Rilaveta Malunghana Ni Vugandzeri Lebyi Tengeke Bya Yehovha
“Yehova o v̌uriwa l’a lav̌etaka; i Šikwembu ša rilonḍo.”—EKSODA 34:14.
1. Xana hi yihi mfanelo leyikulu ya Xikwembu, naswona yi yelana njhani ni mavondzo ya yena?
YEHOVHA u tihlamusela tanihi “Šikwembu ša rilonḍo.” Rito ra Bibele leri vulaka “mavondzo lama faneleke” kumbe “mavondzo lama nga fanelangiki” ri katsa tinhlamuselo leti nga tsakisiki. Hambi swi ri tano, mfanelo leyikulu ya Xikwembu i rirhandzu. (1 Yohane 4:8) Hikwalaho mintlhaveko yihi na yihi leyi a vaka na yona ya rilaveta yi fanele yi endleriwa ku pfuna vanhu. Entiyisweni, hi ta swi vona leswaku rilaveta ra Xikwembu ri hoxa xandla eku tiseni ka ku rhula ni ntwanano evuakweni hinkwabyo.
2. Hi tihi tindlela tin’wana leti marito ya Xiheveru lama nge “mavondzo” ma hundzuluxeriwaka ha yona?
2 Marito lama fanaka ya Xiheveru ya “rilaveta” ma humelela minkarhi yo tlula 80 eMatsalweni ya Xiheveru. Kwalomu ka hafu ya tinhlamuselo leti ti vulavula hi Yehovha Xikwembu. G. H. Livingston wa hlamusela: “Loko wu tirhisiwa eka Xikwembu, mongo wa rilaveta a wu kombisi nhlamuselo ya ntlhaveko wo huma endleleni, kambe, ematshan’weni ya sweswo, wu kombisa ku phikelela eku gandzeleni ka Yehovha a ri swakwe.” (The Pentateuch in Its Cultural Environment) Xisweswo, New World Translation minkarhi yin’wana yi hundzuluxela riviti leri ra Xiheveru yi ku “ku phikelela eku tinyiketeleni ko hlawuleka.” (Ezekiyele 5:13) Tinhlamuselo tin’wana leti faneleke i “ku chivirika” kumbe “ku hiseka.”—Pisalema 79:5; Esaya 9:7.
3. Xana minkarhi yin’wana mavondzo ma nga hetisisa xikongomelo lexinene hi tindlela tihi?
3 Munhu u vumbiwe a ri ni vuswikoti bya ku va ni mavondzo, kambe ku wela ka vanhu exidyohweni swi vange leswaku mavondzo ya vona ma biha. Hambi swi ri tano, mavondzo ya munhu ma nga hetisisa xikongomelo lexinene. Ma nga susumetela munhu leswaku a sirhelela murhandziwa wakwe eka minkucetelo yo biha. Ku tlula kwalaho, vanhu va nga kombisa mavondzo hi ndlela leyinene eka Yehovha ni vugandzeri bya yena. (1 Tihosi 19:10) Leswaku ri nyika matwisiselo lamanene ya rilaveta ro tano ra Yehovha, riviti ra Xiheveru ri nga hundzuluxeriwa ri va ‘ku nyenya ka yena ku tlhontlhiwa.’—2 Tihosi 10:16, ringanisa NW.
Rhole Ra Nsuku
4. Hi xihi xileriso lexi khumbaka mavondzo lamanene lexi a xi hlawulekile eNawini lowu Xikwembu xi wu nyikeke Israyele?
4 Xikombiso xa mavondzo lamanene i xa leswi endlekeke endzhaku ka loko Vaisrayele va amukele Nawu eNtshaveni ya Sinayi. Hi ku phindha-phindha va tsundzuxiwile leswaku va nga gandzeli swikwembu leswi endliweke hi vanhu. Yehovha u va byele leswi: “Mina Yehovha Xikwembu xa wena ndzi Xikwembu lexi lavaka ku tinyiketela ko hlawuleka [kumbe, “Xikwembu lexi nga ni rilondzo (hisekaka); Xikwembu lexi nyenyaka ku tlhontlhiwa”].” (Eksoda 20:5, nhlamuselo ya le hansi NW; ringanisa Eksoda 20:22, 23; 22:20; 23:13, 24, 32, 33.) Yehovha u endle ntwanano ni Vaisrayele, a va tshembisa ku va katekisa ni ku va nghenisa eTikweni ra Xitshembiso. (Eksoda 23:22, 31) Kutani vanhu va te: “Hikwaŝo leŝi Yehova a ŝi v̌uleke hi ta ŝi yingisa, hi v̌a hi ŝi endla.”—Eksoda 24:7.
