Timbhoni Ta Vukreste Ta Vuhosi Bya Xikwembu
“Mi . . . twarisa mintirho leyo saseka ya loyi a mi vitaneke ku huma emunyameni, mi ta nghena eku vonakaleni ka yena loku hlamarisaka.”—1 PETRO 2:9.
1. Hi byihi vumbhoni lebyi humelelaka lebyi nyikeriweke malunghana na Yehovha eminkarhini ya le mahlweni ka Vukreste?
EMINKARHINI ya le mahlweni ka Vukreste, timbhoni to tala ti tiyisekise hi xivindzi leswaku Yehovha hi yena ntsena Xikwembu xa ntiyiso. (Vaheveru 11:4–12:1) Hi ku tiya eripfumelweni, handle ko chava va yingise milawu ya Yehovha va tlhela va ala ku landzula xiyimo xa vona etimhakeni ta vugandzeri. Va nyikele vumbhoni bya matimba eka vuhosi bya misava hinkwayo bya Yehovha.—Pisalema 18:21-23; 47:1, 2.
2. (a) I mani Mbhoni leyikulu ngopfu ya Yehovha? (b) I mani loyi a siveke tiko ra Israyele tanihi mbhoni ya Yehovha? Hi swi tivisa ku yini?
2 Mbhoni yo hetelela ni leyikulu swinene ya le mahlweni ka Vukreste a ku ri Yohane Mukhuvuri. (Matewu 11:11) U ve ni lunghelo ra ku twarisa ku ta ka Muhlawuriwa, naswona u tivise Yesu tanihi Mesiya la tshembisiweke. (Yohane 1:29-34) Yesu i Mbhoni leyikulu swinene ya Yehovha, “mbhoni leyi tshembekeke ya ntiyiso.” (Nhlavutelo 3:14) Hikwalaho ka leswi Israyele wa nyama a aleke Yesu, Yehovha u va arile kutani a vumba tiko lerintshwa, Israyele wa moya wa Xikwembu, leswaku ri va mbhoni yakwe. (Esaya 42:8-12; Yohane 1:11, 12; Vagalatiya 6:16) Petro u tshahe vuprofeta lebyi khumbaka Israyele naswona u kombise leswaku a byi tirha eka ‘Israyele wa Xikwembu,’ vandlha ra Vukreste, loko a ku: “N’wina, mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu hi xiviri, leswaku mi ta kota ku twarisa mintirho leyo saseka ya loyi a mi vitaneke ku huma emunyameni, mi ta nghena eku vonakaleni ka yena loku hlamarisaka.”—1 Petro 2:9; Eksoda 19:5, 6; Esaya 43:21; 60:2.
3. Hi byihi vutihlamuleri lebyikulu bya Israyele wa Xikwembu ni bya “ntshungu lowukulu”?
3 Marito ya Petro ma kombisa leswaku vutihlamuleri lebyikulu bya Israyele wa Xikwembu i ku nyikela vumbhoni malunghana ni ku dzuneka ka Yehovha. Esikwini ra hina tiko leri ra moya ri joyiniwe hi “ntshungu lowukulu” wa timbhoni leti na tona ti dzunisaka Xikwembu erivaleni. Va huwelela hi rito lerikulu leswaku vanhu hinkwavo va swi twa: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!” (Nhlavutelo 7:9, 10; Esaya 60:8-10) Xana Israyele wa Xikwembu ni vanakulobye va yena va nga byi hetisisa njhani vumbhoni lebyi? Hi ripfumelo ni ku yingisa ka vona.
