Yehovha U Nyika La Karhaleke Matimba
“La’v̌a ṭhembaka Yehova v̌a engeta v̌a kuma matimba la’mantŝha. V̌a ta haha tani hi magama.”—ESAYA 40:31.
1, 2. Xana Yehovha u va nyika yini lava tshembelaka eka yena, naswona i yini leswi hi nga ta swi xiya sweswi?
MAGAMA i tin’wana ta tinyenyana ta matimba swinene exibakabakeni. Ma nga haha mimpfhuka yo leha handle ko kavata timpiko ta wona. Leswi ri nga ni timpiko leti nga leha ku tlula timitara timbirhi, “Hosi ya Tinyenyana,” gama ra xitshopana, i “rin’wana ra magama lamakulu ri tlhela ri hlamarisa exikarhi ka magama hinkwawo; ri haha ri hundza swintshabyana ni switsunga, ivi ri heta tiawara [ri] haha-haha ehenhla ka nongonoko wa tintshava, kutani ri ba xindziwa-ndziwana ri tlakukela ehenhla ku kondza ri vonaka ri ri nchumunyana wa ntima exibakabakeni.”—The Audubon Society Encyclopedia of North American Birds.
2 Loko a ri karhi a ehleketa hi vuswikoti byo haha bya gama, Esaya u tsarile: “[Yehovha] o nyika l’a kareleke matimba ya yena, o pfuša l’a heleke mbilu. Timbhuri ta karala, ta hela matimba, ni tinhenha ti lav̌a ku wa; kambe la’v̌a ṭhembaka Yehova v̌a engeta v̌a kuma matimba la’mantšha. V̌a ta haha tani hi magama, v̌a ta ṭuṭuma v̌a nga karali; v̌a ta famba v̌a nga ṭani!” (Esaya 40:29-31) Wa nga vona ndlela leyi swi chavelelaka ha yona ku tiva leswaku Yehovha u nyika lava tshembelaka eka yena matimba yo ya emahlweni, onge u va hlomisa hi timpiko leti vonakaka ti nga karhali ta gama leri haha-hahaka ri ya ehenhla! Sweswi, xiya man’wana ya malunghiselelo lawa a ma endleke leswaku a nyika lava karhaleke matimba.
Matimba Ya Xikhongelo
3, 4. (a) Yesu u khutaze vadyondzisiwa va yena ku endla yini? (b) I yini lexi hi nga langutelaka leswaku Yehovha a xi endla loko a hlamula swikhongelo swa hina?
3 Yesu u khutaze vadyondzisiwa va yena “ku khongela minkarhi hinkwayo, va nga heli timbilu.” (Luka 18:1) Xana ku chululela timbilu ta hina eka Yehovha swi nga hi pfuna hakunene leswaku hi tlhela hi kuma matimba ni ku papalata ku lan’wa loko mintshikilelo ya vutomi yi vonaka yi hi hlula? Ina, kambe ku ni swilo swin’wana leswi hi faneleke hi swi tsundzuka.
4 Hi fanele hi va lava nga ni ku twisisa, malunghana ni leswi hi languteleke leswaku Yehovha a swi endla, loko a hlamula swikhongelo swa hina. Mukreste un’wana loyi a veke ni gome lerikulu endzhakunyana u te: “Ku fana ni mavabyi man’wana, Yehovha a nga ma endli mahlori enkarhini lowu. Kambe wa hi pfuna leswaku hi langutana na byona ni ku hlakarhela hi mpimo lowu nga kotekaka eka mafambiselo lawa.” Loko a hlamusela lexi endleke swikhongelo swa yena swi n’wi vuyerisa, u engeterile: “A ndzi kuma moya lowo kwetsima wa Yehovha tiawara ta 24 hi siku.” Xisweswo, Yehovha a nga hi sirheleti eka mintshikilelo ya vutomi leyi nga hi tshikilelaka, kambe u “nyika Moya lowo Kwetsima eka lava kombelaka ka yena.” (Luka 11:13; Pisalema 88:1-3) Moya wolowo wu nga hi endla hi kota ku langutana ni ndzingo wihi na wihi kumbe ntshikilelo lowu hi nga langutanaka na wona. (1 Vakorinto 10:13) Loko swi fanerile, wu nga hi nyika “matimba lama tlulaka lama tolovelekeke” leswaku hi tiyisela ku kondza Mfumo wa Xikwembu emisaveni leyintshwa leyi tshineleke wu susa swiphiqo hinkwaswo leswi hi tshikilelaka.—2 Vakorinto 4:7, NW.
