’wana wa Nahoro, xisweswo a ri xaka ra le kule ra munghana wa Yehovha, Abrahama. (Esaya 41:8) Elihu u xixime vakulukumba lava hi ku yingisela matlhelo hinkwawo ya njhekajhekisano wa vona. Kambe, u vulavule hi xivindzi etimhakeni leti a va hoxisa eka tona. Hi xikombiso, vukarhi byakwe byi pfurhele Yobo hikuva “a a tiv̌ekile l’a lulameke e mahlweni ka Šikwembu.” Vukarhi bya Elihu byi ve byikulu ngopfu ehenhla ka vachaveleri va mavunwa. Marito ya vona a ma tikomba ma tlakusa Xikwembu kambe entiyisweni a ma xi tsakisanga hikuva a ma yima ni tlhelo ra Sathana. ‘Hi ku tala marito’ ni ku susumetiwa hi moya lowo kwetsima, Elihu a ri mbhoni ya Yehovha leyi nga yiki hi nghohe.—Yobo 32:2, 18, 21.
9. Xana Elihu u vule yini hi ku vuyeteriwa ka Yobo?
9 Yobo a anakanya ngopfu hi ku tilwela, ku nga ri ku lwela Xikwembu. Entiyisweni, a holove ni Xikwembu. Hambi swi ri tano, loko moya-xiviri wa Yobo wu ya wu tshinela eku feni, a a tikomba a tlhelela exiyin’weni xakwe. Njhani? Phela, Elihu u susumeteleke ku vula leswaku Yehovha u tsakele Yobo hi rungula leri: “Ṅwi lamulele, a nga ti ṭhuka a šikela sireni; nḍi kumile le’ši nga ṅwi kuṭulaka. Kutani mmiri wa yena wu hlukela e ku tlula v̌uhlangini. A tlhelela masikwini ya v̌untŝha bya yena.”—Yobo 33:24, 25.
10. Xana Yobo a a ta ringiwa ku fikela kwihi, kambe i yini lexi hi nga tiyisekaka ha xona hi ku ya hi 1 Vakorinto 10:13?
10 Elihu u tsundzuxe Yobo hi ku vula ka yena leswaku ku hava vuyelo bya ku tsakela Xikwembu hi ku hlayisa vutshembeki. Elihu u te: “Ŝo biha ŝi le kule na Šikwembu; a ku na ku homboloka e ka Lo’wa-matimba-hikwawo! Hikuv̌a o tlherisela ka munhu le’ŝi ringanaka mitiro ya yena.” Yobo u teke goza leri hoxeke hi ku kandziyisa ku lulama ka yena, kambe sweswo u swi endle hi ku kala vutivi ni ku twisisa loku ringaneke. Elihu u engetele a ku: “Ingi nḍi ranḍa leŝaku o ringiwa e ku yisa mahlweni, leŝi [u] hlamuleke hi mukhuv̌a wa la’v̌o biha!” (Yobo 34:10, 11, 35, 36) Hi laha ku fanaka, ripfumelo ni vutshembeki bya hina swi kombisiwa hi ku helela ntsena loko hi ‘ringiwa hi xitalo’ hi ndlela yo karhi. Hambi swi ri tano, Tata wa hina wa rirhandzu wa le tilweni a nge hi tshiki hi langutana ni ndzingo lowu wu hi hlulaka.—1 Vakorinto 10:13.
11. Loko hi langutane ni ndzingo lowukulu, hi fanele ku tsundzuka yini?
11 Loko Elihu a ya emahlweni, u tlhele a kombisa leswaku Yobo a a kandziyisa ngopfu ku lulama ka yena. Hi fanele hi xiya Muendli wa hina Lonkulu. (Yobo 35:2, 6, 10) Elihu u te, Xikwembu “a ši hlayisi v̌utomi bya mbabva, ši av̌anyisela la’v̌a šanisiwaka.” (Yobo 36:6) A nga kona loyi a nga solaka ndlela ya Xikwembu, a vula leswaku a xi lulamanga. Xi tlakuke ngopfu ku tlula hi laha hi nga swi tivaka ha kona, naswona malembe ya xona a ma hlayiwi. (Yobo 36:22-26) Loko u langutane ni ndzingo lowukulu, tsundzuka leswaku Xikwembu xa hina lexi hanyaka hi masiku, xi lulamile naswona xi ta hi hakela hikwalaho ka ntirho wa hina wo tshembeka lowu wu xi dzunisaka.