Timbhoni Ta Mavunwa
4. Ha yini Vayuda va le sikwini ra Yesu a va ri timbhoni ta mavunwa?
4 Ripfumelo ni ku yingisa swi katsa ku hanya hi misinya ya milawu ya Xikwembu. Nkoka wa leswi wu voniwa eka leswi Yesu a swi vuleke malunghana ni varhangeri va vukhongeri va Vayuda esikwini rakwe. Vona ‘va tshame exitshan’weni xa Muxe’ tanihi vadyondzisi va Nawu. Va tlhela va rhuma varhumiwa leswaku va hundzula lava nga pfumeriki. Kambe, Yesu u te eka vona: “Mi rhendzeleka ni malwandle ni matiko, leswaku mi ta kuma mudyondzisiwa un’we ntsena, kutani loko mi n’wi kumile, mi n’wi endla loyi a fanelaka hi [Gehena] ku tlula n’wina kambirhi.” Vanhu lava va vukhongeri a va ri timbhoni ta mavunwa—lava titivaka, va vukanganyisi ni lava nga riki na rirhandzu. (Matewu 23:1-12, 15, ringanisa NW.) Siku rin’wana Yesu u vule leswi eka Vayuda van’wana: “N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina.” Xana a ta swi vurisa ku yini sweswo eka swirho swa tiko leri hlawuriweke ra Xikwembu? Hikuva a va nga ma yingisi marito ya Mbhoni leyikulu swinene ya Yehovha.—Yohane 8:41, 44, 47.
5. Hi swi tivisa ku yini leswaku Vujagana byi nyikele vumbhoni bya mavunwa hi Xikwembu?
5 Hi ndlela leyi fanaka, eka malembe-xidzana yo sukela enkarhini wa Yesu, madzana ya timiliyoni eVujaganini ma tivule vadyondzisiwa vakwe. Hambi swi ri tano, a va ku endlanga ku rhandza ka Xikwembu kutani a va amukeriwi hi Yesu. (Matewu 7:21-23; 1 Vakorinto 13:1-3) Vujagana byi rhume varhumiwa, lava vo tala va vona swi nga kanakanisiki leswaku a va tinyiketerile. Kambe, va dyondzise vanhu ku gandzela xikwembu xa Vunharhu-un’we lexi hisaka vadyohi endzilweni wa tihele, naswona vo tala lava hundzukeleke eka byona a va tikombi ni leswaku i Vakreste. Hi xikombiso, tiko ra le Afrika ra Rwanda a ri ri tiko leri noneke ra varhumiwa va Rhoma Khatoliki. Kambe, Makhatoliki ya le Rwanda ma nghenelele hi mbilu hinkwayo enyimpini leyi veke kona ya tinxaka etikweni rero. Mihandzu ya nsimu yoleyo ya vurhumiwa yi kombisa leswaku a va byi kumanga vumbhoni bya xiviri bya Vukreste eVujaganini.—Matewu 7:15-20.
Ku Hanya Hi Misinya Ya Milawu Ya Xikwembu
6. Xana ku tikhoma lokunene i xiphemu xa nkoka hi ndlela yihi eku nyikeleni ka vumbhoni?
6 Ku tikhoma loko biha ka lava tivulaka Vakreste ku tisa xisandzu eka “ndlela ya ntiyiso.” (2 Petro 2:2) Mukreste wa xiviri u hanya hi ku pfumelelana ni misinya ya milawu ya Xikwembu. A nga yivi, a nga hembi, a nga kanganyisi, naswona a nga tikhomi hi ndlela yo biha. (Varhoma 2:22) Naswona a nga va dlayi vaakelani vakwe. Vavanuna va Vakreste va langutela mindyangu ya vona hi rirhandzu. Vavasati va xixima vulanguteri byoleyo hi xichavo. Vana va leteriwa hi vatswari va vona kutani hi ndlela yoleyo va lunghekela ku va Vakreste lava kuleke lava nga ni vutihlamuleri. (Vaefesa 5:21–6:4) I ntiyiso leswaku hinkwerhu a hi hetisekanga naswona ha swi endla swihoxo. Kambe Mukreste wa xiviri u xixima mimpimanyeto ya Bibele naswona u endla matshalatshala lamakulu yo yi tirhisa. Vanhu van’wana va swi vona sweswo naswona swi nyikela vumbhoni lebyinene. Minkarhi yin’wana, lava eku sunguleni a va kaneta ntiyiso va xiye ku tikhoma lokunene ka Mukreste naswona sweswo swi va kokile.—1 Petro 2:12, 15; 3:1.