5, 6. (a) Xana Vaisrayele va dyohe njhani hi ndlela leyikulu loko va ri eNtshaveni ya Sinayi? (b) Xana Yehovha ni vagandzeri vakwe vo tshembeka va ma kombise njhani mavondzo lamanene eSinayi?
5 Hambi swi ri tano, ku nga ri khale Vaisrayele va dyohele Xikwembu. A va ha dzime mixaxa ehansi ka Ntshava ya Sinayi. Muxe u hete masiku yo tala entshaveni, a amukela vuleteri lebyi engetelekeke lebyi humaka eka Xikwembu, kutani vanhu va sindzisa Aroni makwavo wa Muxe, leswaku a va endlela xikwembu. Aroni u pfumerile kutani a endla rhole hi nsuku lowu vanhu va wu nyikeleke. A va vula leswaku xifaniso lexi xi yimela Yehovha. (Pisalema 106:20) Esikwini leri landzeleke va endle magandzelo kutani va ya emahlweni va “nkhinsama e mahlweni ka rona.” Kutani va “suka v̌a tšina.”—Eksoda 32:1, 4, 6, 8, 17-19.
6 Muxe u xike entshaveni loko Vaisrayele va ha tlangela. Loko a vona ku tikhoma ka vona loku nyangatsaka, u huwelerile a ku: “[I] mani l’a ranḍaka Yehova?” (Eksoda 32:25, 26, ringanisa NW.) Vana va Levhi va hlengeletane eka Muxe, kutani a va byela leswaku va teka matlhari va dlaya vagandzeri lava va swifaniso. Hi ku kombisa mavondzo ya vona hikwalaho ka vugandzeri byo tenga bya Xikwembu, Valevhi va dlaye vamakwavo lava nga ni nandzu va kwalomu ka 3 000. Yehovha u tiyise xiendlo lexi hi ku rhumela ntungu ehenhla ka lava poneke. (Eksoda 32:28, 35) Kutani Xikwembu xi tlhele xi vula xileriso lexi nge: “U nga ka u nga nkhinsameli šikwembu šiṅwana, hikuv̌a Yehova o v̌uriwa l’a lav̌etaka; i Šikwembu ša rilonḍo.”—Eksoda 34:14.
Baali Wa Le Peyori
7, 8. (a) Xana Vaisrayele vo tala va nghenise ku yini evugandzerini lebyikulu bya swikwembu swa hava malunghana na Baali wa le Peyori? (b) Xana ntungu wa Yehovha wu herise ku yini?
7 Endzhaku ka malembe ya 40, loko tiko ra Israyele ri ri kusuhi ni ku nghena eTikweni ra Xitshembiso, vavasati vo koka-mahlo va Vamowabu ni Vamidiyani va wonge Vaisrayele vo tala leswaku va ta tsakela moya wa vona wo amukela vaendzi. Vavanuna lava a va fanele va arile ku tihlanganisa ni vagandzeri va swikwembu swa mavunwa. (Eksoda 34:12, 15) Ematshan’weni ya sweswo, va tsutsumele kona ku fana ni ‘tinkuzi loko ti ya eku tlhaviweni,’ va oswa swin’we ni vavasati va tlhela va nkhinsama na vona emahlweni ka Baali wa le Peyori.—Swivuriso 7:21, 22; Tinhlayo 25:1-3.
8 Yehovha u rhumele ntungu leswaku wu dlaya lava katsekeke evugandzerini lebyi bya rimbewu lebyi khomisaka tingana. Xikwembu xi tlhele xi lerisa Vaisrayele vo tshembeka leswaku va dlaya vamakwavo lava dyoheke. Hi ku delela, ndhuna ya Israyele leyi va nge i Zimri yi te ni nkosikazi ya Mumidiyani etendeni ra yona leswaku yi etlela na yena. Loko a vona leswi, Finiyasi muprista la chavaka Xikwembu u dlaye mpatswa lowu wa mahanyelo yo biha. Ivi ntungu lowu wu herisiwa, kutani Xikwembu xi ku: “Finiyasi . . . u tlherise vukarhi bya mina ehenhla ka Vaisrayele; u va kombise mavondzo ya vukarhi yo fana ni lama ndzi susumeteke, kutani hikwalaho ka mavondzo ya mina a ndzi va lovisanga Vaisrayele.” (Tinhlayo 25:11, The New English Bible) Hambi leswi tiko ri nga lovisiwangiki, ku fe Vaisrayele va kwalomu ka 23 000. (1 Vakorinto 10:8) Va lahlekeriwe hi ntshembo lowu a va ri na wona ku sukela khale wa ku nghena eTikweni ra Xitshembiso.
