Va Tiyisiwe Hi Munghana Wa Vona Lonkulu

KU NI vunghana byin’we lebyi tiyisaka Timbhoni ta Yehovha. I vuxaka bya tona bya risima ni Munghana wa tona lonkulu swinene, Yehovha Xikwembu. (Ringanisa Yakobo 2:23.) Wa ti tiyisa hi nkarhi wa miringo leyikulu ya ripfumelo.

Rhekhodo ya Timbhoni ya vutshembeki ehansi ka mimfumo yo lerisa yi bumabumeriwe hi vahlaleri vo tala. Un’wana wa vona i Jiří Krupička, mutivi-nkulu wa filosofi na sayense ya swa ntumbuluko loyi a rhurheke eCzechoslovakia hi 1968 endzhaku ko tirha malembe yo tala etikampeni ta nxaniso ta Makhomunisi. Ebukwini ya yena leyi nge Renesance rozumu (Ku Pfuxetiwa Ka Vutlhari), u hlamusela ku xaniseka ni ku tiyisela ka Timbhoni leti a ti khomeriwe vukala-tlhelo bya tona.

Ehansi ka mfumo wa Makhomunisi, Timbhoni to tala a ti pfaleriwa ekhotsweni hikwalaho ka ripfumelo ra tona. Hambiloko ti ri ekhotsweni, ti arile ku cela yureniyamu leswaku yi ta tirhiseriwa nyimpi. (Esaya 2:4) Krupička u hlamusela xivono lexi a xi voneke eka wun’wana wa migodi leyi hi 1952. U vone vanhu vambirhi va yime kukota xifaniso lexi funengetiweke hi ayisi eka maxelo yo titimela ya xixika. A va khubumetiwe tinhloko ku ya fika emasengeni hi miphongolo.

Krupička wa tsala: “A va yime ehandle ka khotso va ambale swiambalo swo handzukela ku sukela hi mahlamba-ndlopfu. Xana va swi kotise ku yini ku yima nkarhi wo leha milenge ya vona yi ri karhi yi biwa hi gwitsi? Hi matimba ya ripfumelo. Miphongolo a yi ri ya khale naswona a yi kurhile. Voko ra nsele a ri ri karhi ri va himetela tinhloko ni makatla hi matimba lerova nchumu lowu fanaka ni mukwana wo kariha wu tsema baji wu nghena wu fika enhlongeni ya un’wana wa vavanuna lava, kutani ngati yi xiririka hi le mavokweni ya baji ra yena.

“Murindzi u hi yimise hi xaxamela emahlweni ka vona, kutani murhangeri wa maphorisa a hi byela marito yo koma. U te, ku ala ku tirha, i ku xandzuka naswona ku rihiwa hi mpimo wa kona. Hambi wo va byela yini hi nyimpi kumbe ku dlawa a swi nge va pfuni nchumu vakaneti lava, valala lava va vusoxalisi.”

Murhangeri wa maphorisa a teka nhonga ya nsimbhi a hima wun’wana wa miphongolo. Wanuna loyi a khubumetiwe hi wona a titivala ni mphongolo wakwe enhlokweni. Leswi humeleleke ku ya emahlweni swi mile timitsu emianakanyweni ya Krupička.

Wa hlamusela: “A ku ri ni ku yimbelela loku a ku huma eka swichayachayani. Mpfumawulo wo hola, xikhongelo xo hlevetela lexi yaka eka Xikwembu, lexi kotaka ku twa xin’wana ni xin’wana endhawini yihi na yihi—hambi ku ri matshalatshala ya ku yimbelela ka lava nga endzeni ka miphongolo ya khale, yo kurha leyi endliweke hi yureniyamu. Xi swi twa kahle ku tlula ntlawa wa khwayere leyi yimbelelaka ekerekeni leyikulu.”

Hi September 1, 1993, ntirho wa Timbhoni ta Yehovha le Riphabliki ra Czech wu amukeriwe ximfumo. Sweswi Timbhoni ta Maczech ti tiphina hi ku hambeta ni ntirho wa tona wa Vukreste wo dyondzisa hi ku ntshunxeka. Ina, ti tsakela ku byela van’wana malunghana na Yehovha, Munghana wa tona lonkulu swinene.

[Xifaniso lexi nga eka tluka 7]

Vatsombani le Riphabliki ra Czech