Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w98 9/1 matl. 24-28
  • Ndzi Dyondze Ku Titshega Hi Yehovha

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Ndzi Dyondze Ku Titshega Hi Yehovha
  • Xihondzo xo Rindza Xi Huwelela Mfumo Wa Yehovha—1998
  • Swihloko
  • Tinhlokomhaka Tin'wana Leti Yelana Na Yona
  • Masungulo Ya Miringo Leyikulu
  • Xivutiso Xa Ku Landzula
  • Ku Xanisiwa Ku Kula
  • Ku Rhurhela eVuxeni—Kutani Hi Baleka
  • Ku Ntshunxiwa Kambe Khombo Leri Yaka eMahlweni
  • Ntshunxeko Eku Heteleleni!
  • Ripfumelo Ri Ringiwa Le Slovakia
    Xalamuka!—2003
  • Ndzi Fularhele Tipolitiki Ndzi Va Mukreste La Nga Seketeliki Tlhelo Ro Karhi
    Xalamuka!—2002
  • Hi Endle Xiboho Lexi Tiyeke Malunghana Ni Vuhosi Bya Xikwembu
    Xihondzo xo Rindza Xi Huwelela Mfumo Wa Yehovha—2004
  • Malembe Yo Tlula 50 Yo ‘Pelela Ku Ya Pfuna’
    Xihondzo xo Rindza Xi Huwelela Mfumo Wa Yehovha—1996
Vona Swo Tala
Xihondzo xo Rindza Xi Huwelela Mfumo Wa Yehovha—1998
w98 9/1 matl. 24-28

Ndzi Dyondze Ku Titshega Hi Yehovha

HI KU VULA KA JÁN KORPA-ONDO

A ku ri hi 1942, naswona a ndzi rindziwile hi masocha ya le Hungary ekusuhi ni le Kursk, eRussia. A hi ri vabohiwa va mimfumo leyi Hlanganeke leyi a yi lwa ni masocha ya le Russia hi nkarhi wa Nyimpi ya Vumbirhi ya Misava. Sirha ra mina a ri ceriwile, naswona a ndzi nyikiwe timinete ta khume leswaku ndzi endla xiboho xa loko ndzi ta sayina tsalwa leri a ri vula leswaku a ndza ha ri un’wana wa Timbhoni ta Yehovha. Ndzi nga si hlamusela leswi humeleleke endzhaku, mi nge ndzi mi byela leswaku ndzi tise ku yini kwalaho.

NDZI velekiwe hi 1904 eximutanini xa Zahor, lexi sweswi xi nga evuxeni bya Slovakia. Endzhaku ka Nyimpi yo Sungula ya Misava, ximutana xa Zahor xi ve xiphemu xa tiko lera ha ku vumbiwaka ra Czechoslovakia. Ximutana xa ka hina a xi ri ni makaya ya kwalomu ka 200 ni tikereke timbirhi, yin’wana ya Khatoliki ya Magriki kasi leyin’wana a yi ri ya Macalvin.

Hambileswi a ndzi ya eKerekeni ya Macalvin, a ndzi nga tikhomanga kahle emahanyelweni. Ekusuhinyana ni le kaya a ku tshama wanuna un’wana loyi a hambanile swinene na mina. Siku rin’wana u sungule ku burisana na mina ivi a ndzi lomba Bibele. A ku ri ro sungula ndzi khoma buku yoleyo. Enkarhini lowu, hi 1926, ndzi tekane na Barbora, ivi endzhakunyana hi va ni vana vambirhi, Barbora na Ján.

Ndzi sungule ku hlaya Bibele, kambe a ku ri ni swilo swo tala leswi a ndzi nga swi twisisi. Kutani ndzi ye eka mufundhisi wa mina ivi ndzi n’wi kombela ku ndzi pfuna. U te: “Bibele i ya vanhu lava dyondzekeke ntsena, u nga kali u ringeta ku yi twisisa.” Kutani a ndzi rhamba leswaku hi ta tlanga makariti.

