Ku Hlanganisiwa Hi Xiboho Lexi Hetisekeke Xa Rirhandzu

“Khomana[ni] swin’we hi rirhandzu.”—VAKOLOSA 2:2.

1, 2. Hi wihi nkucetelo lowu vangaka ku avana loku nga kona namuntlha?

TWANANI! Rito lerikulu ri pfuma ri huma etilweni ri ku: “Mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” (Nhlavutelo 12:12) Loko ku hundza lembe rin’wana ni rin’wana, rungula rero ri ya ri pfuxa ku chava lokukulu eka vaaki va misava.

² Nala lonkulu wa Yehovha i khale a tiviwa tanihi mukaneti (Sathana) ni mulumbeti (Diyavulosi). Kambe mukanganyisi loyi sweswi u teka xiyimo xin’wana xo biha—u hundzuke xikwembu lexi hlundzukeke! Ha yini? Hikuva u cukumetiwile etilweni hi Mikayele ni tintsumi ta yena enyimpini leyi tlhekekeke etilweni hi 1914. (Nhlavutelo 12:7-9) Diyavulosi wa swi tiva leswaku u ni nkarhi wo koma swinene leswaku a kombisa ntlhontlho wakwe wa leswaku a nga susa vanhu hinkwavo evugandzerini bya Xikwembu. (Yobo 1:11; 2:4, 5) Leswi a nga riki na vuchavelo, yena ni mademona yakwe va fana ni tinyoxi leti kariheke leti lumaka mintshungu ya vanhu leyi kayakayaka.—Esaya 57:20.

3. Xana hi wihi mbuyelo wa ku cukumetiwa ka Sathana enkarhini wa hina?

³ Swiendlakalo leswi, leswi nga vonakiki emahlweni ya vanhu, swi hlamusela leswaku ha yini sweswi ku va ni ku hohloka ka mahanyelo exikarhi ka vanhu. Swi tlhela swi hlamusela matshalatshala ya ku chivirikela ka vanhu ku hlanganisa matiko lama avanaka, lama nga swi kotiki ku hanya hi ntwanano. Mintlawa ya swivongo ni ya tinxaka yi hlaselana hi matimba, yi vanga vanhu vo tala leswaku va pfumala makaya ni ku va susa etindhawini ta vona. A swi hlamarisi leswi vuhomboloki byi andzaka hi mpimo lowu nga si tshamaka wu va kona! Hi laha Yesu a vhumbheke ha kona, ‘rirhandzu ra vanhu vo tala ra hola.’ Hinkwako laha u langutaka kona, u vona vanhu lava kayakayaka lava pfumalaka ntwanano ni rirhandzu.—Matewu 24:12.

4. Ha yini vanhu va Xikwembu va ri ekhombyeni lerikulu?

⁴ Loko hi languta xiyimo xa misava, xikhongelo xa Yesu lexi a xi endleleke valandzeri vakwe xi va xa nkoka swinene: “A ndzi kombeli leswaku u va susa emisaveni, kambe hi leswaku u va lwela eka Lowo biha. A hi va misava, tanihi leswi na mina ndzi nga riki wa misava.” (Yohane 17:15, 16) Namuntlha, “Lowo biha” u karihela ngopfu “lava hlayisaka milawu ya Xikwembu ni ku humesa vumbhoni bya Yesu.” (Nhlavutelo 12:17) Loko a ku nga ri hikwalaho ka nkhathalelo wa Yehovha lowu rindzaka ni wa rirhandzu, Timbhoni takwe to tshembeka a ti ta va ti nga ha ri kona. Vutomi bya hina byi titshege hi ku tirhisa ka hina malunghiselelo lawa Xikwembu xi ma endlaka leswaku hi hlayiseka ni ku tiya emoyeni. Sweswo swi katsa ku tikarhata ka hina hi ku ya hi matirhelo ya matimba ya xona ha Kreste, hi laha muapostola a tsundzuxeke ha kona eka Vakolosa 1:29.

5, 6. Xana muapostola Pawulo u titwe njhani hi Vakreste va le Kolosa, naswona ha yini ndzimana ya nhloko-mhaka ya 1995 yi fanerile?