7. Xana i swa nkoka hi ndlela yihi leswaku Vakreste va rhandzana?
7 Yesu u kombise yinhla ya nkoka ya ku tikhoma ka Vukreste loko a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Vanhu va misava ya Sathana va vonaka hi “ku homboloka hinkwako, ni leswo biha, ni makwanga, ni nsele; va tele mavondzo, ni ku dlaya, ni ku kanetana, ni ku xisa, ni ku kucetela; i vahlevi ni valumbeti; i vavengi va Xikwembu, va mona lava titivaka ni lava tidzunisaka; i vanhu lava sungulaka tindlela leto biha letintshwa, lava nga yingisiki vatswari va vona.” (Varhoma 1:29, 30) Eka mbango wo tano, nhlengeletano ya misava hinkwayo leyi nga ni rirhandzu yi nga nyikela vumbhoni bya matimba malunghana ni ku tirha ka moya wa Xikwembu—vumbhoni lebyi humelelaka. Timbhoni ta Yehovha ti vumba nhlengeletano yoleyo.—1 Petro 2:17.
Timbhoni I Swichudeni Swa Bibele
8, 9. (a) Xana mupisalema u tiyisiwe njhani hi ku dyondza Nawu wa Xikwembu ni ku anakanyisisa ha wona? (b) Xana dyondzo ya Bibele ni ku anakanyisisa ha yona swi nga hi tiyisa hi tindlela tihi leswaku hi hambeta hi nyikela vumbhoni?
8 Leswaku a humelela eku nyikeleni ka vumbhoni lebyinene, Mukreste u fanele ku tiva ni ku rhandza misinya ya milawu yo lulama ya Yehovha kutani a venga vuhomboloki bya misava hi ku helela. (Pisalema 97:10) Misava yi phikelela ni ku hlohlotela mianakanyo ya yona, naswona swi nga nonon’hwa ku papalata moya wa yona. (Vaefesa 2:1-3; 1 Yohane 2:15, 16) I yini lexi nga hi pfunaka leswaku hi hlayisa langutelo leri faneleke ra mianakanyo? I dyondzo ya Bibele ya nkarhi na nkarhi ni leyi nga ni xikongomelo. Mutsari wa Pisalema 119 u phindha-phindhe minkarhi yo tala a kombisa leswaku u rhandza Nawu wa Yehovha. U wu hlayile a tlhela a anakanya ha wona nkarhi hinkwawo, “siku hikwaro.” (Pisalema 119:92, 93, 97-105) Hikwalaho, u tsarile a ku: “Nḍi v̌engile, nḍi nyenya mav̌unwa; kambe nḍi ranḍa nawu wa wena.” Tlhandla-kambirhi, rirhandzu rakwe ri n’wi susumetele ku teka goza. U ri: “Nḍi ku ḍunisa e ka ntlhanu na kambiri hi siku, hikwalaho ka milawu ya ku lulama ka wena.”—Pisalema 119:163, 164.
9 Hi ndlela leyi fanaka, loko hi dyondza Rito ra Xikwembu nkarhi na nkarhi hi tlhela hi anakanyisisa ha rona ri ta khumba timbilu ta hina ni ku hi susumetela ku ‘xi dzunisa’—hi nyikela vumbhoni ha Yehovha—nkarhi na nkarhi, ina “e ka ntlhanu na kambiri hi siku.” (Varhoma 10:10) Hi ku pfumelelana ni leswi, mutsari wa pisalema yo sungula u vula leswaku loyi nkarhi na nkarhi a anakanyisisaka hi marito ya Yehovha “o fana ni muri lo’wu simekiweke kusuhi ni milambu ya mati, lo’wu tŝalaka mihanḍu ya wona hi nkari wa wona, lowu matluka ya wona ma nga omiki: Hikwaŝo leŝi a ŝi endlaka ŝi ta kateka.” (Pisalema 1:3) Muapostola Pawulo u tlhele a kombisa matimba ya Rito ra Xikwembu loko a tsala a ku: “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, ni ku tolovetisa leswo lulama, leswaku mutirheli wa Xikwembu a va la hetisekeke, a tilulamisela ku endla ntirho wun’wana ni wun’wana lowunene.”—2 Timotiya 3:16, 17.