5. (a) Leswaku swikhongelo swa hina swi humelela, i swilo swihi swimbirhi leswi nga swa nkoka? (b) Xana hi fanele hi khongela hi ndlela yihi loko hi lwisana ni ku tsana ka nyama? (c) Xana ku khongela ka hina hi ku phikelela ni hi ku kongoma ku ta kombisa yini eka Yehovha?
5 Kambe, leswaku swikhongelo swa hina swi tirha hi fanele hi tiyisela, naswona hi fanele hi kongoma. (Varhoma 12:12) Hi xikombiso, loko minkarhi yin’wana u karhala hikwalaho ka leswi u lwisanaka ni ku tsana ka nyama, eku sunguleni ka siku rin’wana ni rin’wana, kombela Yehovha leswaku a ku pfuna u papalata ku wela eku tsaneni koloko siku hinkwaro. Khongerisa sweswo siku hinkwaro ni loko u nga si ya eku etleleni vusiku byin’wana ni byin’wana. Loko u tlhelele endzhaku, kombela Yehovha leswaku a ku rivalela, kambe u tlhela u n’wi byela lexi vangeleke ku tlhelela endzhaku koloko ni leswi u nga ha swi endlaka ku papalata swiyimo swoleswo enkarhini lowu taka. Ku phikelela ko tano ni swikhongelo leswi kongomeke leswi yisiwaka eka “Mutwi wa swikhongelo” swi ta kombisa ku tshembeka ka ku navela ka wena leswaku u hlula nyimpi.—Pisalema 65:2, NW; Luka 11:5-13.
6. Ha yini hi nga ha fanelaka ku langutela Yehovha leswaku a twa swikhongelo swa hina hambi loko hi titwa hi nga fanelekeli ku khongela?
6 Hambi swi ri tano, minkarhi yin’wana lava karhaleke va nga ha titwa va nga fanelekeli ku khongela. Wansati wa Mukreste loyi a titweke hi ndlela yoleyo endzhakunyana u te: “Yoleyo i mianakanyo leyi nga ni khombo swinene hikuva swi vula leswaku ha tiavanyisa hina hi hexe, kambe ku avanyisa a hi ka hina.” Entiyisweni, “hi šona Šikwembu le’ši av̌anyisaka.” (Pisalema 50:6) Bibele ya hi tiyisekisa leswaku hambi loko “ripfalo ra hina ri hi avanyisa . . . Xikwembu xi tlula ripfalo leri ra hina hi vukulu, naswona xi tiva hinkwaswo.” (1 Yohane 3:20) Wa nga vona ndlela leyi swi chavelelaka ha yona ku tiva leswaku hambi loko hi nga tiavanyisa tanihi lava nga fanelangiki ku khongela, Yehovha a nga ha va a nga titwi hi ndlela yoleyo hi hina! U “tiva hinkwaswo” malunghana na hina, ku katsa ni swiyimo swa vutomi bya hina leswi nga ha vaka swi hi endle hi titwa hi nga faneleki. (Pisalema 103:10-14) Tintswalo ta yena ni vuenti bya ku twisisa ka yena swi n’wi susumetela ku twa swikhongelo leswi humaka “[embilwini] le’yi ṭhov̌ekeke, le’yi nge nhlomulweni.” (Pisalema 51:17) Xana a nga ala ku twa swirilo swa hina swo lava mpfuno njhani loko yena hi yexe a sola “l’a tisiv̌aka tindlev̌e leŝaku a nga twi mikosi ya šisiwana” ke?—Swivuriso 21:13.
Rirhandzu Ra Vumakwerhu
7. (a) I lunghiselelo rihi leri Yehovha a ri endleleke ku hi pfuna leswaku hi tlhela hi kuma matimba? (b) I yini lexi loko hi xi tiva hi vumakwerhu bya hina xi nga hi tiyisaka?
