Ku Dyondzisiwa Hi Yehovha Ku Fikela Namuntlha
“Yehovha hi byakwe u ndzi nyike ririmi ra lava dyondzisiweke.”—ESAYA 50:4, NW.
1, 2. (a) Yehovha u endle n’wana wakwe la n’wi rhandzaka a lunghekela yini, naswona vuyelo byi ve byihi? (b) Xana Yesu u xi kombise njhani Xihlovo lexi tidyondzo ta yena ti pfaka eka xona?
YEHOVHA XIKWEMBU a a ri Mudyondzisi ku sukela loko a sungule ku va Tatana. Endzhaku ka loko vana va yena van’wana va xandzukile, u letele n’wana la n’wi rhandzaka swinene, Mativula yakwe, leswaku a lunghela ku ta endla vutirheli bya laha misaveni. (Swivuriso 8:30) Esaya ndzima 50, hi vuprofeta yi boxa n’wana loyi tanihi loyi a nge: “Hosi Leyikulu Yehovha hi byakwe u ndzi nyike ririmi ra lava dyondzisiweke leswaku ndzi ta tiva ndlela yo hlamula hi rito loyi a karhaleke.” (Esaya 50:4, NW) Hikwalaho ko tirhisa dyondzo ya Tata wakwe loko a ri laha emisaveni, Yesu u ve xihlovo lexi phyuphyisaka eka hinkwavo lava “karheleke, ni lava tikeriwaka.”—Matewu 11:28-30.
2 Yesu u endle mintirho yo tala ya matimba hi lembe-xidzana ro sungula. U pfule mahlo ya lavo-fe-mahlo a tlhela a pfuxa vafi, kambe ngopfu-ngopfu a tiviwa hi vanhu va nkarhi wolowo tanihi mudyondzisi. Valandzeri va yena ku katsa ni vakaneti va yena a va n’wi vitanisa xisweswo. (Matewu 8:19; 9:11; 12:38; 19:16; Yohane 3:2) Yesu a nga tilavelanga ku dzuneka eka leswi a swi dyondziseke kambe hi ku titsongahata u te: “Dyondzo leyi ndzi yi dyondzisaka a hi ya mina, kambe i ya Loyi a ndzi rhumeke.” “Ndzi vula swilo leswi hilaha Tatana a ndzi dyondziseke hakona.”—Yohane 7:16; 8:28; 12:49.
Vuxaka Lebyinene Bya Mudyondzisi Ni Mudyondzisiwa
3. Xana vuprofeta bya Esaya byi kombisa njhani leswaku Yehovha wa va tsakela lava a va dyondzisaka?
3 Mudyondzisi lonene, u tsakela lava a va dyondzisaka hi xiviri, hi nkathalelo ni hi rirhandzu. Esaya ndzima 50 yi paluxa leswaku Yehovha Xikwembu u tsakela lava a va dyondzisaka, hi ndlela yoleyo. Vuprofeta byi ri: “Mixo wun’wana ni wun’wana wa pfuka; u pfuxa ndleve ya mina leswaku yi twa ku fana ni lava dyondzisiweke.” (Esaya 50:4, NW) Marito lawa ma vulavula hi muleteri loyi a pfuxaka vana va yena ni mixo leswaku a va dyondzisa. Loko a hlamusela leswi vuprofeta lebyi byi vulaka swona, mudyondzi un’wana wa Bibele u te: “Mhaka hi leswaku Mukutsuri u ta va . . . loyi a a ri exikolweni xa Xikwembu hi ndlela yo fanekisela; ni loyi a fanelekaka ku nyikela swiletelo eka van’wana. . . . Mesiya a a ta faneleka swinene, hi dyondzo ya Xikwembu, leswaku a va muleteri wa vanhu.”