10. I yini leswi xiyekaka malunghana ni vanhu va Yehovha emasikwini lawa ya makumu?
10 Ku andza ka xihatla ka nhlayo ya vagandzeri va ntiyiso eka lembe-xidzana ra vu-20 ku kombisa mikateko ya Yehovha. Handle ko kanakana, tanihi ntlawa, timbhoni leti ta manguva lawa ta vuhosi bya Xikwembu ti hlakulele ku rhandza nawu wa Yehovha etimbilwini ta tona. Ku kotisa mupisalema, ti susumeteleka ku yingisa nawu wa Yena ni ku nyikela vumbhoni hi ku tshembeka “vusiku ni nhlekanhi” malunghana ni ku kwetsima ka Yehovha.—Nhlavutelo 7:15.
Mintirho Ya Yehovha Ya Matimba
11, 12. I yini leswi hetisisiweke hi mahlori lama endliweke hi Yesu ni valandzeri vakwe?
11 Eka lembe-xidzana ro sungula, moya lowo kwetsima wu tiyise timbhoni ta Vukreste to tshembeka leswaku ti endla mintirho ya matimba leyi nyikeke vumbhoni lebyi tiyeke bya leswaku vumbhoni bya tona i bya ntiyiso. Loko Yohane Mukhuvuri a ri ekhotsweni, u rhume vadyondzisiwa leswaku va ya vutisa Yesu va ku: “Xana hi wena loyi va nge wa ta, kumbe xana ha ha langutela un’wana ke?” Yesu a nga hlamulanga a ku ina kumbe e-e. Ematshan’weni ya sweswo, u te: “Fambani, mi ya rungulela Yohane leswi mi swi twaka ni leswi mi swi vonaka: Lavo-fe-mahlo va tlhela va vona, swilema swa famba, vanhlokonho va basisiwa, lavo-fe-tindleve va twa, vafi va pfuka, swisiwana swi byeriwa Mahungu Lamanene. Kutani ku katekile la nga ta ka a nga khunguvanyeki hikwalaho ka mina.” (Matewu 11:3-6) Mintirho leyi ya matimba yi nyikele vumbhoni eka Yohane bya leswaku Yesu hakunene a a ri ‘Loyi a Taka.’—Mintirho 2:22, ringanisa NW.
12 Hi ndlela leyi fanaka, van’wana va valandzeri va Yesu va hanyise vavabyi hambi ku ri ku pfuxa va vafi. (Mintirho 5:15, 16; 20:9-12) Eka vona mahlori lawa a ma fana ni vumbhoni lebyi humaka eka Xikwembu. (Vaheveru 2:4) Naswona mintirho yo tano yi kombise matimba lamakulu ya Yehovha. Hi xikombiso, i ntiyiso leswaku Sathana, “mufumi wa misava,” u ni tindlela to vangela rifu. (Yohane 14:30; Vaheveru 2:14) Kambe loko Petro a pfuxa Dorkasi wansati wo tshembeka eku feni, a ta kota ku swi endla ntsena hi matimba ya Yehovha, tanihi leswi ku nga Yena ntsena loyi a nga tlheriselaka vutomi.—Pisalema 16:10; 36:9; Mintirho 2:25-27; 9:36-43.
13. (a) Xana mahlori ya le Bibeleni ma ya emahlweni ma tiyisekisa matimba ya Yehovha hi ndlela yihi? (b) Xana ku hetiseka ka vuprofeta ku hetisisa xiphemu lexikulu eku kombiseni ka Vukwembu bya Yehovha hi ndlela yihi?