7 Lunghiselelo rin’wana leri Yehovha a ri endleke leswaku a hi pfuna ku tlhela hi kuma matimba i vumakwerhu bya hina bya Vukreste. Mawaku lunghelo ra risima swonghasi ra ku va xiphemu xa ndyangu wa misava hinkwayo wa vamakwerhu va xinuna ni va xisati! (1 Petro 2:17) Loko mintshikilelo ya vutomi yi hi tshikilela, rirhandzu ra vumakwerhu bya hina ri nga hi pfuna ku tlhela hi kuma matimba. Hi ndlela yihi? Ku tiva leswaku a hi hexe eku langutaneni ni swiphiqo leswi tshikilelaka swi nga hi tiyisa. Exikarhi ka vamakwerhu va hina va xinuna ni va xisati, handle ko kanakana va kona van’wana lava tshameke va langutana ni mintshikilelo kumbe miringo ni lava veke ni mintlhaveko leyi fanaka swinene ni ya hina. (1 Petro 5:9) Swa chavelela ku tiva leswaku leswi hi langutanaka na swona swi tolovelekile ni leswaku mintlhaveko ya hina yi tolovelekile.
8. (a) I swikombiso swihi leswi kombisaka ndlela leyi hi nga ha kumaka mpfuno wo tala lowu lavekaka ni xikhutazo eka vumakwerhu bya hina? (b) Xana wena hi wexe u pfuniwe ni ku chaveleriwa hi ‘munghana wa ntiyiso’ hi ndlela yihi?
8 Eka rirhandzu ra vumakwerhu hi nga kuma ‘vanghana va ntiyiso’ lava, loko hi ri ni ntshikilelo, va nga nyikelaka mpfuno ni xikhutazo lexi lavekaka. (Swivuriso 17:17) Hakanyingi, leswi lavekaka i marito ya tintswalo kumbe swiendlo leswi ehleketiweke kahle. Mukreste la lwisaneke ni mintlhaveko ya ku titwa a nga pfuni nchumu wa tsundzuka: “A ku ri ni vanghana lava a va vulavula na mina hi swilo leswinene leswi ndzi swi endlaka, leswaku va ndzi pfuna ndzi hlula mianakanyo leyi hoxeke leyi a ndzi ri na yona.” (Swivuriso 15:23) Endzhaku ka rifu ra xinhwanyatana xa yena, eku sunguleni makwerhu wa xisati loyi a swi n’wi tikela ku yimbelela tinsimu ta Mfumo eminhlanganweni ya vandlha, ngopfu-ngopfu tinsimu leti a ti boxa mpfuko wa vafi. Wa tsundzuka: “Eka khamba rin’wana makwerhu wa xisati loyi a a tshame eka tlhelo lerin’wana u ndzi vone ndzi rila. U tile, a fika a ndzi angarha, ivi a yimbelela risimu hinkwaro na mina. Ndzi titwe ndzi rhandza vamakwerhu swinene, naswona ndzi tsakile leswi hi yeke eminhlanganweni, ndzi xiya leswaku hi kona laha mpfuno wa hina wu kumekaka kona, eHolweni ya Mfumo.”
9, 10. (a) Xana hi nga hoxa xandla eka rirhandzu ra vumakwerhu bya hina hi ndlela yihi? (b) I vamani lava ngopfu-ngopfu va lavaka vunakulobye lebyinene? (c) I yini leswi hi nga swi endlaka ku pfuna lava lavaka xikhutazo?