Dyondzo Leyi Nyikaka Xitsundzuxo
9. Xana vanhu va Israyele ni va Yuda va weriwe hi yini hikwalaho ko pfumala mavondzo ya vugandzeri lebyi tengeke bya Yehovha?
9 Lexi khomisaka gome, hi ku hatlisa Vaisrayele va rivale tidyondzo leti. A va nga ri na mavondzo ya vugandzeri lebyi tengeke bya Yehovha. “V̌a v̌anga . . . rilonḍo ra [Xikwembu] hi ŝifaniso ŝa ŝikwembu ŝa v̌ona.” (Pisalema 78:58) Hikwalaho, Yehovha u pfumelele tinxaka ta khume ta Israyele leswaku ti yisiwa evuhlongeni hi Vaasiriya hi 740 B.C.E. Mfumo wa Yuda lowu saleke wa tinxaka timbirhi wu kume nxupulo lowu fanaka, loko Yerusalema ntsindza wa vona wu lovisiwe elembeni ra 607 B.C.E. Vo tala va dlayiwile, naswona lava poneke va yisiwe evuhlongeni eBabilona. Vona xitsundzuxo lexinene swonghasi eka Vakreste hinkwavo namuntlha!—1 Vakorinto 10:6, 11.
10. I yini lexi nga ta endleka eka vagandzeri va swikwembu swa hava lava nga hundzukiki?
10 N’we-xa-nharhu xa vaaki va misava—va kwalomu ka 1 900 wa timiliyoni—sweswi va tivula Vakreste. (1994 Britannica Book of the Year) Vunyingi bya vona byi le tikerekeni leti tirhisaka swifaniso ni swihambano evugandzerini bya tona. Yehovha a nga va tsetselelanga vanhu vakwe lava pfuxeke mavondzo ya yena hi ku gandzela ka vona swikwembu swa hava. Naswona a nge va tsetseleli lava tivulaka Vakreste, lava gandzelaka hi ku tirhisa swilo leswi vonakaka. Yesu Kreste u te: “Xikwembu i moya; kutani lava xi gandzelaka, va fanele ku xi gandzela hi moya ni ntiyiso.” (Yohane 4:24) Ku tlula kwalaho, Bibele yi tsundzuxa Vakreste leswaku va tivonela eku gandzeleni ka swikwembu swa hava. (1 Yohane 5:21) Vagandzeri va swifaniso lava nga hundzukiki va hlayiwa exikarhi ka lava nga ta ka va nga dyi ndzhaka ya Mfumo wa Xikwembu.—Vagalatiya 5:20, 21.
11. Xana Mukreste a nga ha va ni nandzu wa ku gandzela swikwembu swa hava handle ko nkhinsamela xifaniso hi ndlela yihi, naswona i yini lexi nga n’wi pfunaka ku papalata vugandzeri byo tano bya swikwembu swa hava? (Vaefesa 5:5)
11 Hambi loko Mukreste wa ntiyiso a nga ta ka a nga xi nkhinsameli xifaniso, u fanele ku papalata xin’wana ni xin’wana lexi Xikwembu xi xi langutaka tanihi lexi yelanaka ni vugandzeri bya swifaniso, lexi thyakeke ni xa vudyoho. Hi xikombiso, Bibele ya tsundzuxa: “Dlayani leswi swi nga swa misava eka n’wina, hileswaku vuoswi, ni swa thyaka, ni ku hisekela swa tingana, ni ku navela loko biha, ni makwanga, ku nga ku gandzela swikwembu swa hava. Hikwalaho ka swona vukari bya Xikwembu byi ta [ehenhla ka lava tiarisaka].” (Vakolosa 3:5, 6, xiitaliki i xerhu.) Loko hi yingisa marito lawa hi ta papalata ku tikhoma loko biha. Leswi swi lava leswaku hi papalata vuhungasi lebyi pfuxaka ku navela loku thyakeke ka rimbewu. Ematshan’weni yo enerisa ku navela ko tano, Vakreste va ntiyiso va ni mavondzo hikwalaho ka vugandzeri lebyi tengeke bya Xikwembu.