13 Namuntlha, mintirho yoleyo ya mahlori a ya ha endleki. Xikongomelo xa yona xi hetisekile. (1 Vakorinto 13:8) Hambi swi ri tano, rhekhodo ya yona ya ha ri kona eBibeleni, leyi seketeriwaka hi timbhoni to tala. Loko Vakreste namuntlha va xiyisisa timhaka leti ta matimu, mintirho yoleyo ya ha nyika vumbhoni lebyi humelelaka bya matimba ya Yehovha. (1 Vakorinto 15:3-6) Ku engetela kwalaho, le ndzhaku esikwini ra Esaya, Yehovha u vulavule hi vuprofeta lebyi kongomeke tanihi xikombiso lexi xiyekaka xa leswaku i Xikwembu xa ntiyiso. (Esaya 46:8-11) Vuprofeta byo tala bya Bibele lebyi huhuteriweke hi Xikwembu bya hetiseka namuntlha—byo tala bya byona byi hetiseka evandlheni ra Vukreste. (Esaya 60:8-10; Daniyele 12:6-12; Malakiya 3:17, 18; Matewu 24:9; Nhlavutelo 11:1-13) Ku hetiseka ka vuprofeta lebyi ku kombisa leswaku hi hanya “emasikwini ya makumu,” ku tlhela ku seketela Yehovha tanihi yena ntsena Xikwembu xa ntiyiso.—2 Timotiya 3:1.
14. Xana matimu ya manguva lawa ya Timbhoni ta Yehovha ma nyikela vumbhoni bya matimba bya leswaku Yehovha i Hosi Leyikulu hi tindlela tihi?
14 Ni sweswi, Yehovha wa ha endla swilo leswikulu, leswi hlamarisaka, eka vanhu vakwe. Ku vonakala loku andzaka ka ntiyiso wa Bibele ku kongomisiwa hi moya wa Yehovha. (Pisalema 86:10; Nhlavutelo 4:5, 6) Ku andza loku xiyekaka loku vikiwaka emisaveni hinkwayo ku kombisa leswaku Yehovha ‘wa swi hatlisisa hi nkarhi wa swona.’ (Esaya 60:22) Loko ku pfuka nxaniso lowukulu ematikweni yo hambana-hambana emasikwini yo hetelela, vanhu va Yehovha va kote ku tiyisela hi xivindzi hikwalaho ka nseketelo lowu tiyisaka wa moya lowo kwetsima. (Pisalema 18:1, 2, 17, 18; 2 Vakorinto 1:8-10) Ina, matimu ya manguva lawa ya Timbhoni ta Yehovha hi woxe i vumbhoni bya matimba bya leswaku Yehovha i Hosi Leyikulu.—Zakariya 4:6.
Mahungu Lamanene Ma Fanele Ku Chumayeriwa
15. Hi byihi vumbhoni lebyikulu lebyi a byi ta nyikeriwa hi vandlha ra Vukreste?
15 Yehovha u veke tiko ra Israyele ri va mbhoni ya yena ematikweni. (Esaya 43:10) Hambi swi ri tano, a hi vangani Vaisrayele lava lerisiweke hi Xikwembu leswaku va ya chumayela eka lava nga riki Vaisrayele, naswona leswi hakanyingi a swi endleriwa ku twarisa ku avanyisa ka Yehovha. (Yeremiya 1:5; Yonasi 1:1, 2) Hambi swi ri tano, vuprofeta lebyi nga eMatsalweni ya Xiheveru byi kombisa leswaku Yehovha siku rin’wana a a ta xiyisisa matiko hi ndlela leyikulu, naswona leswi u swi endle hi ku tirhisa Israyele wa Xikwembu wa moya. (Esaya 2:2-4; 62:2) A nga si tlhandlukela etilweni, Yesu u lerise valandzeri vakwe a ku: “Hikokwalaho, yanani eka vamatiko hinkwavo, mi va endla vadyondzisiwa.” (Matewu 28:19) Hambi leswi Yesu a a langutana ngopfu ni “Vaisraele, lava lahlekeke kukota tinyimpfu,” valandzeri vakwe va rhumiwe eka “vamatiko hinkwavo,” ni “ku ya fika emakun’wini ya misava.” (Matewu 15:24; Mintirho 1:8) Vumbhoni bya Vukreste a byi fanele ku twiwa hi vanhu hinkwavo.