9 Kavula, un’wana ni un’wana wa hina u ni vutihlamuleri byo hoxa xandla eka rirhandzu ra vumakwerhu bya Vukreste. Xisweswo, timbilu ta hina ti fanele ti ‘ndlandlamuxiwa’ leswaku ti nghenisa vamakwerhu hinkwavo. (2 Vakorinto 6:13) Wa nga vona ndlela leyi swi khomisaka gome ha yona eka lava karhaleke loko va vona onge vona a va ha kombisiwi rirhandzu ra vumakwerhu! Kambe, Vakreste van’wana va vika leswaku va titwa va ri ni xivundza naswona va honisiwa. Makwerhu wa xisati loyi nuna wa yena a kanetaka ntiyiso u titshandzile a ku: “I mani loyi a nga byi naveriki naswona a nga byi laviki vunghana lebyi akaka, swikhutazo ni vunakulobye bya rirhandzu? Hi kombela mi tsundzuxa vamakwerhu leswaku ha va lava!” Ina, ngopfu-ngopfu lava swiyimo swa vona swi va tshikilelaka evuton’wini—lava nga ni vanghana va vukati lava nga pfumeriki, vatswari lava nga voxe, lava nga ni swiphiqo swa rihanyo leswi nga tshungulekiki, lava dyuhaleke ni van’wana—va lava vunakulobye lebyinene. Xana va kona van’wana va hina lava faneleke ku tsundzuxiwa hi sweswo?
10 Xana hi nga pfuna hi ku endla yini? A hi kuriseni rirhandzu ra hina. Loko hi rhamba vanhu, hi nga va rivali lava lavaka xikhutazo. (Luka 14:12-14; Vaheveru 13:2) Ematshan’weni yo ehleketa leswaku swiyimo swa vona swi va sivela ku amukela xirhambo, ha yini u nga va rhambi kunene? Kutani u va tshika va endla xiboho. Hambi loko va taka va nga xi amukeli, handle ko kanakana va ta titwa va khutazekile ku tiva leswaku van’wana va ehleketa hi vona. Sweswo ku nga ha va leswi va swi lavaka leswaku va tlhela va kuma matimba.
11. Lava tshikileriweke va nga ha lava mpfuno hi tindlela tihi?
11 Lava karhaleke va nga ha lava mpfuno hi tindlela tin’wana. Hi xikombiso, manana la nga tekiwangiki a nga ha tsakela leswaku ku va ni makwerhu wa xinuna la wupfeke la tsakelaka n’wana wa yena wa mufana la nga riki na tatana. (Yakobo 1:27) Makwerhu wa xinuna kumbe wa xisati la nga ni xiphiqo lexikulu xa rihanyo a nga ha tsakela ku pfuniwa hi ku yeriwa exitolo kumbe hi mintirho yin’wana ya le ndlwini. Munhu la dyuhaleke a nga ha va a navela vunghana byo karhi kumbe a lava mpfuno wo karhi leswaku a ya evutirhelini bya nsimu. Loko ku laveka leswaku hi hambeta hi pfuna exiyin’weni xo tano, swi nga ‘ringa ku tiya ka rirhandzu ra hina.’ (2 Vakorinto 8:8) Ematshan’weni yo fularhela lava pfumalaka hikwalaho ka nkarhi ni matshalatshala lama lavekaka, onge hi nga famba emahlweni hi rirhandzu ra Vukreste, hi ku va lava anakanyelaka ni ku endla xo karhi hi swilaveko swa van’wana.
Matimba Ya Rito Ra Xikwembu
12. Xana Rito ra Xikwembu ri hi pfunisa ku yini leswaku hi tlhela hi kuma matimba?
12 Munhu la tshikaka ku dya hi ku hatlisanyana u ta heleriwa hi ntamu. Hikwalaho ka sweswo, ndlela yin’wana leyi Yehovha a hi nyikaka matimba yo ya emahlweni ha yona i ku tiyiseka leswaku hi wundliwa kahle hi tlhelo ra moya. (Esaya 65:13, 14) I swakudya swihi swa moya leswi a swi nyikeleke? Nchumu lowukulu, i Rito ra yena, ku nga Bibele. (Matewu 4:4; ringanisa Vaheveru 4:12.) Xana ri nga hi pfunisa ku yini leswaku hi tlhela hi kuma matimba? Loko mintshikilelo ni swiphiqo leswi hi langutaneke na swona swi sungula ku hunguta ntamu wa hina, hi nga kuma ntamu hi ku hlaya hi mintlhaveko na hi matshalatshala ya xiviri lama endliweke hi vavanuna ni vavasati vo tshembeka va le minkarhini ya Bibele. Hambi leswi va nga swikombiso leswi hlamarisaka swa vutshembeki, a va ri vanhu “lava nga ni mintlhaveko leyi fanaka ni ya hina.” (Yakobo 5:17, NW; Mintirho 14:15) Va tshame va langutana ni miringo ni mintshikilelo leyi fanaka ni ya hina. Xiya swikombiso swin’wana.