⁵ Hambi leswi kumbexana Pawulo a nga si tshama a va vona, a a rhandza vamakwavo va le Kolosa. U va byele leswi: “Ndzi navela onge mi nga twisisa hi laha ndzi karhatekaka ngopfu ha kona ha n’wina.” (Vakolosa 2:1, The New Testament in Modern English, hi J. B. Phillips) Tanihi leswi valandzeri va Yesu va nga riki xiphemu xa misava, “Lowo biha” u ta hambeta a ringeta ku dlaya vun’we bya vamakwerhu hi ku byala moya wa misava exikarhi ka vona. Mahungu lawa Epafrasi a ma tiseke ma huma hi le Kolosa ma kombise leswaku leswi a swi endleka hi ndlela yo karhi.

⁶ Ku khumbeka kun’wana ka Pawulo hi vamakwavo va Vakreste ku nga phofuriwa hi marito lawa: “Khomana[ni] swin’we hi rirhandzu.” Marito yakwe ma ni nhlamuselo ya nkoka namuntlha, emisaveni leyi teleke ku avana ni ku pfumala rirhandzu. Loko hi yingisa xitsundzuxo xa Pawulo, hi ta kuma nkhathalelo wa Yehovha. Hi ta tlhela hi kuma matimba ya moya wa yena evuton’wini bya hina, ma hi pfuna ku papalata mintshikilelo ya misava. Ndzayo leyi i ya vutlharhi hakunene! Xisweswo, Vakolosa 2:2 yi ta va ndzimana ya nhloko-mhaka ya 1995.

7. Hi wihi ntwanano lowu faneleke ku va kona exikarhi ka Vakreste va ntiyiso?

⁷ Epapileni ro sungula leri yaka eka Vakorinto, muapostola u tirhise miri wa munhu tanihi xikombiso. U tsale leswaku “ku nga vi na ku avana” evandlheni ra Vakreste lava totiweke kambe leswaku “swirho hinkwaswo swi tirhelana.” (1 Vakorinto 12:12, 24, 25) Mawaku xikombiso xo saseka swonghasi! Swirho swa hina swa tirhelana, hinkwaswo swi hlangane ni miri wa hina hinkwawo. Leswi swi tano ni hi nhlengeletano ya hina ya vamakwerhu va misava hinkwayo leyi vumbiwaka hi vatotiwa ni timiliyoni ta lava nga ni ntshembo wa ku hanya emisaveni ya paradeyisi. A hi fanelanga hi tihambanisa ni nhlengeletano ya Vakreste-kulorhi hi hanya hi ri swerhu! Hi ku tirhisa Kreste Yesu, moya wa Xikwembu wu hungela eka hina hi mpimo lowukulu hi ku tihlanganisa ka hina ni vamakwerhu.

Ntwanano Wu Fambisana Ni Vutivi

8, 9. (a) I yini leswi nga swa nkoka leswaku hi kota ku hoxa xandla eka ntwanano wa vandlha? (b) Xana u byi kumise ku yini vutivi malunghana na Kreste?

⁸ Yin’wana ya tinhla-nkulu ta Pawulo a ku ri leswaku ntwanano wa Vukreste wu fambisana ni vutivi, ngopfu-ngopfu lebyi khumbaka Kreste. Pawulo u tsale leswaku Vakreste va fanele “va khomana swin’we hi rirhandzu, kutani va ta fumisiwa hi matlhelo hinkwawo hi ku nyikiwa ku twisisa loku hetisekeke, leswaku va tiva xihundla xa Xikwembu, a nga Kriste.” (Vakolosa 2:2) Hi kume vutivi—ntiyiso—ku sukela loko hi sungule ku dyondza Rito ra Xikwembu. Tanihi xiphemu xa ku twisisa ndlela leyi vunyingi bya ntiyiso lowu byi nghenaka ha yona exikongomelweni xa Xikwembu, hi twisisa xiphemu xa nkoka xa Yesu. “Eka yena ku tumbetiwile rifuwo hinkwaro ra vutlhari ni ra vutivi.”—Vakolosa 2:3.

⁹ Xana u titwa hi ndlela yoleyo hi Yesu ni xiphemu xakwe exikongomelweni xa Xikwembu? Vanhu vo tala eVujaganini va rhandza ku vulavula hi Yesu, va vula leswaku va n’wi amukerile ni leswaku va ponisiwile. Kambe xana va n’wi tiva hakunene? Nikatsongo, hikuva vo tala va vona va pfumela eka dyondzo ya Vunharhu-un’we leyi nga riki ya Matsalwa. Wena u tiva ntiyiso wa mhaka leyi naswona u ni vutivi lebyi engetelekeke bya leswi Yesu a swi vuleke ni ku swi endla. Vanhu va timiliyoni va pfuniwile leswaku va byi kuma hi dyondzo leyi dyondzisaka, hi ku tirhisa buku leyi nge Nghwazi Leyi Tshameke Yi Hanya. Kambe hi fanele hi ya emahlweni hi entisa vutivi bya hina malunghana na Yesu ni tindlela ta yena.