16. Xana vandlha ra Vukreste ra lembe-xidzana ro sungula ri hetisise ntirho wihi, naswona hi mpimo wihi?
16 Pawulo u kombise leswaku a a swi twisisa kahle sweswo. Hi lembe ra 61 C.E., u vule leswaku mahungu lamanene a a ma ‘veka mihandzu ni ku andza emisaveni hinkwayo.’ Mahungu lamanene a ma nga yisiwi eka tiko rin’we ntsena kumbe mpambukwa, tanihi lowu a wu “gandzela tintsumi.” Ematshan’weni ya sweswo, ma “twarisiwile eka swivumbiwa hinkwaswo leswi nge hansi ka tilo.” (Vakolosa 1:6, 23, ringanisa NW; 2:13, 14, 16-18.) Xisweswo, Israyele wa Xikwembu eka lembe-xidzana ro sungula u hetisise ntirho wa yena wo “twarisa mintirho leyo saseka ya loyi a [va] vitaneke ku huma emunyameni, [va] ta nghena eku vonakaleni ka yena loku hlamarisaka.”
17. Xana Matewu 24:14 yi ya emahlweni yi hetiseka njhani hi ndlela leyikulu?
17 Kambe, ntirho wolowo wo chumayela wa lembe-xidzana ro sungula a wu ri masungulo ntsena ya ntirho lowu a wu ta hetisisiwa emasikwini ya makumu. Loko a vulavula ngopfu-ngopfu hi nkarhi wa hina, Yesu u te: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:14; Marka 13:10) Xana vuprofeta lebyi byi hetisekile? Hakunene, byi hetisekile. Ku sukela eka masungulo lama nga nyawuriki hi 1919, ku chumayeriwa ka mahungu lamanene sweswi ku fike ematikweni yo tlula 230. Vumbhoni byi twiwa ematikweni ya N’walungu lama nga ni gwitsi ni le tindhawini ta maxelo yo hisa. Matiko lamakulu ma hlanganisiwa, naswona ku fikiwa ni le ka swihlala leswi nga le tlhelo leswaku vaaki va swona va kota ku kuma vumbhoni. Hambi ku ri exikarhi ka nkitsikitsi lowukulu, tanihi nyimpi ya le Bosnia na Herzegovina, mahungu lamanene ma ya emahlweni ma chumayeriwa. Tanihi le ka lembe-xidzana ro sungula, vumbhoni byi tswala mihandzu ‘emisaveni hinkwayo.’ Mahungu lamanene ma twarisiwa khwatsi “eka swivumbiwa hinkwaswo leswi nge hansi ka tilo.” Vuyelo byi ve byihi? Xo sungula, lava saleke va Israyele wa Xikwembu va hlengeletiwile “va huma etinxakeni hinkwato, va ri va tindzimi hinkwato, ni va swivongo hinkwaswo, ni va matiko hinkwawo.” Xa vumbirhi, timiliyoni ta “ntshungu lowukulu” ti sungule ku humesiwa, ti huma “ematikweni hinkwawo, ni le tinxakeni hinkwato, [ti] ri [ta] swivongo hinkwaswo ni [ta] tindzimi hinkwato.” (Nhlavutelo 5:9; 7:9) Matewu 24:14 yi ya emahlweni yi hetiseka hi ndlela leyikulu.