12. Xana marito yo hetelela ya Elihu ma kombisa yini hi ku avanyisa ka Xikwembu ehenhla ka lavo biha?
12 Loko Elihu a ri karhi a vulavula, a ku pfuka moya wa vukarhi. Loko wu ri karhi wu tshinela, mbilu yakwe yi sungula ku tlula-tlula ni ku rhurhumela. U vulavule hi swilo leswikulu leswi endliweke hi Yehovha a ku: “Wee Yobo, yingisa mhaka leyi hi tindlev̌e; yima la, u ṭunḍuka masingita ya Šikwembu.” Ku fana na Yobo, hi fanele ku anakanya hi mintirho leyi hlamarisaka ya Xikwembu ni xindzhuti xa xona lexikulu. Elihu u te: “Hi nga ka hi nga ṭhineli lo’wa-matimba-hikwawo, o tlakukile hi matimba, ni ku twisisa, ni ku lulama hikwaku, a nga hlamuli ntšhumu. Hikwalaho, v̌anhu v̌a fanele ku tšhav̌a Šikwembu.” (Yobo 37:1, 14, 23, 24) Marito ya Elihu yo hetelela ma hi tsundzuxa leswaku loko Xikwembu xi tisa ku avanyisa eka lavo biha, a xi nge byi rivali vululami ni vunene naswona xi ta hlayisa lava xi chavaka tanihi vagandzeri va xona. Mawaku lunghelo ra ku va exikarhi ka vahlayisi vo tano va vutshembeki lava langutaka Yehovha tanihi Hosi ya Vuako Hinkwabyo! Tiyisela hi laha Yobo a endleke ha kona, naswona u nga tshuki u pfumelela Diyavulosi a ku susa exiyin’weni xa wena lexi katekisiweke exikarhi ka mintshungu leyi tsakeke.
Yehovha A Hlamula Yobo
13, 14. (a) Xana Yehovha u rhange a vutisa Yobo malunghana na yini? (b) Hi tihi tinhla leti nga kumiwaka eka swivutiso swin’wana leswi Xikwembu xi swi vutiseke Yobo?
13 Anakanya ndlela leyi Yobo a faneleke a hlamale ha yona loko Yehovha a vulavula na yena a ri exidzedzeni! Xidzedze xexo a xi vangiwa hi Xikwembu, ku hambana ni moya lowukulu wa Sathana lowu wiseke yindlu, wu dlaya vana va Yobo. Yobo a nga swi kotanga ku vulavula loko Xikwembu xi vutisa xi ku: “A u ri kwihi siku nḍi akeke masungulo ya misav̌a? . . . I mani l’a v̌ekeke ribye ra yinhla ra yona? Siku tinyeleti ta v̌uša ti baka huwa yo ṭaka, ni v̌ana hikwav̌o v̌a šikwembu v̌a yimbelelaka hi ku ṭakisisa?” (Yobo 38:4, 6, 7) Yehovha u vutise Yobo swivutiso hi ku landzelelana malunghana ni lwandle, nguvu ya rona ya mapapa, vurhonga, tinyangwa ta rifu, ku vonakala ni munyama ni tinyeleti. Yobo a nga swi kotanga ku humesa rito loko a vutisiwa leswaku: “Šana wa tiv̌a milawu ya le tilweni?”—Yobo 38:33.