Endzhaku ka sweswo ndzi ye eka wanuna loyi a ndzi lombeke Bibele. A a ri Xichudeni xa Bibele, hilaha Timbhoni ta Yehovha a ti vitaniwa hakona hi nkarhi wolowo. U swi tsakerile ku ndzi pfuna, naswona endzhaku ka nkarhi wo karhi mahlo ya mina ma sungule ku pfuleka. Ndzi tshike ku nwa ku tlula mpimo ivi ndzi sungula ku hanya vutomi lebyinene; ndzi sungule ni ku byela van’wana hi Yehovha. Ntiyiso wa Bibele a wu sungule ku dzima timitsu le Zahor eku sunguleni ka va-1920, naswona ku nga ri khale ku simekiwe ntlawa lowu hisekaka wa Swichudeni swa Bibele.

Hambiswiritano, a ku ri ni nkaneto lowukulu wa vukhongeri. Mufundhisi wa kwalaho u endle leswaku vo tala va ndyangu wa ka hina va ndzi hundzukela, va vula leswaku ndzi hlangane nhloko. Kambe vutomi bya mina byi sungule ku va ni xikongomelo, naswona hi xivindzi ndzi endle xiboho xo tirhela Xikwembu xa ntiyiso, Yehovha. Xisweswo, hi 1930, ndzi kombise ku tinyiketela ka mina eka Yehovha ivi ndzi khuvuriwa.

Masungulo Ya Miringo Leyikulu

Hi 1938, xifundzha xa hina xi fumiwe hi Hungary, leyi a yi yima na Jarimani hi nkarhi wa Nyimpi ya Vumbirhi ya Misava. Hi nkarhi wolowo a hi ri ni Timbhoni ta kwalomu ka 50 eximutanini xa ka hina lexi a xi ri ni vaaki va le hansi ka gidi. Hi ye emahlweni hi chumayela hambileswi ku endla tano swi vekeke vutomi ni ntshunxeko wa hina ekhombyeni.

Hi 1940, ndzi tsarisiwe hi nsindziso leswaku ndzi joyina vuthu ra le Hungary. Xana a ndzi ta endla yini? A ndzi byi hlayile vuprofeta bya Bibele malunghana ni vanhu lava fulaka matlhari ya vona ya nyimpi ma va switirho swa ku rhula, naswona a ndzi swi tiva leswaku hi ku famba ka nkarhi, Xikwembu xi ta herisa tinyimpi hinkwato emisaveni. (Pisalema 46:9; Esaya 2:4) Xisweswo, ndzi sungule ku venga nyimpi, naswona ndzi bohe ku ka ndzi nga ngheneli vusocha, ku nga khathariseki vuyelo bya kona.

Ndzi gweviwe tin’hweti ta 14 ekhotsweni naswona ndzi tirhele xigwevo xa mina ndzi ri le Pécs, eHungary. A ku ri na Timbhoni tin’wana ta ntlhanu ekhotsweni rin’we, kutani hi tlangele ku va hi kota ku va ni vunakulobye. Hambiswiritano, ku ringana nkarhi wo karhi a ndzi pfaleriwe ndzi ri ndzexe ndzi bohiwe milenge hi tinketani. Loko hi ala ku endla ntirho lowu a wu seketela nyimpi, a hi biwa. Nakambe, hi sindzisiwe ku yima hi ololokile siku hinkwaro, handle ka tiawara timbirhi ninhlikanhi. Maxangu lawa ma ye emahlweni ku ringana tin’hweti to hlaya. Kambe a hi tsakile hikuva a hi ri ni ripfalo leri tengeke emahlweni ka Xikwembu xa hina.

