Xiviko Xa Vahuweleri Va Mfumo

Lava A Va Ri Valala Eku Sunguleni Va Tirhela Yehovha Hi Vun’we

“LOKO ndzi sungula ku twa swo karhi hi Timbhoni ta Yehovha a ndzi tirha tanihi murindzi la hlomeke le Bosnia,” ku hlamusela Branko.a

Branko a a ri entirhweni wo rindza exibedlhele laha lava vavisekeke a va ri karhi va tshunguriwa kona. Un’wana wa madokodela a a dyondza Bibele ni Timbhoni, naswona hi nkarhi lowu a nghena ni vusiku entirhweni, u hlamusele Branko swo tala leswi a swi dyondzeke malunghana ni Bibele.

Leswi Branko a swi tweke vusiku byebyo swi n’wi tsakise ngopfu lero hi ku hatlisa u veke matlhari yakwe ehansi. U tihlanganise ni Timbhoni, a lava ku dyondza leswi engetelekeke. Endzhakunyana, ka loko a ta va a rhurhele eka tiko rin’wana ra le Yuropa, Branko u lave Holo ya Mfumo naswona u hlanganyele minhlangano evandlheni ra Timbhoni ta Yehovha ta le Yugoslavia. Hi kona laha Branko a hlanganeke kona na Slobodan.

Na yena Slobodan a huma eBosnia naswona u tirhe tanihi mutirhi wa ku tirhandzela enyimpini yin’we na Branko—kambe a yima ni tlhelo lerin’wana. Slobodan a lwela vanhu va le Serbia a lwisana ni va le Croatia. Hi nkarhi lowu lavambirhi va hlangane ha wona, Slobodan u ve Mbhoni ya Yehovha leyi khuvuriweke. U sungule ku dyondza Bibele na Branko, loyi a ri nala wa yena eku sunguleni. Loko dyondzo yi ri karhi yi ya emahlweni, Branko u dyondze swo tala hi Yehovha naswona rirhandzu ra yena hi Xikwembu ri ye ri kula. Leswi swi susumetele Branko leswaku a nyiketela vutomi bya yena eka Muvumbi. Hi October 1993 u kombise ku tinyiketela ka yena hi nkhuvulo wa mati.

Xana Slobodan u ve un’wana wa Timbhoni ta Yehovha hi ndlela yihi? A ku ri khalenyana a balekile endhawini ya nyimpi le Bosnia. U hlaye minkandziyiso yin’wana leyi a yi kumeke eka Timbhoni, kambe loko Timbhoni timbirhi ti n’wi endzela ekaya rakwe eku sunguleni ka 1992 hi kona laha ku tsakela kakwe Rito ra Xikwembu ku sunguleke ku kula. Xana i mani loyi a yeke eka Slobodan, a lava ku ya sungula dyondzo ya Bibele na yena? I Mujo, loyi na yena a huma eBosnia kambe loyi a kurisiweke a ri Mumoslem. Tanihi leswi dyondzo ya Bibele a yi ri karhi yi yela emahlweni, Mujo na Slobodan lava tshameke va va valala, va hete nkarhi wo tala va ri swin’we leswaku va tiyisana eripfumelweni.

Nyimpi leyi a yi ri kona le khale ka Yugoslavia yi wutle vutomi bya madzana ya magidi ya vanhu. Kambe Branko, Slobodan na Mujo sweswi va tirha tanihi vachumayeri va nkarhi hinkwawo va mahungu lamanene evandlheni rin’we ra Timbhoni ta Yehovha. Va hlule nkwetlembetano wa vutiko ni wa rixaka, naswona sweswi va lava ku rhula hi ku titsongahatela Muvumbi, Yehovha.

Kambe xana i yini lexi tiseke ku hundzuka ko tano? A ku ri rirhandzu ra vona hi Yehovha, ku xixima ka vona Bibele, ni ku hisekela ka vona ku tirhisa ntiyiso wa Bibele evuton’wini bya vona. Hilaha Matsalwa layo Kwetsima ma vulaka ha kona, “Rito ra Xikwembu ra hanya, naswona ra tirha . . . ri kota ku hlaya mianakanyo ni makungu ya mbilu.”—Vaheveru 4:12.

[Nhlamuselo ya le hansi]