Tempele Leyikulu Ya Yehovha Ya Moya
“Hi ni Muprista Lonkulu wo tani hi yena, . . . la tirhaka exivandleni lexi hlawulekeke ni le Ntsongeni wa xiviri, lowu yimisiweke ku nga ri hi munhu kambe hi Hosi.”—VAHEVERU 8:1, 2.
1. Hi rihi lunghiselelo ra rirhandzu leri Xikwembu xi ri endleleke vanhu lava dyoheke?
YEHOVHA XIKWEMBU, hikwalaho ka rirhandzu ra yena lerikulu hi vanhu, u nyikele gandzelo ro susa swidyoho swa misava. (Yohane 1:29; 3:16) A ku laveka leswaku xi hundzisela vutomi bya N’wana wa xona wa mativula a suka etilweni a ya nghena embelekweni ya wanhwana wa Muyuda la vuriwaka Mariya. Ntsumi ya Yehovha yi n’wi hlamusele kahle Mariya leswaku n’wana loyi a nga ta n’wi veleka u ta “vuriwa N’wana wa Xikwembu.” (Luka 1:34, 35) Yosefa, loyi a a vute Mariya, u byeriwe hi ta hlori ra ku tikiwa ka Yesu a tlhela a byeriwa leswaku hi yena la nga ta “ponisa tiko rakwe eswidyohweni swa rona.”—Matewu 1:20, 21.
2. I yini lexi Yesu a xi endleke loko a ri ni malembe ya kwalomu ka 30 hi vukhale, naswona ha yini?
2 Loko Yesu a ri karhi a kula, u fanele a twisise mintiyiso yin’wana ya malunghana ni ku velekiwa ka yena hi hlori. A a swi tiva leswaku Tata wa yena wa le tilweni a ri ni ntirho wo ponisa vutomi lowu a fanele a wu endla emisaveni. Kutani, tanihi wanuna la kuleke kahle wa kwalomu ka malembe ya 30 hi vukhale, Yesu u te eka muprofeta wa Xikwembu Yohane leswaku a khuvuriwa eNambyeni wa Yordani.—Marka 1:9; Luka 3:23.
3. (a) Xana Yesu a vula yini hi marito lama nge, “A wu navelanga timhamba ni magandzelo”? (b) Hi xihi xikombiso lexi xiyekaka lexi Yesu a xi vekeleke hinkwavo lava lavaka ku va vadyondzisiwa va yena?
3 Yesu a a ri karhi a khongela hi nkarhi wa ku khuvuriwa ka yena. (Luka 3:21) Entiyisweni, ku sukela kwalaho ku ya emahlweni, evuton’wini bya yena, u hetisise marito ya Pisalema 40:6-8, lama endzhakunyana muapostola Pawulo a kombeteleke eka wona a ku: “A wu navelanga timhamba ni magandzelo, kambe u ndzi vumbele miri.” (Vaheveru 10:5) Xisweswo Yesu u kombise ku xiya ka yena leswaku Xikwembu ‘a xi nga ha lavi’ leswaku magandzelo ya swiharhi ma ya emahlweni ma nyikeriwa etempeleni ya le Yerusalema. Ematshan’weni ya sweswo, u xiye leswaku Xikwembu xi lunghiselele miri wa yena munhu la hetisekeke, Yesu, leswaku a wu nyikela tanihi gandzelo. A ri ta susa xilaveko xihi na xihi xa magandzelo ya swiharhi. Loko a kombisa ku navela ka yena loku humaka embilwini ko titsongahatela ku endla ku rhandza ka Xikwembu, Yesu u ye emahlweni a khongela: “Hi mina loyi, we Xikwembu, ndzi tile ku ta endla ku rhandza ka wena, hilaha swi nga tsariwa hakona ehenhla ka mina ebukwini ya Nawu.” (Vaheveru 10:7) Wa nga vona xikombiso lexi xiyekaka swonghasi xa xivindzi ni ku tinyiketela ka ku pfumala vutianakanyi, lexi Yesu a xi vekeke hi siku rolero eka hinkwavo lava a va ta va vadyondzisiwa va yena endzhakunyana!—Marka 8:34.
