Mintsombano Ya Muganga Ya “Dyondzo Ya Xikwembu”
HINKWAVO lava tsakelaka ku dyondzisiwa hi Yehovha va langutele Mintsombano ya Muganga ya “Dyondzo Ya Xikwembu” hi mahlo-ngati. Nongonoko lowu wa masiku ya mune wu ta kandziyisa swiphemu swa nkoka swa dyondzo ya Matsalwa leyi sirhelelaka Vakreste eminkarhini leyi ya swiphiqo swa vanhu leswi kulaka ni mahlomulo ya misava. Nongonoko wu ta va pfuna leswaku va yimelana hi laha ku tiyeke ni ‘xin’wana ni xin’wana lexi lwisanaka ni dyondzo leyi hanyisaka’ ni ku va vadyondzisi lava antswaka va Rito ra Xikwembu.—1 Timotiya 1:10.
Mawaku swikombiso leswinene swonghasi leswi hi faneleke hi swi tekelela! Mudyondzisi Lonkulu a ku na un’wana handle ka Yehovha Xikwembu hi byakwe! Xisweswo, Elihu u vule kahle eka Yobo leswaku Yehovha “[u] hi nyikile ku twisisa lo’ku tlulaka ka ŝihari, ni v̌utlhari le’byi tlulaka bya tinyanyana ta le tilweni.” U tlhele a vutisa leswi malunghana na Yehovha: “I mani l’a dyonḍisaka kukotisa [ye]na?” (Yobo 35:11; 36:22) Eka Esaya 30:20 ku vuriwa leswaku Xikwembu i ‘Muleteri Lonkulu.’
Loyi a tlhandlamaka Yehovha tanihi mudyondzisi i Yesu Kreste ntsena. A vitaniwa “Mudyondzisi” ni ‘Muleteri,’ ku vulavuriwa ha yena minkarhi yo tlula 50 eka Tievhangeli. Ku nga khathariseki ku hanyisa ka yena loku hlamarisaka ni masingita man’wana, Yesu a a vitaniwa Mutshunguri nakambe a vitaniwa Mudyondzisi, Muleteri.—Matewu 8:19; Luka 5:5; Yohane 13:13.
Hi laha ku fanelekaka swinene, Yesu u dyondzise vadyondzisiwa ni vaapostola vakwe leswaku va va vadyondzisi ku kotisa yena. Hi nga vona leswi eka Matewu 10:5 ku ya ka 11:1 na Luka 10:1-11. Loko a nga si tlhandlukela etilweni, Yesu u nyike vadyondzisiwa vakwe xileriso xo dyondzisa lexi tiviwaka kahle lexi tsariweke eka Matewu 28:19, 20. Buku ya Mintirho, swin’we ni mapapila lama huhuteriweke lama landzelaka yona eka Matsalwa ya Vukreste ya Xigriki, ma hlamusela ndlela ya ku hiseka, ya vutshila ni ku tshembeka loku valandzeri vo rhanga va Yesu va endleke ntirho lowu wo dyondzisa ha yona.
Ntirho lowu wo dyondzisa i wa xihatla swinene namuntlha ku tlula rini na rini. Hi hanya emasikwini ya makumu ya mafambiselo lawa ya swilo, naswona hikwalaho ka sweswo, vutomi bya katseka. Leswaku vanhu va nga ngheni eka swidyoho swa Babilona Lonkulu ni leswaku va nga amukeli xiphemu xa maxangu ya yena, va fanele va dyondzisiwa ni ku pfuniwa va huma eBabilona kutani va yima swin’we ni Mfumo wa Yehovha.—Nhlavutelo 18:4.
Ku pfuna Timbhoni ta Yehovha hinkwato eka matshalatshala ya tona ya ku endla ntirho wa tona wo dyondzisa, Yehovha hi nhlengeletano ya yena u lunghiselele Mintsombano ya Miganga ya “Dyondzo Ya Xikwembu.” Onge nandza un’wana ni un’wana la tinyiketeleke wa Yehovha a nga tiyiseka leswaku u va kona eka wun’wana wa mintsombano leyi, a va kona ni ku rhiya ndleve ku sukela eka risimu ni xikhongelo xo pfula hi Ravumune ni ndzhenga ku fikela eka xikhongelo xo pfala hi Sonto ni ndzhenga.