Xiviko Xa Vahuweleri Va Mfumo

Mintiyiso Ya Bibele Yi Ya eMahlweni Yi Chumayeriwa eIreland

EMALEMBENI ya sweswi, tiko ro saseka hi ntumbuluko ra Ireland ri hundzuke xivandla xa mpfilumpfilu lowukulu. Hi nkarhi lowu fanaka vanhu va le Ireland va ri amukele kahle rungula ra Bibele leri tisiweke hi Timbhoni ta Yehovha. Mintokoto leyi landzelaka, leyi humaka eIreland yi tiyisekisa leswi.

■ EDublin un’wana wa Timbhoni ta Yehovha ni n’wana wa yena wa xisati a va ri entirhweni wo chumayela hi yindlu ni yindlu. Va hlangane ni wansati loyi vito ra yena a nga Cathy, loyi a a khomekile hi vana va yena vo tala. Mbhoni yi kombele leswaku n’wana wa yona wa xisati loyi a a ha dyondza ku chumayela a n’wi byela rungula ro koma. Cathy u pfumerile, hiloko xinhwanyetana lexi xi nyikela rungula leri lunghiseleriweke kahle. Cathy u tsakisiwe hi ku tiyimisela ni xichavo xa n’wana loyi kutani a amukela nyiko ya xiphephana xa Bibele.

Endzhaku Cathy u hlamusele ndlela leyi muendzi wa yena lontsongo a a lunghiselele ha yona ni hi ku tikhoma ka yena lokunene. U te: “Ndzi tsakisiwe hileswaku xinhwanyetana lexi xi vule rungula ro tano ro tsakisa handle ko tikukumuxa. Ndzi endle xiboho xa leswaku loko Timbhoni ta Yehovha ti tlhela ti ta, ndzi ta ti yingisela.”

Hi nkarhi wolowo Cathy u rhurhele exidorobanini lexi nga edzonga-vupela-dyambu bya Ireland ekusuhi ni ndzilakana wa swifundzha swa Cork na Kerry. Endzhaku ka nkarhi, Timbhoni ta Yehovha ti gongondze ekaya ra yena kutani a ti pfulela ti nghena. U amukele dyondzo ya nkarhi na nkarhi ya Bibele kutani sweswi u hlanganyela minhlangano ya vandlha ni vana va yena van’wana. Cathy u nkhensa ngopfu hikwalaho ka ku navela loku humaka embilwini ka xinhwanyetana lexi ko lava ku n’wi byela mahungu lamanene.

■ Exifundzheni xa Tullamore, Timbhoni ti vulavurisane hi Bibele ni wansati loyi vito ra yena ku nga Jean ku ringana malembe ya nkombo. Minkarhi yin’wana a a tsakela ivi a amukela tibuku kambe minkarhi yin’wana ku tsakela ka yena a ku hela. Siku rin’wana loko Mbhoni leyi vito ra yona ku nga Frances ni mutirhi-kulobye va endzele Jean, va n’wi kume a nga tsakeli nikatsongo. Timbhoni ti ri: “Ku nga khathariseki leswi a hi swi vula, a a ya a nyenyetseka ngopfu. Kutani emakumu u hi hlongorile ivi a hima rivanti.”

Frances a a ehleketa leswaku loko vo tlhelela kumbexana a va ta amukeriwa hi ndlela leyi fanaka. Frances u anakanye leswi: ‘Kumbexana a swi nge he pfuni nchumu ku tlhela hi n’wi endzela loko a nga ri tsakeli rungula leri.’ Hambiswiritano, u vulavule ni nuna wakwe Thomas hi mhaka leyi kutani yena a a ri ni ntshembo. Nkarhi lowu landzeleke loko va ri endhawini yoleyo, va tlhele va endzela Jean. A a ri ni xinghana ivi a amukela tikopi ta timagazini ta Xihondzo xo Rindza na Xalamuka! Maendzo lama landzeleke a ma tsakisa swinene naswona Thomas na Frances va sungule dyondzo ya nkarhi na nkarhi ya Bibele na yena.

Hikwalaho ka yini a hundzukile? Jean u vula leswaku nkarhi lowu a a nga kombisi vumunhu eka Timbhoni, a a ha ku kuma n’wana naswona a a ha ku huma exibhedlhele. A a kota ku etlela awara yin’we ntsena hikwalaho ko mamisa ricece ra yena ni ku dyisa n’wana wa yena lonkulunyana. Jean u ri: “A ndzi ta bula hi swilo swin’wana ku nga ri ku vulavula hi vukhongeri.”

Ku nga si hela tin’hweti timbirhi, Jean a a hlanganyela minhlangano hinkwayo ya vandlha naswona ku nga si hela mune wa tona, a a hlanganyela evutirhelini bya nsimu. U khuvuriwe endzhaku ka tin’hweti ta khume ku sukela loko a sungule dyondzo ya yena ya Bibele. Sweswi Jean u pfuniwa hi ntokoto wa yena n’wini evutirhelini. Wa hlamusela: “Loko ndzi hlangana ni munhu la pfumalaka vumunhu, ndzi ringeta ku va la twisisaka swinene. Minkarhi hinkwayo ndza n’wi fungha. Nkarhi wun’wana xiyimo xi ta va xi cincile loko ndzi vuya; kumbe munhu yoloye u ta va a titwa a antswa ivi a ndzi amukela.”