Swikombiso Swa Le Ndzhakunyana Swa Mavondzo Ya Xikwembu
12, 13. Xana Yesu u xi vekise ku yini xikombiso lexi xiyekaka eku kombiseni ka mavondzo ya vugandzeri lebyi tengeke bya Xikwembu?
12 Xikombiso lexi xiyekaka swinene xa munhu loyi a kombiseke mavondzo hikwalaho ka vugandzeri lebyi tengeke bya Xikwembu a ku ri Yesu Kreste. Elembeni ro sungula ra vutirheli bya yena, u vone van’wamabindzu va makwanga va xavisa eswivaveni swa tempele. Swi le rivaleni leswaku Vayuda lava endzeke a va ta lava mpfuno wa vaxavisi leswaku va cinca mali ya le tikweni ra vona ivi va kuma leyi a yi ta amukeleka eka xibalo xa tempele. Nakambe a va lava ku xava swifuwo ni swinyanyana leswaku va endla magandzelo lawa a ma laviwa hi Nawu wa Xikwembu. Ku xaviselana ko tano a ku fanele ku endliwe ehandle ka swivava swa tempele. Leswi tlulaka sweswo, swi le rivaleni leswaku vaxavisi a va dyelela vamakwavo hikwalaho ka swilaveko swa vona swa vukhongeri hi ku teka mali yo tlula mpimo. Hikwalaho ka mavondzo ya vugandzeri lebyi tengeke bya Xikwembu, Yesu u tirhise nkharisa leswaku a hlongola tinyimpfu ni tihomu. Nakambe u wisetele matafula ya vaxavisi, a ku: “Mi nga teki yindlu ya Tata wa mina, mi yi endla ya ku bindzulela eka yona.” (Yohane 2:14-16) Xisweswo Yesu u hetisise marito ya Pisalema 69:9: “Ku hiseka [kumbe, “mavondzo,” Byington] ka yindlu ya wena ku nḍi dyile.”
13 Endzhaku ka malembe manharhu, Yesu u vone vaxavisi va makwanga va xavisa etempeleni ya Yehovha. Xana a a ta yi basisa ra vumbirhi? Mavondzo yakwe ya vugandzeri lebyi tengeke bya Xikwembu a ma ri makulu swinene enkarhini wolowo ku fana ni le nkarhini lowu a sunguleke vutirheli byakwe ha wona. U hlongole vaxavisi swin’we ni vaxavi. Naswona u nyike ni xivangelo lexi tiyeke swinene xa swiendlo swakwe, a ku: “Xana a ku tsariwanga leswaku: ‘Yindlu ya mina yi ta vuriwa yindlu ya xikhongelo eka matiko hinkwawo’ xana? Kasi n’wina mi yi endlile ‘bako ra makhamba’.” (Marka 11:17) Mawaku xikombiso lexinene swonghasi xa ku phikelela eku kombiseni ka mavondzo ya Xikwembu!