4. Xana Yesu u angule njhani eka dyondzo ya Tata wakwe?
4 Hi ntolovelo, vana va yi yingisa dyondzo ya muleteri wa vona. Xana Yesu u angule njhani eka dyondzo ya Tata wa yena? N’wangulo wa yena a wu fambisana ni leswi hi swi hlayaka eka Esaya 50:5: “Hosi Yehova o nḍi pfule ndlev̌e, kutani a nḍi alanga, a nḍi tlhelanga nḍaku.” Ina, Yesu a a hisekela ku dyondza. A a ri muyingiseri la rhiyaka ndleve. Ku tlula kwalaho, a tiyimiserile ku endla xin’wana ni xin’wana lexi Tata wakwe a n’wi kombela ku xi endla. A a nga gunguli; ematshan’weni ya sweswo u te: “Ntsena ku nga endliwi ku rhandza ka mina, kambe a ku endliwe ku rhandza ka wena.”—Luka 22:42.
5. (a) I yini lexi kombisaka leswaku Yesu a a yi tiva miringo leyi a ta langutana na yona emisaveni? (b) Xana vuprofeta lebyi nga eka Esaya 50:6 byi hetiseke hi ndlela yihi?
5 Vuprofeta byi kombisa leswaku N’wana a a tiva leswi nga ta n’wi humelelela hikwalaho ka ku endla ku rhandza ka Xikwembu. Leswi swi kombisiwa hi leswi loyi a dyondzisiweke a swi vulaka: “Nḍi nyiketile nhlana wa mina e ka la’v̌a nga nḍi ba, ni marama ya mina e ka la’v̌a nga nḍi hluv̌elela malepfu; a nḍi fihlanga mombo wa mina loko v̌a nḍi ruketela, ni loko v̌a nḍi tŝhutela hi mari e mahlweni.” (Esaya 50:6) Hi laha vuprofeta byi kombisaka ha kona, Yesu u khomiwe hi tihanyi laha misaveni. Muapostola Matewu u tsarile: “Kutani va n’wi tshwutela marha exikandzeni, . . . van’wana va n’wi ba hi timpama.” (Matewu 26:67) Leswi swi endliwe hi mavoko ya varhangeri va vukhongeri hi vusiku bya Paseka ya 33 C.E. Siku leri landzelaka Yesu u tinyiketele eka vahimeteri, loko masocha ya Varhoma ma ri karhi ma n’wi ba handle ka ntwela-vusiwana ma nga si n’wi hayeka emhandzini leswaku a fa.—Yohane 19:1-3, 16-23.
6. I yini lexi kombisaka leswaku Yesu a nga tshikanga ku tshemba Mudyondzisi wa yena, naswona ntshembo lowu wu hakerisiwe ku yini?
6 N’wana, loyi a dyondzisiweke kahle ka ha ri emahlweni, a nga tshikanga ku tshemba Mudyondzisi wakwe. Leswi swi kombisiwa hi leswi a yaka emahlweni a swi vula hi ku ya hi vuprofeta: “Leŝi Hosi Yehova a taka [ku] ndzi pfuna, a nḍi helanga mbilu loko v̌a nḍi ruketela.” (Esaya 50:7) Ku tshemba ka Yesu mpfuno wo huma eka Mudyondzisi wakwe ku hakeriwe hi ndlela leyi fuweke. Tata wakwe u n’wi tlakusile, a n’wi katekisa hi xikhundlha lexi tlakukeke lexi nge henhla ka hinkwaswo swa malandza laman’wana ya Xikwembu. (Vafilipiya 2:5-11) Na hina, hi hlayiseriwe mikateko leyikulu loko ho namarhela dyondzo ya Yehovha hi ku tshembeka hi tlhela hi nga ‘tlheleli endzhaku.’ A hi languteni ndlela leyi dyondzo yoleyo yi endliweke yi kumeka ha yona, ku fikela esikwini ra hina.