18. Hi swihi swilo swin’wana leswi hetisisiwaka hi ku chumayeriwa ka mahungu lamanene emisaveni hinkwayo?
18 Ku chumayeriwa ka mahungu lamanene emisaveni hinkwayo ku kombisa leswaku vukona bya Yesu bya vuhosi byi sungurile. (Matewu 24:3) Ku engetela kwalaho, hi yona ndlela leyikulu yo endla ‘ntshovelo wa misava,’ tanihi leswi yi nyikaka vanhu ntshembo wa ntiyiso wa vanhu, Mfumo wa Yehovha. (Nhlavutelo 14:15, 16) Tanihi leswi Vakreste va ntiyiso ku nga vona ntsena va hlanganyelaka eku chumayeleni ka mahungu lamanene, ntirho lowu wa nkoka wu hlawula Vakreste va ntiyiso eka va mavunwa. (Malakiya 3:18) Hi ndlela leyi, swi endla leswaku lava chumayelaka swin’we ni lava va yingisaka va ponisiwa. (1 Timotiya 4:16) Xa nkoka ngopfu, ku chumayela mahungu lamanene ku tisa ku dzuneka ni xichavo eka Yehovha Xikwembu, loyi a leriseke leswaku ku endliwa, loyi a seketelaka lava ku endlaka, loyi a endlaka leswaku ku veka mihandzu.—2 Vakorinto 4:7.
19. Xana Vakreste hinkwavo va khutaziwa leswaku va tiyimisela hi ndlela yihi tanihi leswi va nghenaka elembeni lerintshwa ra ntirho?
19 A swi hlamarisi leswi muapostola Pawulo a susumetelekeke ku vula a ku: “Ndzi ta va ni khombo loko ndzi nga twarisi Mahungu Lamanene!” (1 Vakorinto 9:16) Namuntlha Vakreste va titwa hi ndlela leyi fanaka. I lunghelo lerikulu ni vutihlamuleri lebyikulu ku va “vatirhi-kuloni eka Xikwembu,” hi vangamisa ku vonakala ka ntiyiso emisaveni leyi ya munyama. (1 Vakorinto 3:9; Esaya 60:2, 3) Ntirho lowu veke ni masungulo lama nga nyawuriki hi 1919 sweswi wu fikelele mpimo lowu hlamarisaka. Vakreste va kwalomu ka ntlhanu wa timiliyoni va nyikela vumbhoni bya vuhosi bya Xikwembu va ri karhi va heta tiawara to tlula gidi ra timiliyoni hi lembe leswaku va tivisa van’wana rungula ra ku pona. Mawaku ntsako lowu tisiwaka hi ku hlanganyela entirhweni lowu wo kwetsimisa vito ra Yehovha! Tanihi leswi hi nghenaka elembeni ra ntirho ra 1996, a hi tiyimiseleni ku ka hi nga kokeli endzhaku. Ematshan’weni ya sweswo, hi ta ma yingisa ku tlula rini na rini marito lawa Pawulo a ma vuleke eka Timotiya: “Twarisa Rito, u hiseka.” (2 Timotiya 4:2) Loko hi ri karhi hi endla tano, hi khongela hi timbilu ta hina hinkwato leswaku Yehovha a ya emahlweni a katekisa matshalatshala ya hina.
Wa Tsundzuka Xana?
◻ I mani loyi a siveke Israyele tanihi “mbhoni” ya Yehovha ematikweni?
◻ Xana ku tikhoma hi ndlela ya Vukreste ku pfuneta njhani eku nyikeleni ka vumbhoni?
◻ Ha yini swi ri swa nkoka leswaku Mbhoni leyi nga Mukreste yi dyondza Bibele ni ku anakanyisisa ha yona?
◻ Xana matimu ya manguva lawa ya Timbhoni ta Yehovha ma nyikela vumbhoni bya leswaku Yehovha i Xikwembu xin’we xa ntiyiso hi ndlela yihi?
◻ Xana ku chumayeriwa ka mahungu lamanene ku hetisisa yini?
[Swifaniso leswi nga eka tluka 15]
Handle ko siveriwa, mahungu lamanene ma twarisiwa sweswi “eka swivumbiwa hinkwaswo leswi nge hansi ka tilo”