14. Xana mavondzo ya Yesu ya vugandzeri lebyi tengeke ma fanele ma hi khumbisa ku yini?
14 Vumunhu bya Hosi Yesu Kreste loyi sweswi a kwetsimisiweke a byi cincanga. (Vaheveru 13:8) Eka lembe-xidzana leri ra vu-20, mavondzo lawa a nga na wona hi vugandzeri lebyi tengeke bya Tata wakwe ma fana ni lawa a ri na wona loko a ha ri emisaveni. Leswi swi nga voniwa eka marungula ya Yesu lawa a ma yiseke eka mavandlha ya nkombo lama tsariweke ebukwini ya Nhlavutelo. Matirha ngopfu enkarhini wa sweswi, “hi siku ra Hosi.” (Nhlavutelo 1:10; 2:1–3:22) Exivonweni muapostola Yohane u vone Yesu Kreste la kwetsimisiweke loyi “mahlo ya yena a ma fana ni malangavi ya ndzilo.” (Nhlavutelo 1:14) Leswi swi kombisa leswaku a ku na nchumu lexi Kreste a nga xi voniki loko a kambela mavandlha a tiyisekisa leswaku ma tshama ma basile ni ku fanelekela ntirho wa Yehovha. Vakreste va manguva lawa va fanele ku tsundzuka xitsundzuxo xa Yesu malunghana ni ku lwisana ni ku ringeta ku tirhela tihosi timbirhi—Xikwembu ni rifuwo. (Matewu 6:24) Yesu u byele swirho swa vandlha ra Lawodikiya leswi a swi rhandza swilo leswi vonakaka a ku: “Leswi u kufumelaka, u nga hisiki, u nga titimeliki, ndzi ta ku kampfula enon’weni wa mina. . . . Tikarhate u hundzuka!” (Nhlavutelo 3:14-19) Hi marito ni hi xikombiso, vakulu va vandlha lava vekiweke va fanele ku pfuna vapfumeri-kulobye leswaku va papalata ntlhamu wa ku rhandza swilo leswi vonakaka. Vakulu na vona va fanele va sirhelela ntlhambi leswaku wu nga onhiwi hi mahanyelo ya misava leyi yi rhangisaka rimbewu emahlweni. Tlhandla-kambiri, vanhu va Xikwembu a va fanelanga va tshika nkucetelo wihi na wihi wo fana ni wa Yezabele evandlheni.—Vaheveru 12:14, 15; Nhlavutelo 2:20.
15. Xana muapostola Pawulo u tekelele Yesu hi ndlela yihi eku kombiseni ka mavondzo ya vugandzeri bya Yehovha?
15 Muapostola Pawulo a a tekelela Kreste. Leswaku a sirhelela Vakreste lava ha ku khuvuriwaka eka minkucetelo leyi thyakeke emoyeni, u te: “Ndza mi hisekela kukota leswi Xikwembu na xona xi mi hisekerisaka xiswona.” (2 Vakorinto 11:2) Emahlweni ka leswi, mavondzo ya Pawulo ya vugandzeri lebyi tengeke ma n’wi susumetele ku letela vandlha leri leswaku ri susa muoswi loyi a nga hundzukiki loyi a ri ni nkucetelo lowu nyamisaka. Swiletelo leswi huhuteriweke leswi nyikeriweke enkarhini wolowo swi nyike mpfuno lowukulu eka vakulu namuntlha tanihi leswi va tikarhatelaka ku hlayisa mavandlha ya Timbhoni ta Yehovha yo tlula 75 500 ma basile.—1 Vakorinto 5:1, 9-13.
Mavondzo Ya Xikwembu Ma Vuyerisa Vanhu Va Xona
16, 17. (a) Loko Xikwembu xi xupula Yuda wa khale, xana matiko ma kombise langutelo rihi? (b) Endzhaku ka vuhlonga bya Yuda bya malembe ya 70, xana Yehovha u ma kombisise ku yini mavondzo yakwe ehenhla ka Yerusalema?
16 Loko Xikwembu xi xupule vanhu va Yuda hi ku va tshika va yisiwa evuhlongeni eBabilona, va hlekuriwile. (Pisalema 137:3) Hi mavondzo ya rivengo, Vaedomu va tlhele va pfuna Vababilona leswaku va xanisa vanhu va Xikwembu, kutani Yehovha u swi vonile sweswo. (Ezekiyele 35:11; 36:15) Evuhlongeni lava poneke va hundzukile, naswona Yehovha u va tlherisele etikweni ra vona endzhaku ka malembe ya 70.
17 Eku sunguleni, vanhu va Yuda a va ri exiyin’weni lexi chavisaka. Muti wa Yerusalema ni tempele ya wona a swi hundzuke marhumbi. Kambe matiko lama vandzamaneke na rona a ma kanetana ni matshalatshala hinkwawo yo pfuxa tempele. (Ezra 4:4, 23, 24) Xana Yehovha u titwise ku yini hi leswi? Rhekhodo leyi huhuteriweke yi ri: “Yehova wa tinyimpi o te: Nḍi ni ritsimbo le’rikulu hikwalaho ka Yerusalem na Sion; kutani nḍi karihela hi ku tlurisa e matiko la’ma tiṭakeleke; hikuv̌a a nḍi kariheli tiko ra mina ŝiṭanana, kasi wona ma engeta ku endla ŝo biha. Hikwalaho, ku v̌ula Yehova, nḍi v̌uyela e ka Yerusalem hi tintŝalo, yindlu ya mina yi ta tlhela yi akiwa kona, ku v̌ula Yehova wa tinyimpi.” (Zakariya 1:14-16) Hi ku ya hi xitshembiso xakwe, tempele ni muti wa Yerusalema swi pfuxiwe hi laha ku humelelaka.