Nongonoko Lowu Ndlandlamuxiweke Wo Dyondzisa
7. Xana Yehovha u yi yise njhani dyondzo ya yena emahlweni laha emisaveni?
7 Hi laha hi xiyeke ha kona eku sunguleni, Yehovha u tirhise Muyimeri wa yena wa laha misaveni, Yesu Kreste, leswaku a yisa dyondzo ya Xikwembu emahlweni, hi lembe-xidzana ro sungula. (Yohane 16:27, 28) Yesu hi ku phindha-phindha u kombetele eka Rito ra Xikwembu tanihi xihlovo xa dyondzo ya yena, a vekela lava a a va dyondzisa xikombiso. (Matewu 4:4, 7, 10; 21:13; 26:24, 31) Endzhaku ka sweswo, dyondzo ya Yehovha yi yisiwe emahlweni laha misaveni hikwalaho ka vutirheli bya vanhu volavo lava dyondzisiweke. Tsundzuka leswaku Yesu u va lerisile a ku: “Hikokwalaho, yanani eka vamatiko hinkwavo, mi va endla vadyondzisiwa, . . . mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20, xiitaliki i xerhu.) Loko vadyondzisiwa va endliwile, va ve xiphemu xa “ndyang[u] wa Xikwembu, . . . [vandlha ra, NW] Xikwembu lexi hanyaka.” (1 Timotiya 3:15) A va aviwe hi ku ya hi mavandlha lawa eka wona a va dyondzisiwa hi Yehovha. (Mintirho 14:23; 15:41; 16:5; 1 Vakorinto 11:16) Xana dyondzo yo tano ya Xikwembu yi ye emahlweni ku fikela esikwini ra hina?
8. Xana Yesu u swi kombise njhani leswaku ntirho wo chumayela wu ta endliwa emisaveni makumu ma nga si fika?
8 Hakunene, yi fikile! Masiku manharhu emahlweni ka rifu rakwe, Yesu u vhumbhe leswaku ku nga si fika makumu ya mafambiselo lawa ya swilo, ku ta va ni ntirho lowukulu wo chumayela. U te: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” Yesu u ye emahlweni a hlamusela xitirho lexi nongonoko lowu wo chumayela ni ku dyondzisa ka misava hinkwayo wu nga ta kongomisiwa ha xona. U vulavule hi “nandza la tshembekaka, wo tlhariha” loyi a a ta tirha tanihi ntila kumbe xitirho xo nyika malandza ya Yena swakudya swa moya. (Matewu 24:14, 45-47) Yehovha Xikwembu u tirhise “nandza” loyi ku langutela swilaveko swa Mfumo emisaveni hinkwayo.
9. I vamani va vumbaka nandza lowo tshembeka ni lowa vutlhari?
9 Namuntlha, nandza lowo tshembeka ni lowa vutlhari u vumbiwa hi masalela ya vadyandzhaka va Mfumo. Lava i vatotiwa va Vakreste, masalela lama nga laha misaveni ya lava 144 000 lava nga “va ka Kriste” ni lava nga xiphemu xa ‘mbewu ya Abrahama.’ (Vagalatiya 3:16, 29, ringanisa NW; Nhlavutelo 14:1-3.) Xana u nga n’wi vona njhani nandza lowo tshembeka ni lowa vutlhari? Ngopfu-ngopfu u nga n’wi vona hi ntirho lowu a wu endlaka ni ku namarhela ka yena swinene Rito ra Xikwembu, ku nga Bibele.
10. I switirho swihi leswi swi tirhisiwaka hi ntlawa wa nandza ku yisa dyondzo ya Yehovha emahlweni?
10 Yehovha u tirhisa “nandza” loyi tanihi ndlela ya yena yo dyondzisa vanhu namuntlha. Lava va ntlawa wa nandza va amukele vito leri nge Timbhoni ta Yehovha hi 1931. Ku sukela kwalaho, timiliyoni ti tihlanganise na vona naswona ti amukele vito rolero, ti tlhela ti hlanganyela eku huweleleni ka Mfumo wa Xikwembu. Magazini lowu nge, Xihondzo xo Rindza Xi Huwelela Mfumo Wa Yehovha, i xitirho-nkulu lexi tirhisiwaka hi “nandza” loyi entirhweni wo dyondzisa. Hambi swi ri tano, minkandziyiso yin’wana na yona ya tirhisiwa, ku katsa tibuku, swibukwana, tibroxara, swiphephana ni magazini wa Xalamuka!
