Ku Hlengeletana Ni Lava Xiximaka Xikwembu

“ETINDHAWINI hinkwato vanhu va navela ku ntshunxeka eka nchavo—nchavo wa madzolonga, nchavo wa ku pfumaleka ka mintirho ni nchavo wa vuvabyi lebyi nga ni matimba. Na hina hi ni ku navela ko tano. . . . Kutani, ha yini hi bula hi ndlela yo hlakulela xichavo?” Xivutiso xolexo lexi nyanyulaka xi vutisiwe hi xivulavuri xa nkulumo-nkulu eka wun’wana ni wun’wana wa Mintsombano ya Muganga ya “Ku Xixima Xikwembu” leyi sunguleke hi June 1994.

Timiliyoni ta lava hlanganyeleke—ku sungula eAmerika N’walungu, kutani ku landzela Yuropa, eAmerika Xikarhi na Dzonga, Afrika, Asia ni le swihlaleni swa lwandle—a va hisekela ku dyondza ku hlakulela xichavo xo tano. Ha yini? Hikwalaho ka leswi ku hlanganyela ka hina eka mikateko leyi Yehovha Xikwembu a yi nyikaka vanhu va yena swi titshegeke hi ku xixima Xikwembu. A ku ri ku lava ku dyondza ku chava Xikwembu leswi endleke leswaku vatsombani va hlangana swin’we, naswona enkarhini wa nongonoko wa masiku manharhu, va dyondze swo tala malunghana ni mfanelo leyi ya nkoka ya Vukreste.

‘Xixima Xikwembu, U Hlayisa Milawu Ya Xona’

Yoleyo a ku ri nhloko-mhaka ya siku ro sungula ra ntsombano, yi sekeriwe eka Eklesiasta 12:13. Xana ku xixima Xikwembu swi vula yini? Eka xiyenge xo sungula xa nongonoko, mutshama-xitulu wa ntsombano u hlamusele leswaku ku xixima Xikwembu swi kombisa xichavo lexi enteke eka Yehovha kun’we ni ku chava ku n’wi hlundzukisa. Ku xixima Xikwembu hi ndlela yo tano a swi khomisi tingana; swa pfuna naswona swi fanerile.

Xana hi nga vuyeriwa njhani hi xichavo xo tano lexi pfunaka? Nkulumo leyi landzeleke leyi nge, “Mi Nga Karhali Ivi Mi Lan’wa,” yi hlamusele leswaku ku xixima Xikwembu swi ta hi susumetela ku hlayisa milawu ya Xikwembu hi ntsako. Xikan’we ni rirhandzu eka Xikwembu ni vaakelani, ku xixima ko tano ku ta hi tiyisa hi matimba ya moya. Ina, ku xixima Xikwembu swi ta hi pfuna ku papalata ku hela matimba emphikizanweni wa vutomi lebyi nga heriki.

Lexi landzeleke enongonokweni a ku ri mimbulavurisano leyi kombiseke kahle leswaku ku xixima Xikwembu ku nga hi tiyisa. Lava va vulavurisiweke va vule ndlela leyi ku chava Xikwembu hi vuenti swi va susumeteleke ha yona ku ya emahlweni ni vutirheli ku nga khathariseki ku pfumaleka ko tsakela, ku honisiwa, kumbe ku xanisiwa naswona swi va pfunile ku tiyisela hambi loko va hlangana ni miringo leyi tikaka ya munhu hi xiyexe.