18. Xana Vakreste va ntiyiso va langutane na yini enyimpini yo sungula ya misava?
18 Vandlha ra Vukreste bya ntiyiso ri ve ni ntokoto lowu fanaka hi lembe-xidzana ra vu-20. Enyimpini yo sungula ya misava, Yehovha u tshinye vanhu vakwe hikwalaho ka leswi va nga hlayisangiki vukala-tlhelo lebyi heleleke enyimpini yoleyo ya misava. (Yohane 17:16) Xikwembu xi pfumelele mfumo wa tipolitiki leswaku wu va tshikilela, naswona vafundhisi va Vujagana va tsakisiwe hi khombo leri. Entiyisweni, vafundhisi a va famba emahlweni eku hlohloteleni ka van’watipolitiki leswaku va yirisa ntirho wa Swichudeni swa Bibele, hi laha Timbhoni ta Yehovha a ti vitaniwa ha kona enkarhini wolowo.—Nhlavutelo 11:7, 10.
19. Xana Yehovha u ma kombise njhani mavondzo ya vugandzeri byakwe ku sukela hi 1919?
19 Hambi swi ri tano, Yehovha u kombise mavondzo evugandzerini byakwe naswona u tlhele a amukela vanhu lava hundzukeke elembeni ra le ndzhaku ka nyimpi hi 1919. (Nhlavutelo 11:11, 12) Hikwalaho, nhlayo ya vadzunisi va Yehovha yi engeteleke yi suka eka 4 000 hi 1918 yi va kwalomu ka ntlhanu wa timiliyoni namuntlha. (Esaya 60:22) Hi ku hatlisa, mavondzo ya Yehovha ya vugandzeri byakwe lebyi tengeke ma ta kombisiwa hi tindlela ta matimba swinene.
Swiendlo Swa Nkarhi Lowu Taka Swa Mavondzo Ya Xikwembu
20. Xana Xikwembu xi ta endla yini ku nga ri khale ku kombisa mavondzo ya xona ya vugandzeri lebyi tengeke?
20 Eka malembe-xidzana yo tala tikereke ta Vujagana ti landzele ndlela ya Vayuda lava gwineheke lava pfuxeke mavondzo ya Yehovha. (Ezekiyele 8:3, 17, 18) Hi ku hatlisa Yehovha Xikwembu u ta teka goza hi ku nghenisa mianakanyo ya matimba etimbilwini ta swirho swa Nhlangano wa Matiko. Leswi swi ta susumetela mfumo lowu wa tipolitiki leswaku wu lovisa Vujagana ni vukhongeri hinkwabyo bya mavunwa. (Nhlavutelo 17:16, 17) Vagandzeri va ntiyiso va ta pona eku avanyiseni koloko loku tisiwaka hi Xikwembu ko chavisa. Va ta hlamula marito ya swivumbiwa swa le tilweni leswi nge: “Aleluya! . . . [Hikuva, NW] xi avanyisile muoswi lonkulu [vukhongeri bya mavunwa] loyi a boriseke misava hi vuoswi bya yena [tidyondzo ta yena ta mavunwa ni ku seketela tipolitiki leti onhaka], kutani xi rihiserile ngati ya malandza ya xona ehenhla ka yena.”—Nhlavutelo 19:1, 2.
21. (a) Xana Sathana ni mafambiselo yakwe va ta endla yini endzhaku ka ku lovisiwa ka vukhongeri bya mavunwa? (b) Xana Xikwembu xi ta angurisa ku yini?
21 Xana ku ta endleka yini endzhaku ka ndzoviso wa mfumo wa misava wa vukhongeri bya mavunwa? Sathana u ta hlohlotela mfumo wa tipolitiki leswaku wu hlela nhlaselo wa misava hinkwayo ehenhla ka vanhu va Yehovha. Xana Xikwembu xa ntiyiso xi ta endla yini hi matshalatshala lawa ya Sathana yo herisa vugandzeri bya ntiyiso emisaveni? Ezekiyele 38:19-23 ya hi byela: “Hikwalaho ka rilonḍo ra mina [kumbe, ku hiseka], ni nḍilo wa ku kariha ka mina [Yehovha], nḍi tiyisa, nḍi ri: . . . Hi laha nḍi nga ta tenga na yena [Sathana] hi ntungu ni ngati, nḍi ta nisa mpfula le’yikulu, ni maribye, ni nḍilo, ni šiv̌av̌ula e henhla ka yena, e henhla ka mitlawa ya yena, ne henhla ka matiko la’manyingi la’ma nga ta v̌a na yena. Kutani nḍi ta titwarisa ni ku tikwetsimisa, nḍi ta titiv̌isa e mahlweni ka matiko la’manyingi, ma ta tiv̌a leŝaku hi mina Yehova.”—Nakambe vona Sofoniya 1:18; 3:8.
