Wa Tsundzuka Xana?

Xana u tiphinile hi ku hlaya minkandziyiso ya sweswinyana ya Xihondzo xo Rindza? Loko swi ri tano, languta loko u ta swi kota ku hlamula swivutiso leswi landzelaka:

▫ Ha yini Vakreste vo sungula va nga ri tlangelanga siku ra ku velekiwa ka Yesu?

Hi ku ya hi The World Book Encyclopedia, “Vakreste vo Sungula a va ku tlangelanga ku velekiwa ka [Yesu] hikuva a va teka ku tlangela siku ra ku velekiwa ka munhu wihi na wihi ku ri mukhuva wa vuhedeni.”—12/15, tluka 4.

▫ Xana swikhongelo swi fanele ku kongomisiwa eka Yesu?

E-e, hikuva swikhongelo i muxaka wa vugandzeri lebyi hi ku hlawuleka byi nga bya Xikwembu xa Matimba Hinkwawo. Hi ku kongomisa swikhongelo swa hina hinkwaswo eka Yehovha Xikwembu, hi kombisa leswaku ha wu amukela hi mbilu hinkwayo nkongomiso wa Yesu wa ku khongela hi ku: “Tata wa hina la nge matilweni.” (Matewu 6:9)—12/15, tluka 25.

▫ Hikwalaho ka yini ku ve ni ku avanyisa loku hambaneke ka xidyoho lexikulu xa Hosi Davhida loko xi ringanisiwa ni xidyoho xa Ananiya na Safira? (2 Samuwele 11:2-24; 12:1-14; Mintirho 5:1-11)

Xidyoho xa Hosi Davhida xi vangiwe hi ku tsana ka nyama. Loko a kombisiwe leswi a swi endleke, u hundzukile, naswona Yehovha u n’wi rivalerile—hambi leswi a langutaneke ni vuyelo bya xidyoho xa yena. Ananiya na Safira va dyohile hikwalaho ka leswi hi vukanganyisi va hembeke, va ringeta ku xisa vandlha ra Vukreste kutani xisweswo ‘va hembela moya lowo kwetsima wa Xikwembu.’ (Mintirho 5:3, 4) Sweswo swi kombise ku va ni mbilu leyo biha, hikwalaho va avanyisiwe hi ndlela leyi vavaka ngopfu.—1/1, matluka 27, 28.

▫ I yini lexi nga hi pfunaka ku tirhela Yehovha hi mbilu leyi tsakeke?

Hi fanele ku hlakulela langutelo lerinene ni ku tlangela mikateko swin’we ni malunghelo lama humaka eka Xikwembu ya ntirho, naswona a hi fanelanga ku rivala leswaku hi ku landzelela Rito ra Xikwembu, ha xi tsakisa.—1/15, matluka 16, 17.

▫ I swilo swihi swimbirhi leswi hi faneleke ku swi tsundzuka leswaku hi kota ku nyikela xikhutazo lexi humelelaka?

Xo sungula, anakanya hi leswi u nga swi vulaka leswaku xikhutazo xi va xa nkoka. Xa vumbirhi, hlawula nkarhi wo tshinelela munhu loyi a lavaka xikhutazo kumbe loyi a lavaka ku akiwa.—1/15, tluka 23.

▫ Hikwalaho ka yini “ntshungu lowukulu” wu “tamele mincindzu emandleni ya [w]ona”? (Nhlavutelo 7:9)

Ku ndzulutiwa ka marhavi ya micindzu ku kombisa leswaku “ntshungu lowukulu” hi ntsako wu huwelela Mfumo wa Yehovha ni Hosi ya wona leyi totiweke, Yesu Kreste. (Vona Levhitika 23:39, 40.)—2/1, tluka 18.

▫ I tidyondzo tihi ta nkoka leti kumekaka ebukwini ya Yobo?

Buku ya Yobo yi hi komba ndlela leyi hi faneleke ku tamela swiphiqo ha yona. Yi nyika swikombiso leswi xiyekaka swa ndlela leyi faneleke—ni leyi nga fanelangiki—yo laya loyi a langutaneke ni miringo. Ku tlula kwalaho, ntokoto wa Yobo wu nga hi pfuna ku endla hi ku ringanisela loko hi tikuma hi xanisiwa hi swiyimo leswi nga tsakisiki.—2/15, tluka 27.

▫ Xana hi dyondza yini eka mahlori ya Yesu?

Mahlori ya Yesu ma dzunisa Xikwembu, ma veka xikombiso eka Vakreste leswaku va dzunisa Xikwembu. (Varhoma 15:6) Ma khutaza ku endla leswinene, ku kombisa ku hanana ni ku kombisa ntwela-vusiwana.—3/1, tluka 8.

▫ Hi xihi xikongomelo lexi endliweke hi ku va vakulu va pfuxeta swivutiso leswi hleriweke ni lava ha ku tinyiketelaka?

Leswi swi tiyisekisa leswaku munhu un’wana ni un’wana a twisisa khwatsi tidyondzo ta xisekelo ta Bibele ni ku lemuka leswi ku va Mbhoni ya Yehovha swi katsaka swona.—3/1, tluka 13.

▫ Xana swikhongelo swa Bibele swi nga hi pfuna njhani?

Hi ku langutisisa swikhongelo leswi nga eMatsalweni, hi nga kota ku vona swin’wana leswi vuriweke hi loyi a ri exiyin’weni lexi fanaka ni xa hina. Ku lavisisa, ku hlaya, ni ku anakanyisisa hi swikhongelo swo tano swi ta hi pfuna leswaku hi antswisa ku vulavurisana ka hina na Yehovha.—3/15, matluka 3, 4.

▫ Xana ku chava Xikwembu i yini?

Ku chava Xikwembu, i ku xixima Yehovha hi vuenti, swin’we ni ku chava ku n’wi hlundzukisa. (Pisalema 89:7)—3/15, tluka 10.

▫ Hi tihi tindlela tinharhu leti ha tona Bibele yi kombaka leswaku hi va risima emahlweni ka Xikwembu?

Bibele yi dyondzisa leswaku un’wana ni un’wana wa hina i wa nkoka emahlweni ka Xikwembu (Luka 12:6, 7); yi wu veka erivaleni nkoka lowu Yehovha a wu vonaka eka hina (Malakiya 3:16); nakambe yi hlamusela leswi Yehovha a swi endleke ku kombisa rirhandzu rakwe eka hina. (Yohane 3:16)—4/1, matluka 11, 12, 14.

▫ Ha yini Vaheveru 10:24, 25 yi nga ri xileriso tsena xa leswaku Vakreste va hlangana kun’we?

Marito lawa ya Pawulo ma nyika mpimanyeto lowu huhuteriweke wa Xikwembu eka minhlangano hinkwayo ya Vukreste—entiyisweni, eka xiendlakalo xin’wana ni xin’wana loko Vakreste va hlengeletana swin’we.—4/1, tluka 16.