Hambi swi ri tano, hikwalaho ka yini vanhu van’wana va ri na xichavo eka Xikwembu loko van’wana va ri hava? Enkulumeni leyi nge “Ku Hlakulela Ku Xixima Xikwembu Ni Ku Pfuniwa Ha Kona,” xivulavuri xa nkulumo-nkulu xi hlamusele leswaku eka Yeremiya 32:37-39, Yehovha u tshembise leswaku U ta nyika vanhu va Yena mbilu ya ku chava Xikwembu. Yehovha u simeka ku xixima Xikwembu etimbilwini ta hina. Hi ndlela yihi? Hi ku tirhisa moya wa yena lowo kwetsima ni Rito ra yena leri huhuteriweke, Bibele. Hambi swi ri tano, handle ko kanakana hi fanele hi endla matshalatshala lamakulu yo dyondza Rito ra Xikwembu ni ku ma tirhisa swinene malunghiselelo ya moya lawa xi hi endleleke wona. Leswi swi katsa mintsombano ni minhlangano ya vandlha, leswi swi hi pfunaka ku dyondza ku xi xixima.

Nongonoko wa ni ndzhenga wu pfuriwe hi xitsundzuxo xa ku tshemba Yehovha ni Rito ra yena. Leswi swi landzeriwe hi bulo ra tindlela letikulu leti Mfumo wu faneleke wu khumba vutomi bya hina ha tona tanihi Vakreste.

Kutani ku te yin’wana ya tinkulumo tinharhu ta nxaxamelo leti nyikeriweke entsombanweni. “Ku Xixima Xikwembu Swi Hi Susumetela Ku Landzela Swilaveko Swa Xikwembu” a ku ri nhloko-mhaka ya nkulumo leyi ya nxaxamelo, leyi kokeleke nyingiso endyangwini. Lexi landzelaka i xikombiso xa Matsalwa lexi tsundzuxaka—ni lexi tirhaka—lexi nyikeriweke.

□ Eka vavanuna: Ku xixima Xikwembu swi fanele swi susumetela wanuna ku rhandza nsati wa yena ku fana ni miri wakwe. (Vaefesa 5:28, 29) Wanuna a nga ka a nga wu vavisi miri wa yena ha vomu, a nge tikhomisi tingana eka vanghana va yena, kumbe ku vulavula swo biha hi swihoxo swa yena. Kutani, u fanele ku khoma nsati wa yena hi ndlela leyi a tikhomaka ha yona ni xichavo lexi a nga na xona eka yena n’wini.

□ Eka vavasati: Ku xixima ka Yesu Xikwembu ku n’wi susumetele ‘ku endla leswi tsakisaka Xikwembu masiku hinkwawo.’ (Yohane 8:29) Lowu i moya lowunene lowu vavasati va faneleke ku wu tekelela loko va hanyisana ni vanuna va vona.

□ Eka vatswari: Vatswari va Vakreste va fanele va kombisa ku xixima Xikwembu hi ku teka vutihlamuleri bya vona bya vutswari byi ri bya nkoka, va teka vana va vona tanihi ndzhaka leyi humaka eka Yehovha. (Pisalema 127:3) Xikongomelo lexikulu xa vatswari ku fanele ku va ku kurisa vana va vona leswaku va va Vakreste va ntiyiso.

□ Eka vana: Yehovha u lerisa vana leswaku va yingisa “vatswari va [vona] hikuva hi swona leswi lulameke emahlweni ka Hosi.” (Vaefesa 6:1) Hikwalaho, ku yingisa vatswari va vona i ku yingisa Xikwembu.

Nkulumo yo hetelela ya siku yi khumbe mintlhaveko ya hina, hikuva yi boxe ku titwa loku hinkwerhu hi vaka na kona loko hi feriwa hi murhandziwa wa hina. Hambi swi ri tano, loko nkulumo yi ri exikarhi, ku ve ni xihlamariso. Xivulavuri xi tsakise vayingiseri hi ku tivisa ku humesiwa ka broxara leyintshwa leyi nge, Loko U Feriwa Hi Loyi U N’wi Rhandzaka. Nkandziyiso lowu wa matluka ya 32, wa mihlovo hinkwayo wu hlamusela swo tala leswi nga pfunaka lava nga ni gome leswaku va twisisa ni ku hlangavetana ni mintlhaveko leyi vaka kona endzhaku ka ku feriwa hi murhandziwa wa wena. Xana u tshame u titwa u nga tivi leswi u nga swi vulaka eka munhu loyi a feriweke? Xiphemu xin’wana xa broxara leyi xi hlamusela ndlela leyi hi nga va pfunaka ha yona lava feriweke. Loko va ri karhi va yingisela xivulavuri, vo tala va vayingiseri a va anakanya hi un’wana loyi a nga pfunekaka hi broxara leyi leyintshwa.

