Vukhongeri Bya Wena—Xana I Ngalava Leyi U Nga Fanelangiki Ku Huma Eka Yona?

NGALAVA yi le xikarhi ka xidzedze lexi tinyikeke matimba. Ntlawa wa vatluti lowu lwaka hi matimba ya wona hinkwawo ku ponisa xikepe xa wona, wu langutane ni xiboho lexi nonon’hwaka: ku tshama engalaveni kumbe ku huma engalaveni leswaku va tiponisa. Xana a wu swi tiva leswaku xivono lexi xo chavisa xi tirhisiwa tanihi xifaniso xo fanekisela vukhongeri ke?

Vafundhisi, ngopfu-ngopfu swidyondzi swa Khatoliki, hakanyingi va fanisa kereke ya vona ni ngalava leyi langutaneke ni mheho. Va vula leswaku ngalava leyi, leyi lawulaka hi Yesu kumbe Petro, yi fanekisela ndlela yi ri yoxe yo pona. Vafundhisi va swi languta hi ndlela leyi, ‘U nga tshuki u huma engalaveni. Kereke yi tshame yi langutana ni minkitsinkitsi leyikulu, naswona i ngalava leyi tiyiseleleke swidzedze hinkwaswo ematin’wini.’ Van’wana va ri, ‘Ha yini u huma u yi sukela? U ta ya kwihi? Ha yini u nga tshami ivi u pfuneta ku yi yisa ematini yo rhulanyana ke?’

Hi ku twanana ni ririmi leri ro fanekisela, vanhu vo tala, lava hlanganyelaka eka mikhuva hinkwayo ya vukhongeri, va anakanya hi ndlela leyi, ‘Ndza swi tiva leswaku vukhongeri bya mina byi hoxile eka swilo swo tala, kambe ndzi tshemba leswaku byi ta cinca. A ndzi lavi ku huma eka byona. Ndzi ta tsakela ku byi pfuna ku hlula swiphiqo swa byona.’ Ku anakanya hi ndlela leyi swi nga ha vangiwa hi ku rhandza vukhongeri bya vatswari hi mbilu hinkwayo kumbe hambi ku ri ku chava ku byi “paluxa.”

Xikombiso lexi twalaka hi lexiya xa Hans Küng, mufundhisi la tivekaka swinene wa Khatoliki la kanetanaka ni mhaka leyi, loyi a nga te: “Xana ndzi nga huma engalaveni hi nkarhi wa mheho, ndzi siya lava hi nga tluta swin’we ku fikela sweswi va langutana ni moya, va kukuta mati kumbexana ni ku lwela ku pona ke?” U hlamurile: “A ndzi nge wu tshiki ntirho wa mina endzeni ka kereke.” Ku hlawula kun’wana ku nga ha va “ku tihambanisa ni kereke, hikokwalaho ka vubihi bya yona byo rhandza swilo swa le henhla, ivi kumbexana u va Mukreste wa xiviri.”—Die Hoffnung bewahren.

Kambe, xana munhu a nga tshama engalaveni ya kereke ya yena hi ntshembo wa leswaku Xikwembu hi tintswalo ta xona xi ta nyika vukhongeri hinkwabyo nkarhi lowu nga pimiwangiki leswaku byi hundzuka ke? Xexo i xivutiso xa nkoka. Tanihi laha swi kombisiweke ha kona exifanisweni, ku huma hi xihatla engalaveni leyi nga ekhombyeni ivi u khandziya ebyatsweni lebyi nga sirhelelekangiki swi ta va swi ri na khombo ku fana ni ku tshama engalaveni leyi mbombomelaka. Xana i vutlhari ku tshama ekerekeni ku nga khathariseki leswaku u lahlekeriwa hi yini kumbe leswaku hi xihi xiyimo xa yona? Xana namuntlha ku ni leswi tshembisaka mayelana ni leswaku vukhongeri byi nga hundzuka? Xana Xikwembu xi ta byi pfumelela ku fikela kwihi leswaku byi lwisana ni ku rhandza ka xona ke?

[Laha Xifaniso Xi Humaka Kona eka tluka 3]

Chesnot/Sipa Press