Ku Hanya Hi Nawu Wa Kreste
“Rhwalelanani mindzhwalo, kutani, hi ku endlisa sweswo, mi ta va mi hetisa nawu wa Kriste.”—VAGALATIYA 6:2.
1. Ha yini ku nga ha vuriwaka leswaku nawu wa Kreste i nsusumeto wa ku endla swilo leswinene namuntlha?
LE Rwanda, Timbhoni ta Yehovha ta Mahutu na Matutsi ti nghenise vutomi bya tona ekhombyeni leswaku ti sirhelelana eka ku dlayana ka rixaka loku ka ha ku kukulaka tiko rero. Timbhoni ta Yehovha eKobe, le Japani, leti lahlekeriweke hi swirho swa mindyangu ya tona eka ku tsekatseka ka misava loku onhaka ti tshoveke timbilu hi ku lahlekeriwa ka tona. Kambe, ti ye hi ku hatlisa leswaku ti ya ponisa vahlaseriwa van’wana. Ina, swikombiso leswi khutazaka leswi humaka emisaveni hinkwayo swi kombisa leswaku nawu wa Kreste wa tirha namuntlha. I nsusumeto lowu nga ni matimba wa leswinene.
2. Xana Vujagana byi tsandzeke ku twisisa nawu wa Kreste hi ndlela yihi, naswona hi nga endla yini leswaku hi hetisisa nawu wolowo?
2 Hi nkarhi lowu fanaka, vuprofeta bya Bibele bya mayelana ni ‘masiku lawa ya makumu’ lama nonon’hwaka bya hetiseka. Vo tala va “tiendla wonge hi loko va ri ni vukhongeri” kambe ‘va ale matimba ya byona.’ (2 Timotiya 3:1, 5) Ngopfu-ngopfu eVujaganini, vukhongeri hakanyingi byo va mukhuva ntsena, a hi mhaka leyi humaka embilwini. Xana sweswo swi vangiwa hikwalaho ka leswi swi tikaka swinene ku hanya hi nawu wa Kreste? E-e. Yesu a a nga ta hi nyika nawu lowu a wu nga ta landzeriwa. Vujagana byi tsandzeke ku twisisa nawu wolowo. Byi tsandzeke ku yingisa marito lawa lama huhuteriweke: “Rhwalelanani mindzhwalo, kutani, hi ku endlisa sweswo, mi ta va mi hetisa nawu wa Kriste.” (Vagalatiya 6:2) Hi “hetisa nawu wa Kriste” hi ku rhwalelana mindzhwalo, ku nga ri hi ku tekelela Vafarisi naswona handle ko kombisa vululami hi engetela mindzhwalo ya vamakwerhu.
3. (a) Hi swihi swileriso swin’wana leswi katsiweke enawini wa Kreste? (b) Ha yini swi ta va swi hoxile ku gimeta hileswaku vandlha ra Vukreste a ri fanelanga ri va ni milawu handle ka swileriso swa Kreste leswi kongomeke?
3 Nawu wa Kreste wu katsa swileriso hinkwaswo swa Yesu Kreste—ku nga ha va ku ri ku chumayela ni ku dyondzisa, ku hlayisa mahlo ya hina ma tengile ni ku va lamanene, ku tirhela ku hlayisa ku rhula ni vaakelani va hina, kumbe ku susa thyaka evandlheni. (Matewu 5:27-30; 18:15-17; 28:19, 20; Nhlavutelo 2:14-16) Hakunene, Vakreste va boheka ku hlayisa swileriso hinkwaswo leswi nga eBibeleni leswi kongomisiwaka eka valandzeri va Kreste. Naswona ku na leswi engetelekeke. Nhlengeletano ya Yehovha, swin’we ni mavandlha hi woxe, ma fanele ma simeka milawu ni maendlelo lama fanelaka leswaku ku va ni nhleleko lowunene. (1 Vakorinto 14:33, 40) Phela, Vakreste a va ta va va nga hlangani swin’we loko a va nga ri na milawu ya leswaku va hlangana rini, kwihi na leswaku va fanele va yi khoma njhani mihlangano yo tano! (Vaheveru 10:24, 25) Ku fambisana ni swiletelo leswi twisisekaka leswi simekiweke hi lava nyikiweke vulawuri enhlengeletanweni leyi na swona i xiphemu xo hetisisa nawu wa Kreste.—Vaheveru 13:17.
4. I yini lexi susumetaka vugandzeri lebyi tengeke?
4 Hambiswiritano, Vakreste va ntiyiso a va pfumeleli vugandzeri bya vona byi va nxaxamelo wa milawu leyi nga twaliki. A va tirheli Yehovha hikwalaho ka ku va vanhu kumbe nhlengeletano yo karhi yi va byele ku endla tano. Ematshan’weni ya sweswo, matimba lama va susumetelaka eka vugandzeri bya vona i rirhandzu. Pawulo u tsarile: “Rirhandzu ra Kriste ra hi fambisa.” (2 Vakorinto 5:14, xiitaliki i xerhu; nhlamuselo ya le hansi ya NW.) Yesu u lerise valandzeri va yena leswaku va rhandzana. (Yohane 15:12, 13) Rirhandzu ra ku tinyiketela i xisekelo xa nawu wa Kreste, naswona ri susumetela kumbe ku khutaza Vakreste va ntiyiso hinkwako-nkwako, endyangwini ni le vandlheni. A hi voneni leswaku hi ndlela yihi.
eNdyangwini
5. (a) Xana vatswari va nga hetisisa nawu wa Kreste ekaya hi ndlela yihi? (b) I yini lexi vana va xi lavaka eka vatswari va vona, naswona i swihinga swihi leswi vatswari van’wana va faneleke va swi hlula leswaku va xi hetisisa?
5 Muapostola Pawulo u tsarile: “N’wina vavanuna, rhandzani vasati va n’wina kukota leswi Kriste na yena a nga rhandza [vandlha], kutani ú nyiketile vutomi bya yena hikwalaho ka [rona].” (Vaefesa 5:25) Loko wanuna a tekelela Kreste ivi a khoma nsati wa yena hi rirhandzu na hi ku twisisa, u hetisisa mhaka ya nkoka ya nawu wa Kreste. Ku tlula kwalaho, Yesu u ri kombise erivaleni rirhandzu ro rhandza vana, a va vukarha, a va tlhandleka mavoko, ni ku va katekisa. (Marka 10:16) Vatswari lava hetisisaka nawu wa Kreste na vona va kombisa rirhandzu ro rhandza vana va vona. Entiyisweni, ku ni vatswari lava kumaka wu ri ntlhontlho ku tekelela xikombiso xa Yesu emhakeni leyi. Van’wana hi ntumbuluko a va na mboyamelo wo kombisa mintlhaveko ya vona. Vatswari, mi nga pfumeleli swivangelo swo tano swi mi sivela ku kombisa vana va n’wina rirhandzu leri mi va rhandzaka ha rona! A swi fanelanga swi tiva hi n’wina ntsena leswaku mi rhandza vana va n’wina. Na vona va fanele va swi tiva. Naswona a va nge swi tivi handle ka loko mi kuma tindlela to kombisa rirhandzu ra n’wina.—Ringanisa Marka 1:11.
6. (a) Xana vana va yi lava milawu ya vutswari, naswona ha yini u hlamula hi ndlela yoleyo? (b) Hi swihi swivangelo leswikulu swa milawu ya ndyangu leswi vana va faneleke va swi twisisa? (c) Hi wahi makhombo lama papalatiwaka loko nawu wa Kreste wu ri kona endyangwini?
6 Hi nkarhi lowu fanaka, vana va lava swiletelo, leswi vulaka leswaku vatswari va vona va fanele va veka milawu naswona minkarhi yin’wana va tirhisa milawu leyi hi ku tshinya. (Vaheveru 12:7, 9, 11) Hambiswiritano, vana va fanele va pfuniwa nkarhi na nkarhi ku vona xivangelo lexikulu xa milawu leyi: vatswari va vona va va rhandza. Naswona va fanele va tiva leswaku rirhandzu i xivangelo xo antswa eka vona xa leswaku va yingisa vatswari va vona. (Vaefesa 6:1; Vakolosa 3:20; 1 Yohane 5:3) Pakani ya vutswari leyi twisisekaka i ku dyondzisa vana ku tirhisa ‘matimba ya vona yo ehleketa’ leswaku eku heteleleni va ta tiendlela swiboho leswi twalaka hi voxe. (Varhoma 12:1; ringanisa 1 Vakorinto 13:11.) Hi hala tlhelo, milawu a yi fanelanga yi tala swinene kumbe ndzayo yi va leyi vavaka swinene. Pawulo u ri: “Vatatana, mi nga hlundzukisi vana va n’wina, leswaku va nga ti hela mbilu.” (Vakolosa 3:21; Vaefesa 6:4) Loko nawu wa Kreste wu ri kona endyangwini, a mi nga va nyikeli ndzayo hi vukarhi lebyi nga lawulekiki kumbe ku va sapatela hi ndlela leyi vavisaka. Ekaya ro tano, vana va titwa va sirhelelekile ni ku akeka, a va titwi va tikeriwa kumbe va tekeriwa ehansi.—Ringanisa Pisalema 36:7.
7. Xana makaya ya Bethele ma nga ha nyikela xikombiso loko ku tiwa eku vekeni ka milawu ekaya hi tindlela tihi?
7 Van’wana lava tshameke va endzela makaya ya Bethele emisaveni hinkwayo va vula leswaku i swikombiso leswinene swa ku ringanisela emhakeni ya milawu ya ndyangu. Hambileswi ku nga na vanhu lavakulu, tindhawu to tano ti tirha ku fana ni mindyangu.a Mintirho ya le Bethele yi rharhanganile naswona yi lava milawu yo hlayanyana leyikulu—kahle-kahle yo tlula xiringaniso xa ndyangu. Hambiswiritano, vakulu lava rhangelaka emakaya ya Bethele, etihofisini ni le mintirhweni ya le fektri va lwela ku tirhisa nawu wa Kreste. Va wu teka tanihi ntirho wa vona ku nga ri ku hlela ntirho ntsena kambe ni ku kondletela nhluvuko wa moya ni “ku ṭaka ka Yehova” exikarhi ka vatirhi-kulobye. (Nehemiya 8:10) Hikwalaho, va lwela ku endla swilo hi ndlela leyinene ni leyi khutazaka naswona va tikarhatela ku anakanyela van’wana. (Vaefesa 4:31, 32) A swi hlamarisi leswi mindyangu ya Bethele yi tivekaka hikwalaho ka moya wa yona wa ntsako!
eVandlheni
8. (a) Xana pakani ya hina yi fanele yi va yihi evandlheni minkarhi hinkwayo? (b) Xana van’wana va vutisile kumbe va ringeta ku endla milawu ehansi ka swiyimo swihi?
8 Evandlheni ka ha ri pakani ya hina ya ku akana hi moya wa rirhandzu. (1 Vatesalonika 5:11) Kutani Vakreste hinkwavo va fanele va tivonela leswaku va nga engeteleli van’wana mindzhwalo hi ku nyikela mianakanyo ya vona vini eka timhaka ta nhlawulo wa munhu hi xiyexe. Minkarhi yin’wana, van’wana va tsalela Sosayiti ya Watch Tower va vutisa hi milawu eka timhaka to tano ta leswaku va fanele va va ni langutelo rihi hi tifilimi to karhi, tibuku hambi ku ri swilo swo tlangisa. Kambe, Sosayiti a yi nyikiwanga ku kambisisa swilo swo tano ni ku swi avanyisa. Hakanyingi, leti i timhaka leti munhu un’wana ni un’wana kumbe nhloko ya ndyangu leyi faneleke yi endla xiboho eka tona, swi sekeriwe eka rirhandzu ra yona ra misinya ya milawu ya Bibele. Van’wana va tala ku hundzula swiringanyeto ni minkongomiso ya Sosayiti swi va milawu. Hi xikombiso, eka nkandziyiso wa Xihondzo xo Rindza wa March 15, 1996, a ku ri ni xihloko lexinene lexi khutazaka vakulu ku endla maendzo ya vurisi ya nkarhi na nkarhi eka swirho swa vandlha. Xana xikongomelo xa wona a ku ri ku simeka milawu? E-e. Hambileswi lava va kotaka ku landzelela swiringanyeto va pfunekaka swinene, vakulu van’wana a va swi koti ku endla tano. Hi ku fanana, xihloko lexi nge “Swivutiso Swa Vahlayi” eka nkandziyiso wa Xihondzo xo Rindza xa April 1, 1995, xi tsundzuxe hi ku susa xindzhuti xa nkarhi wa ku khuvuriwa hi ku endla swilo leswi engetelekeke swinene, swo tanihi ku endla minkhuvo leyi nga lawulekiki kumbe swinkhubyana swa ku hlula. Van’wana va tirhise ndzayo leyi leyi vupfeke hi ndlela leyi hundzeletiweke, hambi ku ri ku endla nawu wa leswaku ku rhumela khadi ra xikhutazo hi nkarhi lowu swi ta va swi hoxile!
9. Ha yini swi ri swa nkoka leswaku hi papalata ku va lava xopaxopaka swinene ni ku avanyisa van’wana?
9 Nakambe, xiya leswaku loko “Nawu lowu hetisekeke wa ku ntshunxeka” wu ta va kona exikarhi ka hina, hi fanele hi pfumela leswaku a hi mapfalo hinkwawo ya Vakreste ma fanaka. (Yakobo 1:25) Xana hi fanele hi hlundzuka loko vanhu va endla minhlawulo leyi nga thyakisiki misinya ya milawu ya Matsalwa? E-e. Loko hi endla tano hi ta va hi vanga ku avana. (1 Vakorinto 1:10) Pawulo, loko a hi tsundzuxa malunghana ni ku avanyisa Mukreste-kulorhi, u te: “Hambi a yima kumbe ku wa, sweswo swi tiviwa hi n’wini wa yena; kambe ú ta yima, hikuva Hosi ya swi kota ku n’wi pfuxa a yima.” (Varhoma 14:4) Loko hi vulavula ku biha hi vanhu van’wana malunghana ni timhaka leti faneleke ti siyeriwa ripfalo ra munhu, hi tiveka ekhombyeni ro hlundzukisa Xikwembu.—Yakobo 4:10-12.
10. I vamani lava averiweke ku langutela vandlha, naswona xana hi fanele hi va seketela hi ndlela yihi?
10 Nakambe, a hi tsundzukeni leswaku vakulu va averiwe ku langutela ntlhambi wa Xikwembu. (Mintirho 20:28) Va lava ku pfuna. Hi fanele hi ya eka vona hi ntshunxekile loko hi lava xitsundzuxo, hikuva na vona i swichudeni swa Bibele naswona va tolovelanile ni leswi hlamuseriweke eka tibuku ta Sosayiti ya Watch Tower. Loko vakulu va vona mahanyelo lama kumbexana ma nga yisaka eku tluleni ka misinya ya milawu ya Matsalwa, va nyikela ndzayo leyi lavekaka handle ko chava. (Vagalatiya 6:1) Swirho swa vandlha swi landzela nawu wa Kreste hi ku tirhisana ni varisi lava lava rhandzekaka, lava rhangelaka exikarhi ka vona.—Vaheveru 13:7.
Vakulu Tirhisani Nawu Wa Kreste
11. Xana vakulu va wu tirhisa njhani nawu wa Kreste evandlheni?
11 Vakulu va hisekela ku hetisisa nawu wa Kreste evandlheni. Va rhangela eku chumayeleni ka mahungu lamanene, va dyondzisa leswi humaka eBibeleni leswaku va fikelela timbilu, naswona tanihi varisi va rirhandzu, lavo rhula, va vulavula ni “lava helaka ntamu.” (1 Vatesalonika 5:14) Va papalata malangutelo lama nga riki ya Vukreste lama nga kona eka vukhongeri byo tala bya Vujagana. Entiyisweni, misava leyi ya mbombomela hi ku hatlisa, naswona ku fana na Pawulo, vakulu va nga ha tikarhatela ntlhambi; kambe va ringanisela loko va ri karhi va teka magoza eka ku khathalela ko tano.—2 Vakorinto 11:28.
12. Loko Mukreste a ya eka nkulu a lava mpfuno, xana nkulu a nga ha angurisa ku yini?
12 Hi xikombiso, Mukreste a nga ha va a tsakela ku vulavurisana ni nkulu malunghana ni mhaka ya nkoka leyi yi nga hlamuseriwiki hi ku kongoma hi swikombo swin’wana swa Matsalwa kumbe leyi lavaka ku ringanisela misinya ya milawu yo hambana-hambana ya Vukreste. Kumbexana u tlakusiwile entirhweni lowu hakelaka mali yo tala kambe wu ri ni vutihlamuleri lebyikulu. Kumbe tatana la nga riki mupfumeri wa Mukreste lontshwa a nga ha va a lava swo karhi eka n’wana wa yena leswi nga khumbaka vutirheli bya yena. Eswiyin’weni swo tano nkulu u papalata ku nyikela mavonelo ya munhu hi xiyexe. Ematshan’weni ya sweswo, kumbexana u ta pfula Bibele kutani a pfuna munhu loyi leswaku a ehleketa hi misinya ya milawu ya nkoka. A nga ha tirhisa Watch Tower Publications Index, loko yi ri kona, leswaku a ta lava leswi “nandza la tshembekaka, wo tlhariha” a swi vuleke emhakeni yoleyo eka matluka ya Xihondzo xo Rindza ni tibuku tin’wana. (Matewu 24:45) Ku vuriwa yini hi loko Mukreste endzhaku ka sweswo a endla xiboho lexi nga tikombiki xi ri vutlhari eka nkulu? Loko xiboho xi nga yi tluli misinya ya milawu kumbe milawu ya Bibele, Mukreste u ta kuma leswaku nkulu u xiya mfanelo ya munhu yo endla xiboho xo tano, a tiva leswaku “un’wana ni un’wana ú ta rhwala mpingu wa yena.” Hambiswiritano, Mukreste u fanele a tsundzuka leswaku “xin’wana ni xin’wana lexi munhu a xi byalaka, ú ta tshovela xona.”—Vagalatiya 6:5, 7.
13. Ematshan’weni yo nyikela tinhlamulo leti kongomeke ta swivutiso, kumbe va nyikela mavonelo ya vona vini, ha yini vakulu va pfuna van’wana ku anakanyisisa hi timhaka?
13 Ha yini nkulu la nga ni ntokoto a endla hi ndlela leyi? Hikwalaho ka swivangelo leswi nga vaka swimbirhi. Xo sungula, Pawulo u byele vandlha rin’wana leswaku a a nga ‘fumi ripfumelo ra vona.’ (2 Vakorinto 1:24) Hi ku pfuna makwavo ku anakanyisisa hi Matsalwa ni ku endla xiboho xa yena n’wini lexi sekeriweke evutivini, nkulu u tekelela langutelo ra Pawulo. U xiya leswaku ku ni swipimelo eka vulawuri bya yena, tanihi laha Yesu a xiyeke leswaku a ku ri ni swipimelo eka vulawuri bya yena. (Luka 12:13, 14; Yuda 9) Hi nkarhi lowu fanaka, vakulu va lunghekele ku nyikela ndzayo ya Matsalwa leyi pfunaka, ni leyi kongomeke laha swi fanelaka. Xa vumbirhi, u letela Mukreste-kulobye. Muapostola Pawulo u te: “Swakudya leswi tiyeke i swa lava kuleke, i swa lava miehleketo ya vona yi vupfeke, lava toloveleke ku hlawula leswinene eka leswo biha.” (Vaheveru 5:14) Hikwalaho, leswaku hi kula hi va lava vupfeke, hi fanele hi tirhisa matimba ya hina yo twisisa, minkarhi hinkwayo hi nga titshegi hi munhu un’wana leswaku a hi nyika tinhlamulo. Hi ku kombisa Mukreste-kulobye ndlela yo anakanyisisa hi Matsalwa, hi ndlela leyi, nkulu u n’wi pfuna leswaku a endla nhluvuko.
14. Xana lava vupfeke va nga swi kombisa njhani leswaku va tshemba Yehovha?
14 Hi nga va ni ntshembo wa leswaku Yehovha Xikwembu hi ku tirhisa moya wa yena lowo kwetsima u ta kucetela timbilu ta vagandzeri va ntiyiso. Xisweswo, Vakreste lava vupfeke va tsakisa timbilu ta vamakwavo va vona, va va khongotela, hilaha muapostola Pawulo a endleke hakona. (2 Vakorinto 8:8; 10:1; Filemoni 8, 9) Pawulo a a swi tiva leswaku ngopfu-ngopfu hi lava nga lulamangiki lava lavaka nawu lowu nga ni vuxokoxoko leswaku wu va hlayisa va hanya kahle, hayi lava lulameke. (1 Timotiya 1:9) A nga kombisanga ku va sola kumbe ku nga va tshembi, kambe u vulavule hi ripfumelo ra vamakwavo. U tsalele vandlha rin’wana a ku: “Hosi yi hi nyika ku tshemba hi tlhelo ra n’wina.” (2 Vatesalonika 3:4) Ripfumelo, ra Pawulo, ku tiya kakwe ni ntshembo wakwe, entiyisweni swi khutaze Vakreste volavo. Vakulu ni valanguteri lava famba-fambaka namuntlha va ni tipakani leti fanaka. Wa nga vona ndlela leyi vavanuna lava lava tshembekaka va phyuphyisaka ha yona loko va risa ntlhambi wa Xikwembu hi rirhandzu!—Esaya 32:1, 2; 1 Petro 5:1-3.
Ku Hanya Hi Nawu Wa Kreste
15. Hi swihi swivutiso leswi hi nga ha tivutisaka swona loko hi lava ku vona leswaku ha wu tirhisa nawu wa Kreste eka vuxaka bya hina ni vamakwerhu?
15 Hinkwerhu ka hina hi fanele hi tikambisisa nkarhi na nkarhi ku vona loko hi hanya hi nawu wa Kreste ni ku wu seketela. (2 Vakorinto 13:5) Entiyisweni, hinkwerhu hi nga pfuneka hi ku tivutisa: ‘Xana ndzi munhu la akaka kumbe la xopaxopaka? Xana ndza ringanisela kumbe ndza hundzeleta? Xana ndzi kombisa ku anakanyela van’wana kumbe ndza va sindzisa hi timfanelo ta mina?’ Mukreste a nga ringeti ku lerisa leswaku i magoza wahi lawa makwavo wa yena a faneleke kumbe a nga fanelangiki ku ma teka etimhakeni leti ku nga vulavuriwiki hi tona eBibeleni.—Varhoma 12:1; 1 Vakorinto 4:6.
16. Xana hi nga va pfunisa ku yini lava nga ni mavonelo layo biha hi vona vini, xisweswo hi hetisisa xilaveko xa nkoka xa nawu wa Kreste?
16 Eminkarhini leyi yo nonon’hwa, i swa nkoka eka hina leswaku hi lava tindlela to khutazana. (Vaheveru 10:24, 25; ringanisa Matewu 7:1-5.) Loko hi languta vamakwerhu va xinuna ni va xisati, xana timfanelo ta vona letinene a ti vuli swo tala eka hina ku tlula ku tsana ka vona? Eka Yehovha, un’wana ni un’wana i wa risima. Lexi vavisaka, a hi hinkwavo va titwaka hi ndlela yoleyo, hambi ku ri vona vini. Vo tala va tala ku vona ku tsana ka vona vini ni ku nga hetiseki ka vona. Leswaku hi khutaza lavo tano—ni van’wana—xana hi nga ringeta ku vulavula ni munhu un’we kumbe vambirhi eka nhlangano wun’wana ni wun’wana, hi va byela lexi endlaka hi teka vukona bya vona ni munyikelo wa nkoka lowu va wu endlaka evandlheni wu ri wa nkoka? Wa nga vona ntsako wo olovisa ndzhwalo wa vona hi ndlela leyi naswona xisweswo hi hetisisa nawu wa Kreste!—Vagalatiya 6:2.
Nawu Wa Kreste Wa Tirha!
17. Xana u vona nawu wa Kreste wu tirha hi tindlela tihi to hambana-hambana evandlheni ra ka n’wina?
17 Nawu wa Kreste wa tirha evandlheni ra Vukreste. Ha wu vona siku na siku—loko Timbhoni-kulorhi ti hlanganyela eku twariseni ka mahungu lamanene hi ku hiseka, loko ti chavelelana ni ku khutazana, loko ti lwela ku tirhela Yehovha ku nga khathariseki swiphiqo leswi nonon’hwaka ngopfu, loko vatswari va lwela ku kurisa vana va vona leswaku va rhandza Yehovha hi timbilu leti tsakeke, loko valanguteri va dyondzisa Rito ra Xikwembu hi rirhandzu na hi musa, va khutaza ntlhambi leswaku wu hisekela ku tirhela Yehovha hilaha ku nga heriki hi ku hiseka lokukulu. (Matewu 28:19, 20; 1 Vatesalonika 5:11, 14) Loko hina tanihi vanhu hi tirhisa nawu wa Kreste evuton’wini bya hina, wa nga vona ndlela leyi mbilu ya Yehovha yi tsakaka ha yona! (Swivuriso 23:15) U lava leswaku hinkwavo lava rhandzaka nawu wa yena lowu hetisekeke va hanya hi masiku. Eka Paradeyisi leyi taka, hi ta vona nkarhi lowu vanhu va nga ta va va hetisekile ha wona, nkarhi lowu ku nga ta va ku nga ri na vatluli va nawu ni nkarhi lowu mboyamelo wun’wana ni wun’wana wa timbilu ta hina wu nga ta va wu lawuleka. Mawaku hakelo leyi dzunekaka swonghasi yo hanya hi nawu wa Kreste!
[Nhlamuselo ya le hansi]
a Makaya yo tano a ma fani ni tindhawu leti ku tshamaka tinghwendza ta Vujagana. A ku na “tinghwendza letikulu,” kumbe “vatatana,” lava lawulaka. (Matewu 23:9) Vamakwerhu lava nga ni vutihlamuleri va xiximiwa, kambe ntirho wa vona wu kongomisiwa hi misinya ya milawu leyi fanaka, leyi fumaka vakulu hinkwavo.
U Ehleketa Yini?
◻ Ha yini Vujagana byi nga wu twisisanga nawu wa Kreste?
◻ Xana hi nga wu tirhisa hi ndlela yihi nawu wa Kreste endyangwini?
◻ Leswaku hi tirhisa nawu wa Kreste evandlheni, hi fanele hi papalata yini, naswona hi fanele hi endla yini?
◻ Xana vakulu va nga ha yingisa nawu wa Kreste eku tirhisaneni ka vona ni vandlha hi ndlela yihi?
[Xifaniso lexi nga eka tluka 23]
N’wana wa wena u lava ku rhandziwa swinene
[Xifaniso lexi nga eka tluka 24]
Wa nga vona ndlela leyi varisi va hina lava rhandzekaka va phyuphyisaka ha yona!