14 Swivutiso swin’wana swi kombise leswaku loko munhu a nga si vumbiwa ni ku nyikiwa matimba yo fuma tinhlampfi, tinyanyana, swivandzana ni swilo leswi kokovaka, Xikwembu a xi swi hlayisa—handle ka mpfuno kumbe ku tsundzuxiwa hi munhu. Swivutiso swin’wana swa Yehovha swi kombise swivumbiwa swin’wana swo tanihi nyarhi, yimbhu ni hanci. Yobo u vutisiwe leswaku: “Šana i ku lerisa ka wena loko gama ri tlhandlukela, ri ya aka šisaka ša rona e mananganangeni šana?” (Yobo 39:27) I ntiyiso leswaku a hi ka yena! Anakanya ndlela leyi Yobo a titweke ha yona loko Xikwembu xi vutisa xi ku: “Šana mukaneti o ta tenga yini ni Lo’wa-matimba-hikwawo?” A swi hlamarisi leswi Yobo a nga te: “V̌ona, nḍi lo’nṭongo ntsena, nḍi nga ku hlamula yini? Nḍi v̌eka v̌oko ra mina e noṅwini wa mina.” (Yobo 40:2, 4) Tanihi leswi Yehovha a lulameke minkarhi hinkwayo, loko hi tshuka hi langutane ni ndzingo wa ku n’wi sola, hi fanele ‘ku veka voko ra hina enon’wini wa hina.’ Swivutiso swa Xikwembu swi tlhele swi dzunisa vukulu, xindzhuti ni matimba ya xona, leswi kombisiwaka hi ntumbuluko.
Behemoto na Levhiyatani
15. Xana Behemoto yi toloveleke tanihi xiharhi xihi, naswona hi swihi swihlawulekisi swin’wana swa xona?
15 Endzhaku ka sweswo Yehovha u vulavule hi Behemoto, leyi hi ntolovelo yi tekiwaka tanihi mpfuvu. (Yobo 40:15-24, ringanisa NW.) Xiharhi lexi xi dume hi vukulu bya xona, ntiko wa xona lowukulu, ni dzovo ra xona ro tsindziyela, xi ‘dya byanyi bya rihlaza.’ Xihlovo xa matimba ni ntamu wa xona swi le swisutini ni le misiheni ya khwiri ra xona. Marhambu ya milenge ya xona ma tiye ku fana ni “timpompi ta kopor.” Behemoto a yi chavisiwi hi maboboma ya mati kambe yi hlambela hi ku olova yi langutane ni gandlati.
16. (a) Nhlamuselo ya Levhiyatani yi fanela xivumbiwa xihi, naswona hi yihi mintiyiso yin’wana ha xona? (b) Matimba ya Behemoto ni Levhiyatani ma nga ha kombisa yini malunghana ni ku hetisisa swiavelo entirhweni wa Yehovha?
16 Xikwembu xi tlhele xi vutisa Yobo xi ku: “Šana u nga phasa ngwenya [Levhiyatani, NW] hi nḍov̌o? U nga boha ririmi ra yona hi ngole-ke?” Nhlamuselo ya Levhiyatani yi fanela ngwenya. (Yobo 41:1-34) A yi nge endli ntwanano wa ku rhula ni munhu, naswona ku hava munhu wo tlhariha loyi a nga tiyelaka ku tlhontlha xikokovi lexi. Miseve a yi yi hlongoli, naswona “yi hleka ku ntŝiririka ka matlhari.” Levhiyatani leyi bongaka yi pfindlusa xidziva ku fana ni mbita ya mirhi ya risuna leyi vilaka. Ntiyiso wa leswaku Levhiyatani ni Behemoto a swi ri ni matimba lamakulu ku tlula Yobo wu n’wi pfune leswaku a titsongahata. Na hina hi fanele hi pfumela hi ku titsongahata leswaku a hi na ntamu. Hi lava vutlharhi ni matimba lama humaka eka Xikwembu leswaku hi hlula miseve ya Sathana, Nyoka, ni ku hetisisa swiavelo swa hina entirhweni wa Yehovha.—Vafilipiya 4:13; Nhlavutelo 12:9.
17. (a) Xana Yobo u ‘vone Xikwembu’ hi ndlela yihi? (b) I yini lexi kombisiweke hi swivutiso leswi Yobo a tsandzekeke ku swi hlamula, naswona xana leswi swi nga hi pfuna njhani?
