Ntsombano Wa Muganga Wa “Vadzunisi Lava Tsakeke” Wa Timbhoni Ta Yehovha

U yimeriwe hi masiku manharhu lama vuyerisaka ya ndzetelo wa Bibele. Leswi ku endliweke malunghiselelo ya mintsombano yo tlula 35 edzongeni wa Afrika ntsena, handle ko kanakana ku ta va ni ntsombano ekusuhi ni laha u tshamaka kona.

Nongonoko wa ni mixo hi siku ro sungula wu ta va wu ri ni marito yo amukela vatsombani swin’we ni nkulumo-nkulu leyi nge, “Ku Hlawuriwa Tanihi Vadzunisi Lava Tsakeke eMisaveni Hinkwayo.” Ni ndzhenga nongonoko wu ta vulavula hi vantshwa, vatswari ni dyondzo. “Xana Ndzi Swi Lunghekerile Ku Nghenela Vukati?” leyi i nkulumo leyi vantshwa va nga ta tsakela ku yi twa. Vatswari va fanele va yi yingisela hi vukheta swinene nkulumo leyi nge “Vatswari Lava Tsakelaka Vana Va Vona.” Nongonoko wa ni ndzhenga wu ta gimeta hi nkulumo leyi nge “Dyondzo—Yi Tirhisele Ku Dzunisa Yehovha.” Leswi swi nga ta kaneriwa swi ta pfuna vana leswaku va endla nhluvuko lowunene exikolweni.

Nongonoko wa ni mixo hi siku ra vumbirhi wu ta vulavula hi nkhuvulo naswona lava fanelekaka ku khuvuriwa va ta nyikiwa nkarhi wo endla tano. Hi ndzhenga ku ta va ni nhlamuselo leyi kongomeke ya ndlela leyi ha yona Sathana a tirhisaka ku navela ka rimbewu leswaku a phasa vanhu, ku sukela khale. Nakambe ku ta va ni nkulumo ya matimba leyi nge “Tivonele Eka Mintlhamu Ya Diyavulosi.” Nongonoko wa siku wu ta gimeta hi nkulumo ya nkoka leyi nge “Mhaka Leyi Ha Yona Vanhu Va Lavaka Vutivi Bya Xikwembu.”

Hi mixo wa siku ro hetelela, nxaxamelo lowu nge “Vadzunisi Lava Tsakeke eMakun’wini Ya Mafambiselo Lawa” wu ta vulavula swinene hi swiendlakalo leswi chavisaka emisaveni hinkwayo, leswi hi nga ta langutana na swona ku nga ri khale. Wu ta kandziyisa xihatla xa ku balekela evutumbelweni ku nga si sungula “nhlomulo . . . lowukulu” lowu Yesu Kreste a vulavuleke ha wona, hi laha swi tsariweke ha kona eka Matewu 24:21.

Nongonoko wa ni mixo wu ta gimeta hi drama ya nkoka leyi nge “Ku Xixima Lava Fanelekaka eMalembeni Ya Vona Ya Vudyuhari.” Kutani ni ndzhenga ku ta nyikeriwa nkulumo ya le rivaleni leyi nge, “Dzunisa Hosi Ya Minkarhi Ni Minkarhi!” Yi ta va yi ri nhlohlorhi ya ntsombano lowu.

Endla malunghiselelo yo va kona sweswi. Leswaku u kuma laha ntsombano wu nga ta va kona ekusuhi ni kaya ra wena, tihlanganise ni Holo ya Mfumo ya Timbhoni ta Yehovha, kumbe u tsalela vakandziyisi va magazini lowu.