13. I swikombiso swihi swa le Matsalweni leswi kombisaka leswaku vavanuna ni vavasati lava tshembekeke va le minkarhini ya Bibele a va ri ni mintlhaveko ni mintokoto leyi fanaka kahle ni ya hina?
13 Mupatriarka Abrahama u rile swinene hikwalaho ka rifu ra nsati wa yena hambi leswi a a ri ni ripfumelo eka mpfuko wa vafi. (Genesa 23:2; ringanisa Vaheveru 11:8-10, 17-19.) Davhida la hundzukeke u vone onge swidyoho swa yena swi n’wi endle a nga fanelekeli ku tirhela Yehovha. (Pisalema 51:11) Muxe a a ri ni mintlhaveko ya ku titwa a nga faneleki. (Eksoda 4:10) Epafrodito u karhatekile loko swi sungule ku tiveka leswaku vuvabyi lebyikulu a byi n’wi hikela eka leswi a a swi endlaka “entirhweni wa Hosi.” (Vafilipiya 2:25-30, NW) Pawulo a a fanele a lwisana ni nyama leyi tsaneke. (Varhoma 7:21-25) Efodiya na Sintika, vamakwerhu vambirhi va xisati lava totiweke evandlheni ra le Filipiya, swi vonaka onge a va nga hanyisani. (Vafilipiya 1:1; 4:2, 3) Wa nga vona ndlela leyi swi khutazaka ha yona ku tiva leswaku vanhu lava vo tshembeka a va ri ni mintlhaveko ni mintokoto leyi fanaka ni ya hina, kambe a va lan’wanga! Hambi a ri Yehovha a nga va lahlanga.
14. (a) I xitirho xihi lexi Yehovha a xi tirhiseke ku hi pfuna ku kuma matimba eRitweni ra yena? (b) Ha yini timagazini ta Xihondzo xo Rindza na Xalamuka! ti ri ni swihloko leswi vulavulaka hi timhaka ta ntshamisano, ndyangu ni ta mintlhaveko?
14 Leswaku a hi pfuna hi kuma ntamu eRitweni ra yena, Yehovha u tirhisa nandza lowo tshembeka, wa vutlhari leswaku a hambeta a hi nyika “swakudya hi nkarhi wa kona.” (Matewu 24:45) Nandza lowo tshembeka, wa vutlhari i khale a tirhisa timagazini ta Xihondzo xo Rindza ni Xalamuka! leswaku a lwela ntiyiso wa Bibele ni ku huwelela Mfumo wa Xikwembu tanihi ntshembo wu ri wun’we ntsena wa vanhu. Ngopfu-ngopfu eka malembe-khume ma nga ri mangani lama hundzeke, timagazini leti a ti ri ni swihloko swa Matsalwa leswi nga le nkarhini leswi vulavulaka hi swiphiqo swa ntshamisano, ndyangu ni swa mintlhaveko leswi hambi ku ri van’wana va malandza ya Xikwembu va hlangavetanaka na swona. Xana rungula ro tano ri humesiwe hi xikongomelo xihi? Kahle-kahle, leswaku ri pfuna lava hlangavetanaka ni swiphiqo swo tano leswaku va kuma ntamu ni xikhutazo eRitweni ra Xikwembu. Kambe swihloko swo tano swi tlhela swi pfuna hinkwerhu leswaku hi swi twisisa kahle leswi van’wana va vamakwerhu va hina va langutanaka na swona. Xisweswo hi hlomisiwa hi mpimo lowu antswaka leswaku hi yingisa marito ya Pawulo lama nge: “Mi tiyisa lava helaka ntamu; pfunani lava tsaneke, mi lehisela hinkwavo timbilu.”—1 Vatesalonika 5:14.