17 Loko a tsongahatiwe hi ku helela, Yobo u amukele mavonelo yakwe lama hoxeke naswona u pfumerile leswaku u vulavule handle ka vutivi. Kambe, u phofule ripfumelo ra leswaku a ta “v̌ona Šikwembu.” (Yobo 19:25-27) Xana sweswo a swi ta endlekisa ku yini, tanihi leswi ku nga riki na munhu loyi a nga vonaka Yehovha a vuya a hanya? (Eksoda 33:20) Kahle-kahle, Yobo u vone ku kombisiwa ka matimba ya Xikwembu, a twa rito ra Xikwembu, naswona mahlo yakwe ya ku twisisa ma pfuriwile leswaku a vona ntiyiso malunghana na Yehovha. Hikwalaho Yobo u ‘tisorile, a hundzuka a ri entshurini ni le nkumeni.’ (Yobo 42:1-6) Swivutiso swo tala leswi a hlulekeke ku swi hlamula swi kombisa vukulu bya Xikwembu naswona swi kombisa vutsongo bya munhu, hambi loyi a tinyiketeleke eka Yehovha ku kotisa Yobo. Leswi swi hi pfuna ku vona leswaku swilaveko swa hina a swi fanelanga swi rhangisiwa emahlweni ka ku kwetsimisiwa ka vito ra Yehovha ni ku lweriwa ka vuhosi bya yena. (Matewu 6:9, 10) Hi fanele hi tikarhatela ngopfu ku hlayisa vutshembeki eka Yehovha ni ku dzunisa vito ra yena.
18. Xana vachaveleri va Yobo va mavunwa va boheke ku endla yini?
18 Kambe, ku vuriwa yini hi vachaveleri va mavunwa lava a va tivona va lulamile? Yehovha a a ta swi kota ku dlaya Elifasi, Bilidada na Sofara hi ku ka va nga vulavulanga ntiyiso ha yena, ku hambana na Yobo. Xikwembu xi te: “Humesani tinkunzi ta ntlhanu na timbiri, ni makhuna ya ntlhanu na mambiri, mi ya ka nanḍa wa mina Yobo, mi ya titlhav̌ela maganḍelo, kutani Yobo, nanḍa wa mina, o ta mi khongelela.” Vavanuna lavanharhu va boheke ku titsongahata leswaku va endla sweswo. Yobo loyi a hlayisa vutshembeki a fanele ku va khongelela, naswona Yehovha u amukele xikhongelo xa yena. (Yobo 42:7-9) Kambe ku vuriwa yini hi nsati wa Yobo, loyi a n’wi khutazeke leswaku a rhukana Xikwembu, a fa? Swi tikomba onge u vuyelelane na yena hi tintswalo ta Xikwembu.
Tihakelo Leti Tshembisiweke Ti Hi Nyika Ntshembo
19. Malunghana na Yobo, xana Yehovha u byi kombise njhani vukulukumba bya Yena ehenhla ka Diyavulosi?
19 Endzhakunyana ka loko Yobo a tshike ku vilela hi maxangu yakwe, a tlhela a kuma matimba entirhweni wa Xikwembu, Yehovha u hundzule swiyimo swa yena. Kute loko Yobo a hete ku khongelela vavanuna lavanharhu, Xikwembu ‘xi n’wi humesa eku bohiweni ka yena’ kutani xi n’wi nyika ‘hinkwaswo leswi a a ri na swona swi andzisiwe kambirhi.’ Yehovha u kombise vukulu bya Yena ehenhla ka Diyavulosi hi ku sivela voko ra Sathana leri vangaka vuvabyi ivi a hanyisa Yobo hi hlori. Xikwembu xi tlhele xi hlongola ntshungu wa mademona, xi ma sivela hi ku tlhela xi sirhelela Yobo hi ku veka rihlampfu ra tintsumi ta xona.—Yobo 42:10; Pisalema 34:7.