‘Endla Ntirho Wo Kwetsima Hi Ku Xixima Ni Ku Chava Xikwembu’

Leyi a ku ri nhloko-mhaka ya siku ra vumbirhi, leyi sekeriweke eka Vaheveru 12:28. Hi nkarhi wa nongonoko wa ni mixo ku landzele nkulumo ya nxaxamelo ya vumbirhi, “Mavandlha Lama Xiximaka Yehovha.” Xiyenge xo sungula xi vulavule hi ku va kona eminhlanganweni. Vukona bya hina eminhlanganweni byi kombisa ku xixima ka hina Xikwembu ni malunghiselelo ya xona ya moya. Hi ku hlanganyela, hi kombisa leswaku hi xixima vito ra xona naswona hi hisekela ku fambisana ni ku rhandza ka xona. (Vaheveru 10:24, 25) Xivulavuri xa vumbirhi xi hlamusele leswaku loko vandlha hinkwaro ri ta kota ku famba hi ku xixima Yehovha, munhu un’wana ni un’wana u fanele ku tikarhatela ku va ni mahanyelo lamanene. Xivulavuri xo hetelela xi vulavule hi lunghelo ni mfanelo leyi Mukreste un’wana ni un’wana a nga na yona—ku twarisa mahungu lamanene handle ko karhala. Xana hi ta chumayela ku fikela rini? Ku fikela loko Yehovha a vula leswaku swi ringene.—Esaya 6:11.

“Ku Tsaka Ka Yehovha I Khokholo Ra N’wina” a ku ri nhloko-mhaka ya nkulumo leyi landzeleke, hi laha yi hlanganisiweke ha kona sweswi eka swihloko swa tidyondzo eka magazini lowu. (Nehemiya 8:10) Hikwalaho ka yini vanhu va Yehovha va tsaka? Xivulavuri xi hlamusele swivangelo swo hlaya. Lexi xiyekaka ngopfu hi leswaku vuxaka lebyikulu ni Xikwembu byi hi endla hi va vanhu lava tsakeke ngopfu emisaveni. Ehleketa, xivulavuri xi tsundzuxe vatsombani xi ku, hi ni lunghelo ro va exikarhi ka vanhu lava Yehovha a va kokeleke eka Yesu Kreste. (Yohane 6:44) I xivangelo xa matimba xa ntsako hakunene!

Lexi tsakisaka ngopfu eka ntsombano wun’wana ni wun’wana i nkhuvulo, kutani ni le ka Mintsombano ya “Ku Xixima Xikwembu” swi ve tano. Enkulumeni leyi nge “Ku Tinyiketela Ni Nkhuvulo, Hi Ku Xixima Yehovha,” xivulavuri xi hlamusele leswaku ndzhwalo wa munhu hi xiyexe wa vanhu hinkwavo lava khuvuriweke wu ni swiphemu swa mune: (1) Hi fanele ku dyondza Rito ra Xikwembu hi mpfuno wa tibuku leti hi pfunaka ku ri twisisa ni ku ri tirhisa; (2) hi fanele ku khongela; (3) hi fanele ku hlangana ni vapfumeri-kulorhi eminhlanganweni ya vandlha; naswona (4) hi fanele ku nyikela vumbhoni bya vito ra Yehovha ni Mfumo wa yena.