Vakulu Lava Nga “Šisirelelo Loko Moya Wu Hunga”
15. Xana Esaya u profete yini mayelana ni lava tirhaka tanihi vakulu, naswona i vutihlamuleri byihi lebyi leswi swi byi vekaka eka vona?
15 Yehovha u veke vanhu van’wana leswaku va hi pfuna loko hi karhala—ku nga vakulu va vandlha. Muprofeta Esaya u tsarile mayelana na vona a ku: “Uṅwana ni uṅwana wa v̌ona o ta kotisa šisirelelo loko moya wu hunga, kukota šitšhav̌elo loko šidzedze ši fika, kukota šinambyana ša mati e tikweni ra dyanḍa, ni nḍuti wa ribye le’ri tlakukeke tikweni le’ri omeke.” (Esaya 32:1, 2) Kutani, vakulu va ni vutihlamuleri bya timfanelo to fanelekela leswi Yehovha a swi vhumbheke ha vona. Va “fanele va kotisa” swihlovo swa nchavelelo ni ku phyuphyisa van’wana naswona va rhandza ku “ya emahlweni va rhwalelana mindzhwalo, [kumbe “swilo swo karhata”; hi ku kongoma, “swilo swo tika”].” (Vagalatiya 6:2, nhlamuselo ya le hansi eka NW) Xana va nga swi endlisa ku yini leswi?
16. Xana vakulu va nga endla yini ku pfuna loyi a titwaka a nga fanelekeli ku khongela?
16 Hi laha swi hlamuseriweke ha kona eku sunguleni, minkarhi yin’wana munhu loyi a karhaleke a nga ha titwa a nga fanelekeli ku khongela. Xana vakulu va nga endla yini? Va nga khongela ni munhu yoloye va tlhela va n’wi khongelela. (Yakobo 5:14) Loko va kombela Yehovha va ri ni loyi a karhaleke, leswaku va pfuna munhu yoloye ku twisisa ndlela leyi Yehovha ni van’wana va n’wi rhandzaka ha yona kunene sweswo swi nga n’wi chavelela. Hi ku twa xikhongelo xa ku khumbeka ni lexi humaka embilwini xa nkulu swi nga ha pfuna ku tiyisa ntshembo wa munhu la nga ni gome. A nga ha pfuniwa ku xiya leswaku loko vakulu va tshemba leswaku Yehovha u ta hlamula swikhongelo swa vona loko va n’wi khongelela, kutani na yena a nga va ni ntshembo wolowo.
17. Ha yini vakulu va fanele va va vayingiseri lava nga ni ntwela-vusiwana?
17 “Munhu un’wana ni un’wana a a hatlise ku twa, a hlwela ku vulavula,” ku vula Yakobo 1:19. Leswaku va pfuna la karhaleke leswaku a tlhela a kuma matimba, vakulu va fanele va tlhela va va vayingiseri lava nga ni ntwela-vusiwana. Etimhakeni tin’wana swirho swa vandlha swi nga ha va swi lwisana ni swiphiqo kumbe mintshikilelo leyi nga taka yi nga tlhantlheki emafambiselweni lawa ya swilo. Kutani, lexi va nga ha vaka va lava xona, a hi ntlhantlho wo “lunghisa” xiphiqo xa vona kambe i ku vulavula ni muyingiseri lonene—munhu loyi a nga taka a nga va byeli ndlela leyi va faneleke va titwa ha yona, kambe loyi a nga ta va yingisela handle ko va avanyisa.—Luka 6:37; Varhoma 14:13.
18, 19. (a) Xana ku hatla u yingisa swi nga pfuna nkulu ku papalata ku endla ndzhwalo wa la karhaleke wu tika swinene hi ndlela yihi? (b) I yini lexi vaka kona loko vakulu va “[twela] vusiwana”?