20. Xana Yehovha u hakele ni ku katekisa Yobo hi tindlela tihi?
20 Vamakwavo va Yobo va xinuna ni va xisati, ni vanakulobye va khale a va hamba va ta dya na yena, va n’wi tiyisa, ni ku n’wi chavelela ekhombyeni leri Yehovha a pfumeleke leswaku ri n’wi wela. Un’wana ni un’wana wa vona u nyike Yobo mali ni sindza ra nsuku. Yehovha u katekise makumu ya Yobo ku tlula masungulo ya yena, kutani a va ni tinyimpfu ta 14 000, tikamela ta 6 000, ni swipani swa tihomu swa 1 000, ni timbhongolo ta matswele ta 1 000. Nakambe Yobo u ve ni majaha ya nkombo ni vanhwana vanharhu, ku nga nhlayo leyi a ri na yona eku sunguleni. Vanhwana va yena—Yemima, Kesiya na Kreni-Hapuku—a va ri vavasati vo xonga ku tlula hinkwavo etikweni, naswona Yobo u va pambulele ndzhaka exikarhi ka vamakwavo. (Yobo 42:11-15) Ku tlula kwalaho, Yobo u hanye malembe man’wana ya 140 a tlhela a vona tinxaka ta vumune ta vatukulu vakwe. Mhaka yakwe yi gimeta hi ku: “Yobo a fa a dyuhele, a talele hi masiku.” (Yobo 42:16, 17) Ku lehisiwa ka vutomi byakwe a ku ri xiendlo lexi hlamarisaka xa Yehovha Xikwembu.
21. Xana hi pfuniwa njhani hi mhaka ya Matsalwa leyi khumbaka Yobo, naswona hi fanele hi tiyimisela ku endla yini?
21 Mhaka ya Matsalwa malunghana na Yobo yi hi endla hi ma xiya kahle marhengu ya Sathana, yi tlhela yi hi pfuna ku vona ndlela leyi vuhosi bya vuako hinkwabyo byi yelanaka ha yona ni vutshembeki bya munhu. Ku kotisa Yobo, hinkwavo lava rhandzaka Xikwembu va ta ringiwa. Kambe hi nga swi kota ku tiyisela hi laha Yobo a endleke ha kona. U hlule miringo yakwe hi ripfumelo ni ntshembo, naswona tihakelo takwe a ti tele. Tanihi malandza ya Yehovha namuntlha, hi ni ripfumelo ni ntshembo wa ntiyiso. Naswona ku ni ntshembo lowukulu swonghasi lowu Muhakeri Lonkulu a wu vekeke emahlweni ka hina hinkwerhu! Ku tsundzuka hakelo ya le tilweni swi ta pfuna vatotiwa leswaku va tirhela Xikwembu hi ku tshembeka evuton’wini bya vona hinkwabyo emisaveni. Vunyingi lebyi nga ni ntshembo wa laha misaveni byi nga ka byi nga fi, kambe lava faka va ta hakeriwa hi ku pfuxeriwa eParadeyisini emisaveni, kun’we na Yobo hi byakwe. Va ri ni ntshembo wolowo wa ntiyiso embilwini ni le mianakanyweni, onge hinkwavo lava rhandzaka Xikwembu va nga kombisa vunwa bya Sathana hi ku yima va tiyile etlhelweni ra Yehovha tanihi vahlayisi va vutshembeki ni vaseketeri lava tiyeke va vuhosi bya yena bya vuako hinkwabyo.
A Wu Ta Hlamurisa Ku Yini?
◻ Hi tihi tinhla tin’wana leti boxiweke hi Yobo enhlamulweni yakwe yo hetelela eka vachaveleri va yena va mavunwa?
◻ Xana Elihu a ri mbhoni ya Yehovha leyi nga yiki hi nghohe hi ndlela yihi?
◻ Hi swihi swivutiso swin’wana swa Xikwembu eka Yobo, naswona xana swi n’wi khumbe njhani?
◻ Xana u pfuneke njhani emhakeni ya Matsalwa ya Yobo?
[Swifaniso leswi nga eka tluka 18]
Marito ya Yehovha malunghana ni Behemoto ni Levhiyatani ma pfune Yobo leswaku a titsongahata