10. Xana vutivi lebyi tumbeleke hi byi kumisa ku yini?

¹⁰ Marito lama nge “rifuwo hinkwaro ra vutlhari ni ra vutivi” swi “tumbetiwile” eka Yesu a ma vuli leswaku vutivi byo tano a swi koteki ku byi kuma. Ematshan’weni ya sweswo, byi fana ni mugodi lowu pfulekeke. A hi boheki ku lavisisa endhawini leyikulu hi nga ku tivi lomu hi nga sungulaka kona ku cela. Ana se ha swi tiva—leswaku vutivi bya ntiyiso byi sungula eka leswi Bibele yi swi paluxaka hi Yesu Kreste. Loko hi ya hi xi twisisa kahle xiphemu xa Yesu eku hetisekeni ka xikongomelo xa Yehovha, hi kuma rifuwo ra vutivi bya ntiyiso ni vutivi lebyi kongomeke. Kutani leswi hi faneleke ku swi endla i ku cela hi vuenti, hi hakuta rifuwo kumbe swilo swin’wana swa risima leswi kumekaka exihlobyeni lexi se hi xi celeke.—Swivuriso 2:1-5.

11. Xana hi nga byi kurisa njhani vutivi ni vutlharhi bya hina hi ku anakanyisisa hi Yesu? (Kombisa hi Yesu loko a hlantswa milenge ya vadyondzisiwa kumbe u tirhisa swikombiso swin’wana.)

¹¹ Hi xikombiso, ha swi tiva leswaku Yesu u hlantswe milenge ya vaapostola vakwe. (Yohane 13:1-20) Kambe, xana hi tshame hi anakanyisisa hi dyondzo leyi a a dyondzisa yona ni langutelo leri a ri kombiseke? Loko hi endla tano, hi nga ha hakuta rifuwo ra vutivi lebyi hi pfunaka—ina, lebyi hi susumetelaka—ku cinca ndlela leyi hi hanyisanaka ha yona ni makwerhu wa xinuna kumbe wa xisati loyi ku nga khale hi nga tsakisiwi hi vumunhu byakwe. Kumbe loko hi nyikiwa xiavelo lexi hi nga xi rhandziki ngopfu, hi nga ha xi languta hi ndlela leyi hambaneke endzhaku ko twisisa mongo hinkwawo wa Yohane 13:14, 15. Leyi hi yona ndlela leyi vutivi ni vutlharhi swi hi khumbaka ha yona. Xana van’wana va nga khumbeka njhani loko hi ya hi fambisana swinene ni vutivi bya Kreste hi laha ku engetelekeke? Swi le rivaleni leswaku ntlhambi wu ta ‘khomana swin’we hi rirhandzu.’a

Ku Hambuka Ku Nga Dlaya Ntwanano

12. Xana hi fanele ku tivonela eka vutivi byihi?

¹² Loko vutivi lebyi kongomeke byi endla leswaku hi ‘khomana swin’we hi rirhandzu,’ xana “leswi hi ndlela leyi hoxeke swi vuriwaka ‘vutivi’” swi tisa yini? Swi tisa leswi hambaneke—timholovo, ku avana ni ku hambuka eripfumelweni. Kutani hi fanele hi tivonela eka vutivi byo tano bya mavunwa, hi laha Pawulo a tsundzuxeke Timotiya ha kona. (1 Timotiya 6:20, 21) Pawulo u tlhele a tsala a ku: “Ndzi vula leswi leswaku ku nga vi na loyi a mi kanganyisaka hi marito lama ringetaka ku mi khorwisa. Chavani leswaku munhu a nga mi phasi hi tidyondzo ta vutlhari, hi marito ya vunwa lama nga pfuniki nchumu, lama humaka eka mintolovelo ya vanhu ni ka mimoya leyi fumaka misava leyi, ku nga ri eka Kriste.”—Vakolosa 2:4, 8.