11. I swikolo swihi leswi “nandza” a swi seketeleke, naswona xana xin’wana ni xin’wana xa swona xi hetisisa xikongomelo xihi?
11 Ku engetela kwalaho, “nandza” u seketela swikolo swo hambana-hambana. Leswi swi katsa Xikolo xa Bibele xa Gilead xa Watchtower, lexi ku nga khoso ya ntlhanu wa tin’hweti leyi lunghiselelaka vatirheli lavantshwa ntirho wa vurhumiwa wa le matikweni mambe, ni khoso ya tin’hweti timbirhi ya Xikolo xa Ndzetelo wa Vutirheli, lexi letelaka vakulu lava nga tekangiki ni malandza ya vutirheli ku hetisisa swiavelo leswi hlawulekeke swa le tilweni. Nakambe ku ni Xikolo xa Vutirheli bya Mfumo, laha vakulu va Vakreste ni malandza ya vutirheli va leteriwaka kona nkarhi na nkarhi mayelana ni vutihlamuleri bya vona emavandlheni, ni Xikolo xa Ntirho wa Vuphayona, lexi hlomisaka vavuri va evhangeli va nkarhi hinkwawo leswaku va humelela swinene entirhweni wa vona wo chumayela.
12. Hi xihi xiphemu xa vhiki na vhiki xa nongonoko wo dyondzisa?
12 Xiphemu xin’wana xa nongonoko wo dyondzisa i minhlangano ya ntlhanu leyi khomiwaka emavandlheni yo tlula 75 500 ya vanhu va Yehovha emisaveni hinkwayo. Xana wa pfuneka swinene eka minhlangano leyi? Hi ku yingiserisisa ka wena swiletelo leswi nyikeriwaka, xana wa swi kombisa leswaku wa pfumela hakunene leswaku u le xikolweni xa Xikwembu, hi ndlela yo fanekisela? Xana nhluvuko wa wena wa moya wu swi veka erivaleni eka van’wana leswaku u ni “ririmi ra lava dyondzisiweke”?—Esaya 50:4; 1 Timotiya 4:15, 16.
Ku Dyondzisiwa eMinhlanganweni Ya Vandlha
13. (a) Hi yihi ndlela ya nkoka leyi Yehovha a dyondzisaka vanhu va yena ha yona namuntlha? (b) Xana hi nga ku kombisa njhani ku tlangela ka hina Xihondzo xo Rindza?
13 Yehovha ngopfu-ngopfu u dyondzisa vanhu va yena hi ku tirhisa dyondzo ya vhiki na vhiki ya Bibele, hi ku tirhisa Xihondzo xo Rindza tanihi xitirho xo dyondzisa. Xana u languta nhlangano wu ri ndhawu leyi u nga dyondzisiwaka eka yona hi Yehovha? Hambi leswi Esaya 50:4 yi tirhaka swinene eka Yesu, yi nga ha tirha ni le ka hinkwavo lava tirhisaka malunghiselelo ya Xikwembu leswaku va kuma “ririmi ra lava dyondzisiweke.” Ndlela yin’wana leyi u nga kombisaka ha yona leswaku wa xi tlangela Xihondzo xo Rindza i ku hlaya nkandziyiso wun’wana ni wun’wana hi ku hatlisa endzhaku ko wu kuma. Kutani, loko Xihondzo xo Rindza xi hlayiwa evandlheni, u nga kombisa ku tlangela ka wena eka Yehovha hi ku va kona ni ku lunghela ku hlamula leswaku u ta kombisa ntshembo wa wena erivaleni.—Vaheveru 10:23.
14. (a) Ha yini ku hlamula eminhlanganweni ku ri lunghelo ra nkoka swonghasi? (b) I tinhlamulo ta muxaka wihi ta vantshwa leti khutazaka swinene?