Xivutiso Xa Ku Landzula

Siku rin’wana ntlawa wa vafundhisi va 15 va Khatoliki wu tile wu ta ringeta ku hi khorwisa leswaku a swi ri swa nkoka leswaku hi seketela nyimpi hi ku joyina vusocha. Hi nkarhi wa ku vulavurisana hi te: “Loko mo hi komba eBibeleni leswaku moya-xiviri a wu fi ni leswaku loko hi fa enyimpini hi ta ya etilweni, hi ta ya evusocheni.” Ina, a va nga ta hi komba sweswo, naswona a va ha swi lavanga ku ya emahlweni ni bulo.

Hi 1941 xigwevo xa mina xa le khotsweni xi herile, naswona a ndzi langutele ku tlhela ndzi ya hlangana ni ndyangu wa mina. Ematshan’weni ya sweswo, ndzi yisiwe egoveleni ra masocha ra le Sárospatak, eHungary. Loko hi fika, ndzi nyikiwe nkarhi wo ntshunxiwa. Ndzi byeriwe leswaku, “Leswi u faneleke u swi endla i ku sayina xitshembiso xa leswaku u ta hakela mali leyi ringanaka 200 wa ti-pengö loko u fika ekaya.”

Ndzi vutisile: “Xana sweswo swi nga endlekisa ku yini? Xana mali leyi i ya yini?”

Ndzi byeriwe leswaku, “Hi mali yoleyo u ta kuma xitifiketi xa leswaku a wu humelelanga exikambelweni xa swa vutshunguri bya masocha.”

Leswi swi ndzi vangele xiboho xo nonon’hwa. Ku ringana nkarhi lowu tlulaka lembe, a ndzi xanisiwe hi ndlela leyi nga riki ya vumunhu; a ndzi karhala. Sweswi, hi ku pfumela ku hakela mali yo karhi, a ndzi ta ntshunxiwa. Ndzi n’unun’utile ndzi ku, “Ndzi ta anakanyisisa ha swona.”

Xana a ndzi ta endla xiboho xihi? A ndzi ri ni nsati ni vana lava ndzi faneleke ndzi va khathalela. Hi nkarhi wolowo ndzi kume papila leri humaka eka Mukreste-kulorhi loyi a ndzi khutazeke ha rona. U tshahe Vaheveru 10:38, laha muapostola Pawulo a tshaheke marito ya Yehovha lama nge: “‘La lulameke wa mina, u ta hanya hikwalaho ka ripfumelo,’ naswona, ‘loko a tlhelela endzhaku, moya-xiviri wa mina a wu n’wi tsakeli.’” Endzhakunyana ka kwalaho, vatirhela-mfumo vambirhi va le Hungary ekomponi va vulavule na mina, un’wana a ku: “A wu swi tivi leswaku hi ku xixima njhani hikwalaho ka ku seketela ka wena misinya ya milawu ya Bibele hilaha ku tiyeke swinene! U nga tshiki!”

Hi siku leri tlhandlamaka ndzi ye eka lava va ndzi nyikeke ntshunxeko wa 200 wa ti-pengö ivi ndzi ku: “Tanihi leswi Yehovha Xikwembu a pfumeleleke leswaku ndzi khotsiwa, u ta tlhela a khathalela ku ntshunxiwa ka mina. A ndzi nge hakeli mali leswaku ndzi ntshunxiwa.” Kutani ndzi gweviwe ku tshama malembe ya khume ekhotsweni. Kambe wolawo a ku nga ri makumu ya matshalatshala ya ku ndzi endla ndzi landzula. Huvo yi vule leswaku yi ta ndzi rivalela loko ndzo pfumela ku ya tirha evusocheni tin’hweti timbirhi ntsena, naswona a ndzi nga ta boheka ku khoma tlhari! Ndzi yi arile na nyiko yoleyo, kutani xigwevo xa mina xa le khotsweni xi sungurile.