13, 14. (a) Ha yini vamakwerhu va le Kolosa a va ri ekhombyeni malunghana ni vutivi? (b) Ha yini van’wana namuntlha va nga ha anakanyaka leswaku a va langutananga na rona khombo leri fanaka?

¹³ Vakreste va le Kolosa a va rhendzeriwe hi nkucetelo lowu kanganyisaka lowu fanaka ni leswi vuriwaka vutivi. Vanhu vo tala va le Kolosa ni le kusuhi na kona a va va xixima swinene vativi va filosofi va Magriki. Nakambe a ku ri ni Vayuda lava a va lava leswaku Vakreste va hlayisa Nawu wa Muxe, tanihi masiku ya minkhuvo ni swilaveko swa swakudya. (Vakolosa 2:11, 16, 17) Pawulo a a nga vuli swona leswaku vamakwavo a va nga fanelanga ku kuma vutivi bya ntiyiso, kambe a va fanele ku tivonela leswaku va nga phasiwi hi munhu, loyi a tirhisaka marito yo kucetela a va khorwisa leswaku va teka langutelo ra munhu hi vutomi ni swiendlo swakwe. U nga swi xiya leswaku loko van’wana evandlheni va pfumelela mianakanyo ya vona ni swiboho swa vona swi lawuriwa hi miehleketo ni mavonelo ya vutomi lama nga riki ya Matsalwa, swi nga lwisana ni ntwanano ni rirhandzu exikarhi ka swirho swa vandlha.

¹⁴ U nga ha ku, ‘Ina, ndza ri vona khombo leri Vakolosa a va langutane na rona, kambe mina a ndzi langutananga ni khombo ro kuceteriwa hi mianakanyo ya Vagriki, yo tanihi moya-xiviri lowu nga fiki kumbe xikwembu xa vunharhu-un’we; naswona a ndzi ri voni khombo ra ku kuceteriwa hi tiholideyi ta vuhedeni ta vukhongeri bya mavunwa lebyi ndzi humeke eka byona.’ Hi swona. I swinene ku khorwiseka hi vukulu bya ntiyiso wa xisekelo lowu paluxiweke hi Yesu ni lowu kumekaka eMatsalweni. Hambi swi ri tano, xana swi nga ha endleka leswaku, hi langutane ni khombo ra tifilosofi tin’wana kumbe mavonelo ya vanhu lama andzeke namuntlha?

15, 16. Hi rihi langutelo ra vutomi leri ri nga ha khumbaka mianakanyo ya Mukreste?

¹⁵ Langutelo rin’wana ro tano i khale ri ri kona: “Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona.” (2 Petro 3:4) Mongo lowu wu nga ha vekiwa hi marito man’wana, kambe langutelo ra kona ra fana. Hi xikombiso, van’wana va nga ha ku, ‘Loko ndzi sungula ku dyondza ntiyiso eka makume ya malembe lama hundzeke, makumu a ma ri “kwala nyongeni.” Kambe a ma si fika ni sweswi, naswona i mani loyi a tivaka leswaku ma ta fika rini?’ I ntiyiso leswaku a nga kona munhu loyi a tivaka leswaku makumu ma ta fika rini. Kambe, xiya langutelo leri Yesu a hi khutazeke leswaku hi va na rona: “Tlharihani mi hiteka, hikuva a mi tivi leswaku nkarhi wu ta va rini.”—Marka 13:32, 33.

¹⁶ Hi nga weriwa hi khombo lerikulu loko ho va ni langutelo ra leswaku leswi hi nga wu tiviki nkarhi lowu makumu ma nga ta fika ha wona, hi fanele hi kunguhatela vutomi lebyi heleleke ni lebyi “tolovelekeke”! Ndlela yoleyo yi nga ha kombisiwa hi mianakanyo ya leswaku, ‘Ndzi nga ha teka magoza lawa ma nga pfumelelaka mina (kumbe vana va mina) leswaku ndzi va ni ntirho-vutomi lowunene lowu holelaka kahle naswona wu nga ndzi pfuna leswaku ndzi tiphina hi vutomi lebyi tsakisaka. Ina, ndzi ta ya eminhlanganweni ya Vukreste ni ku hlanganyela entirhweni wo chumayela, kambe ku hava xivangelo xa leswaku ndzi tikarhata ngopfu kumbe ndzi titsona swilo swo tala.’—Matewu 24:38-42.