22. Xana hi nga swi kombisa njhani leswaku hi ni mavondzo ya vugandzeri lebyi tengeke bya Yehovha?
22 Mawaku ndlela leyi swi chavelelaka ha yona ku tiva leswaku Hosi Leyikulu ya vuako hinkwabyo yi khathalela vagandzeri va yona va ntiyiso hi mavondzo! Hikwalaho ko tlangela tintswalo ta yona leti nga fanelangiki, a hi veni ni mavondzo ya vugandzeri bya ntiyiso bya Yehovha Xikwembu. Hi ku hiseka, onge hi nga ya emahlweni hi chumayela mahungu lamanene ni ku rindzela hi xivindzi siku lerikulu laha Yehovha a nga ta tlakusa ni ku kwetsimisa vito rakwe lerikulu.—Matewu 24:14.
Tinhla To Anakanyisisa Ha Tona
◻ Xana ku va ni mavondzo ya Yehovha swi vula yini?
◻ Xana hi nga dyondza yini exikombisweni lexi vekiweke hi Vaisrayele va khale?
◻ Xana hi nga swi papalata njhani ku pfuxa mavondzo ya Yehovha?
◻ Xana Xikwembu na Kreste va kombise mavondzo ya vugandzeri lebyi tengeke hi ndlela yihi?
[Bokisi leri nga eka tluka 12]
Rirhandzu A Ri Na Mavondzo
MALUNGHANA ni rivengo, Albert Barnes xidyondzi xa Bibele xa lembe-xidzana ra vu-19 u tsarile: “I xin’wana xa swikombiso leswi tolovelekeke ngopfu swa vubihi, naswona xi ku kombisa kahle ku onhaka ka vanhu.” U ye emahlweni a ku: “Loyi a nga kotaka ku xiyisisa tinyimpi hinkwato ni hasahasa ni makungu ya misava lama swi vangaka—marhengu ni swikongomelo hinkwaswo swa lava tivulaka Vakreste, leswi nyamisaka vukhongeri bya vona ni ku va endla va anakanya hi ndlela ya misava, a xiyisisa masungulo ya swona ya xiviri—a nga hlamala loko a kuma leswaku swo tala swi vangiwa hi rivengo. Swi hi twisa ku vava leswi van’wana va humelelaka ku tlula hina; hi navela ku va ni swilo leswi van’wana va nga na swona, hambi leswi hi nga riki na mfanelo ya swona; kutani leswi swi yisa eka tindlela to hambana-hambana to biha leti endleriwaka ku hunguta ntsako wa vona, kumbe leswaku hina hi swi kuma, kumbe ku kombisa leswaku swilo leswi va nga na swona a swi ringani ni leswi a va fanele va va na swona hi ntolovelo. . . . xisweswo moya wa rivengo lowu nga eswifuveni swa hina wu ta eneriseka.”—Varhoma 1:29; Yakobo 4:5.
Ku hambana ni sweswo, Barnes u vule marito lawa yo tsakisa malunghana ni rirhandzu, leri “nga riki na mona.” (1 Vakorinto 13:4, King James Version) U tsarile: “Rirhandzu a ri na mona hi ntsako wa van’wana; ri tsakela ku hlayiseka ka vona; naswona loko ntsako wa vona wu kula . . . , lava va susumetiwaka hi rirhandzu . . . a va nge wu herisi; a va nge va khomisi tingana hikwalaho ka leswi va nga na swona; a va nge wu kavanyeti ntsako wolowo; a va nge n’unun’uti kumbe ku vilela hikwalaho ka leswi vona va nga riki na rona. . . . Loko hi rhandza van’wana—loko hi tsakela ntsako wa vona, a hi fanelanga hi va fela mona.”
[Xifaniso lexi nga eka tluka 10]
Finiyasi a ri ni mavondzo ya vugandzeri lebyi tengeke bya Yehovha