Ku Xanisiwa Ku Kula

Ndzi tekiwile nakambe ndzi yisiwa ekhotsweni ra Pécs. Enkarhini lowu nxaniso a wu ri wukulu swinene. Mavoko ya mina ma boheriwe endzhaku, ivi va ndzi hayeka ha wona ku ringana kwalomu ka tiawara timbirhi. Hikwalaho, makatla ya mina hamambirhi ma konyomukile. Nxaniso wo tano wu ye emahlweni ku ringana nkarhi wa kwalomu ka tin’hweti ta tsevu. Ndzi nkhensa Yehovha ntsena hikwalaho ka leswi ndzi nga landzulangiki.

Hi 1942 ntlawa wa hina—vabohiwa va swa tipolitiki, Vayuda na 26 wa Timbhoni ta Yehovha—hi yisiwe emutini wa Kursk endhawini leyi a yi tekiwe hi masocha ya Jarimani. Hi nyiketiwe eka Majarimani, kutani va sindzise vabohiwa ku rhwala swakudya, matlhari ni swiambalo va swi yisa eka masocha lama nga enyimpini. Hina Timbhoni hi arile ku tirha hikuva a swi lwisana ni vukala-tlhelo bya hina bya Vukreste. Hikwalaho ka sweswo, hi tlheriseriwe eka masocha ya le Hungary.

Eku heteleleni, hi pfaleriwe ekhotsweni ra kwalaho eKursk. Hi biwe masiku yo hlayanyana kanharhu hi siku hi michizo ya rhaba. Ndzi biwe emombyeni wa mina ivi ndzi wela ehansi. Loko ndzi ri karhi ndzi biwa, ndzi anakanyile ndzi ku, ‘Ku fa a swi nonon’hwi.’ Miri wa mina hinkwawo wu sungule ku fa vusindza, kutani a ndzi nga twi nchumu. A hi nyikiwanga nchumu xo dya ku ringana masiku manharhu. Kutani hi yisiwe ehubyeni, ivi tsevu wa vanhu va gweveriwa rifu. Loko xigwevo xi hetisisiwa, hi sele hi ri 20.

Ndzingo wa ripfumelo lowu ndzi langutaneke na wona emasikwini wolawo eKursk hi October 1942 a wu ri wukulu swinene eka yin’wana leyi ndzi tshameke ndzi langutana na yona. Ndlela leyi a hi titwa ha yona yi phofuriwe kahle hi Hosi Yehoxafati wa khale loko vanhu va yena va langutane ni swihinga leswi tikaka: “Hi pfumala matimba e mahlweni ka v̌unyingi lebyi le’byikulu le’byi taka henhla ka hina; loko hi ri hina, a hi tiv̌i leŝi hi nga ta ŝi endla, kambe mahlo ya hina ma langutela wena.”—2 Tikronika 20:12.

Hina hi ri 20 hi humesiwile hi ya cela masirha ya hina, hi rindziwe hi 18 wa masocha ya le Hungary. Loko hi hetile ku cela, hi byeriwe leswaku hi na timinete ta khume to sayina tsalwa, leri xiphemu xa rona xi hlayekaka hi ndlela leyi: “Dyondzo ya Timbhoni ta Yehovha yi hoxile. A ndzi nge he yi pfumeli kumbe ku yi seketela. Ndzi ta lwela tiko ra rikwerhu ra Hungary . . . Ndzi tiyisekisa hi ku sayina ka mina leswaku ndzi joyina Kereke ya Rhoma Khatoliki.”

Endzhaku ka timinete toleto ta khume va lerisile va ku: “Hundzulukelani exineneni! Machani mi ya emasirheni!” Ivi ku landzela xileriso lexi nge: “Mubohiwa wo sungula ni wa vunharhu a va nghene emugodini!” Vanhu lavambirhi va nyikiwe timinete tin’wana ta khume leswaku va endla xiboho xo sayina tsalwa. Un’wana wa masocha u komberile a ku: “Lan’wani ripfumelo ra n’wina ivi mi huma esirheni!” Ku hava loyi a vuleke rito. Kutani mutirhela-mfumo loyi a ri ni vutihlamuleri a va balesela havumbirhi bya vona.

“Ku vuriwa yini hi lavan’wana?” socha ri vutise mutirhela-mfumo la nga ni vutihlamuleri.