17, 18. Hi rihi langutelo leri Yesu ni vaapostola va hi khutazeke leswaku hi va na rona?

¹⁷ Hambi swi ri tano, a hi nge swi kaneti leswaku Yesu ni vaapostola vakwe va hi khutaze leswaku hi hanya hi ku hitekela ku chumayeriwa ka mahungu lamanene, hi ku tinyiketela ni ku tiyimisela ku titsona swin’wana. Pawulo u tsarile: “Ndzi mi byela mhaka leyi, vamakwerhu: Nkarhi a wa ha ri kona. Ku sukela sweswi, lava nga ni vasati va fanele ku endla wonge hi loko va nga ri na vona; . . . ni lava xavaka wonge hi loko va nga ri na nchumu; ni lava tirhisanaka ni swa misava leyi a va ve tanihi loko va nga tirhisani na swona; hikuva misava leyi ni swa yona hinkwaswo swa hundza.”—1 Vakorinto 7:29-31; Luka 13:23, 24; Vafilipiya 3:13-15; Vakolosa 1:29; 1 Timotiya 4:10; 2 Timotiya 2:4; Nhlavutelo 22:20.

¹⁸ Pawulo a nga kalanga a ringanyeta leswaku hi endla vutomi lebyinene byi va pakani ya hina, ehansi ka ku huhuteriwa u tsale a ku: “A hi tanga na nchumu emisaveni, naswona hi nga ka hi nga fambi na nchumu, loko hi suka kwala misaveni. Hikokwalaho, loko hi ri ni swakudya ni tinguvu, hi ta kolwa hi swona. . . . Lwana nyimpi leyinene ya ku pfumela; tamela hi mandla mambirhi vutomi lebyi nga heriki, lebyi u nga vitaniwa hikwalaho ka byona ni ku veka vumbhoni lebyinene ehenhla ka byona, emahlweni ka vanhu lavo tala lava nga ku twa.”—1 Timotiya 6:7-12.

19. Xana vandlha ri khumbeka njhani loko lava nga eka rona va amukela langutelo ra vutomi leri Yesu a ri khutazeke?

¹⁹ Loko vandlha ri ri ni Vakreste lava hisekaka lava tikarhatelaka ku ‘vulavula kahle erivaleni,’ ntwanano wu va kona. A va ngheniwi hi ku olova hi langutelo ra leswaku, ‘U ni swilo swo tala leswinene leswi hlengeletiweke malembe yo tala; wisa, u dya, u nwa, u tiphina.’ (Luka 12:19) Ematshan’weni ya sweswo, va endla matshalatshala lama fanaka hi vun’we, va tiyimisela ku titsona swilo swin’wana leswaku va hlanganyela hi xitalo hi laha swi kotekaka ha kona entirhweni lowu nga taka wu nga phindhiwi.—Ringanisa Vafilipiya 1:27, 28.

Hi Fanele Ku Tivonela Eka Marito Lama Khorwisaka

20. Hi kwihi kun’wana laha Vakreste va nga ha hambukisiwaka kona?

²⁰ I ntiyiso leswaku ku ni tindlela tin’wana leti Vakreste va nga ha ‘hambukisiwaka ha tona hi marito lama kucetelaka’ kumbe vukanganyisi lebyi nga pfuniki nchumu lebyi onhaka ku “khomana swin’we hi rirhandzu.” Hofisi ya Sosayiti ya Watch Tower ya le Jarimani yi tsale yi ku: “Ku ve ni mhaka yin’wana leyi pfuxeke njhekanjhekisano laha, vahuweleri ku katsa ni vakulu a va seketela matlhelo yo hambana malunghana ni vutshunguri lebyi tirhisiweke hi makwerhu wo karhi.” Va engetele va ku: “Hikwalaho ka tindlela to hambana-hambana leti nga kona leti tirhisiwaka ni nhlayo leyikulu ya vavabyi, leyi i mhaka ya njhekanjhekisano, naswona loko tindlela ta vutshunguri ti katsa ni moya wa vungoma, ti nga ha va ni khombo.”—Vaefesa 6:12.