18 Vakulu, ku yingisa hi ku hatlisa swi nga mi pfuna ku papalata ku engetela ku tika ka ndzhwalo wa lava karhaleke handle ko swi xiya. Hi xikombiso, loko makwerhu a xwile eminhlanganweni yin’wana kumbe a nga ha hlanganyeli swinene evutirhelini bya nsimu, xana hakunene u lava xitsundzuxo xa leswaku a endla leswi engetelekeke evutirhelini kumbe ku va kona eminhlanganweni nkarhi na nkarhi? Kumbexana. Kambe xana u tiva xiyimo hinkwaxo? Xana ku ni swiphiqo swa rihanyo leswi yaka swi engeteleka? Xana vutihlamuleri bya ndyangu byi hundzukile sweswinyana? Xana ku ni swiyimo kumbe mintshikilelo yin’wana leyi n’wi tshikilelaka? Tsundzuka, munhu yoloye a nga ha va ana se a tivona nandzu hikwalaho ka leswi a nga kotiki ku endla leswi engetelekeke.
19 Kutani, xana u nga n’wi pfunisa ku yini makwerhu loyi? U nga si endla swiboho ivi u nyikela ndzayo, yingisela! (Swivuriso 18:13) Hi swivutiso swo lava ku twisisa ‘lavisisa’ mintlhaveko ya mbilu ya munhu yoloye. (Swivuriso 20:5) U nga honisi mintlhaveko yoleyo—anakanya ha yona. Munhu la karhaleke a nga ha lava ku tiyisekisiwa leswaku Yehovha wa hi khathalela naswona wa swi twisisa leswaku minkarhi yin’wana swiyimo swa hina swi nga ha hi hikela. (1 Petro 5:7) Loko vakulu va kombisa ku “[twela] vusiwana” hi ndlela yoleyo, lava karhaleke va ta ‘kumela mimoya-xiviri ya vona ku phyuphya.’ (1 Petro 3:8; Matewu 11:28-30) Loko va kuma ku phyuphya ko tano, a va nge kali va byeriwa ku endla leswi engetelekeke; timbilu ta vona ti ta va susumetela ku endla hinkwaswo leswi va nga kotaka ku swi endla eku tirheleni Yehovha.—Ringanisa 2 Vakorinto 8:12; 9:7.
20. Tanihi leswi makumu ya xitukulwana lexi xo homboloka ma tshineleke swinene, i yini lexi hi faneleke hi tiyimisela ku xi endla?
20 Entiyisweni hi hanya enkarhini lowu tshikilelaka swinene ku tlula hinkwayo ematin’wini ya munhu. Mintshikilelo yo hanya emisaveni ya Sathana yi ya yi andza loko hi ri karhi hi ya hi nghena swinene enkarhini wa makumu. Tsundzuka, ku fana ni nghala leyi hlotaka, Diyavulosi u lava leswaku hi karhala ivi hi lan’wa leswaku a ta tirhisa xiyimo a hi endla vahlaseriwa va yena lava hlaselekaka hi ku olova. Mawaku ndlela leyi hi nkhensaka ha yona leswi Yehovha a nyikaka lava karhaleke matimba! A hi ma tirhiseni hi laha ku teleke malunghiselelo lawa a ma endleke leswaku a hi nyika matimba yo ya emahlweni, onge hi loko a hi nyika timpiko ta matimba ta gama leri hahelaka ehenhla. Tanihi leswi makumu ya xitukulwana lexi xo homboloka ma tshineleke, sweswi a hi nkarhi wo tshika ku tsutsuma emphikizanweni wo ya kuma hakelo—ku nga vutomi lebyi nga heriki.—Vaheveru 12:1.
Nhlamulo Ya Wena Yi Ri Yini Ke?
◻ I yini lexi hi nga langutelaka Yehovha leswaku a xi endla loko a hlamula swikhongelo swa hina?
◻ Xana hi nga kuma matimba eka vumakwerhu bya hina bya Vukreste hi tindlela tihi?
◻ Xana Rito ra Xikwembu ri hi pfunisa ku yini ku kuma matimba nakambe?
◻ I yini lexi vakulu va nga xi endlaka leswaku va pfuna lava karhaleke ku tlhela va kuma matimba?
[Xifaniso lexi nga eka tluka 17]
Loko hi rhamba vanhu, hi nga va rivali lava lavaka xikhutazo
[Xifaniso lexi nga eka tluka 18]
Vakulu va nga kombela Yehovha leswaku a pfuna lava karhaleke va twisisa ndlela leyi va rhandziwaka ha yona