U hlamurile a ku, “Va boheni. Hi ta tlhela hi va xanisa ivi hi va balesela hi awara ya tsevu nimixo.”

Hi xitshuketa ndzi sungule ku chava, ku nga ri ku chava ku fa, kambe leswaku a ndzi nge swi koti ku tiyisela nxaniso kutani ndzi ta landzula. Kutani ndzi ye emahlweni ivi ndzi ku: “Nkulukumba, hi tlule nawu ku fana ni vamakwerhu lava ma ha ku va baleselaka. Hikwalaho ka yini mi nga hi baleseli xikan’we na hina?”

Kambe a va hi baleselanga. Hi boheriwe mavoko endzhaku. Kutani hi hayekiwe hi mavoko ya hina. Loko hi titivala, a va hi chela hi mati. A swi vava swinene hikuva ntiko wa miri wu konyomule makatla ya hina. Ku xanisiwa loku ku ye emahlweni ku ringana kwalomu ka tiawara tinharhu. Kutani, hi xitshuketa ku va ni xileriso xa leswaku Timbhoni ta Yehovha ti nga ha baleseriwi.

Ku Rhurhela eVuxeni—Kutani Hi Baleka

Endzhaku ka mavhiki manharhu hi machisiwe masiku ma nga ri mangani ku kondza hi fika etimbuweni ta Nambu wa Don. Lava a va ri ni vutihlamuleri va hi byele leswaku a hi nge vuyi ha ha hanya. Ninhlikanhi, a hi nyikiwa ntirho lowu nga riki na xikongomelo, hi cela migerho hi tlhela hi yi seletela. Nimadyambu, a hi ri ni ntshunxeko wo karhi wo tifamba-fambela.

Loko ndzi languta xiyimo, a ku ri ni mintshembo mimbirhi. A hi ta fela kwalaho, kumbe a hi ta balekela Majarimani ivi hi ya tinyiketa eka Marhaxiya. Hi hina hi ri vanharhu ntsena lava boheke ku ringeta ku baleka hi tsemakanya Nambu wa Don lowu gwitsileke. Hi December 12, 1942, hi khongele eka Yehovha ivi hi baleka. Hi fike etimbaleni ta masocha ya le Russia ivi xikan’we-kan’we hi nghenisiwa ekampeni ya khotso hi ri ni vabohiwa va kwalomu ka 35000. Hi ximun’wana, a ko va vabohiwa va kwalomu ka 2300 ntsena lava a va ha hanya. Lavan’wana hinkwavo a va file hikwalaho ko sika.

Ku Ntshunxiwa Kambe Khombo Leri Yaka eMahlweni

Ndzi pone nyimpi hinkwayo, ku katsa ni tin’hweti to hlayanyana endzhaku ka loko yi herile, ndzi ri mubohiwa wa Marhaxiya. Eku heteleleni, hi November 1945, ndzi tlhelele ekaya eZahor. Purasi ra hina a ri ri exiyin’weni lexi nga tsakisiki, kutani ndzi boheke ku sungula ehansi. Nsati wa mina ni vana va tirhe epurasini hi nkarhi wa nyimpi, kambe hi October 1944, loko Marhaxiya ma tshinela, va rhurhiseriwe evuxeni. Hinkwaswo leswi a hi ri na swona a swi phanghiwile.

Lexi biheke ku tlula na mpimo, loko ndzi tlhelela ekaya, nsati wa mina a vabya swinene. U fe hi February 1946. A ri ni malembe ya 38 ntsena. Hi ve ni nkarhi wutsongo swinene wo tiphina hi ku tlhela hi hlangana endzhaku ko hambana malembe lama tlulaka ntlhanu yo leha, lama nonon’hwaka.