14 Xana wa swi xiya leswaku hi tinhlamulo ta wena eminhlanganweni, u nga va ni xiphemu enongonokweni lowukulu wa Yehovha wo dyondzisa? A swi kanakanisi leswaku ku hlamula eminhlanganweni i ndlela ya nkoka leyi hi nga pfuxanaka ha yona ni ku “kombana rirhandzu ni mintirho leyinene.” (Vaheveru 10:24, 25) Xana vana na vona va nga va ni xiphemu enongonokweni lowu wo dyondzisa? Ina, va nga va na xona. Tinhlamulo ta vana leti humaka embilwini hakanyingi ta khutaza eka lavakulu. Minkarhi yin’wana, lavantshwa eminhlanganweni ya hina va khutaziwe hi tinhlamulo ta vana leswaku va sungula ku tsakela mintiyiso ya Bibele hi xiviri. Vana van’wana va swi endla mukhuva ku hlaya tinhlamulo ta vona hi ku kongoma eka ndzimana kumbe va vula leswi va hleveriweke swona etindleveni hi lavakulu. Hambi swi ri tano, swa khutaza swinene loko tinhlamulo ta vona ti lunghiseleriwe kahle. Ku hlamula ko tano ku tisa ku dzuneka eka Muleteri wa hina Lonkulu ni le ka nongonoko wa yena lowu tlakukeke wo dyondzisa.—Esaya 30:20, 21.
15. Xana vatswari va nga endla yini ku pfuna vana leswaku va hlamula hi laha ku humelelaka swinene?
15 Swa tsakisa ku vona vana va lava ku hlanganyela eku dzuniseni ka Xikwembu xa hina. Yesu a a ma tlangela marito ya ku dzunisa lama humaka eka vana. (Matewu 21:15, 16) Nkulu un’wana wa Mukreste u vula leswi: “Loko ndza ha ri n’wana, a ndzi lava ku hlamula eka Dyondzo ya Xihondzo xo Rindza. Endzhaku ko ndzi pfuna ku lunghiselela nhlamulo ya mina, tatana a lava leswaku ndzi titoloveta nhlamulo ya mina ka nkombo.” Kumbexana hi nkarhi wa dyondzo ya n’wina ya ndyangu ya Bibele, n’wina vatswari mi nga pfuna vana va n’wina ku lunghiselela tinhlamulo hi marito ya vona vini eka tindzimana to karhi eka Xihondzo xo Rindza. Va pfune leswaku va vona lunghelo leri va nga na rona ro hlanganyela eka nongonoko wo dyondzisa wa Yehovha.
16. Hi byihi vuyelo lebyi Xikolo xa Vutirheli bya le Tilweni xi veke na byona, naswona i vamani lava nga tsarisaka exikolweni lexi?
16 Dyondzo leyi kumekaka eminhlanganweni yin’wana ya Vukreste na yona yi fanele yi tekiwa yi ri ya nkoka, hi lava va nga ni lunghelo ro nyikela rungula ni lava yingiselaka swiletelo leswi nyikeriwaka. Se ku hundze malembe yo tlula 50 sweswi, Yehovha a ri karhi a tirhisa Xikolo xa Vutirheli bya le Tilweni ku letela timiliyoni ta vavanuna ni vavasati ku nyikela rungula ra Mfumo hi laha ku humelelaka swinene. Lava va hlanganyelaka nkarhi na nkarhi ni vandlha va nga ha tsarisa, ku katsa ni vanhu lava ha ku sungulaka ku hlanganyela mihlangano, ntsena loko va hanya vutomi lebyi fambisanaka ni misinya ya milawu ya Vukreste.
17. (a) Xana Nhlangano wa le Rivaleni ngopfu-ngopfu a wu simekiwe hi xikongomelo xihi? (b) Hi tihi timhaka leti swivulavuri swa le rivaleni swi faneleke swi ti tsundzuka?