4. Xana Xikwembu xi ku kombisise ku yini ku amukela ka xona ku tinyikela ka Yesu?
4 Xana Xikwembu xi kombise ku xi amukela xikhongelo xa Yesu loko a khuvuriwa? A hi pfumeleleni un’wana wa vaapostola va Yesu lava hlawuriweke a hi nyika nhlamulo: “Kuteloko Yesu a khuvuriwile, a hatla a huma ematini; kutani hi nomu lo matilo ma pfuleka, a vona Moya wa Xikwembu wu xika tanihi tuva, wu ta ehenhla ka yena. Kutani ku twakala rito leri humaka etilweni, ri ku: ‘Loyi i N’wananga la rhandzekaka, loyi ndzi n’wi tsakelaka.’”—Matewu 3:16, 17; Luka 3:21, 22.
5. I yini lexi a xi fanekiseriwa hi altari ya xiviri leyi nga etempeleni?
5 Ku pfumela ka Xikwembu leswaku miri wa Yesu wu nyiketiwa tanihi gandzelo a swi vula leswaku, hi tlhelo ra moya, altari leyikulu ku tlula leyi a yi ri etempeleni ya le Yerusalema yi humelerile. Altari ya xiviri laha swiharhi a swi nyikeriwa kona tanihi magandzelo a yi fanekisela altari yoleyo ya moya, leyi entiyisweni a yi ri “ku rhandza” ka Xikwembu kumbe lunghiselelo ro amukela vutomi bya munhu Yesu tanihi gandzelo. (Vaheveru 10:10) Hi yona mhaka leyi muapostola Pawulo a tsaleleke Vakreste-kulobye a ku: “Hi ni altari leyi, vaprista lava tirhaka eNtsongeni [kumbe etempeleni] va nga riki na fanelo ya ku dya swa yona.” (Vaheveru 13:10) Hi marito man’wana, Vakreste va ntiyiso va pfuneka eka gandzelo leri tlakukeke ro riha swidyoho, leri vaprista vo tala va Vayuda va ri aleke.
6. (a) I yini lexi humeleleke erivaleni hi nkarhi wa ku khuvuriwa ka Yesu? (b) Xana xithopo lexi nge Mesiya kumbe Kreste xi vula yini?
6 Ku totiwa ka Yesu hi moya lowo kwetsima a swi vula leswaku Xikwembu se xi sungule lunghiselelo ra xona hinkwaro ra tempele ya moya, na Yesu la tirhaka tanihi Muprista Lonkulu. (Mintirho 10:38; Vaheveru 5:5) Mudyondzisiwa Luka u huhuteriwe ku kombetela eka lembe ra xiendlakalo lexi xa nkoka tanihi “lembe ra khume na ntlhanu ra ku fuma ka Tiberiyo Khezari.” (Luka 3:1-3) Swoleswo swi fambisana ni lembe ra 29 C.E.—69 wa mavhiki ya malembe hi ku kongoma, kumbe 483 wa malembe, ku sukela enkarhini lowu Hosi Ataserkisi a nyikeleke xileriso xa leswaku makhumbi ya Yerusalema ma pfuxetiwa. (Nehemiya 2:1, 5-8) Hi ku ya hi vuprofeta, “Mesia Hosi” a ta humelela hi lembe rolero ri vhumbhiweke. (Daniyele 9:25) Entiyisweni Vayuda vo tala a va swi xiya leswi. Luka u vika leswaku “vanhu a va tshama va langutele” ku humelela ka Mesiya, kumbe Kreste, swithopo leswi humaka eka marito ya Xiheveru ni Xigriki lama nga ni nhlamuselo leyi fanaka, ‘mutotiwa.’—Luka 3:15.
7. (a) Xana Xikwembu xi xi tote rini “Šikwetsimisiso,” naswona leswi swi vula yini? (b) I yini swin’wana leswi humeleleke eka Yesu enkarhini wa ku khuvuriwa ka yena?