Nongonoko wa ni ndzhenga hi Mugqivela wu sungule hi nhloko-mhaka leyi tiyisaka leyi nge “Vanhu Lava Yehovha A Nga Va Lahlangiki.” Eka malembe-xidzana ya 35 lama hundzeke, loko tiko ra Israyele ri langutane ni minkarhi yo nonon’hwa, Yehovha u va nyike xitiyisekiso hi ku tirhisa Muxe, a ku: “Yehova, Šikwembu ša wena . . . a nga ka a nga ku siyi, a nga ka a nga ku ṭhiki.” (Deteronoma 31:6) Yehovha u hetisise xitiyisekiso xolexo hi ku sirhelela Vaisrayele loko va nghena eTikweni ra Xitshembiso ni ku ri teka. Namuntlha, loko hi langutane ni miringo leyi tikaka, na hina hi nga va ni ntshembo lowu tiyeke wa leswaku Yehovha a nga ka a nga hi lahli, ntsena loko hi n’wi namarhela ni ku yingisa nkongomiso wa Rito ra yena.

Xana u nga wu kuma njhani ntsako hi ku hlaya Bibele? Enkulumeni leyi nge “Hlaya Rito Ra Xikwembu, Bibele Yo Kwetsima Siku Na Siku,” xivulavuri xi ringanyete leswaku hi hlaya hi mianakanyo yo lava ku tiva ni ku tivutisa swivutiso swo fana ni leswi: Xana mhaka leyi yi ndzi dyondzisa yini mayelana ni timfanelo ta Yehovha ni tindlela ta yena? Xana ndzi nga n’wi tekelerisa ku yini Yehovha etimhakeni leti? Ku hlaya Bibele hi ndlela leyi swa tsakisa naswona swi nyika vutivi.

Endzhaku ka sweswo nyingiso wu yisiwe eka nkulumo ya nxaxamelo ya vunharhu enongonokweni, “Malunghiselelo Yo Pfuna Lava Xiximaka Yehovha.” Hambi leswi Yehovha a nga taka a nga ma endli masingita eka malandza ya yena namuntlha, entiyisweni u nyikela mpfuno eka lava n’wi xiximaka. (2 Petro 2:9) Nkulumo leyi ya nxaxamelo yi hlamusele malunghiselelo ya mune lama humaka eka Yehovha, ya ku hi pfuna eminkarhini leyi yo nonon’hwa: (1) Hi ku tirhisa moya wa yena, Yehovha u hi nyika matimba yo hetisisa mintirho leyi tlulaka matimba ya hina. (2) Hi ku tirhisa Rito ra yena, u hi nyika xitsundzuxo ni xiletelo. (3) Hi ku tirhisa nkutsulo, u hi nyika ripfalo leri tengeke. (4) Hi ku tirhisa nhlengeletano ya yena, ku katsa ni vakulu, u hi nyika nkongomiso ni nsirhelelo. (Luka 11:13; Vaefesa 1:7; 2 Timotiya 3:16; Vaheveru 13:17) Hi ku tirhisa malunghelo lawa hi xitalo, hi ta kota ku tiyisela, hi ndlela yoleyo hi ta amukeriwa hi Yehovha.

Nkulumo yo hetelela hi Mugqivela ni ndzhenga a yi ri ni xihloko lexi nge “Siku Ra Yehovha Leri Chavisaka Ri Tshinele,” leyi a yi sekeriwe eka vuprofeta bya Malakiya. Ku tshame ku va ni masiku lama chavisaka ematin’wini lama hundzeke, tanihi le nkarhini wa ku lovisiwa ka Yerusalema hi 70 C.E. Kambe siku leri chavisaka ngopfu evuton’wini hinkwabyo bya vanhu ku ta va siku ra Yehovha leri taka loko ‘ku rihisa ku tisiwa eka lava nga tiviki Xikwembu ni lava nga yingisiki mahungu lamanene ya Hosi ya hina Yesu.’ (2 Vatesalonika 1:6-8) Xana leswi swi ta va swa xihatla hi ndlela yihi? Xivulavuri xi hlamuserile: “Makumu ma tshinele! Yehovha u tiva siku ni nkarhi wolowo. A nga ka a nga wu cinci nkarhi wa yena. Hina hi byeriwa leswaku hi tiyisela.”