17 Xiphemu xin’wana lexi nga ni nkarhi wo leha xa nongonoko wo dyondzisa i Nhlangano wa le Rivaleni. Hi laha vito ra wona ri kombisaka ha kona, nhlangano lowu ngopfu-ngopfu wu simekeriwe leswaku wu toloveta lava nga riki Timbhoni, tidyondzo ta xisekelo ta Bibele. Xisweswo, loyi a nyikelaka nkulumo yoleyo u fanele a nyikela rungula hi ndlela leyi nga ta twisiseka eka lava sungulaka ku twa rungula rolero. Leswi swi vula ku hlamusela marito yo tanihi “tinyimpfu tin’wana,” “vamakwerhu,” na “masalela,” marito lawa lava nga riki Timbhoni va nga ha vaka va nga ma twisisi. Tanihi leswi vanhu lava va nga kona eNhlanganweni wa le Rivaleni va nga ha vaka va ri ni tidyondzo kumbe mahanyelo lawa ma hambanaka ni Matsalwa—hambi loko swi amukeleka eka vanhu va namuntlha—minkarhi hinkwayo xivulavuri xi fanele xi va ni vuxiyaxiya naswona xi nga tshuki xi sandza tidyondzo kumbe mahanyelo yo tano.—Ringanisa 1 Vakorinto 9:19-23.
18. I minhlangano yihi ya vandlha ya vhiki na vhiki leyi nga kona, naswona xikongomelo xa yona i yini?
18 Dyondzo ya Buku ya Vandlha i nhlangano lowu minkandziyiso leyi lunghiseleriweke ehansi ka nkongomiso wa nandza lowo tshembeka ni lowa vutlhari yi dyondziwaka eka wona, vhiki na vhiki, xikan’we na Bibele. Buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! hi yona leyi dyondziwaka sweswi ematikweni yo tala. Nhlangano wa Ntirho wu endleriwe ku hlomisa vanhu va Yehovha leswaku va hlanganyela hi xitalo eku chumayeleni ka mahungu lamanene ya Mfumo ni ku endla vadyondzisiwa.—Matewu 28:19, 20; Marka 13:10.
Ku Dyondzisiwa eMinhlanganweni Leyikulu
19. Hi yihi minhlangano leyikulu leyi “nandza” a yi lunghiselelaka lembe rin’wana ni rin’wana?
19 Hi malembe lama tlulaka dzana, “nandza la tshembekaka” u lunghiselele mintsombano ni tinhlengeletano leswaku ku dyondzisiwa ku tlhela ku khutaziwa Vakreste va ntiyiso hi laha ku hlawulekeke. Minhlangano yinharhu yo tano, leyikulu, ya khomiwa sweswi lembe rin’wana ni rin’wana. Ku ni nhlengeletano ya siku rin’we leyi yi vumbiwaka hi mavandlha yo hlayanyana lama endlaka xifundzha. Exikarhi ka lembe, xifundzha xin’wana ni xin’wana xi ni nhlengeletano ya masiku mambirhi leyi vuriwaka nhlengeletano ya xifundzha. Ku engetela kwalaho, ku ni nhlengeletano leyi vuriwaka ntsombano wa muganga leyi ku hlanganaka swifundzha swo hlayanyana. Malembe man’wana ku nga va ni mintsombano ya matiko hinkwawo. Minhlangano leyi leyikulu leyi vaka ni vaendzi lava nga Timbhoni lava humaka ematikweni yo tala, ya va tiyisa swinene vanhu va Yehovha eripfumelweni!—Ringanisa Deteronoma 16:16.
20. I yini leswi kandziyisiweke nkarhi na nkarhi eminhlanganweni leyikulu ya Timbhoni ta Yehovha?
20 Hi 1922, loko vanhu lava nga vaka 10 000 va hlanganile le Cedar Point, Ohio, U.S.A., vapfhumba va nyanyuriwe hi xikhutazo xa xivulavuri lexi nge: “Leri i siku ra masiku hinkwawo. Vonani, Hosi ya fuma! N’wina mi vanhu va yona lava yi twarisaka. Hikwalaho, twarisani, twarisani, twarisani Mufumi ni mfumo wakwe.” Mintsombano yo tano leyikulu nkarhi na nkarhi yi kandziyise ntirho wo chumayela. Hi xikombiso, entsombanweni wa matiko hinkwawo eDorobeni-nkulu ra New York hi 1953, ku endliwe xitiviso mayelana ni ku sunguriwa ka nongonoko wo letela malunghana ni ntirho wa yindlu na yindlu emavandlheni hinkwawo. Ku simekiwa ka wona ku ve ni vuyelo lebyinene ngopfu eku chumayeriweni ka Mfumo ematikweni yo tala.