7 Enkarhini wa ku khuvuriwa ka Yesu, vutshamo bya le tilweni bya Xikwembu a byi totiwile, kumbe byi vekeriwe etlhelo, tanihi “šikwetsimisiso” elunghiselelweni ra tempele leyikulu ya moya. (Daniyele 9:24) “Ntsong[a] wa xiviri [kumbe tempele], lowu yimisiweke ku nga ri hi munhu kambe hi Hosi” wu sungule ku tirha. (Vaheveru 8:2) Nakambe, hi ku khuvuriwa ka yena hi mati ni moya lowo kwetsima, Yesu Kreste u velekiwe nakambe tanihi N’wana wa Xikwembu wa moya. (Ringanisa Yohane 3:3.) Leswi a swi vula leswaku Xikwembu hi nkarhi lowu faneleke a xi ta vuyetela N’wana wa xona evuton’wini bya le tilweni, laha a nga ta tirha evokweni ra Tata wa yena ra xinene tanihi Hosi ni Muprista Lonkulu “hilaha ku nga heriki, hileswi a nga wa rixaka rin’we na Melkisedeke.”—Vaheveru 6:20; Pisalema 110:1, 4.
Vukwetsimisiso Bya Le Tilweni
8. Xana xiluvelo xa Xikwembu etilweni xi ve ni swivumbeko swihi sweswi?
8 Hi siku ra ku khuvuriwa ka Yesu, xiluvelo xa le tilweni xa Xikwembu xi ve ni swivumbeko leswintshwa. Ku endliwa ka gandzelo ra munhu la hetisekeke ro riha swidyoho swa misava ku kandziyise ku kwetsima ka Xikwembu hilaha ku hambaneke ni vudyoho bya vanhu. Tintswalo ta Xikwembu ti tlhele ti kandziyisiwa hileswaku sweswi xi kombise ku navela ka xona ku rhula, kumbe ku miyela. Xisweswo xiluvelo xa Xikwembu xa le tilweni xi fane ni yindlu ya le xikarhi swinene ya tempele, laha muprista lonkulu a nghena kan’we hi lembe ni ngati ya xiharhi leswaku a riha swidyoho hi ndlela yo fanekisela.
9. (a) Xana nguvu leyi nga le xikarhi ka Vukwetsimelo ni Vukwetsimisiso yi fanekisela yini? (b) Xana Yesu u nghene njhani engubyeni ya tempele ya Xikwembu ya moya?
9 Nguvu leyi a yi hambanisa Vukwetsimelo eka Vukwetsimisiso a yi fanekisela miri wa Yesu wa nyama. (Vaheveru 10:19, 20) A yi ri rihlampfu leri a ri sivela Yesu ku nghena eka vukona bya Tata wa yena loko a ha ri munhu emisaveni. (1 Vakorinto 15:50) Enkarhini wa ku fa ka Yesu, “xisirhelelo xa Tempele xi handzuka hi le xikarhi, ku sukela ehenhla, ku ya fika ehansi.” (Matewu 27:51) Leswi swi swi kombise kahle leswaku rihlampfu leri sivelaka Yesu ku nghena etilweni ri susiwile sweswi. Masiku manharhu endzhakunyana, Yehovha Xikwembu u endle hlori leri hlamarisaka. U pfuxe Yesu eku feni, a nga ri munhu wa nyama ni ngati la faka, kambe a ri xivumbiwa xa moya xo kwetsima lexi “hanya[ka] hi masiku ni masiku.” (Vaheveru 7:24) Masiku ya 40 endzhakunyana, Yesu u tlhandlukele etilweni ivi a nghena eka “šikwetsimisiso,” “a ta humelela sweswi emahlweni ka Xikwembu ku hi yimela.”—Vaheveru 9:24.
10. (a) I yini lexi humeleleke endzhaku ka loko Yesu a nyikele ntikelo wa gandzelo ra yena eka Tata wa yena wa le tilweni? (b) Xana ku totiwa hi moya lowo kwetsima a swi vula yini eka vadyondzisiwa va Kreste?
10 Xana Xikwembu xi amukele nkoka wa ngati ya Yesu leyi halatiweke tanihi ku rivaleriwa ka swidyoho swa misava? Ina xi wu amukerile. Vumbhoni bya leswi byi vonake hi ku kongoma masiku ya 50 endzhaku ka ku pfuxiwa ka Yesu, hi siku ra nkhuvo wa Pentekosta. Moya lowo kwetsima wa Xikwembu wu chululeriwe ehenhla ka vadyondzisiwa va 120 va Yesu lava a va hlengeletane eYerusalema. (Mintirho 2:1, 4, 33) Ku fana ni Muprista wa vona Lonkulu, Yesu Kreste, sweswi se a va totiwile leswaku va tirha tanihi “vaprista lava hlawulekeke, [va] humesa magandzelo ya moya” ehansi ka lunghiselelo ra Xikwembu ra tempele leyikulu ya moya. (1 Petro 2:5) Ku tlula kwalaho, vatotiwa lava va vumbe tiko lerintshwa, “tiko leri hlawulekeke” ra Xikwembu ra Israyele wa moya. Ku sukela kwalaho, vuprofeta hinkwabyo bya swilo leswinene mayelana na Israyele, swo tanihi xitshembiso xa “ntwanano lo’wuntŝha” lexi rhekhodiweke eka Yeremiya 31:31, a swi ta tirha eka vandlha ra Vakreste lava totiweke, ‘Israyele wa Xikwembu’ wa xiviri.—1 Petro 2:9; Vagalatiya 6:16.
Swivumbeko Swin’wana Swa Tempele Ya Xikwembu Ya Moya
11, 12. (a) I yini lexi a xi fanekisela hi xivava xa vaprista emhakeni ya Yesu, naswona xi fanekisela hi yini emhakeni ya valandzeri va yena lava totiweke? (b) Xana nhlambeto ya mati yi fanekisela yini, naswona a yi tirhisiwa hi ndlela yihi?
11 Hambileswi Vukwetsimisiso a byi fanekisela “etilweni hi koxe,” laha Xikwembu xi tshameke kona, swivumbeko leswin’wana hinkwaswo swa tempele ya moya ya Xikwembu swi yelana ni swilo leswi nga emisaveni. (Vaheveru 9:24) Etempeleni le Yerusalema, a ku ri ni xivava xa vuprista xa le ndzeni lexi nga ni altari ya magandzelo ni nhlambeto leyikulu ya mati, leyi vaprista a va yi tirhisela ku tibasisa emahlweni ka ku va va endla ntirho wo kwetsima. Xana swilo leswi a swi fanekisela yini elunghiselelweni ra tempele ya Xikwembu ya moya?
12 Emhakeni ya Yesu Kreste, xivava xa vuprista xa le ndzeni a xi fanekisela xiyimo xa yena xo pfumala vudyoho tanihi N’wana wa Xikwembu la nga munhu la hetisekeke. Hi ku kombisa ripfumelo egandzelweni ra Yesu, valandzeri va Kreste lava totiweke va faneriwa hi ku vuriwa lava lulameke. Xisweswo, Xikwembu xi nga tirhisana na vona kahle onge hiloko va ri hava xidyoho. (Varhoma 5:1; 8:1, 33) Hikwalaho, xivava lexi xi tlhela xi fanekisela xiyimo lexi hlamuseriwaka xi ri lexi lulameke xa vumunhu lebyi xirho xin’wana ni xin’wana xa vaprista lava lavo kwetsima xi nga na xona emahlweni ka Xikwembu. Hambiswiritano, Vakreste lava totiweke a va hetisekanga naswona va ha swi endla swidyoho. Nhlambeto ya mati exivaveni yi fanekisela Rito ra Xikwembu, leri Muprista Lonkulu a ri tirhisaka ku basisa vaprista lava kwetsimaka nkarhi na nkarhi. Hi ku titsongahatela fambiselo leri ra ku basisiwa, va kume xindzhuti lexi xiximekaka eka Xikwembu naswona va kokela vanhu va le handle evugandzerini bya xona lebyi tengeke.—Vaefesa 5:25, 26; ringanisa Malakiya 3:1-3.
Vukwetsimelo
13, 14. (a) Xana Vukwetsimelo bya tempele byi fanekisela yini emhakeni ya Yesu ni valandzeri va yena lava totiweke? (b) Xana xitlhoma-rivoni xa nsuku xi fanekisela yini?
13 Kamara ro sungula ra tempele ri fanekisela xiyimo lexi tlakukeke eka lexiya xa le xivaveni. Emhakeni ya munhu la hetisekeke Yesu Kreste, ri fanekisela ku tswariwa ka yena nakambe tanihi N’wana wa Xikwembu wa moya la vekeriweke ku tlhelela evuton’wini bya le tilweni. Endzhaku ko vuriwa lava lulameke hikwalaho ka ripfumelo ra vona engatini ya Kreste leyi halatiweke, valandzeri lava lava totiweke va tlhela va tokota matirhelo lama hlawulekeke ya moya wa Xikwembu. (Varhoma 8:14-17) Hi “mati [hileswaku, ku khuvuriwa ka vona] ni Moya,” va “tlhela [va] tswariwa ra vumbirhi” tanihi vana va moya va Xikwembu. Hi ndlela yoleyo, va ni ntshembo wo pfuxeriwa vutomi bya le tilweni tanihi vana va Xikwembu va moya, ntsena loko va tshama va tshembekile ku fikela eku feni.—Yohane 3:5, 7; Nhlavutelo 2:10.
14 Vaprista lava a va tirha endzeni ka Vukwetsimelo bya tempele ya laha misaveni, a va nga voniwi hi vagandzeri lava nga le handle. Hi ku fanana, Vakreste lava totiweke va tokota xiyimo xa moya lexi nga hlanganyeriwiki kumbe ku twisisiwa hilaha ku teleke hi vunyingi bya vagandzeri va Xikwembu, lava ntshembo wa vona ku nga ku hanya hi masiku emisaveni ya paradeyisi. Xitlhoma-rivoni xa nsuku xa le tabernakeleni xi fanekisela xiyimo xa ku voningeriwa ka Vakreste lava totiweke. Ku tirha ka moya lowo kwetsima wa Xikwembu, ku fana ni mafurha etimbonini, ku tise ku vonakala eBibeleni. Ku twisisa loku Vakreste va ku kumaka hikwalaho ka sweswo, a va tshami hi kona. Ematshan’weni ya sweswo, va yingisa Yesu loyi a nga te: “N’wina mi ku vonakala ka misava; . . . Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.”—Matewu 5:14, 16.
15. Xana xinkwa lexi nga le tafuleni ra xinkwa xa xikombiso xi fanekisela yini?
15 Leswaku va tshama va ri exiyin’weni lexi xo voningeriwa, Vakreste lava totiweke nkarhi na nkarhi va fanele va tiwundla hi leswi fanekiseriweke hi xinkwa lexi nga le tafuleni ra xinkwa xa xikombiso. Xihlovo xa vona xo sungula xa swakudya swa moya i Rito ra Xikwembu, leri va tikarhatelaka ku ri hlaya ni ku anakanyisisa ha rona siku na siku. Nakambe Yesu u va tshembise ku va nyika “swakudya hi nkarhi wa kona” hi ku tirhisa “nandza [wa yena] la tshembekaka, wo tlhariha.” (Matewu 24:45) “Nandza” loyi i huvo hinkwayo ya Vakreste lava totiweke emisaveni hi nkarhi wihi na wihi wo karhi. Kreste u tirhise huvo leyi leyi totiweke ku humesa rungula ra ku hetiseka ka vuprofeta bya Bibele ni ku nyikela nkongomiso nkarhi na nkarhi eku tirhiseni ka misinya ya milawu ya Bibele evuton’wini bya manguva lawa bya siku na siku. Hikwalaho, Vakreste lava totiweke hi ku tlangela va tiwundla hi malunghiselelo wolawo hinkwawo ya moya. Kambe swakudya swa vutomi bya vona bya moya a swi titsheganga hi ku nghenisa vutivi bya Xikwembu emianakanyweni ya vona ni le timbilwini ta vona ntsena. Yesu u te: “Swakudya swa mina i ku endla ku rhandza ka Loyi a ndzi rhumeke, ni ku heta ntirho wa yena swinene.” (Yohane 4:34) Hi ku fanana, Vakreste lava totiweke va tokota ku eneriseka hi ku endla ku rhandza ka Xikwembu loku paluxiweke siku na siku.
16. Xana ntirho ealtarini ya mirhi ya risuna wu fanekisela yini?
16 Nimixo na nimadyambu, muprista a a nyikela murhi wa risuna eka Xikwembu ehenhla ka altari ya mirhi ya risuna eVukwetsimelweni. Hi nkarhi lowu fanaka, vagandzeri lava nga riki vaprista a va khongela eka Xikwembu loko va yime eswivaveni swa le handle swa tempele ya xona. (Luka 1:8-10) Bibele ya hlamusela: “Murhi wa risuna, [i] mikhongelo ya vahlawuriwa va Xikwembu.” (Nhlavutelo 5:8) Mupisalema Davhida u tsarile a ku: “Šikhongelo ša mina a ši tlhandlukele ka wena tani hi miri ya risuna.” (Pisalema 141:2) Vakreste lava totiweke na vona va teka lunghelo ra vona ro tshinelela Yehovha hi xikhongelo ha Yesu Kreste ri ri ra risima. Swikhongelo swa ku hiseka leswi humaka embilwini swi fana ni murhi wa risuna lowu nun’hwelaka kahle. Vakreste lava totiweke va tlhela va dzunisa Xikwembu hi tindlela tin’wana, va tirhisa milomo ya vona ku dyondzisa van’wana. Ku tiyisela ka vona emaxangwini ni vutshembeki bya vona ehansi ka ndzingo, swi tsakisa Xikwembu swinene.—1 Petro 2:20, 21.
17. I yini leswi a swi katseka eku hetisekeni ka xifaniso xa vuprofeta, xa ku nghena ko sungula ka muprista lonkulu eVukwetsimisisweni hi Siku ro Phahlelana Mariyeta?
17 Hi Siku ro Phahlelana Mariyeta, muprista lonkulu wa Israyele a a fanele a nghena eVukwetsimisisweni ivi a hisa murhi wa risuna exihisweni xa murhi wa risuna lexi nga ni makala lama vuvumelaka. Leswi a swi fanele swi endliwa a nga si tisa ngati ya magandzelo ya swidyoho. Eku hetisekeni ka xifaniso lexi xa vuprofeta, Yesu u hlayise vutshembeki lebyi hetisekeke eka Yehovha Xikwembu emahlweni ko nyikela vutomi bya yena tanihi gandzelo rin’we ntsena ro hetelela ra swidyoho swa hina. Xisweswo u kombise leswaku munhu la hetisekeke a nga byi hlayisa vutshembeki bya yena eka Xikwembu ku nga khathariseki mintshikilelo leyi Sathana a n’wi tiselaka yona. (Swivuriso 27:11) Loko a ringiwa, Yesu u khongerile “a huwelela hi matimba ni ku rila hi mihloti, . . . kutani ú yingisiwile hikwalaho ka xichavo xa yena.” (Vaheveru 5:7) Hi ndlela leyi u dzunise Yehovha tanihi Hosi Leyikulu yo lulama ni leyi fanelaka ya vuako hinkwabyo. Xikwembu xi hakele Yesu hi ku n’wi pfuxa eku feni xi n’wi pfuxela evuton’wini lebyi nga fiki bya le tilweni. Exiyin’weni lexi lexi tlakukeke, Yesu u kokela nyingiso eka xivangelo xa vumbirhi xa ku ta ka yena emisaveni, ku nga ku hlanganisa vanhu lava dyoheke ni Xikwembu.—Vaheveru 4:14-16.
Ku Kwetsima Lokukulu Ka Tempele Ya Moya Ya Xikwembu
18. Xana Yehovha u ku tise njhani ku kwetsima loku hlamarisaka etempeleni ya yena ya moya?
18 Yehovha u vhumbhile a ku: “Ku kwetsima ka yindlu ya le nḍaku ku ta tlula ka le’yo sungula.” (Hagayi 2:9) Hi ku pfuxa Yesu, Hosi ni Muprista Lonkulu la nga fiki, Yehovha u tise ku kwetsima loku hlamarisaka etempeleni ya yena ya moya. Sweswi Yesu u le xiyin’weni xo tisa “ku ponisiwa loku nga heriki eka hinkwavo lava va n’wi yingisaka.” (Vaheveru 5:9) Vo sungula ku kombisa ku yingisa koloko a ku ri vadyondzisiwa va 120 lava amukeleke moya lowo kwetsima hi Pentekosta ya 33 C.E. Buku ya Nhlavutelo yi vhumbhe leswaku vana lava va Israyele wa moya eku heteleleni a va ta fika eka 144 000. (Nhlavutelo 7:4) Endzhaku ka ku fa, vo tala va vona va boheke ku etlela esirheni leri tolovelekeke ra vanhu va yimele nkarhi wa vukona bya Yesu ematimbeni ya vuhosi. Ndzandzelano wa minkarhi wa vuprofeta lowu nga eka Daniyele 4:10-17, 20-27 wu kombetela eka 1914 tanihi nkarhi wa Yesu wo sungula ku fuma exikarhi ka valala va yena. (Pisalema 110:2) Hi malembe-xikhume ya le mahlweni, Vakreste lava totiweke a va yimele lembe rolero hi mahlo-ngati. Nyimpi yo sungula ya misava swin’we ni makhombo lama weleke vanhu, swi nyikele vumbhoni bya leswaku Yesu hakunene u vekiwile tanihi Hosi hi 1914. (Matewu 24:3, 7, 8) Endzhakunyana ka sweswo, loko nkarhi wu fikile wa “ku avanyisiwa loku nga ta sungula hi va yindlu ya Xikwembu,” Yesu a a ta hetisisa xitshembiso lexi a xi nyikeke vadyondzisiwa va yena lava totiweke lava feke ku nga lexi: “Ndzi ta vuya; kutani ndzi ta mi teka mi ta ka mina, leswaku laha ndzi nga kona, mi va kona na n’wina.”—1 Petro 4:17; Yohane 14:3.
19. Xana masalela ya lava va 144 000 ma ta nghena njhani eVukwetsimisisweni bya le tilweni?
19 Swirho swa 144 000 swa vaprista lava kwetsimaka a swi lemeriwanga makumu hinkwaswo ni ku hlengeleteriwa kaya ra swona ra le tilweni. Masalela ya swona ma ha hanya emisaveni exiyin’weni xa moya lexi fanekiseriweke hi Vukwetsimelo, lebyi a byi hambanisiwe ni vukona bya Xikwembu lebyi kwetsimaka hi “nguvu,” kumbe rihlampfu ra mimiri ya vona ya nyama. Loko vanhu lava va fa va tshembekile, va pfuxiwa hi ku hatlisa tanihi swivumbiwa swa moya leswi nga fiki leswaku va ya hlangana ni lavan’wana va 144 000 lava ana se va nga le tilweni.—1 Vakorinto 15:51-53.
20. Hi wihi ntirho wa nkoka lowu masalela ya vaprista lava kwetsimaka ma wu endlaka sweswi, naswona wu va ni vuyelo byihi?
20 Leswi ku nga ni vaprista vo tala swinene lava tirhaka swin’we ni Muprista Lonkulu etilweni, tempele ya Xikwembu ya moya yi kume ku kwetsima loku engetelekeke. Hi nkarhi lowu fanaka, masalela ya vaprista lava kwetsimaka ma endla ntirho wa nkoka emisaveni. Hi ku chumayela ka vona, Xikwembu xi “ṭekaṭekisa ni matiko hikwawo” hi marito ya ku avanyisa ka xona, hilaha swi vhumbhiweke ha kona eka Hagayi 2:7. Hi nkarhi lowu fanaka, timiliyoni ta vagandzeri lava hlamuseriwaka tanihi “le’ŝi ranḍekaka ŝa matiko hikwawo” va khitikanela eswivaveni swa laha misaveni swa tempele ya Yehovha. Xana lava va fanelekela njhani elunghiselelweni ra Xikwembu ra ku gandzela, naswona i vumundzuku byihi lebyi vangamaka lebyi hi nga byi langutelaka etempeleni ya xona leyikulu ya moya? Swivutiso leswi swi ta kambisisiwa exihlokweni lexi landzelaka.
Swivutiso Swa Mpfuxeto
◻ Hi xihi xikombiso lexi hlamarisaka lexi Yesu a xi vekeke hi 29 C.E.?
◻ Hi rihi lunghiselelo leri sunguleke ku tirha hi 29 C.E.?
◻ I yini lexi fanekiseriwaka hi Vukwetsimelo ni Vukwetsimisiso?
◻ Xana tempele leyikulu ya moya yi kwetsimisiwe hi ndlela yihi?
[Xifaniso lexi nga eka tluka 17]
Loko Yesu a totiwe hi moya lowo kwetsima hi 29 C.E., tempele leyikulu ya moya ya Xikwembu yi sungule ku tirha