Swivutiso Swa Vahlayi

Xana Xikwembu a xi ya hi nghohe loko xi hlawula vavanuna va huvo leyi fumaka yo sungula va rixaka rin’we ni va tiko rin’we—tanihi leswi hinkwavo a va ri Vayuda?

E-e, a xi nga yi hi nghohe. Hinkwavo lava Yesu a va vitaneke tanihi vadyondzisiwa va yena ro sungula a va ri Vayuda. Kutani, hi Pentekosta ya 33 C.E., Vayuda ni vaproselita va Vayuda va ve vo sungula ku totiwa hi moya lowo kwetsima, xisweswo va endliwe va faneleka ku ya fuma na Kreste etilweni. Endzhaku ka nkarhi hi kona laha Vasamariya ni Vamatiko lava hundzukeke lava nga yimbangiki va katsiweke. Hikwalaho, swa twisiseka leswaku huvo leyi fumaka hi nkarhi wolowo a yi vumbiwe hi Vayuda, ‘vaapostola ni vakulukumba eYerusalema,’ hi laha swi boxiweke ha kona eka Mintirho 15:2. Lava a va ri vavanuna lava a va ri ni vutivi lebyi enteke bya Matsalwa ni malembe yo tala evugandzerini bya ntiyiso, naswona va ve ni nkarhi wo tala wo endla nhluvuko leswaku va va vakulu va Vakreste lava wupfeke.—Ringanisa Varhoma 3:1, 2.

Hi nkarhi wa ku hlangana ka huvo leyi fumaka loku hlamuseriweke eka Mintirho ndzima 15, Vamatiko vo tala se a va ri Vakreste. Leswi swi katse Vantima, Valungu ni vanhu lava humaka eswitsungeni swin’wana. Kambe a ku na rhekhodo leyi kombaka leswaku va kona eka vanhu volavo Vamatiko, lava nghenisiweke eka huvo leyi fumaka, ku endla Vukreste byi amukeleka ni le ka lava a va nga ri Vayuda. Hambi leswi Vakreste lava va Vamatiko, lava va ha ku hundzuka a va ri swirho swa “Israyele wa Xikwembu” ku fana na vona, va fanele va ku xiximile ku wupfa ni ntokoto lowukulu wa Vakreste va Vayuda, ku fana ni vaapostola, lava a va ri xiphemu xa huvo leyi fumaka hi nkarhi wolowo. (Vagalatiya 6:16, ringanisa NW.) Xiya ndlela leyi a wu tekeriwa ehenhla ha yona ntokoto wolowo eka Mintirho 1:21,22.—Vaheveru 2:3; 2 Petro 1:18; 1 Yohane 1:1-3.

Hi malembe-xidzana yo tala Xikwembu xi tirhisane hi ndlela yo hlawuleka ni tiko ra Israyele, laha Yesu a hlawuleke vaapostola vakwe kona. A ku nga ri xihoxo kumbe xihlawuhlawu leswi a ku nga ri na vaapostola lava humaka endhawini leyi sweswi yi vitaniwaka Amerika Dzonga kumbe eAfrika kumbe eVuxa Mpfungwe. Hi ku famba ka nkarhi vavanuna ni vavasati lava sukaka etindhawini teto a va ta va na wona nkarhi wo kuma malunghelo lama tlulaka ya ku va muapostola emisaveni, ku va xirho xa huvo leyi fumaka ya lembe-xidzana ro sungula, kumbe ku va ni xikhundlha xihi na xihi exikarhi ka vanhu va Xikwembu namuntlha.—Vagalatiya 3:27-29.

Muapostola un’wana u susumeteleke ku vula leswaku “Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke xa n’wi tsakela.” (Mintirho 10:34, 35) Ina, mimpfuno ya nkutsulo wa Kreste ya kumeka eka hinkwavo, handle ko ya hi nghohe. Naswona vanhu lava humaka etinyimbeni hinkwato ni le ka tindzimi hinkwato ni le matikweni hinkwawo va ta katsiwa eMfun’weni wa le tilweni ni le ka ntshungu lowukulu lowu nga ta hanya hi laha ku nga heriki emisaveni.

Vanhu vo tala va rhandza swinene rixaka, ririmi kumbe vutiko. Leswi swi kombisiwa hi leswi hi swi hlayaka eka Mintirho 6:1 mayelana ni mhaka leyi vangeke ku n’unun’uta exikarhi ka Vakreste lava vulavulaka Xigriki ni le ka lava a va vulavula Xiheveru. Hi nga ha va hi kurisiwe hi ndlela yoleyo kumbe hi teke langutelo ra sweswinyana ra ku rhandza ngopfu ririmi, rixaka, swisekelo swa rixaka, kumbe muxaka wa rimbewu. Hi ku xiya leswaku sweswo swi nga ha endleka, hi ta va hi endla kahle loko hi endla matshalatshala yo pfumelela mintlhaveko ni swiendlo swa hina leswaku swi fambisana ni vonelo ra Xikwembu, ra leswaku vanhu hinkwavo va ringana emahlweni ka xona, ku nga khathariseki xivumbeko xa hina xa le handle. Loko Xikwembu xi endle leswaku timfanelo ta vakulu ni malandza ya vutirheli ti tsariwa, a xi boxanga rixaka kumbe tiko. E-e, xi languta timfanelo ta moya eka lava nga ha kumekaka, leswaku va tirha. Sweswo i ntiyiso eka vakulu lava hi nga na vona, valanguteri lava famba-fambaka ni vatirhi va le rhavini namuntlha, naswona a swi ri tano hi huvo leyi fumaka ya lembe-xidzana ro sungula.