Va Hlengeletanile Tanihi Vadzunisi Lava Tsakeke
LOKO vanhu va Yehovha Xikwembu va minkarhi ya khale va hlengeletanile hikwalaho ka vugandzeri, a va lerisiwa leswaku va “ṭaka ŝinene.” (Deterenoma 16:15) Ntsombano wa Muganga wa 1995/96 wa “Vadzunisi Lava Tsakeke” entiyisweni wu endle leswaku Timbhoni ta Yehovha ti va ni swivangelo leswinene swo tsaka.
Ku sukela loko nxaxamelo wa mintsombano leyi wu sungurile, va akiwile eripfumelweni. Nakambe va tlhele va kombisa ndlela leyi ntsako wu nga kumiwaka ha yona emisaveni leyi yi nga hava ntsako. A hi kambisiseni siku ha rin’we-rin’we ra masiku ya ntsombano.
‘Dzunisani Yehovha, N’wina Vanhu . . . Mi Tsaka!’
Nhloko-mhaka leyi nga laha henhla ya siku ro sungula ra ntsombano a yi sekeriwe eka Pisalema 149:1, 2. Nkulumo leyi nge, “Hi Ni Xivangelo Xo Huwelela Hi Ku Tsaka” a yi kambisisa ku hetiseka ka vuprofeta bya Esaya ndzima 35. Byi hetisekile eIsrayele wa khale naswona ngopfu-ngopfu esikwini ra hina, hi ku kondleteriwa ka vagandzeri va Yehovha va tlhelela exiyin’weni lexinene xa rihanyo eparadeyisini ya moya. Xisweswo, vatsombani a va ri ni xivangelo xo huwelela hi ku tsaka hikwalaho ka xikongomelo lexi Xikwembu xi nga na xona hi vanhu va xona eparadeyisini ya moya ni le Paradeyisini ya xiviri leyi taka, leyi nga kusuhi swinene.
Nkulumo-nkulu leyi nge, “Ku Hlawuriwa Tanihi Vadzunisi Lava Tsakeke eMisaveni Hinkwayo,” yi hlamule xivutiso lexi nge: I yini lexi hi hambanisaka ni misava leyi? I ku gandzela ka hina Yehovha hi vun’we. Ku nga khathariseki leswaku Timbhoni ta Yehovha ti tshama kwihi emisaveni leyi, ti vulavula ni ku dyondzisa nchumu lowu fanaka. Ti xi tsakela swinene xikongomelo xa Yehovha lexikulu xo hlawulekisa vito ra yena lero kwetsima ni ku lwela vuhosi bya yena hi ku tirhisa Mfumo wa yena. Hambi swi ri tano, xana Yehovha u hi pfunisa ku yini leswaku hi va ni xiphemu exikongomelweni xa yena? U hi nyike ntiyiso wa Rito rakwe lero kwetsima. Xikwembu xi hi nyike moya wa xona lowo kwetsima. Xi hi katekise hi vumakwerhu bya misava hinkwayo ni lunghiselelo ra vugandzeri lebyi tengeke. Ndyangu wa hina wa misava hinkwayo wa hi pfuna ku tirhela Yehovha hi mbilu leyi tsakeke.
“Ku Tihambanisa Ni Misava Ni Ku Pfumala Xivati Xa Yona” yi kandziyisise xilaveko xo papalata ku va ni xihlawuhlawu ni ku hlawula vanhu hi ku ya hi swiyimo swa vona. (Yakobo 2:5-9) Van’wana va nga ha hlawula ku tshama ntsena ni lava nga va ndhavuko wa ka vona kumbe lava nga ni swiyimo swa timali leswi fanaka ni swa vona, va honisa Vakreste-kulobye lava nga swisiwana kumbe lava pfumalaka hi ndlela yo karhi. Van’wana va nga ha va ni mboyamelo wo tsakela lava nga ni vutihlamuleri evandlheni. Va rivala leswaku lunghelo lerikulu leri mani na mani a nga ha vaka na rona i ra ku va Mbhoni ya Yehovha. Hikwalaho a hi fanelanga hi pfumelela nkucetelo wa misava wu hi thyakisa ni ku kavanyeta ku rhula ka vandlha.—2 Petro 3:14.