A swi nonon’hwa ku tshemba leswaku masiku mambirhi se a ma hundzile. Xana siku ro hetelela a ri ta va njhani?

‘Xiximani Xikwembu, Mi Xi Dzunisa’

Nhloko-mhaka ya siku ra vunharhu a yi sekeriwe eka Nhlavutelo 14:7. Hi nkarhi wa nongonoko wa ni mixo, ntlhandlamano wa tinkulumo wu hlamusele tin’wana ta tidyondzo leti hambanisaka Timbhoni ta Yehovha ni tinhlengeletano letin’wana hinkwato ta vukhongeri.

Enkulumeni leyi nge “Ku Ta Va Ni Ku Pfuxiwa Ka Lavo Lulama,” xivulavuri xi tlakuse xivutiso lexi tsakisaka: “ESikwini ra ku Avanyisa ka gidi ra malembe, xana lavo tshembeka lava feke emalembeni lawa yo hetelela ya mafambiselo ya swilo ya Sathana va ta pfuxiwa rini?” Nhlamulo yi ve yihi? Xivulavuri xi hlamuserile: “Bibele a yi swi vuli. Hambi swi ri tano, xana a swi twali ku vula leswaku lava faka enkarhini wa hina va ta rhanga va pfuxiwa leswaku va ta hlanganyela ni ntshungu lowukulu wa lava nga ta pona Armagedoni entirhweni lowukulu wo dyondzisa lowu faneleke ku endleka eSikwini hinkwaro ra ku Avanyisa? Hakunene, i ntiyiso!” Xana ku ta va ni lava nga ta pona? Ina, va ta va kona. Tidyondzo ni swikombiso swa Bibele leswi hi tiyisekisaka swi hlamuseriwe kahle enkulumeni leyi landzeleke, “Va Ta Ponisiwa Va Ri Karhi Va Hanya Eka Nhlomulo Lowukulu.”

Timbhoni ta Yehovha i khale ti ri karhi ti twisisa leswaku Bibele yi tamele tihakelo timbirhi—vutomi lebyi nga heriki eparadeyisini emisaveni eka timiliyoni leti nga hlayekiki ni vutomi lebyi nga riki na ku fa etilweni eka nhlayo leyi pimiweke leyi nga ta fuma na Kreste eMfun’weni wa yena. Ntshembo wo ya hanya etilweni wu hlamuseriwile eka nkulumo leyi nge ‘U Nga Chavi We Ntlhambinyana.’ (Luka 12:32) Mayelana ni xiyimo xa sweswi xa misava, ntlhambinyana a wu fanelanga wu chava; un’wana ni un’wana wa vona u fanele ku tiyisela ku fikela emakumu. (Luka 21:19) Xivulavuri xi te: “Ku nga chavi ka vona, ku pfuna lava va ntshungu lowukulu. Na vona va fanele ku hlakulela mavonelo yo pfumala ku chava tanihi leswi va languteleke ku kutsuriwa esikwini ra nhlomulo lowukulu lowu nga si tshamaka wu va kona emisaveni.”

Eku heleni ka nongonoko wa ni mixo, hi ntsako vayingiseri va hlalele drama ya Bibele leyi nge Swiboho Leswi U Langutaneke Na Swona. Emasikwini ya Yoxuwa, xikan’we ni ya muprofeta Eliya, Vaisrayele a va fanele ku endla xiboho. A va fanele ku tihlawulela. Eliya u te: “Mi ta khuta hi milenge mimbiri ku yisa kwihi šana? Loko Yehova ši ri Šikwembu, ṅwi lanḍeni; kambe loko Baal ši ri Šikwembu, ṅwi lanḍeni.” (1 Tihosi 18:21) Ni namuntlha, vanhu va fanele ku endla xiboho. Lowu a hi wona nkarhi wa ku khuta hi milenge mimbirhi. Xana ku hlawula lokunene hi kwihi? Ku fana ni loku Yoxuwa wa khale a ku endleke. U te: “Loko nḍi ri mina ni yindlu ya mina, hi ta tirela Yehova.”—Yoxuwa 24:15.

