Swivutiso Swa Vahlayi

Eka Vafilipiya 2:9, Pawulo u vule leswi ha Yesu: “Xikwembu xi n’wi tlakusile swinene, kutani xi n’wi nyikile vito leri nge henhla ka mavito man’wana hinkwawo.” Hi rihi vito leri lerintshwa? Naswona loko Yesu a ri ehansi ka Yehovha, swi tisa ku yini leswaku vito ra Yesu ri va ehenhla ka mavito man’wana hinkwawo?

Vafilipiya 2:7-9 yi hlayekisa xileswi: “Loko [Yesu] a voniwile a ri la kotisaka munhu, ú titsongahatile, a va loyi a yingisaka ku fikela eku feni [emhandzini ya nxaniso, NW]. Hikokwalaho Xikwembu xi n’wi tlakusile swinene, kutani xi n’wi nyikile vito leri nge henhla ka mavito man’wana hinkwawo.”

Ndzimana leyi a yi vuli swona leswaku leswi ku nga Yehovha ntsena la nga ni vito leri tlakukeke hi ku helela eka mavito laman’wana hinkwawo, Yesu u fanele a ri munhu un’we na Yehovha. Hi laha mongo wa Vafilipiya ndzima ya vumbirhi wu kombisaka ha kona, Yesu u amukele vito rakwe leri tlakukeke endzhaku ka ku pfuxiwa kakwe. Emahlweni ka kwalaho, a nga ri na rona. Hi hala tlhelo, Yehovha a a ri la tlakukeke hi minkarhi hinkwayo, naswona xikhundlha xakwe a xi cincanga. Leswaku Yesu u amukele vito leri tlakukeke ku tlula vito leri a a ri na rona emahlweni ka vutirheli byakwe bya laha misaveni swi kombisa leswaku a hi munhu un’we na Yehovha. Loko Pawulo a vule leswaku Yesu u nyikiwe vito leri tlakukeke eka mavito laman’wana hinkwawo, a a vula leswaku Yesu sweswi u ni vito leri tlakukeke eka swivumbiwa hinkwaswo swa Xikwembu.

Hi rihi vito ra Yesu leri tlakukeke? Esaya 9:6 ya hi pfuna ku nyikela nhlamulo. Loko yi profeta hi ta ku ta ka Mesiya, Yesu, ndzimana yoleyo yi ri: “V̌uhosi byi v̌ekiwile khatleni ra yena. O ta tšhyiwa Muhlamarisi, Muṭunḍuši, Šikwembu ša matimba, Tatana l’a nga riki na ku hela, Hosi ya ku rula.” (Xiitaliki i xerhu.) Laha “vito” ra Yesu ri yelana ni xikhundlha xa yena xa le henhla ni vulawuri, ku nga ndlela leyi hi ri twisisaka ha yona “vito leri nge henhla ka mavito man’wana hinkwawo” leri ku vulavuriwaka ha rona eka Vafilipiya 2:9. Tsolo rin’wana ni rin’wana ri lerisiwa leswaku ri nkhinsama eka Yesu hikwalaho ka xikhundlha xa le henhla xa vulawuri lexi Yehovha a n’wi nyikeke xona—xikhundlha lexi tlakukeke ku tlula lexi nyikiweke xivumbiwa xihi na xihi xin’wana. Rito “man’wana” eka vuhundzuluxeri lebyi a ri yimeriwanga hi ku kongoma eka ndzimana ya Xigriki, kambe mongo wa ndzimana wa ri humesa. “Vito” ra Yesu a ri le henhla ka vito ra yena n’wini kambe ri le henhla ka mavito man’wana hinkwawo ya swivumbiwa.

Vona ndlela leyi hi tsakaka ha yona ku hlanganyela ni tintsumi hinkwato to tshembeka swin’we ni vanhu eku nkhinsameni hi xixima vito ra Yesu! Hi endla leswi hi ku titsongahata eka Yesu, eka xikhundlha xa yena lexi tlakukeke xa matimba, lexi Yehovha a n’wi nyikeke xona—“eku dzuniseni ka Xikwembu Tatana.”—Vafilipiya 2:11; Matewu 28:18.