Nkulumo leyi nge, “Xana Ndzi Swi Lunghekerile Ku Nghenela Vukati?” yi swi veke erivaleni leswaku vo tala va nghenela vukati hi xihatla. Van’wana va nghenele vukati leswaku va balekela xiyimo xo nonon’hwa ekaya kumbe hikwalaho ka leswi tintangha ta vona ti nghenelaka vukati. Hambi swi ri tano, swivangelo leswi faneleke swo nghenela vukati swi katsa ku navela ka vunghana leswaku mi ta landzela tipakani ta swa le tilweni, rirhandzu ra xiviri, ku lava munghana ni ku sirheleleka ni ku navela ku kuma vana. Ndzetelo wa moya i lunghiselelo ra nkoka ra vukati. Nchumu wun’wana, swa laveka leswaku u aka timfanelo letinene hi ku ambala munhu lontshwa. Nakambe i vutlhari ku kambisisa leswaku loyi a nga ta va munghana wa vukati u na byona vuxaka bya xiviri na Yehovha naswona u hanyisana ni van’wana hi xichavo. Ku lava xitsundzuxo eka Vakreste lava vupfeke i vutlhari.—Swivuriso 11:14.
Nkulumo leyi, leyi pfulaka mahlo yi landzeriwe hi leyi a yi ri na nhloko-mhaka leyi nge “Vatswari Lava Tsakelaka Vana Va Vona.” Hakanyingi ku tswariwa ka n’wana ku tisa ntsako lowukulu. Hambi swi ri tano, ku veleka vana na swona swi tisa vutihlamuleri lebyikulu. (Pisalema 127:3) Xisweswo i swa nkoka leswaku vana va dyondzisiwa ku rhandza Yehovha. Vatswari va nga swi endla leswi loko minkarhi hinkwayo va vulavula ni vana va vona hi Yehovha ni ku tirhisa misinya ya milawu ya Rito ra yena endyangwini.
Siku ro sungula ra ntsombano ri hetelele hi xihlamariso—ku nga ku humesiwa ka broxara leyintshwa leyi nge, Timbhoni Ta Yehovha Ni Dyondzo. Yi hlamusela kahle leswaku Timbhoni “ti khutaza vana va tona leswaku va tirha hi matimba ni ku teka swiavelo swa vona swa xikolo swi ri swa nkoka.” Nakambe broxara leyi yi hlamusela mimbuyelo ya nkoka ya titlilasi to dyondzisa leti fambisiweke hi Timbhoni ta Yehovha hi malembe yo tala le Nigeria, Mexico, ni le matikweni man’wana. Broxara leyi yi ta pfuna vadyondzisi leswaku va vona leswaku hi teka dyondzo yi ri ya nkoka ngopfu.
“A Hi Humeseni Magandzelo Masiku Hinkwawo . . . Hi Dzunisa Xikwembu Ha Wona”
Nhloko-mhaka leyi yo rhanga ya siku ra vumbirhi a yi sekeriwe eka Vaheveru 13:15. Nongonoko wa ni mixo wu nyikeriwe hi nxaxamelo emhakeni leyi nge, “Ku Amukela Xikhutazo Xo Dzunisa Yehovha.” Malembe a hi xihinga eku amukeleni ka xikhutazo lexi. Pisalema 148:12, 13 yi rhamba majaha, tintombhi, lavakulu, ni vafana leswaku va dzunisa Yehovha. Malandza yo tala ya Yehovha lama tsakeke, ma swi kotile ku engetela ku dzunisa ka wona. Emisaveni hinkwayo, ku tlula 600 000 va hlanganyela entirhweni wo chumayela nkarhi hinkwawo kumbe ntirho wa vuphayona. Ku tlula 15 000 i maphayona yo hlawuleka, naswona ku tlula 15 000 va le ntirhweni wa le Bethele.