Hi xitshuketa, swi vonake onge, a ku ri Sonto ni nhlikanhi naswona a ku ri nkarhi wa nkulumo ya le rivaleni leyi nge “Lexi Endlaka Leswaku U Chava Xikwembu Xa Ntiyiso Sweswi.” Eka Nhlavutelo 14:6, 7, vanhu hinkwavo va tsundzuxiwa: “Chavani Xikwembu, mi xi dzunisa.” Ha yini swi ri swa xihatla ku chava Xikwembu sweswi? Hikuva, loko tsalwa ri ya emahlweni ri ri, “nkarhi wa xona wa ku avanyisa wu fikile.” Hi ku tirhisa N’wana wa yena, loyi sweswi a vekiweke exiluvelweni tanihi Hosi ya Mfumo wa Xikwembu wa le tilweni, Yehovha u ta herisa mafambiselo ya swilo ya sweswi lama thyakeke, lama xandzukaka. Xivulavuri xi hlamusele leswaku leyi hi yona ntsena ndlela yo tisa ntshunxeko eka lava xiximaka Xikwembu swin’we ni ku kutsula ni ku hlayisa kaya ra hina ra misava. Tanihi leswi lawa ku nga masiku yo hetelela ya mafambiselo lawa ya swilo, i swa xihatla leswaku hi xixima Xikwembu xa ntiyiso sweswi!

Endzhaku ka nkatsakanyo wa dyondzo ya Xihondzo xo Rindza ya vhiki rero, xivulavuri xo hetelela xi te exitejini. Hikwalaho ka nongonoko lowu wa ntsombano, ku xixima Xikwembu swi ve swa nkoka swinene eka vatsombani. Xi kandziyise mimbuyelo yo tala leyi kumiwaka hi lava xiximaka Xikwembu. Xivulavuri xi tivise ku humesiwa ka vhidiyo leyintshwa—United by Divine Teaching. Yi kombisa swiphemu swo hlawuleka swa Mintsombano ya Matiko Hinkwawo ya “Dyondzo Ya Xikwembu” leyi khomiweke hi 1993-94. Loko nkulumo yi fika emakumu, vo tala va tivutise leswi, ‘Xana hi nga langutela yini haxawa?’ Hi nga langutela mintsombano ya miganga ya masiku manharhu etindhawini to tala.

Eku heteleleni, xivulavuri xi kombetele eka Malakiya 3:16, leyi nge: “Kwalaho la’v̌a tšhav̌aka Yehova v̌a v̌ulav̌ula kuṅwe, uṅwana ni makwav̌o, kutani Yehova a riya ndlev̌e, a yingisela; buku ya šiṭunḍušo yi ṭariwa e mahlweni ka yena, yi ṭaleriwa la’v̌a tšhav̌aka Yehova ni la’v̌a ṭunḍukaka v̌ito ra yena.” Vatsombani va fambe va ri ni ku tiyimisela loku tiyeke ko anakanya hi vito ra Yehovha ni ku n’wi tirhela hi ku n’wi xixima.

[Xifaniso lexi nga eka tluka 24]

Lava khuvuriwaka va lava ku ya emahlweni va kombisa ku xixima Xikwembu

[Xifaniso lexi nga eka tluka 25]

Drama leyi nge “Swiboho Leswi U Langutaneke Na Swona” yi kombise vayingiseri xilaveko xo endla xiboho xo tirhela Yehovha

[Xifaniso lexi nga eka tluka 26]

Vatsombani va tsakisiwe hi ku kuma broxara leyintshwa leyi nge “Loko U Feriwa Hi Loyi U N’wi Rhandzaka”