Xana Hakunene U Nga Xi Rhandza Xikwembu?

XIKWEMBU xi ri: “A ku na munhu l’a nga nḍi v̌onaka a v̌a a hanya.” (Eksoda 33:20) Ku tlula kwalaho, ku sukela emikarhini ya Bibele a ku si va ni vumbhoni bya ku vulavula ka xona ni munhu wihi ni wihi hi ku kongoma. Xana leswi a swi twakali swi tika—kumbe swi nge endleki—leswaku u nga endla xinakulobye ni munhu loyi u nga si tshamaka u n’wi vona kumbe ku n’wi twa hi ku kongoma? Xana swi nga endleka hakunene leswaku u va ni vuxaka lebyinene ni Muvumbi wa vuako hinkwabyo?

A hi fanelanga ku kanakana leswaku swi nga koteka ku kurisa xinakulobye lexi tiyeke ni Xikwembu. Eka Deteronoma 6:5 hi hlaya leswaku tiko ra Israyele ri lerisiwe leswi: “U ta ranḍa Yehova, Šikwembu ša wena, hi mbilu hikwayo ya wena, ni moya hikwawo wa wena, ni matimba hikwawo ya wena.” Yesu Kreste u tiyise nawu lowu eka valandzeri va yena endzhakunyana kutani a engetela a ku: “Lowu hi wona nawu lowukulu, lowo rhanga.” (Matewu 22:37, 38) Xana Bibele a yi ta hi khongotela leswaku hi rhandza Xikwembu loko vuxaka byo tano a byi nga koteki?

Kambexana Yehovha u rindzele leswaku hi n’wi rhandza ntsena hi leswi a hi lerisaka ku endla tano? A swi tano. Xikwembu xi vumbe mpatswa wo sungula wa vanhu wu ri ni vuswikoti bya ku xi rhandza. Adamu na Evha a va nga sindzisiwanga leswaku va rhandza Muvumbi wa vona. Ku ri na sweswo, Xikwembu xi va veke eka swiyimo leswi hetisekeke leswi a swi ta va pfuna ku kurisa xinakulobye xa vona lexikulu na xona. Hi vona a va ta tihlawulela—ku tshinela ekusuhi ni Xikwembu kumbe va va kule na xona.

Adamu na Evha va hlawule ku xandzuka. (Genesa 2:16, 17; 3:6, 7) Hambiswiritano, vatukulu va vona, a va ta va ni vuswikoti bya ku kurisa vuxaka ni Muvumbi.

Ku Famba Ni Xikwembu Xa Ntiyiso

Hi xikombiso, eBibeleni, Abrahama u vuriwa “nakulobye” wa Xikwembu. (Yakobo 2:23) Kambe Abrahama a hi yena ntsena la nga tshama a va ni vuxaka lebyikulu ni Xikwembu. Bibele yi vulavula hi vanhu lava nga hetisekangiki vo tala lava nga kombisa vunakulobye bya xiviri na Yehovha va tlhela va “famba ni Šikwembu” xa ntiyiso.—Genesa 5:24; 6:9; Yobo 29:4; Pisalema 25:14; Swivuriso 3:32.

Malandza ya Xikwembu ya khale a ma velekiwanga ma ri ni rirhandzu ni vunakulobye ni Xikwembu. A ma fanele ma byi kurisa. Hi ndlela yihi? Hi ku xi tiva hi vito ra xona ra xiviri, ku nga Yehovha. (Eksoda 3:13-15; 6:2, 3) Hi ku xiya vukona bya xona ni Vukwembu bya xona. (Vaheveru 11:6) Hi ku tshama ma anakanya hi swiendlo swa xona swa rirhandzu. (Pisalema 63:6) Hi ku phofulela Xikwembu mianakanyo ya vona hi xikhongelo. (Pisalema 39:12) Hi ku dyondza hi vunene bya xona. (Zakariya 9:17) Hi ku papalata ku xi hlundzukisa.—Swivuriso 16:6.

Xana u nga va nakulobye wa Xikwembu u tlhela u famba na xona? I ntiyiso leswaku a wu nge xi voni Xikwembu kumbe ku twa rito ra xona. Hambiswiritano, Yehovha wa ku rhamba leswaku u va ‘neni entsongeni wa yena,’ u va nakulobye wa yena. (Pisalema 15:1-5) Xisweswo, u nga swi kota ku rhandza Xikwembu. Kambe xana u nga swi kotisa ku yini ku kurisa vunakulobye bya xiviri ni vuxaka lebyi tiyeke na xona?