“Hi Dyondzise Ku Khongela”

“HOSI, hi dyondzise ku khongela.” Xikombelo xexo xi endliwe hi un’wana wa vadyondzisiwa va Yesu Kreste. (Luka 11:1) Mudyondzisiwa loyi ku nga vuriwangiki vito ra yena, swi le rivaleni leswaku i wanuna loyi a a xi tlangela swinene xikhongelo. Vagandzeri va ntiyiso namuntlha hilaha ku fanaka, va wu vona nkoka wa xona. Phela, xikhongelo i ndlela leyi ha yona hi kotaka ku twiwa, hi Munhu la Tlakukeke Ngopfu wa vuako hinkwabyo! Ehleketa hi mhaka leyi! “L’a yingisaka mikhongelo” u nyikela nyingiso eka swiphiqo ni mivilelo ya hina hi ku kongoma. (Pisalema 65:2) Xa nkoka ku tlurisa, hi xikhongelo, hi tisa ku khensa ni ku dzunisa, eka Xikwembu.—Vafilipiya 4:6.

Hambiswiritano, marito lama nge, “hi dyondzise ku khongela” ma tlakusa swivutiso swa nkoka swinene. Emisaveni hinkwayo vukhongeri byo hambana-hambana byi tirhisa tindlela to tala ta ku tshinelela Xikwembu. Kambe, xana ku na ndlela leyinene ni leyi hoxeke ya ku khongela? Ku kuma nhlamulo, a hi sunguleni hi ku languta yin’wana ya mikhuva leyi tolovelekeke leyi khumbaka xikhongelo. Hi ta langutisa leyi endliwaka eLatin Amerika.

Swifaniso Ni “Vakwetsimi Lava Nyikelaka Nsirhelelo”

Hi ntolovelo, matiko ya Latin Amerika ma byi rhandza vukhongeri. Hi xikombiso, eMexico hinkwaro u ta xiya mukhuva lowu tolovelekeke wa ku khongeriwa ka “vakwetsimi lava nyikelaka nsirhelelo.” Hakunene, i ntolovelo emadorobeni ya le Mexico ku va ni “vakwetsimi lava nyekelaka nsirhelelo” lava va endleriwaka minkhuvo hi masiku yo karhi. Makhatoliki ya le Mexico ma tlhela ma gandzela swifaniso swo hambana-hambana swo tala. Hambiswiritano, ku tiva leswaku hi wihi “mukwetsimi” la khongeriwaka, swi titshege hi leswaku i xikombelo xa muxaka muni lexi mugandzeri a lavaka ku xi endla. Loko munhu a lava munghana wa vukati, a nga ha voninga khandlhele ra ku hlambanya eka “Mukwetsimi” Anthony. Loko un’wana a lava ku teka riendzo hi movha, a nga ha tivisa “Mukwetsimi” Christopher, musirheleli wa vafambi, ngopfu-ngopfu lava fambaka hi mimovha.

Hambiswiritano, xana mikhuva yo tano yi sungule kwihi? Matimu ma kombisa leswaku, loko Mapaniya ma fika eMexico, ma kume vanhu lava a va tinyiketele evugandzerini bya swikwembu swa vahedeni. Ebukwini yakwe leyi nge Los Aztecas, Hombre y Tribu (Maaztec, Munhu ni Rixaka), Victor Wolfgang von Hagen u ri: “A ku ri ni swikwembu swa munhu hi xiyexe, ximilana xin’wana ni xin’wana a xi ri ni xikwembu xa xona, xiendlo xin’wana ni xin’wana a xi ri ni xikwembu kumbe xikwembukati xa xona, hambi ku ri ku tisunga a ku ri ni xikwembu xa kona. Yacatecuhtli a a ri xikwembu xa van’wamabindzu. Eka misava leyi ya swikwembu swo tarisa xileswi mimboyamelo ni mintirho ya swikwembu hinkwaswo a yi hlamuseriwa kahle.”

Ku fana ka swikwembu leswi ni “vakwetsimi” va Khatoliki a ku ri erivaleni lerova loko vahluri va Mapaniya va ringete ku endla rixaka rero “Vakreste,” hi ku olova ri teke leswi a ri swi endla swifaniso swa rona swa hava kutani ri swi endlela “vakwetsimi va kereke.” Xihloko lexi nga humelela eka The Wall Street Journal xi pfumerile leswaku mikhuva ya Vukhatoliki leyi endliwaka eka swiphemu swin’wana swa Mexico i ya vuhedeni. Yi vule leswaku eka ndhawu yin’wana, vunyingi bya “vakwetsimi” va 64 lava gandzeriwaka hi vanhu a byi yelana ni “swikwembu swo karhi swa Vamayan.”

New Catholic Encyclopedia yi vula leswaku “exikarhi ka vakwetsimi ni vanhu lava va va khongelaka, ku ni xiboho xa ku tshembana ka xiviri, . . . xiboho lexi, ematshan’wini ya ku va xi va hambukisa eka vuxaka bya Kreste ni bya Xikwembu, xi byi fuwisaka ni ku byi kurisa.” Kambe, xana xiboho lexi, swi nga erivaleni leswaku xi huma eka vuhedeni, xi nga kurisa vuxaka ni Xikwembu xa ntiyiso hi ndlela yihi? Xana swi nga endleka leswaku swikhongelo leswi kongomisiwaka eka “vakwetsimi” volavo swi tsakisa Xikwembu hakunene?

Laha Rosary Yi Nga Sungula Kona

Mukhuva wun’wana lowu tolovelekeke wu katsa ku tirhisiwa ka rosary. Buku leyi nge Diccionario Enciclopédico Hispano-Americano (Hispanic-American Encyclopedic Dictionary) yi hlamusela rosary tanihi “ricinda leri nga ni makume-ntlhanu kumbe dzana-makume-ntlhanu wa vuhlalu lebyi nga hambanisiwa hi vukhume hi vuhlalu byin’wana lebyikulunyana kutani byi hlanganisiwa emakumu hi xihambano, lexi sweswi xi rhangeriwaka hi vuhlalu byin’wana byinharhu.”

Loko buku yin’wana ya Khatoliki yi hlamusela ndlela leyi rosary yi tirhisiwaka ha yona, yi ri: “Rosary yo Kwetsima i ndlela yo endla xikhongelo xa nomu ni xa le miehleketweni malunghana ni Timhaka ta nkutsulo wa hina. Yi ni swiyenge swa khume-tlhanu, leswi xin’wana ni xin’wana xi nga ni vuhlalu bya khume. Ntlawa ha wun’we wa vukhume wu katsa ku phatiwa ka Xikhongelo xa Hosi kan’we, ku Huweleriwa ka Mariya ka khume, ni ku phatiwa ka Gloria Patri. Timhaka ta vutomi bya Kreste ta anakanyiwa enkarhini wa xikhongelo xa ntlawa ha wun’we wa vukhume.” Timhaka ta vutomi bya Kreste i ripfumelo kumbe tidyondzo leti Makhatoliki ma fanelaka ku ti tiva, emhakeni leyi, ti kombetela eka vutomi, ku xaniseka, ni rifu ra Kreste Yesu.

The World Book Encyclopedia yi ri: “Mikhuva yo sungula ya ku khongela hi ku tirhisa rosary yi sungule eka Vukreste hi nkarhi wa Nguva ya le Xikarhi, kambe yi sungule ku andza hi va-1400 na hi va-1500.” Xana rosary a yi tirhisiwa hi Makhatoliki ntsena? A swi tano. Diccionario Enciclopédico Hispano-Americano yi ri: “Vuhlalu lebyi fanaka bya tirhisiwa evugandzerini bya Maislamu, bya Malama, ni bya Mabudha.” Hakunene, Encylopedia of Religion and Religions yi ri: “Ku ringanyetiwe leswaku valandzeri va Mohammed va tekelele Rosary eka Mabudha naswona Vakreste va yi tekelele eka valangdzeri va Mohammed hi nkarhi wa Tinyimpi ta Nkutsulo.”

Van’wana va vula leswaku rosary yi tirhisiwa ntsena tanihi xitsundzuxo loko ku laveka leswaku ku phindha-phindhiwa swikhongelo swo hlayanyana. Kambe, xana Xikwembu xa tsaka hi ku tirhisiwa ka yona?

A swi lavi leswaku hi mbambela kumbe hi kanetana hi ku faneleka kumbe hi mfanelo ya ku tirhisiwa ka mikhuva yo tano. Yesu u nyike nhlamulo leyi nga ni matimba loko valandzeri va yena va kombele leswaku a va dyondzisa ku khongela. Leswi a nga swi vula swi ta voninga naswona kumbexana swi tlhela swi hlamarisa vahlayi van’wana.

[Swifaniso leswi nga eka tluka 3]

Hi ntolovelo Makhatoliki ma tirhisa vuhlalu bya “rosary.” Xana byi sungule kwihi?