Timbhoni Ta Yehovha eMisaveni Hinkwayo—Zambia
TIMBALA leti anameke ti funengete maganga lamakulu, mpfhuka wa timitara ta 1 200—laha hi le Zambia, tiko leri nga exivindzini xa dzonga-xikarhi wa Afrika. En’walungu-vuxa, Tintshava ta Muchinga ti tlakuke timitara ta 2 100. Nambu lowukulu wa Zambezi, lowu khulukaka nkarhi na nkarhi wu ya eVictoria Falls leyi tivekaka ngopfu emisaveni, wu vumba yo tala ya mindzilakano ya le dzongeni wa tiko leri. Ku ni mikhuva yo hambana-hambana exikarhi ka vanhu, tanihi leswi ku nga ni tinxaka to hambana-hambana to tlula 70. Ku ni tindzimi ta nhungu letikulu leti vulavuriwaka laha, kambe ku ni tin’wana to tala.
Hi 1911 ririmi rin’wana leri hambaneke ri sungule ku tumbuluka ni ku hangalaka eZambia. Vaendzi va tise minkandziyiso ya buku leyi nge Studies in the Scriptures, naswona ku sukela kwalaho Timboni ta Yehovha ti tikarhatele ku hangalasa ‘ririmi leri tengeke’ ra ntiyiso wa Bibele eZambia. (Sofoniya 3:9) Lexi nga xiphiqo lexikulu i tidyondzo leti nga humiki ematsalweni malunghana ni xiyimo xa lava feke. Loko vanhu va dyondza ntiyiso ni loko va vona ndlela leyi vukholwa-hava byi va xaniseke ha yona, va ntshunxeka!—Yohane 8:32.
Hi xikombiso, makwerhu un’wana la tshembekeke wa vika: “Hi ku hatlisa loko malume wa mina a file, mana wa mina, xirho lexi tiyeke xa Kereke ya United eZambia, u karhatekile. Endzhaku ka vhiki ro leha ra ku lahla hi ku ya hi mukhuva wa malahlelo lowu hetaka vhiki, ndzi tlhelele eximutanini ku ya vona leswaku u pfuke njhani. Loko ndzi fika, ndzi kume wanuna la dyuhaleke endlwini naswona loko a fambile, ndzi vutise kokwa wa mina wa xisati leswaku i mani. U vule leswaku i n’anga ya xintima. Manana a a kunguhate ku n’wi qacha leswaku a rihisela rifu ra makwavo leswaku moya-xiviri wa yena wu ta kota ku wisa. A a tshemba leswaku enkarhini wolowo a wu ri karhi wu ‘rhendzeleka-rhendzeleka’ hi laha a a swi veka ha kona.
“Kokwana wa xisati u ye emahlweni a hlamusela leswaku ku endza ka mina a ku ri nkateko hikuva ndyangu a a wu ri karhi wu lava mali yo hakela n’anga leyi. U ndzi komberile leswaku ndzi pfuneta, kambe ndzi n’wi hlamuserile hi vutlharhi leswaku tanihi Mukreste, a ndzi nga ta nghenelela. Ndzi hlamulane na yena hi Pisalema 146:4, leyi kombaka leswaku vafi a va ha ri na makungu—kutani a ku na moya-xiviri lowu ‘rhendzeleka-rhendzelekaka.’ Hi tlhele hi kambisisa Varhoma 12:19, leyi kombaka leswaku ku rihisela i ka Yehovha naswona a hi ka hina. Endzhaku ka sweswo ndzi byele mana wa mina malunghana ni ntshembo wa ku pfuxiwa ka vafi lowu Yesu a vulavuleke ha wona, hi laha swi tsariweke ha kona eka Yohane 5:28, 29. U tsakisiwe hi ripfumelo ra mina leri tiyeke eswitshembisweni swa Xikwembu. Hi ku hatlisa u sungule ku dyondza ni Mbhoni naswona u endle nhluvuko wa xihatla. U dlaye vuxaka hikwabyo ni khale ka kereke ya yena, naswona u kombise ku tinyiketela ka yena eka Xikwembu hi nkhuvulo. Sweswi i un’wana wa Timbhoni ta Yehovha.”
Makwerhu un’wana wa xisati wa vika: “Ndzi ye enkosini wa nsati wa malume. Loko ndzi fika, ndzi kume malume na mzala va ri karhi va sika. A va nga dyanga nchumu ku sukela siku leri hahani wa mina a feke ha rona. Loko ndzi vutisa leswaku ha yini, va hlamule leswaku hi ku ya hi ndhavuko, a va nga pfumeleriwi ku tshivela ndzilo wo sweka. Ndzi va byele leswaku mina ndzi ta sweka, kambe swirho swin’wana swa ndyangu a swi chava leswaku loko ndzi nga landzeleli mukhuva lowu wa vuhedeni, un’wana ni un’wana u ta hlangana nhloko!
“Ndzi hlamuserile leswaku tanihi un’wana wa Timbhoni ta Yehovha, ndzi xixima leswi Bibele yi swi vulaka eka Levhitika 18:30 naswona a ndzi landzeleli mikhuva leyi nga humiki ematsalweni. Kutani ndzi va kombe broxara leyi nge Mimoya Ya Vafi. Emhakeni yoleyo ku chava ka vona ku sungule ku hangalaka naswona ndzi ye emahlweni ndzi lulamisela malume ni vanhu hinkwavo swakudya. Maxaka ya mufi ma khumbekile hi xivindzi xa mina naswona va pfumerile ku ya emahlweni ni dyondzo ya Bibele. Ana se i vahuweleri lava nga khuvuriwangiki naswona ndyangu hikwawo wu tiyimisele ku khuvuriwa ku nga ri khale.”
Mawaku ntsako lowu hi vaka na wona loko ririmi leri tengeke ra ntiyiso ri heta mpfilumpfilu wa vukhongeri bya mavunwa, ngopfu-ngopfu mianakanyo leyi enteke leyi xanisaka vanhu lava lulameke! Hi ku katekisiwa hi Yehovha ririmi leri tengeke ri ya emahlweni ri hangalaka eZambia, hi laha swi nga ha kona emisaveni hinkwayo.—2 Vakorinto 10:4.
[Bokisi leri nga eka tluka 9]
XIVIKO XA TIKO
Lembe Ra Ntirho Ra 1994
NHLAYO YA LAVA NYIKELEKE VUMBHONI: 82 926
MPIMANYISO: Mbhoni yin’we eka vanhu va 107
LAVA VEKE KONA EXITSUNDZUXWENI: 363 372
XIRINGANISO XA VAHUWELERI VA MAPHAYONA: 10 713
XIRINGANISO XA TIDYONDZO TA BIBELE: 108 948
NHLAYO YA LAVA KHUVURIWEKE: 3 552
NHLAYO YA MAVANDLHA: 2 027
HOFISI YA RHAVI: LUSAKA
[Xifaniso lexi nga eka tluka 9]
Miako ya rhavi ra Watch Tower ehandle ka Lusaka
[Xifaniso lexi nga eka tluka 9]
Ku chumayela eShimabala, edzongeni wa Lusaka