Xivangelo Xa Leswaku U Va Kona

U TA kuma mune wa masiku lama vuyerisaka ya ndzetelo wa moya eka Ntsombano wa Muganga wa “Dyondzo Ya Xikwembu,” lowu nga ta khomiwa nan’waka eka madoroba-nkulu emisaveni hinkwayo. Kahle-kahle, nongonoko wu ta sungula hi Ravumune hi 1:20 ni ndzhenga ivi wu hela hi Sonto hi 4:15 ni ndzhenga. Nchumu lowukulu eka yin’wana ya mintsombano leyi ku ta va swiviko swa varhumiwa, lava va pfuniweke ku tlhelela ematiko-xikaya ya ka vona va ya hlanganyela eka xiendlakalo lexi xo tsakisa.

Hambi u kurile kumbe u ri ntsongo—u wanuna, wansati, tatana, manana, n’wana wa kondlo-a-ndzi-dyi kumbe n’wana—u ta kuma dyondzo leyi nyikeriwaka hi ndlela leyi kongomeke ni leyi tsakisaka leyi nga ta ku pfuna. Hi xikombiso, namuntlha vo tala va vutisa, Xikongomelo xa vutomi i yini? Hi Ravuntlhanu ni mixo, u ta tiphina hi ku twa xivutiso lexi xi hlamuriwa naswona u ta tsakisiwa hi leswi u nga ta swi kuma leswaku u pfuna van’wana hi mhaka leyi.

Ravuntlhanu ni ndzhenga nongonoko wu ta va ni swiphemu leswi nge, “Ku Endla Leswaku Vukati Byi Va Ni Vun’we Lebyi Khomelelaka,” “Tikarhatele Ku Ponisiwa Ka Ndyangu Wa Wena,” na “Vatswari—Vana Va N’wina Va Lava Nyingiso Wo Hlawuleka.” Endzhakunyana ka leswi, ku ta kambisisiwa swiphiqo leswi vantshwa va langutanaka na swona ni ndlela leyi va nga swi tlhantlhaka ha yona. Va ta khutaziwa swinene hi drama ya manguva lawa leyi nge Vantshwa Lava Tsundzukaka Muvumbi Wa Vona Sweswi.

Hi Mugqivela nongonoko wu ta hlamusela vuprofeta bya Yesu bya masiku ya makumu, ngopfu-ngopfu marito ya yena lama nge: “Kan’we-kan’we loko nhlomulo wa minkarhi yoleyo wu ta va wu herile, ‘dyambu ri ta hundzuka ntima.’” (Matewu 24:29) U ta rhandza ku twa nhlamuselo ya leswaku nhlomulo wolowo wu humelela rini. Nongonoko wa Mugqivela wu ta tlhela wu pfuxeta rhekhodo ya Timbhoni ta Yehovha eminkarhini ya manguva lawa wu tlhela wu kombisa leswi va swi hetisiseke.

Hi Sonto, drama yin’wana leyi nga ni xihloko lexi nge U Nga Kanganyisiwi Kumbe Ku Vungunya Xikwembu, yi ta kombisa ntlhontlho wa vutshembeki bya munhu bya Vukreste hikwalaho ka tivhidiyo ta namuntlha leti dumeke ni vuyimbeleri. Ni ndzhenga nkulumo ya le rivaleni yi ta va ni xihloko lexi nge “Dyondzo Leyi Pfunaka Ya Minkarhi Ya Hina Leyo Nonon’hwa.” Nongonoko wu ta hela hi xikhutazo lexi nge “Hambetani Mi Khomelela Eka Dyondzo Ya Xikwembu.”

I ntiyiso, u ta pfuneka hi ku va kona masiku hinkwawo ya mune! U rhambiwa hi malwandla leswaku u va kona. Leswaku u tiva ndhawu ya le kusuhi ni le kaya ra wena, vutisa eka Holo ya Mfumo ya Timbhoni ta Yehovha endhawini ya ka n’wina kumbe u tsalela vakandziyisi va magazini lowu.