Ku Dyondzisiwa Hi Xikwembu Leswaku U Dyondzisa
21. I lunghelo rihi leri hi lavaka ku ri amukela, ni ku nga hupiwi hi xikongomelo xa rona?
21 Hakunene, Yehovha u ni nongonoko lowu hlamarisaka wo dyondzisa emisaveni namuntlha! Hinkwavo lava wu tirhisaka va nga dyondzisiwa hi Xikwembu, ina, va nga va exikarhi ka lava va nyikiweke “ririmi ra lava dyondzisiweke.” Mawaku lunghelo ronghasi ro va exikolweni xa Xikwembu, hi ndlela yo fanekisela! Kambe loko hi amukela lunghelo leri, a hi fanelanga hi hupa xikongomelo xa rona. Yehovha u dyondzise Yesu leswaku a ta dyondzisa van’wana, naswona Yesu u dyondzise vadyondzisiwa va yena leswaku va ta endla ntirho lowu fanaka ni lowu a wu endleke kambe hi mpimo lowukulu. Hi laha ku fanaka, ha leteriwa enongonokweni lowukulu wo dyondzisa wa Yehovha leswaku hi ta dyondzisa van’wana.—Yohane 6:45; 14:12; 2 Vakorinto 5:20, 21; 6:1; 2 Timotiya 2:2.
22. (a) Hi xihi xiphiqo lexi Muxe na Yeremiya a va ri na xona, kambe xi tlhantlhiwe hi ndlela yihi? (b) I xitiyisekiso xihi lexi hi nga vaka na xona xa leswaku Xikwembu xi ta endla leswaku ku chumayeriwa ka Mfumo ku hetisisiwa?
22 Xana u ri “a nḍi munhu l’a tiv̌aka ku v̌ulav̌ula ŝinene,” hi laha Muxe a vuleke ha kona kumbe u vula hi laha Yeremiya a vuleke ha kona u ku, “a nḍi tiv̌i ku v̌ulav̌ula”? Yehovha u ta ku pfuna hi laha a va pfuneke ha kona. U byele Muxe a ku: “Nḍi ta v̌a ni nomu wa wena.” Ni le ka Yeremiya u te: “U nga tšhav̌i, . . . nḍi na wena.” (Eksoda 4:10-12; Yeremiya 1:6-8) Loko varhangeri va vukhongeri va lave ku miyeta vadyondzisiwa va yena, Yesu u te: “Loko vona va miyela, maribye ma ta huwelela.” (Luka 19:40) Kambe maribye a ma bohekanga ku huwelela hi nkarhi wolowo, naswona a ma fanelanga ma huwelela sweswi, hikuva Yehovha u tirhisa ririmi ra lava a va dyondziseke ku nyikela rungula ra yena ra Mfumo.
U Nga Hlamusela Ke?
◻ I vuxaka byihi lebyinene bya Mudyondzisi ni la dyondzisiwaka lebyi kandziyisiwaka eka Esaya ndzima 50?
◻ Xana Yehovha u wu yise njhani emahlweni nongonoko lowu anameke wo dyondzisa?
◻ Hi swihi swiphemu swin’wana swa nongonoko wa Yehovha wo dyondzisa?
◻ Ha yini ku ri lunghelo lerikulu ku hlanganyela enongonokweni wo dyondzisa wa Yehovha?
[Xifaniso lexi nga eka tluka 15599y]
Tinhlamulo leti humaka embilwini ta vana hakanyingi ta khutaza eka lavakulu