21. Xana Mukreste a nga lahlekeriwa njhani hi langutelo lerinene namuntlha?

²¹ Vakreste va lava ku hanya ni ku va ni rihanyo lerinene leswaku va kota ku gandzela Xikwembu. Hambi swi ri tano, emafambiselweni lawa hi langutane ni ku dyuhala ni vuvabyi, leswi vangiwaka hi ku nga hetiseki. Ematshan’weni yo kandziyisa timhaka ta rihanyo, hi fanele ku languta ntlhantlho wa xiviri, wa hina ni wa van’wana. (1 Timotiya 4:16) Kreste hi yena xihlovo xa ntlhantlho wolowo, tanihi leswi a ri xihlovo xa ndzayo ya Pawulo leyi yaka eka Vakolosa. Kambe tsundzuka, Pawulo u kombise leswaku van’wana va nga ha ta ni ‘marito yo khorwisa’ va susa nyingiso wa hina eka Kreste, kumbexana va hi yisa eka tindlela to kambela mavabyi, ta vutshunguri kumbe ta madyelo.—Vakolosa 2:2-4.

22. Hi rihi langutelo leri ringaneleke leri hi faneleke hi va na rona malunghana ni mavonelo yo tala lama khumbaka tindlela to kambela mavabyi ni vutshunguri?

²² Emisaveni hinkwayo vanhu va kuma swinavetisi ni marito yo bumabumela vutshunguri bya tinxaka leti nga kona hinkwato ni tindlela ta ku kambela mavabyi. Tin’wana ta tona ti tirhisiwa ngopfu ni ku amukeriwa; tin’wana ti soriwa ngopfu kumbe a va ti tshembi.b Munhu un’wana ni un’wana u fanele ku vona leswaku u endla yini hi rihanyo rakwe. Kambe lava amukelaka ndzayo ya Pawulo leyi kumekaka eka Vakolosa 2:4, 8 va ta sirheleleka leswaku va nga hambukisiwi hi ‘marito yo khorwisa’ kumbe ‘vukanganyisi lebyi nga pfuniki nchumu’ lebyi lahlekisaka vo tala lava va lavaka ku pfuniwa, hi ku pfumala ntshembo wa Mfumo. Hambi loko Mukreste a kholwa leswaku vutshunguri byo karhi byi tikomba byi ri byinene eka yena, a nga fanelanga a byi bumabumela eka vamakwavo va Vukreste, hikuva byi nga ha va mhaka leyi hangalakaka ni ku va njhekanjhekisano. Xisweswo a nga kombisa leswaku u wu xixima swinene nkoka wa ntwanano evandlheni.

23. Ha yini hi ri ni xivangelo lexikulu xo tsaka?

²³ Pawulo u kandziyise leswaku ntwanano wa Vukreste i xisekelo xa ntsako wa xiviri. Enkarhini wakwe nhlayo ya mavandlha a yi ri yitsongo swinene eka ya namuntlha. Kambe u tsalele Vakolosa a ku: “Hambi ndzi nga ri kona hi miri, hi moya ndzi na n’wina, ndzi ri karhi ndzi tsakela ku vona mahanyelo ya n’wina layo lulama, ni ku tiya ka n’wina eku pfumeleni ka n’wina eka Kriste.” (Vakolosa 2:5; nakambe vona Vakolosa 3:14.) Hi ni xivangelo lexikulu xo tsaka hakunene! Hi nga ha vona vumbhoni bya ntiyiso bya ntwanano, nhleleko lowunene ni ku tiya eripfumelweni evandlheni ra ka hina, leswi kombisaka xiyimo lexi tolovelekeke xa vanhu va Xikwembu emisaveni hinkwayo. Kutani eka nkarhinyana wo koma lowu saleke wa mafambiselo ya sweswi, onge hinkwerhu hi nga tiyimisela ku “khomana swin’we hi rirhandzu.”

[Tinhlamuselo ta le hansi]

Xana U Swi Xiyile?

◻ Hi yihi ndzimana ya lembe ya 1995 ya Timbhoni ta Yehovha?

◻ Ha yini a swi fanerile leswaku Vakreste va le Kolosa va khomana swin’we hi rirhandzu, naswona ha yini swi fanerile eka hina namuntlha?

◻ Hi rihi langutelo leri hambukisaka ra vutomi leri Vakreste va faneleke va tivonela eka rona namuntlha?

◻ Ha yini Vakreste va fanele va xalamukela ku ka va nga hambukisiwi hi marito yo khorwisa malunghana ni rihanyo ni tindlela to kambela mavabyi?

[Swifaniso leswi nga eka tluka 17]

Xana makungu ya wena ya vumundzuku ma titshege hi vukona bya Yesu?