Ku Dyondzisiwa Ku Endla Ku Rhandza Ka Yehovha

“Nḍi letele ku endla le’ŝi ranḍiwaka hi wena! Hikuv̌a u Šikwembu ša mina.”—PISALEMA 143:10.

1, 2. (a) Hi rini laha hi faneleke ku dyondzisiwa, naswona hi fanele hi va ni langutelo rihi leri nga ra xiviri? (b) Ha yini ku dyondzisiwa hi Yehovha ku ri ka nkoka ngopfu?

SIKU rin’wana ni rin’wana leri munhu a vaka a hanya a tlhela a gingiriteka, a nga ha dyondzisiwa swilo swin’wana leswi nga swa nkoka. Leswi swi tano eka wena, naswona swi tano ni le ka van’wana. Kambe ku humelela yini eku feni? A swi koteki ku dyondzisiwa xo karhi kumbe ku dyondza eka xiyimo lexi. Bibele yi swi veka erivaleni leswaku vafi “a v̌a tiv̌i ntšhumu.” Ku hava vutivi eSheol, ku nga sirha leri tolovelekeke ra vanhu. (Eklesiasta 9:5, 10) Xana leswi swi vula leswaku ku dyondzisiwa, ku hlengeleta ka hina vutivi, i swa hava? Sweswo swi titshege hi leswi hi dyondzisiwaka swona ni ndlela leyi hi tirhisaka ha yona vutivi byebyo.

² Loko hi dyondzisiwa leswi nga swa misava ntsena, a hi na byona vumundzuku lebyi tiyeke. Hambiswiritano, lexi tsakisaka, vanhu va timiliyoni ematikweni hinkwawo va dyondzisiwa ku rhandza ka Xikwembu va ri karhi va langutela vutomi lebyi nga heriki. Xisekelo xa ntshembo lowu xi titshege hi ku dyondzisiwa hi Yehovha, Xihlovo xa vutivi lebyi nyikaka vutomi.—Pisalema 94:9-12.

3. (a) Ha yini ku vuriwa leswaku Yesu a a ri xichudeni xo sungula xa Xikwembu? (b) Hi kwihi ku tiyisekisiwa loku hi nga na kona ka leswaku vanhu va ta dyondzisiwa hi Yehovha, naswona ku va ni vuyelo byihi?

³ N’wana wa mativula wa Xikwembu, tanihi xichudeni xa xona xo sungula, u dyondzisiwe ku endla ku rhandza ka Tata wakwe. (Swivuriso 8:22-30; Yohane 8:28) Hilaha ku fanaka, Yesu u kombise leswaku vanhu va timiriyadi va ta dyondzisiwa hi Tata wakwe. Hi kwihi ku langutela loku hina lava dyondzisiwaka hi Xikwembu hi nga na kona? Yesu u te: “Ku tsariwile etibukwini ta vaprofeta, va ku: ‘Hinkwavo va ta dyondzisiwa hi Xikwembu.’ Un’wana ni un’wana la tweke Tatana ni ku dyondza eka yena, wa ta eka mina. . . . Ndzi tiyisisile ndzi ri ka n’wina, loyi a pfumelaka, ú ni vutomi lebyi nga heriki.”—Yohane 6:45-47.

4. Xana vanhu va timiliyoni va khumbiwa njhani hi dyondzo ya Xikwembu, naswona i ku langutela kwihi loku va nga na kona?

⁴ Yesu a tshaha marito ya Esaya 54:13, lawa a ma kongomisiwa eka nsati wa Xikwembu wo fanekisela, Siyoni wa le tilweni. Vuprofeta lebyi byi tirha ngopfu eka vana va yena, ku nga vadyondzisiwa va 144 000 va Yesu Kreste lava tswariweke hi moya. Masalela ya vana lava va moya ma gingiriteka namuntlha, hi wona lama rhangelaka eka nongonoko wo dyondzisa wa misava hinkwayo. Hikwalaho ka leswi, vanhu van’wana va timiliyoni lava vumbaka “ntshungu lowukulu” na vona va vuyeriwa hi ku dyondzisiwa hi Yehovha. Va ni ku langutela ko hlawuleka ka ku dyondza handle ko kavanyetiwa hi rifu. Hi ndlela yihi? Phela, va le nxaxamelweni wa ku pona ‘ku xaniseka lokukulu’ ni ku tiphina hi vutomi lebyi nga heriki eparadeyisini emisaveni.—Nhlavutelo 7:9, 10, 13-17.

Ku Kandziyisa Ngopfu Ku Endla Ku Rhandza Ka Xikwembu

5. (a) Hi yihi ndzimana ya lembe ya 1997? (b) Xana hi fanele hi titwisa ku yini hi ku va kona eminhlanganweni ya Vukreste?

⁵ Hi 1997, emavandlheni lama tlulaka 80 000 emisaveni hinkwayo, Timbhoni ta Yehovha ti ta anakanyisisa hi marito yo sungula ya Pisalema 143:10: “Nḍi letele ku endla le’ŝi ranḍiwaka hi wena!” Leyi yi ta va yi ri ndzimana ya lembe ya 1997. Marito lawa, lama nga ta kombisiwa hi ndlela leyi xiyekaka eTiholweni ta Mfumo, ma ta tirha tanihi xitsundzuxo xa leswaku ndhawu leyi xiyekaka leyi ku kumiwaka dyondzo ya Xikwembu hi le minhlanganweni ya vandlha, laha hi nga hlanganyelaka eka nongonoko lowu yaka emahlweni wo letela. Loko hi hlanganyela ni vamakwerhu eminhlanganweni leswaku hi ta dyondzisiwa hi Muleteri wa hina Lonkulu, hi nga titwa tanihi mupisalema, loyi a tsaleke a ku: “Nḍi ṭakile loko v̌a te ka mina: A hi yeni ndlwini ya Yehova!”—Pisalema 122:1; Esaya 30:20.

6. Hi xiya yini eka marito ya Davhida?

⁶ Ina, hi navela ku dyondzisiwa ku endla ku rhandza ka Xikwembu ematshan’weni ya ku rhandza ka nala wa hina Diyavulosi kumbe ku rhandza ka vanhu lava nga hetisekangiki. Hikwalaho, ku fana na Davhida, ha xi xixima Xikwembu lexi hi xi gandzelaka ni ku xi tirhela: “Hikuv̌a u Šikwembu ša mina. Moya wa wena lo’wa v̌unene a wu nḍi fambise ndleleni ya wena ya ku lulama!” (Pisalema 143:10) Ematshan’weni yo lava ku tihlanganisa ni vanhu va mavunwa, Davhida u hlawule ku va laha vugandzeri bya Yehovha a byi endleriwa kona. (Pisalema 26:4-6) Leswi moya lowo kwetsima wa Xikwembu a wu kongomisa magoza ya yena, Davhida a famba hi tindlela leto lulama.—Pisalema 17:5; 23:3.

7. Xana moya wa Xikwembu wu tirhe njhani evandlheni ra Vukreste?

⁷ Davhida Lonkulu, Yesu Kreste, u tiyisekise vaapostola leswaku moya lowo kwetsima wu ta va dyondzisa swilo hinkwaswo wu tlhela wu va tsundzuxa swilo hinkwaswo leswi a va byeleke swona. (Yohane 14:26) Ku sukela hi Pentekosta ku ya emahlweni, Yehovha a a ri karhi a paluxa “swihundla leswi enteke swa Xikwembu” leswi nga eRitweni ra yena leri tsariweke. (1 Vakorinto 2:10-13) Leswi u swi endle hi ku tirhisa ndlela leyi vonakaka leyi Yesu a yi vuleke “nandza la tshembekaka, wo tlhariha.” U nyikela swakudya swa moya leswi kambisisiwaka enongonokweni wo dyondzisa wa mavandlha ya vanhu va Xikwembu emisaveni hinkwayo.—Matewu 24:45-47.

Ku Dyondzisiwa Ku Rhandza Ka Yehovha eMinhlanganweni Ya Hina

8. Hikwalaho ka yini ku hlanganyela eDyondzweni ya Xihondzo xo Rindza swi ri swa nkoka swinene?

⁸ Mhaka leyi nga eka Dyondzo ya Xihondzo xo Rindza ya vandlha ya vhiki na vhiki, nkarhi na nkarhi yi kandziyisa ku tirha ka misinya ya milawu ya Bibele. Leswi entiyisweni swa hi pfuna leswaku hi langutana ni mivilelo ya vutomi. Etidyondzweni letin’wana ku kambisisiwa mintiyiso leyi enteke ya moya kumbe vuprofeta bya Bibele. Mayana ndlela leyi hi dyondzisiwaka ha yona eka tidyondzo to tano! Ematikweni yo tala Tiholo ta Mfumo ta tala swinene eka minhlangano leyi. Kambe ematikweni yo hlayanyana, nhlayo ya lava vaka kona eminhlanganweni yi hungutekile. Xana u anakanya leswaku swi nga va swi vangiwa hi yini? Xana van’wana va nga ha va va pfumelela ntirho wo tihanyisa wu kavanyeta ku hlanganyela ka vona ka nkarhi na nkarhi leswaku va “kombana rirhandzu ni mintirho leyinene”? Kumbe, xana tiawara to tala ti hetiwa eka mintirho yo titsakisa kumbe hi ku hlalela thelevhixini, ivi sweswo swi endla xiyimiso xa ku va kona eminhlanganweni hinkwayo xi tikomba xi nonon’hwa? Tsundzuka xileriso lexi huhuteriweke lexi nga eka Vaheveru 10:23-25. Xana ku hlangana endhawini yin’we leswaku hi kuma ndzetelo wa Xikwembu, a hi ka nkoka ku tlula rini na rini tanihi leswi sweswi hi “vonaka leswaku siku ra Hosi ri ya ri tshinela”?

9. (a) Xana Nhlangano wa Ntirho wu nga hi hlomisela vutirheli hi ndlela yihi? (b) Hi fanele hi va ni langutelo rihi hi ku nyikela vumbhoni?

⁹ Byin’wana vutihlamuleri bya hina lebyi nga bya nkoka i ku tirha tanihi vatirheli va Xikwembu. Nhlangano wa Ntirho wu endleriwe ku hi dyondzisa ku hetisisa leswi hi ndlela leyi humelelaka. Hi dyondza ndlela leyi hi nga tshinelelaka vanhu ha yona, leswi hi nga ta swi vula, ndlela leyi hi nga angulaka ha yona loko ku ri ni ku tsakela nileswi hi faneleke ku swi endla loko vanhu va ala rungula ra hina. (Luka 10:1-11) Leswi tindlela leti humelelaka ku buriwaka ha tona ni ku tlhela ti kombisiwa eka nhlangano lowu wa vhiki na vhiki, hi hlomisiwa hi ndlela leyinene leswaku hi fikelela vanhu, ku nga ri ntsena loko hi famba hi yindlu na yindlu kambe niloko hi chumayela eswitarateni, etindhawini to paka, eka swofamba swa mani na mani, etimbaleni ta swihaha-mpfhuka, etindhawini ta mabindzu kumbe eswikolweni. Hi ku pfumelelana ni xikombelo xa hina lexi nge: “Nḍi letele ku endla le’ŝi ranḍiwaka hi wena,” hi ta lava ku tirhisa nkarhi wun’wana ni wun’wana leswaku hi endla hilaha N’wini wa hina a khutazaka hakona: “Ku vonakala ka n’wina a ku voningele vanhu . . . leswaku va ta . . . dzunisa Tata wa n’wina la nge matilweni.”—Matewu 5:16.

10. Entiyisweni, hi nga va pfuna njhani ‘lava hi amukelaka’?

¹⁰ Eminhlanganweni yo tano ya vandlha, hi tlhela hi dyondzisiwa ku endla vanhu van’wana va va vadyondzisiwa. Loko hi kuma ku tsakela kumbe loko hi fambise buku, xikongomelo xa hina loko hi endla maendzo yo vuyela i ku sungula tidyondzo ta Bibele ta le kaya. Hi ku landza mongo, leswi swa fana niloko vadyondzisiwa ‘va tshame ni lava va va amukeleke’ leswaku va ta va dyondzisa swilo leswi Yesu a va leriseke swona. (Matewu 10:11; 28:19, 20) Leswi hi nga ni swipfuneto leswinene, swo tanihi buku leyi nge, Vutivi Lebyi Yisaka eVuton’wini Lebyi Nga Heriki, hakunene hi hlome kahle leswaku hi hetisisa vutirheli bya hina hi ku helela. (2 Timotiya 4:5) Loko vhiki na vhiki u va kona eka Nhlangano wa Ntirho ni Xikolo xa Vutirheli bya le Tilweni, ringeta ku twisisa ni ku tlhela u tirhisa tinhla leti pfunaka leti nga ta ku endla leswaku u faneleka tanihi un’wana wa vatirheli va Xikwembu lava fanelekaka leswaku u endla ku rhandza ka xona.—2 Vakorinto 3:3, 5; 4:1, 2.

11. Xana van’wana va kombise ripfumelo eka marito lama kumekaka eka Matewu 6:33 hi ndlela yihi?

¹¹ Xikwembu xi rhandza leswaku hi ‘rhanga hi tilavela mfumo wa xona ni ku lulama ka xona.’ (Matewu 6:33) Tivutise, ‘Xana nsinya lowu wa nawu ndzi nga wu tirhisa njhani loko swilaveko swa ntirho wa mina wa ku tihanyisa [kumbe wa munghana wa mina wa vukati] swi kavanyeta ku va kona ka mina eminhlanganweni?’ Vo tala lava vupfuke hi tlhelo ra moya va teka magoza yo vulavurisana ni vathori va vona hi mhaka leyi. Mutirheli un’wana wa nkarhi hinkwawo u tivise muthori wa yena leswaku u kombela nkarhi wo ya eminhlanganweni ya vandlha vhiki na vhiki. U xi amukerile xikombelo xa yena. Kambe hi ku lava ku tiva leswaku ku humelela yini eminhlanganweni ya kona, na yena u kombele ku ya. Loko se a ri kwale u twe xitiviso lexi a xi ri malunghana ni ntsombano wa muganga lowu a wa ha ta. Hikwalaho ka leswi, muthori loyi u kunguhate ku heta siku hinkwaro entsombanweni. Xana hi yihi dyondzo leyi u yi kumaka eka xikombiso lexi?

Ku Dyondzisiwa Ku Rhandza Ka Yehovha Hi Vatswari Lava Chavaka Xikwembu

12. Leswaku vana va dyondzisiwa ku rhandza ka Yehovha, xana vatswari va Vukreste va fanele va endla yini hi ku lehisa mbilu ni ku tiyisa voko?

¹² Kambe minhlangano ya vandlha ni mintsombano a hi swona ntsena malunghiselelo yo dyondzisiwa ku endla ku rhandza ka Xikwembu. Vatswari lava chavaka Xikwembu va lerisiwa ku letela, ku laya ni ku kurisa vana va vona leswaku va dzunisa Yehovha ni ku endla ku rhandza ka yena. (Pisalema 148:12, 13; Swivuriso 22:6, 15) Leswaku hi endla tano swi lava leswaku hi famba ni “v̌ana” va hina eminhlanganweni laha va nga ta kota ‘ku yingisela ni ku dyondza,’ kambe ku vuriwa yini hi ku va dyondzisa matsalwa layo kwetsima ekaya? (Deteronoma 31:12; 2 Timotiya 3:15) Mindyangu yo tala hi vukheta yi sungule minongonoko ya dyondzo ya ndyangu ya Bibele ya nkarhi na nkarhi, kambe hinkwaswo leswi a swi tlhaveriwanga hi dyambu kumbe swi biwe hi makatla endzhaku ka nkarhinyana. Xana leswi swi tshame swi ku humelela? Xana u nga gimeta hi leswaku ku bumabumela ku va ni dyondzo yo tano ya nkarhi na nkarhi swi hoxile, kumbe hi leswaku ndyangu wa wena wu ni xiyimo lexi hambaneke ngopfu lerova a yi nge tirhi eka n’wina? Ku nga khathariseki leswaku xiyimo xi njhani, n’wina vatswari ma komberiwa leswaku mi pfuxeta xihloko lexinene lexi nge “Ndzhaka Ya Hina Leyi Fuweke Ya Moya” ni lexi nge “Hakelo Ya Ku Phikelela” leswi nga eka Xihondzo xo Rindza xa August 1, 1995.

13. Xana mindyangu yi nga pfuneka njhani hi ku kambisisa ndzimana ya siku?

¹³ Mindyangu ya khutaziwa leswaku yi swi endla mukhuva ku kambisisa ndzimana ya siku eka xibukwana lexi nge, Ku Kambisisa Matsalwa Siku Na Siku. Ku hlaya ndzimana ni tinhlamuselo ntsena i swinene, kambe ku burisana hi ndzimana ni ku yi tirhisa swa pfuna swinene. Hi xikombiso, loko ku kambisisiwa Vaefesa 5:15-17, swirho swa ndyangu swi nga anakanyisisa hi ndlela yo ‘londzovota nkarhi’ wa dyondzo ya munhu hi xiyexe, ku hlanganyela entirhweni wo karhi wa nkarhi hinkwawo ni ku khathalela swiavelo swin’wana swa le tilweni. Ina, bulo ra ndyangu ra ndzimana ya siku ri nga kongomisa van’wana kumbe vo tala leswaku va ringeta “ku twisisa [hi xitalo] leswi Hosi yi rhandzaka swona.”

14. Xana Deteronoma 6:6, 7 yi kombisa leswaku vatswari va fanele va va vadyondzisi va njhani, leswi lavaka leswaku va endla yini?

¹⁴ Vatswari va fanele ku va vadyondzisi lava hisekaka va vana va vona. (Deteronoma 6:6, 7) Kambe leyi a hi mhaka ya ku tshinya loku vavisaka kumbe ku lerisa vana va vona. Tatana na manana na vona va fanele va yingisela, hi ndlela leyi va ta swi kota kahle ku tiva leswi swi faneleke ku hlamuseriwa, leswi lavaka ku twisisiwa kahle, ku kombisiwa kumbe ku phindhiwa. Endyangwini wun’wana wa Vukreste, vatswari va sungula bulo hi ku khutaza vana va vona leswaku va vutisa swivutiso mayelana ni swilo leswi va nga swi twisisiki kumbe leswi va karhataka. Xisweswo va tive leswaku n’wana wa vona wa malembe ya kondlo-a-ndzi-dyi a a ri ni xiphiqo xo twisisa leswaku Yehovha a nga na masungulo. Vatswari va swi kotile ku tirhisa rungula leri nga eka tibuku ta Sosayiti ya Watch Tower ku kombisa leswaku nkarhi ni xibakabaka ku vuriwa leswaku a swi na makumu. Leswi swi tirhile ku kombisa yinhla, naswona leswi swi enerise n’wana wa vona. Hikwalaho tinyike nkarhi leswaku u hlamula swivutiso swa vana va wena hi ndlela leyi twisisekaka ni hi ku tirhisa Matsalwa, u va pfuna ku vona leswaku ku dyondza ku endla ku rhandza ka Xikwembu ku nga va loku enerisaka swinene. I yini swin’wana leswi vanhu va Xikwembu—lavakulu ni lavatsongo—va dyondzisiwaka swona namuntlha?

Ku Dyondzisiwa Ku Va Ni Rirhandzu Ni Ku Lwa Nyimpi

15. Hi rini laha ku tiya ka rirhandzu ra hina ra vumakwerhu ku nga ringiwaka kona?

¹⁵ Hi ku pfumelelana ni nawu wa Yesu lowuntshwa, hi ‘dyondzisiwa hi Xikwembu ku rhandzana.’ (1 Vatesalonika 4:9) Loko swilo swi tshamisekile naswona swi famba kahle, hi nga tivona hi va rhandza vamakwerhu hinkwavo. Kambe ku vuriwa yini loko ku pfuka ku hambana ko karhi kumbe loko hi dyoheriwa hikwalaho ka leswi Mukreste un’wana a swi vulaka kumbe leswi a swi endlaka? Eka xiyimo lexi ku tiya ka rirhandzu ra hina ku nga ha nghena endzingweni. (Ringanisa 2 Vakorinto 8:8.) Xana Bibele yi hi dyondzisa ku endla yini eka swiyimo swo tano? Nchumu wun’wana i ku lwela ku kombisa rirhandzu hi ku helela. (1 Petro 4:8) Ematshan’weni ya ku tilavela leswi nga swa hina ntsena, hi hlundzukisiwa hi swihoxo leswi nga nyawuriki, kumbe ku va ni xikhomela hikwalaho ka leswi hi vavisiweke, hi fanele hi tikarhatela ku pfumelela rirhandzu ri funengeta swidyoho leswo tala. (1 Vakorinto 13:5) Ha swi tiva leswaku loku hi kona ku rhandza ka Xikwembu, hikuva hi swona leswi Rito ra xona ri dyondzisaka swona.

16. (a) I nyimpi ya muxaka muni leyi Vakreste va dyondzisiwaka ku yi lwa? (b) Xana hi hlomisiwa hi ndlela yihi?

¹⁶ Hambileswi vanhu vo tala va ehleketaka leswaku rirhandzu ni nyimpi a swi hlangani, nyimpi i xin’wana xa leswi hi dyondzisiwaka swona, kambe leyi i nyimpi ya muxaka wun’wana lowu xiyekaka. Davhida a a swi xiya leswaku a fanela ku titshega hi Yehovha leswaku a n’wi dyondzisa ndlela yo ya emahlweni ni nyimpi, hambileswi enkarhini wa yena a ku katseka ni nyimpi ya xiviri yo lwisana ni valala va Israyele. (1 Samuwele 17:45-51; 19:8; 1 Tihosi 5:3; Pisalema 144:1) Ku vuriwa yini hi nyimpi ya hina namuntlha? Matlhari ya hina a hi ya nyama. (2 Vakorinto 10:4) Nyimpi ya hina i ya moya, leyi lavaka leswaku hi hloma hi matlhari ya moya. (Vaefesa 6:10-13) Hi ku tirhisa Rito ra yena ni vanhu va yena lava nga vandlha, Yehovha wa hi dyondzisa ku lwa nyimpi ya moya hi ndlela leyi humelelaka.

17. (a) Hi wahi marhengu lawa Diyavulosi a ma tirhisaka leswaku a hi hambukisa? (b) I yini leswi hi faneleke hi swi papalata hi vutlharhi?

¹⁷ Hi tindlela leti nga xiyekiki, ta vukanganyisi, hakanyingi Diyavulosi u tirhisa swilo swa misava, vagwinehi ni van’wana lava lwisanaka ni ntiyiso, a lwela ku hi hambukisela etimhakeni leti nga nyawuriki. (1 Timotiya 6:3-5, 11; Tito 3:9-11) Swi tikomba onge wa swi vona leswaku a nge swi koti kahle ku hi hlula hi ku kongoma, hi ku hi hlasela hi n’wi langutile, hikwalaho u ringeta ku hi phija hi ku endla leswaku hi tshamela ku gungula ni ku vutisa swivutiso swa vuhunguki, leswi nga pfuniki nchumu hi tlhelo ra moya. Tanihi tinhenha leti tshamaka ti rindzile, hi fanele hi xalamukela makhombo yo tano, hilaha a hi ta endla hakona loko hi langutane ni minhlaselo.—1 Timotiya 1:3, 4.

18. Xana ku ka hi nga ha tihanyeli hina vini, swi katsa yini hakunene?

¹⁸ A hi tlakusi ku navela ka vanhu kumbe ku rhandza ka matiko. Yehovha u hi dyondzisile hi ku tirhisa xikombiso xa Yesu leswaku a hi fanelanga hi tihanyela hina vini; ematshanweni ya sweswo, hi fanele hi va ni mianakanyo leyi Kreste Yesu a a ri na yona ivi hi hanyela ku rhandza ka Xikwembu. (2 Vakorinto 5:14, 15) Enkarhini lowu hundzeke, hi nga ha va hi hanye vutomi byo pfumala ku ringanisela, bya vusopfa, hi tlanga hi nkarhi lowu nga wa risima. Minkhuvo leyi nga ni huwa, ku nwa hi mintlawa, mahanyelo yo biha i swihlawulekisi swa misava leyi yo homboloka. Leswi sweswi hi dyondzisiwaka ku endla ku rhandza ka Xikwembu, xana a hi tlangeli leswi hi hambanisiweke ni misava leyi leyi onhakeke? Hikwalaho a hi lweni nyimpi leyi ya moya hi matimba leswaku hi papalata ku katseka eka mikhuva leyi thyakisaka ya misava.—1 Petro 4:1-3.

Hi Dyondzisiwa Leswaku Hi Vuyeriwa Hina Vini

19. Xana ku dyondza ku rhandza ka Yehovha ni ku ku endla, swi ni vuyelo byihi?

¹⁹ I swa nkoka ku xiya leswaku ku dyondzisiwa ku endla ku rhandza ka Yehovha swa hi vuyerisa swinene. Hikwalaho swa twisiseka leswaku hi fanele hi tikarhatela ku nyikela nyingiso swinene leswaku hi ta dyondza kutani hi landzela swiletelo leswi hi swi kumaka hi ku tirhisa N’wana wa yena ni Rito ra yena swin’we ni vanhu va yena lava nga vandlha. (Esaya 48:17, 18; Vaheveru 2:1) Loko hi endla tano, hi ta tiyisiwa leswaku hi yima hi tiyile eminkarhini leyi ya maxangu ni ku lwisana ni swidzedze le swa ha taka. (Matewu 7:24-27) Hambi ku ri sweswi, hi ta va hi tsakisa Xikwembu loko hi endla ku rhandza ka xona naswona xi ta hlamula swikhongelo swa hina. (Yohane 9:31; 1 Yohane 3:22) Nakambe hi ta kuma ntsako wa xiviri.—Yohane 13:17.

20. I yini leswi swi nga ta va swi ri swinene ku anakanyisisa ha swona loko u vona ndzimana ya lembe ya 1997?

²⁰ Hi 1997, hi ta va ni nkarhi wo hlaya ni ku anakanyisisa nkarhi na nkarhi hi ndzimana ya lembe, Pisalema 143:10: “Nḍi letele ku endla le’ŝi ranḍiwaka hi wena!” Loko hi ri karhi hi endla leswi, a hi tirhiseni minkarhi yin’wana leswaku hi anakanyisisa hi malunghiselelo lawa Xikwembu xi ma endleleke hina leswaku hi ta dyondzisiwa hilaha swi boxiweke hakona laha henhla. Nakambe a hi tirhiseni ku anakanyisisa hi marito wolowo tanihi xitirho xo hi susumetela ku endla hi ku pfumelelana ni xikombelo xexo, hi ku tiva leswaku “loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.

A Wu Ta Hlamurisa Ku Yini?

◻ I vamani lava namuntlha va dyondzisiwaka ku endla ku rhandza ka Yehovha?

◻ Pisalema 143:10 yi fanele yi hi khumba njhani hi 1997?

◻ Xana hi dyondzisiwa ku endla ku rhandza ka Yehovha hi ndlela yihi?

◻ Ku laveka yini eka vatswari lava nga Vakreste loko va dyondzisa vana va vona?