Ndzi kuma nchavelelo eka vamakwerhu va moya, hi ku va kona eminhlanganweni ni hi ku hlanganyela evutirhelini bya yindlu na yindlu. Hi 1947, ndzi swi kotile ku lomba mali leswaku ndzi ya eBrno, ku nga mpfhuka wa kwalomu ka 400 wa tikhilomitara, leswaku ndzi ya entsombanweni. Kwalaho, exikarhi ka vamakwerhu va Vakreste, ku katsa na Nathan H. Knorr, loyi a ri muungameri wa Watch Tower Bible and Tract Society hi nkarhi wolowo, ndzi kume nchavelelo lowukulu ni xikhutazo.

A hi tiphinanga nkarhi wo leha hi ntshunxeko wa hina wa le ndzhaku ka nyimpi. Hi 1948 Makhomunisi ma sungule ku hi tshikilela. Vo tala va vamakwerhu lava rhangelaka entirhweni wa Timbhoni ta Yehovha eCzechoslovakia va khomiwile hi 1952, kutani ndzi nyikiwe vutihlamuleri byo khathalela mavandlha. Hi 1954, na mina ndzi khomiwile ivi ndzi gweviwa malembe ya mune ekhotsweni. N’wana wa mina wa mufana, Ján, ni n’wana wa yena wa mufana Juraj na vona va khotsiwile hikwalaho ko hlayisa vukala-tlhelo bya vona bya Vukreste. Ndzi hete malembe mambirhi ekhotsweni ra le xifundzeni xa Pankrác le Prague. Ndzi rivaleriwile hi 1956, ivi ndzi ntshunxiwa.

Ntshunxeko Eku Heteleleni!

Eku heteleleni, hi 1989, Vukhomunisi byi heleriwe hi matimba ya byona eCzechoslovakia, kutani ntirho wa Timbhoni ta Yehovha wu tsarisiwe ximfumo. Xisweswo, a hi ntshunxekile ku hlangana swin’we ni ku chumayela erivaleni. Hi nkarhi wolowo ximutana xa Zahor a xi ri ni Timbhoni ta kwalomu ka dzana, leswi vuleke leswaku kwalomu ka munhu un’we eka vanhu van’wana ni van’wana va khume eximutanini a ri Mbhoni. Malembe ma nga ri mangani lama hundzeke, hi ake Holo ya Mfumo yo saseka, leyi anameke le Zahor, leyi nga ni switulu swa kwalomu ka 200.

Rihanyo ra mina a ra ha ri rinene ngopfu, kutani vamakwerhu va famba na mina hi movha ku ya eHolweni ya Mfumo. Ndza tsaka loko ndzi ri eHolweni naswona ndzi tsakela ku hlamula eka Dyondzo ya Xihondzo xo Rindza. Ndza tsaka swinene ku vona switukulwana swinharhu swa ndyangu wa mina swi tirhela Yehovha, ku katsa ni vatukulu vo hlayanyana. Un’wana wa vona u ve mulanguteri la famba-fambaka wa Timbhoni ta Yehovha eCzechoslovakia ku kondza vutihlamuleri bya ndyangu wa yena byi n’wi sivela ku endla ntirho wolowo.

Ndzi nkhensa Yehovha leswi a ndzi tiyiseke hi minkarhi yo tala ya ku ringiwa ka mina. Ku tshama ndzi kongomise nyingiso wa mina eka yena—“onge hiloko [ndzi] vona Loyi a nga vonakiki”—hi swona leswi ndzi tiyiseke. (Vaheveru 11:27) Ina, ndzi ri twile voko ra yena ra matimba ra ku ponisa. Hikokwalaho, na sweswi ndza ha ya emahlweni ndzi ringeta ku va kona eminhlanganweni ya vandlha ni ku hlanganyela eku twariseni ka vito ra yena evutirhelini bya le rivaleni hilaha ndzi kotaka hakona.

[Xifaniso lexi nga eka tluka 25]

Holo ya Mfumo eZahor

[Xifaniso lexi nga eka tluka 26]

Ndzi tlangela lunghelo ra ku hlamula eDyondzweni ya “Xihondzo xo Rindza”

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela