Ku Hlula Ka Vugandzeri Bya Ntiyiso Ku Tshinele
“Yehova o ta v̌a hosi ya misav̌a hikwayo.”—ZAKARIYA 14:9.
1. Xana Vakreste lava totiweke a va langutane na yini hi nkarhi wa Nyimpi yo Sungula ya Misava, naswona leswi a swi vhumbhiwe hi ndlela yihi?
HI NKARHI wa nyimpi yo sungula ya misava, Vakreste lava totiweke a va langutane ni maxangu yo tala ni ku khotsiwa ematikweni layo tala lama a ma ri eku lweni. Magandzelo ya vona yo dzunisa Yehovha a ma siveriwile naswona a va ri evuhlongeni hi tlhelo ra moya. Hinkwaswo leswi a swi vhumbhiwe eka Zakariya 14:2, leyi hlamuselaka ku hlaseriwa ka Yerusalema hi matiko hinkwawo. Muti wa vuprofeta lebyi i “Yerusalema wa le tilweni,” ku nga Mfumo wa Xikwembu wa le tilweni ni ndhawu ya “xiluvelo xa Xikwembu ni xa Xinyimpfana.” (Vaheveru 12:22, 28; 13:14; Nhlavutelo 22:3) Vatotiwa va Xikwembu lava nga emisaveni va yimelela muti wolowo. Lavo tshembeka exikarhi ka vona va pone nhlaselo, hi ku ala ku yisiwa evuhlongeni ‘va suka emutini.’a
2, 3. (a) Xana vugandzeri bya Yehovha byi hlule njhani ku sukela hi 1919? (b) Ku sukela hi 1935, hi xihi xiendlakalo lexi humeleleke?
2 Hi 1919 vatotiwa lava tshembekaka va ntshunxiwile evuhlongeni, naswona hi ku hatlisa va tirhise nkarhi wa ku rhula lowu veke kona endzhaku ka nyimpi. Tanihi vayimeri va Yerusalema wa le tilweni, va tirhise nkarhi lowunene lowu va pfulekeleke leswaku va chumayela mahungu lamanene ya Mfumo wa Xikwembu, ni ku pfuna eku hlengeletiweni ka swirho swo hetelela swa lava 144 000. (Matewu 24:14; 2 Vakorinto 5:20) Hi 1931 va amukele vito leri fanelaka ra le Matsalweni leri nge Timbhoni ta Yehovha.—Esaya 43:10, 12.
3 Ku sukela kwalaho, Timbhoni ta Xikwembu leti totiweke ti ye emahlweni handle ko karhala. Hambi ku ri Hitler ni vuthu ra yena ra Manazi a va swi kotanga ku ti tshikisa. Ku nga khathariseki nxaniso wa misava hinkwayo, ntirho wa tona wu veke mihandzu emisaveni hinkwayo. Ngopfu-ngopfu ku sukela hi lembe ra 1935, va joyiniwe hi “ntshungu lowukulu” wa matiko hinkwawo, lowu vhumbhiweke ebukwini ya Nhlavutelo. Lava na vona i Vakreste lava tinyiketeleke, lava khuvuriweke naswona va “hlantswile tinguvu ta vona, va ti basisile hi ngati ya Xinyimpfana,” Yesu Kreste. (Nhlavutelo 7:9, 14) Hambiswiritano, a hi vatotiwa lava nga ni ntshembo wa vutomi bya le tilweni. Ntshembo wa vona i ku kuma leswi Adamu na Evha va swi lahleke, ku nga vutomi bya vumunhu lebyi hetisekeke emisaveni ya paradeyisi. (Pisalema 37:29; Matewu 25:34) Namuntlha, ntshungu lowukulu wu endla nhlayo ya mimoya-xiviri ya kwalomu ka ntlhanu wa timiliyoni. Vugandzeri bya ntiyiso bya Yehovha bya hlula, kambe ku hlula ka byona ko hetelela ka ha ta.
Vanhu Vambe ETempeleni Ya Moya Ya Xikwembu
4, 5. (a) Xana ntshungu lowukulu wu gandzela Yehovha kwihi? (b) Hi wahi malunghelo lawa wu tiphinaka hi wona, naswona ku hetiseka vuprofeta byihi?
4 Hilaha swi vhumbhiweke ha kona, ntshungu lowukulu “wu gandzela [Xikwembu] vusiku ninhlekanhi etempeleni ya xona.” (Nhlavutelo 7:15, nhlamuselo ya le hansi, NW) Tanihi leswi wu nga riki vaprista va Israyele wa moya, kumbexana Yohane u wu vone wu yime etempeleni exivaveni xa le handle xa Vamatiko. (1 Petro 2:5) Mawaku ndlela leyi tempele ya Yehovha ya moya yi kwetsimeke swonghasi ha yona, swivandla swa yona swi tele hi ntshungu lowukulu lowu wu n’wi dzunisaka swin’we ni masalela ya Israyele wa moya!
5 Ntshungu lowukulu a wu tirheli Xikwembu wu ri exiyin’weni lexi fanekiseriweke hi xivava xa le ndzeni xa vuprista. A wu vuriwi lowu lulameke hikwalaho ka xikongomelo xo va vana va Xikwembu va moya lava hlawuriweke. (Varhoma 8:1, 15) Hambiswiritano, hi ku kombisa ripfumelo eka nkutsulo wa Yesu, va ni xiyimo lexinene emahlweni ka Yehovha. Va vuriwa lava lulameke hi xikongomelo xo va vanghana va yena. (Ringanisa Yakobo 2:21, 23.) Na vona va ni lunghelo ro tisa magandzelo lama amukelekaka ealtarini ya Xikwembu ya moya. Xisweswo, malunghana ni ntshungu lowu lowukulu, vuprofeta bya Esaya 56:6, 7 byi hetiseka hi ndlela yo kwetsima: “V̌amatiko la’v̌a nga ta namarela Yehova e ku ṅwi tirela, ni ku ranḍa v̌ito ra Yehova, . . . nḍi ta v̌a fikisa e nṭhav̌eni ya mina le’yo kwetsima, kutani nḍi v̌a ṭakisa e ndlwini leyi v̌a nḍi khongelaka ka yona; tiholokosta ta v̌ona, ni maganḍelo ya v̌ona ŝi ta amukeriwa altarini ya mina; hikuv̌a yindlu ya mina yi ta v̌uriwa yindlu ya ku khongela e ka matiko hikwawo.”
6. (a) Xana vanhu vambe va nyikela magandzelo ya muxaka muni? (b) Xana xibye xa mati exivaveni xa vaprista xi va tsundzuxa yini?
6 Exikarhi ka magandzelo lawa vanhu vambe va ma nyikelaka ku ni “mihanḍu ya milomu [ku fana ni magandzelo ya mapa lama lunghisiweke kahle] le’yi v̌ulaka v̌ito ra [Xikwembu]” (BX) ni “ku endla leswinene ni ku pambulela van’wana leswi [va] nga na swona.” (Vaheveru 13:15, 16) Xibye lexikulu xa mati lexi vaprista va xi tirhiseke ku hlambela eka xona xi tlhela xi va xitsundzuxo xa nkoka eka vanhu lava vambe. Na vona va fanele va titsongahatela ku basisiwa ka moya ni ka mahanyelo hilaha Rito ra Xikwembu ri yaka ri twisiseka swinene eka vona hakona.
Vukwetsimelo Ni Swingolongondzwana Swa Byona
7. (a) Xana ntshungu lowukulu wu ma languta njhani malunghelo ya vaprista vo kwetsima? (b) Hi wahi malunghelo lawa van’wana va vanhu vambe va ma kumeke?
7 Xana Vukwetsimelo ni swingolongondzwana swa byona swi ni nhlamuselo yo karhi eka ntshungu lowu lowukulu wa vanhu vambe? Phela, a wu nge pfuki wu ve exiyin’weni lexi fanekiseriweke hi Vukwetsimelo. A va tswariwanga ra vumbirhi tanihi vana va Xikwembu va moya lava nga ni lunghelo ro tshama etilweni. Xana leswi swi va endla va va ni mavondzo kumbe va navela? E-e. Ematshan’weni ya sweswo, va tsakela lunghelo ra vona ro seketela masalela ya lava 144 000, naswona va kombisa ku tlangela lokukulu eka xikongomelo xa Xikwembu xo hlawula vana lava va moya, lava nga ta hlanganyela na Kreste eku tlakuseni ka vanhu leswaku va ya eku hetisekeni. Nakambe, ntshungu lowukulu wa vanhu vambe wu tlangela tintswalo letikulu ta Xikwembu leti nga fanelangiki, to va xi va nyika ntshembo wa vutomi lebyi nga heriki emisaveni eParadeyisini. Van’wana va vanhu lava vambe, ku fana ni Vanetinimi va khale, va nyikiwe malunghelo yo langutela eku pfuneni ka vaprista lavo kwetsima.b (Esaya 61:5) Exikarhi ka vanhu lava Yesu u hlawula “tihosana e misav̌eni hikwayo.”—Pisalema 45:16.
8, 9. Hi byihi vuyelo lebyi ntshungu lowukulu wu byi kumaka loko wu kambisisa swingolongondzwana swa Vukwetsimelo?
8 Hambileswi wu nga taka wu nga ngheni eVukwetsimelweni byo fanekisela, ntshungu lowukulu wa vanhu vambe wu dyondza tidyondzo ta nkoka eka swingolongondzwana swa byona. Tanihi leswi xitlhoma-rivoni a xi lava ku tshama xi cheriwa mafurha, kutani vanhu lava vambe va lava moya lowo kwetsima leswaku wu va pfuna ku twisisa mintiyiso leyi hambetaka leyi humaka eRitweni ra Xikwembu, leyi tisiwaka hi ku tirhisa “nandza la tshembekaka, wo tlhariha.” (Matewu 24:45-47) Ku tlula kwalaho, moya wa Xikwembu wu va pfuna ku angula eka xirhambo lexi: “Moya ni Mutekiwa [ku nga masalela ya vatotiwa] va ri: ‘Tana! Ni loyi a swi twaka a a vule a ku: “Tana!” Loyi a nga ni torha a a te; ni loyi a swi navelaka a a nwe mati ya vutomi a nga hakeli.’” (Nhlavutelo 22:17) Xisweswo, xitlhoma-rivoni i xitsundzuxo eka ntshungu lowukulu malunghana ni ndzhwalo wa wona wa ku vangama tanihi Vakreste ni ku papalata xin’wana ni xin’wana hi langutelo ro karhi, mianakanyo, rito kumbe xiendlo lexi nga khomisaka moya lowo kwetsima wa Xikwembu tingana.—Vaefesa 4:30.
9 Tafula ra xinkwa xa xikombiso ri tsundzuxa ntshungu lowukulu leswaku wu ta tshama wu ri ni rihanyo lerinene ra moya, wu fanele wu dya swakudya swa moya leswi humaka eBibeleni ni le tibukwini ta “nandza la tshembekaka, wo tlhariha” nkarhi na nkarhi. (Matewu 4:4) Altari ya mirhi ya risuna yi wu tsundzuxa hi nkoka wo khongela hi mbilu hinkwayo eka Yehovha leswaku a wu pfuna wu hlayisa vutshembeki bya wona. (Luka 21:36) Swikhongelo swa vona swi fanele swi katsa marito lama humaka embilwini yo dzunisa ni ku nkhensa. (Pisalema 106:1) Altari ya mirhi ya risuna yi tlhela yi wu tsundzuxa hi xilaveko xo dzunisa Xikwembu hi tindlela tin’wana, to tanihi ku yimbelela tinsimu ta Mfumo hi mbilu hinkwayo eminhlanganweni ya Vukreste, ni ku lunghiselela ka vona kahle leswaku va humelela eku ‘vulavuleni ka le rivaleni leswaku va ponisiwa.’—Varhoma 10:10.
Ku Hlula Loku Heleleke Ka Vugandzeri Bya Ntiyiso
10. (a) Xana hi nga langutela ntshembo wihi lowukulu? (b) Hi xihi xiendlakalo lexi faneleke xi humelela ku sungula?
10 Namuntlha ‘vanhu lavo tala’ lava humaka etinxakeni hinkwato va khitikanela endlwini ya Yehovha ya vugandzeri. (Esaya 2:2, 3) Loko yi tiyisa leswi, Nhlavutelo 15:4 yi ri: “I mani la nga ta ka a nga ku chavi, we Hosi, i mani la nga ta ala ku twarisa vito ra wena ke? Hi wena ntsena loyi a kwetsimeke, kutani vamatiko hinkwavo va ta ta va ta nkhinsama emahlweni ka wena, hikuva mintirho ya wena leyo lulama yi le rivaleni!” Zakariya ndzima 14 yi hlamusela leswi nga ta landzela. Ku nga ri khale, langutelo lero biha ra vunyingi bya vanhu emisaveni ri ta fikelela makumu ya rona loko va hlengeletana ro hetelela leswaku va lwa na Yerusalema—ku nga vayimeri va laha misaveni va Yerusalema wa le tilweni emisaveni. Kutani Yehovha u ta teka goza. Tanihi Xikwembu lexi nga Nhenha, u “ta humelela, a lwa ni matiko wolawo” lama xinyataka ma endla nhlaselo lowu.—Zakariya 14:2, 3.
11, 12. (a) Xana Yehovha u ta angula njhani eka nhlaselo wa misava hinkwayo lowu taka, ehenhla ka vagandzeri va le tempeleni ya yena? (b) Xana vuyelo bya nyimpi ya Xikwembu byi ta va byihi?
11 “Hi rona khombo leri Yehova a nga ta ba matiko hikwawo la’ma hlaseleke Yerusalem: Nyama ya v̌ona yi ta bola v̌a ri kari v̌a yimile hi milenge ya v̌ona; mahlo ya v̌ona ma ta bola e makheleni ya wona, ni tinḍimi ta v̌ona e miloṅwini ya v̌ona. Hi siku rolero, dzolonga le’rikulu le’ri humaka e ka Yehova ri ta v̌a kona e šikari ka v̌ona, uṅwana ni uṅwana o ta khoma v̌oko ra uṅwana, v̌oko ra yena ri tlakukela e henhla ka v̌oko ra warikwav̌o.”—Zakariya 14:12, 13.
12 Hambi khombo leri i ra xiviri kumbe i ro fanekisela, hi ta boheka ku yimela vuyelo bya kona. Hambiswiritano, ku ni nchumu wun’we lowu hi tiyisekaka ha wona. Loko valala va Xikwembu va lava ku hlasela malandza ya Yehovha emisaveni hinkwayo, va ta yimisiwa hi swikombiso leswi xiyekaka swa Xikwembu xa matimba hinkwawo. Milomo ya vona yi ta miyetiwa. Swi ta vonaka onge tindzimi ta vona leti va sandzaka ha tona ti borile. Pakani ya vona ya vun’we yi ta hangalaka exivonweni xa vona, onge hi loko mahlo ya vona ma borile. Matimba ya vona ya miri, lama va tiyiseke leswaku va ta hlasela, ma ta hela. Hi ku pfilunganyeka, va ta hundzukelana va yayarhelana. Xisweswo hinkwavo valala va vugandzeri bya Xikwembu bya laha misaveni va ta herisiwa. Eku heteleleni, matiko hinkwawo ma ta boheka ku xiya vuhosi bya Yehovha bya vuako hinkwabyo. Vuprofeta lebyi byi ta hetiseka: “Yehova o ta v̌a hosi ya misav̌a hikwayo.” (Zakariya 14:9) Endzhaku ka sweswo, Sathana ni madimona yakwe va ta bohiwa loko Mfumo Wa Kreste Wa Gidi ra Malembe wu sungula ni mikateko leyikulu leyi hlayiseriweke vanhu.—Nhlavutelo 20:1, 2; 21:3, 4.
Ku Pfuxiwa Ka Laha Misaveni
13. I vamani lava nga “masalela ya matiko hikwawo”?
13 Vuprofeta bya Zakariya byi ya emahlweni eka ndzima 14, ndzimana 16: “Masalela ya matiko hikwawo lawa ma nga hlasela Yerusalem, ma ta tlhandlukela hi lembe riṅwana ni riṅwana, ku ya khongela Hosi, Yehova wa tinyimpi, ni ku endla nkhuv̌o wa miṭonga.” Hi ku ya hi Bibele, vanhu hinkwavo lava hanyaka namuntlha lava yaka emahlweni va hanya ku fikela makumu ya mafambiselo lawa yo biha ni lava avanyisiwaka tanihi valala va vugandzeri bya ntiyiso va ta “avanyisiwa hi ku yisiwa eku onhakeni loku nga heriki.” (2 Vatesalonika 1:7-9; nakambe vona Matewu 25:31-33, 46.) A va nge pfuxiwi. Kutani, a swi kanakanisi leswaku “masalela” ma katsa swirho swa matiko leswi feke emahlweni ka nyimpi yo hetelela ya Xikwembu hikuva swona swi ni ntshembo lowu sekeriweke eBibeleni wa ku pfuxiwa. Yesu u tshembisile: “Nkarhi wa ta lowu hinkwavo lava nge masirheni va nga ta twa rito ra yena, kutani va ta huma. Lava endleke leswinene va ta pfuka va ya evutomini lebyi nga heriki, lava endleke leswo biha va ta pfuka va ya eku avanyisiweni.”—Yohane 5:28, 29.
14. (a) I yini lexi lava pfuxiweke va faneleke va xi endla leswaku va kuma vutomi lebyi nga heriki? (b) I yini lexi nga ta humelela eka vanhu vahi ni vahi lava alaka ku tinyiketela eka Yehovha ni ku seketela vugandzeri bya ntiyiso?
14 Hinkwavo vanhu lava lava pfuxiweke, va fanele va endla swo karhi leswaku ku pfuxiwa ka vona ku va ko ya evuton’wini ku nga ri ka ku avanyisiwa loku nga tsakisiki. Va fanele va ta eswivaveni swa tempele ya Yehovha ya laha misaveni kutani va nkhinsama va tinyiketela eka Xikwembu ha Yesu Kreste. Munhu wihi na wihi wa lava pfuxiweke, loyi a alaka ku endla leswi u ta xanisiwa hi khombo leri fanaka ni leri welaka matiko ya namuntlha. (Zakariya 14:18) I mani loyi a swi tivaka leswaku i vanhu vangani lava nga ta pfuxiwa va joyina ntshungu lowukulu hi ntsako eku tlangeleni ka Nkhuvo wa Mintsonga wo fanekisela? Handle ko kanakana, va ta va va tele, naswona tempele ya Yehovha leyikulu ya moya yi ta va leyi kwetsimaka swinene hikwalaho ka sweswo!
Nkhuvo Wa Mintsonga Wo Fanekisela
15. (a) Hi swihi swilo swin’wana leswi xiyekaka leswi a swi humelela eNkhubyeni wa Mintsonga wa le Israyele wa khale? (b) Hikwalaho ka yini tinkunzi ta 70 ti nyikeriwa hi nkarhi wa nkhuvo?
15 Lembe rin’wana ni rin’wana, Vaisrayele va khale, a ku laveka leswaku va tlangela Nkhuvo wa Mintsonga. A wu heta vhiki naswona a wu hela hi nkarhi wa ku hlengeleta ka ntshovelo wa vona ko hetelela. A wu ri nkarhi wo tsakisa wo nkhensa. Hi nkarhi wo ringana vhiki, a va fanele va tshama swa xinkarhana emintsongeni leyi fuleriweke hi matluka ya mirhi, ngopfu-ngopfu hi marhavi ya mincindzu. Nkhuvo lowu a wu tsundzuxa Vaisrayele ndlela leyi Xikwembu xi poniseke vakokwa wa vona aEgipta ha yona, ni ndlela leyi xi va khathaleleke ha yona loko va ri karhi va tshama emintsongeni loko va ri karhi va famba emananga ku ringana malembe ya 40 ku kondza va fika eTikweni ra Xitshembiso. (Levhitika 23:39-43) Hi nkarhi wa nkhuvo, a ku endliwa magandzelo hi tinkunzi ta 70 ealtarini ya le tempeleni. Entiyisweni, xivumbeko lexi xa nkhuvo a xi ri xa vuprofeta bya ntirho lowu hetisekeke, ni lowu heleleke wa ku ponisa vutomi lowu endliweke hi Yesu Kreste. Eku heteleleni vuyelo bya gandzelo ra yena ra nkutsulo byi ta khulukela eka vatukulu va ntsandza-vahlayi, va mindyangu ya 70 ya vanhu lava humeke eka Nowa.—Genesa 10:1-29; Tinhlayo 29:12-34; Matewu 20:28.
16, 17. (a) Xana Nkhuvo wa Mintsonga wo fanekisela wu sungule rini, naswona wu ye emahlweni hi ndlela yihi? (b) Xana ntshungu lowukulu wu hlanganyela njhani eku tlangeleni ka nkhuvo lowu?
16 Xisweswo Nkhuvo wa Mintsonga wa khale a wu kombetele eka ku hlengeletiwa loku tsakisaka ka vadyohi lava poniseriweke etempeleni leyikulu ya Yehovha ya moya. Ku hetiseka ko fanekisela ka nkhuvo lowu ku sungule hi Pentekosta ya 33 C.E. hi ku sunguriwa ka ku hlengeletiwa loku tsakisaka ka Israyele wa moya evandlheni ra Vukreste. (Mintirho 2:41, 46, 47) Vatotiwa lava va twisise leswaku a va ri ‘vaaki va xinkarhana’ emisaveni ya Sathana hikuva “ra [vona] kaya ri le matilweni.” (1 Petro 2:11; Vafilipiya 3:20) Nkhuvo wa ntsako wu funengetiwe swa xinkarhana hi vugwinehi lebyi veke kona hikwalaho ka ku vumbiwa ka Vujagana. (2 Vatesalonika 2:1-3) Hambiswiritano, nkhuvo wu tlhele wu sunguriwa hi 1919 hi ku hlengeletiwa loku tsakisaka ka swirho swo hetelela swa lava 144 000 swa Vaisrayele va moya, ku landzeriwa hi lokuya ka ntshungu lowukulu wa matiko hinkwawo wa Nhlavutelo 7:9.
17 Ntshungu lowukulu wu hlamuseriwa tanihi lowu khomeke marhavi ya mincindzu emavokweni ya wona, leswi kombisaka leswaku na wona i vatlangeri lava tsakeke va Nkhuvo wa Mintsonga wo fanekisela. Tanihi Vakreste lava tinyiketeleke, va hlanganyela hi ntsako entirhweni wo hlengeleta vagandzeri lava engetelekeke etempeleni ya Yehovha. Ku tlula kwalaho, tanihi vadyohi va twisisa leswaku a va na timfanelo to tshamela makumu laha emisaveni. Vona, swin’we ni lava nga ta pfuxiwa, va fanele va tshama va kombisa ripfumelo egandzelweni ra nkutsulo ra Kreste ku kondza va fikelela vumunhu lebyi hetisekeke emakumu ya Mfumo Wa Kreste Wa Gidi Ra Malembe.—Nhlavutelo 20:5.
18. (a) Xana ku ta humelela yini eku heleni ka Mfumo wa Yesu Kreste Wa Gidi Ra Malembe? (b) Xana vugandzeri bya Yehovha bya ntiyiso byi ta hlula njhani eku heteleleni?
18 Kutani, vagandzeri va Xikwembu lava nga emisaveni va ta yima emahlweni ka xona va ri ni vumunhu lebyi hetisekeke ku ri hava xilaveko xa muprista wa le tilweni. Nkarhi wu ta va wu fikile wa leswaku Yesu Kreste “a nyiketa Mfumo eka Xikwembu Tatana.” (1 Vakorinto 15:24) Sathana u ta ntshunxiwa “nkarhinyana” leswaku a ringa vanhu lava hetisekeke. Munhu wihi na wihi la nga tshembekiki u ta loviseriwa makumu swin’we na Sathana ni madimona yakwe. Lava nga ta tshama va tshembekile, va ta nyikiwa vutomi lebyi nga heriki. Va ta va vaaki va hilaha ku nga heriki emisaveni ya Paradeyisi. Xisweswo Nkhuvo wa Mintsonga wo fanekisela wu ta va wu fike emakumu lama kwetsimaka ni lama humeleleke. Vugandzeri bya ntiyiso byi ta va byi hlurile eka ku kwetsima loku nga heriki ka Yehovha ni ntsako wa vanhu lowu nga heriki.—Nhlavutelo 20:3, 7-10, 14, 15.
[Tinhlamuselo ta le hansi]
a Leswaku u kuma nhlamuselo ya ndzimana yin’wana ni yin’wana ya Zakariya ndzima 14, vona buku leyi nge Paradise Restored to Mankind—By Theocracy!, leyi humesiweke hi 1972 hi Watchtower Bible and Tract Society of New York, Inc., tindzima 21 na 22.
b Leswaku u kuma rungula leri engetelekeke mayelana ni Vanetinimi va manguva lawa, vona Xihondzo xo Rindza, xa April 15, 1992, tluka 16.
Swivutiso Swa Mpfuxeto
◻ Xana “Yerusalem” wu hlaseriwe njhani hi nkarhi wa nyimpi yo sungula ya misava?—Zakariya 14:2.
◻ Ku humelele yini eka vanhu va Xikwembu ku sukela hi 1919?
◻ I vamani lava namuntlha va hlanganyelaka eku tlangeleni ka Nkhuvo wa Mintsonga wo fanekisela?
◻ Xana vugandzeri bya ntiyiso byi ta hlula njhani hi ku helela?
[Xifaniso lexi nga eka tluka 23]
Marhavi ya mincindzu a ma tirhisiwa eku tlangeleni ka Nkhuvo wa Mintsonga