“Ku Tirha Hi Ku Tshembeka Swin’we Ni Nhlengeletano Ya Yehovha” leyi i nkulumo leyi kombiseke leswaku vutshembeki i bya nkoka ngopfu eka malandza ya Xikwembu. Ku tshembeka eka Yehovha swi vula ku namarhela yena hi ku tinyiketela loku tiyeke loku tirhaka tanihi xidamarheti xa matimba. Vutshembeki byi lava leswaku hi papalata ku tlula milawu ya Bibele hi vomu, ku nga khathariseki leswaku van’wana va hi vona kumbe e-e. Byi lava leswaku hi namarhela hi vutshembeki etidyondzweni ta Bibele leti kumekaka eka timagazini ta Xihondzo xo Rindza ni Xalamuka! ku katsa ni swakudya swin’wana swa moya leswi humesiwaka hi Sosayiti ya Watch Tower. Nkulumo leyi yi landzeriwe hi nkulumo ya nkhuvulo. Mawaku ntsako lowu veke kona loko lava yaka eku khuvuriweni va kombise ku tinyiketela ka vona eka Yehovha!
Marito ya Hosiya 4:1-3 a ma ri xisekelo xa nkulumo ya ni ndzhenga leyi nge, “Vunene Ni Vubihi—Hi Xihi Lexi U Tikarhatelaka Xona?” Ku nga khathariseki leswi malangutelo ya misava mayelana ni vunene ma nyanyaka ku biha, Vakreste va fanele va hambeta va “endl[a] hi matimba” ku tikarhatela ku hlayisa mahanyelo lamanene. (2 Petro 1:5) Leswi swi titshege hi ndlela leyi munhu a ehleketaka ha yona. Loko miehleketo ya yena yi ri yinene, u ta vulavula marito lama baseke, lama tengeke ni lama akaka naswona u ta ringeta hi matimba leswaku a tirhisana ni van’wana hi vutshembeki. Ku tikarhatela vululami swi katsa ku ringeta ku anakanyela ni ku n’wi twela vusiwana Mukreste-kuloni la xanisiwaka hi ntshikilelo kumbe gome.—1 Vatesalonika 5:14.
Nkulumo yin’wana leyi nge, “Tivonele Eka Mintlhamu Ya Diyavulosi,” yi tsundzuxe Vakreste leswaku va tivonela va nga tinghenisi eminkucetelweni ya vudemona. Emhakeni ya ku tshunguriwa ka mavabyi, Vakreste va fanele va tivonela eka tindlela ta vutshunguri to tanihi ku tekela dzanu loku fambisanaka swinene ni vungoma. Hambi swi ri tano, leswi munhu a swi endlaka leswaku a khathalela rihanyo ra yena ra miri i mhaka ya munhu hi xiyexe.
Siku ra vumbirhi ri hele hi xihlamariso lexi tsakisaka—ku nga ku humesiwa ka buku leyintshwa ya mpimo lowuntsongo leyi endleriweke ku pfuna vanhu va timbilu letinene leswaku va endla nhluvuko wa xihatla lowu yisaka eku tinyiketeleni ni nkhuvulo. Buku leyi leyintshwa ya matluka ya 192 yi ni nhloko-mhaka leyi nge Vutivi Lebyi Yisaka eVuton’wini Lebyi Nga Heriki. Buku leyi nge Vutivi yi nyikela ntiyiso hi ndlela leyi akaka. A yi tshameli ku paluxa tidyondzo ta mavunwa. Ririmi ra yona leri twisisekaka ni ntlhandlamano wa tinhla swi ta endla leswaku swi olova ku tirhisa buku leyi eku fambiseni ka tidyondzo ta Bibele ni ku pfuna vanhu leswaku va twisisa vutivi lebyi wisisaka mbilu bya Xikwembu.
“Ṭakani, Mi Ṭakisisa Hi Masiku”
Marito lawa lama nga eka Esaya 65:18 a ma ri nhloko-mhaka ya siku ra vunharhu ra ntsombano. Ku hetiseka ka vuprofeta bya Bibele ku boxa 1914 ri ri lembe leri ha rona mafambiselo lawa yo biha ya swilo ma ngheneke emasikwini ya wona yo hetelela. Hikwalaho, nxaxamelo wa tinkulumo lowu nge “Vadzunisi Lava Tsakeke eMakun’wini Ya Mafambiselo Lawa” wu koke nyingiso wa vayingiseri. Swivulavuri swi kombise ndlela leyi magidi ya timiliyoni ma ngheniweke ngopfu ha yona hi moya wa misava, wa makwanga ni madzolonga. Hi nkarhi lowu faneleke va ta avanyisiwa va ri xiphemu xa misava leyi Sathana a nga mufumi wa yona. Xisweswo, lowu i nkarhi wo tihlawulela. Xana hi rihi tlhelo leri hi lavaka ku va eka rona? Xana hi lava ku gandzela Yehovha ni ku namarhela vuhosi bya yena, kumbe hi ta pfumelela Sathana leswaku a va mufumi wa hina hi ku endla swilo leswi n’wi tsakisaka? Handle ko kanakana hinkwerhu hi fanele ku yima hi tiyile etlhelweni ra Yehovha.
Nkulumo ya le rivaleni ya ntsombano leyi nge “Dzunisa Hosi Ya Minkarhi Ni Minkarhi!” yi endle leswaku hinkwavo lava a va ri kona va kuma nchumu wo anakanyisisa ha wona. Hambi loko vanhu lava tsaneke va nga yi twisisi, mianakanyo ya Yehovha u yi twisisa hi ku helela. “Yehovha i hosi hi masiku, hi laha ku nga heriki,” ku yimbelele mupisalema. (Pisalema 10:16) Hosi leyi ya minkarhi ni minkarhi yi pfulele vanhu ndlela yo tsakela vutomi lebyi nga heriki hi ku tirhisa N’wana wa yona, Yesu Kreste. (Yohane 17:3) Xivulavuri xi te: “Ina, hina vanhu lava nga ni vudyoho hi nga kuma vutomi lebyi nga heriki hi ku tirhisa dyondzo ya Xikwembu ni ku pfumela egandzelweni ra nkutsulo ra Yesu.”
Loko ntsombano wu ya eku heleni, lava a va ri kona va akiwile hi nkulumo leyi a yi ri ni nhloko-mhaka yo hetelela leyi nge, “Ku Dzunisa Yehovha Hi Ntsako Siku Na Siku.” A swi khutaza ku kuma swiviko swa ku andza ka ntirho wo endla vadyondzisiwa emisaveni hinkwayo. Lava a va ri entsombanweni va susumeteleke ‘ku vonga Yehovha hi masiku hinkwawo, ni ku dzunisa vito ra yena hi minkarhi leyi nga heriki.’—Pisalema 145:2.
Swiendlo leswi chavisaka, swa tihanyi swi tekela misava ntsako. Hambi swi ri tano, vanhu lava nga ni ripfumelo leri heleleke eka Yehovha va nga va ni ntsako wo chava Xikwembu. Hi vumakwerhu bya misava hinkwayo, Timbhoni ta Yehovha ti nga engeta hi ku vula marito lama landzelaka ya Pisalema 35:27, 28: “A v̌a yimbelele, a v̌a ṭake la’v̌a ranḍaka ku lulama ka mina, a v̌a v̌ule hi masiku. A ku v̌ongiwe Yehova! L’a ranḍaka ku rula ka nanḍa wa yena! Ririmi ra mina ri ta v̌ula ku lulama ka wena, ri ta v̌ula ku ḍuna ka wena hi masiku.”
[Swifaniso leswi nga eka tluka 7]
Mindyangu yi ta vuyeriwa eka broxara leyi nge “Timbhoni Ta Yehovha Ni Dyondzo”
[Swifaniso leswi nga eka tluka 8, 9]
Buku leyintshwa leyi nge, “Vutivi Lebyi Yisaka eVuton’wini Lebyi Nga Heriki,” yi humesa mintiyiso ya Bibele hi ndlela leyi akaka
[Xifaniso lexi nga eka tluka 9]
Vo tala va khuvuriwile va kombisa ku tinyiketela ka vona eka Yehovha
[Xifaniso lexi nga eka tluka 9]
Lava a va ri kona entsombanweni va tsakisiwe ngopfu hi drama leyi nge, “Ku Xixima Lava Fanelekaka eMalembeni Ya Vona Ya Vudyuhari”