Ku Dzuneka Lokukulu Ka Yindlu Ya Yehovha
“Nḍi [ta] tata yindlu leyi hi ku kwetsima, ku v̌ula Yehova wa mav̌andla.”—HAGAYI 2:7.
1. Moya lowo kwetsima wu yelana njhani ni ripfumelo kun’we ni mintirho?
LOKO a ri karhi a chumayela hi yindlu na yindlu, un’wana wa Timbhoni ta Yehovha u hlangane ni wansati un’wana wa Mupentekosta loyi a nga te, ‘Hina ho va ni moya lowo kwetsima, kambe n’wina hi n’wina mi endlaka ntirho wa kona.’ Hi ku tirhisa vutlharhi, u hlamuseriwe leswaku loyi a nga ni moya lowo kwetsima, handle ko kanakana u ta susumeteleka ku endla ntirho wa Xikwembu. Yakobo 2:17 ya vika: “Ku pfumela ku ri koxe, loko ku nga tikombi hi mintirho, ku file.” Hi ku pfuniwa hi moya wa Yehovha, Timbhoni ta yena ti hlakulele ku va ni ripfumelo leri tiyeke, naswona u ‘tate yindlu yakwe hi ku kwetsima’ hi ku ti rhuma leswaku ti endla mintirho leyo lulama—ngopfu-ngopfu ku ‘chumayela mahungu lawa lamanene ya Mfumo emisaveni hinkwayo leyi akiweke leswaku ma va vumbhoni eka tinxaka hinkwato.’ Loko ntirho lowu se wu endliwe hi ndlela leyi enerisaka Yehovha, “kutani hi kona makumu ma nga ta fika.”—Matewu 24:14.
2. (a) Xana ku tinyiketela ka hina swinene entirhweni wa Yehovha swi ta tisa mikateko yihi? (b) Hikwalaho ka yini hi fanele hi tsaka hi ku “hlwela” kwihi na kwihi loku nga ha vonakaka ku ri kona?
2 Eka marito lawa ya Yesu, hi fikelela makumu ya leswaku ntirho wa hina namuntlha wu fanele ngopfu-ngopfu wu va ku chumayela van’wana hi “mahungu lamanene lama vangamaka ya Xikwembu lexi tsakeke,” lawa hi byarhisiweke wona. (1 Timotiya 1:11, NW) Loko hi ya hi tinyiketela swinene hi ntsako entirhweni wa Yehovha, hi kona makumu ma nga ta tikomba ma tshinela hi xihatla. Eka Habakuku 2:2, 3, hi hlaya marito ya Yehovha lama nge: “Ṭala hlav̌utelo, yi v̌atle mahantini, leŝaku l’a yi hlayaka a yi hlaya hi ku ṭuṭuma; hikuv̌a hlav̌utelo leyo ya ha ṭhamele nkari wa kona, kambe yi ta hatlisa e ku heteleleni, yi nga ka yi nga šisi. Hambi yi nga hlwela, u yi langutela, hikuv̌a yi ta endleka ŝinene, yi nga ka yi nga hlweri.” Ina, “hlav̌utelo” leyi yi ta hetiseka “hambi yi nga hlwela.” Tanihi leswi se hi nga eka lembe ra vu-83 ra vulawuri bya Mfumo wa Yesu, van’wana va nga ha vona onge nguva leyi hi nga eka yona sweswi ya nonoka. Xana a hi fanelanga hi tsaka, leswi makumu ma kalaka ma nga si fika? Eka lembe-xikhume leri ra va-1990, minsivelo ya ku chumayeriwa ka mahungu lamanene yi susiwile hi ndlela leyi vonakaka yi ri ya singita eYuropa Vuxa, eswiphen’wini swa Afrika ni le matikweni man’wana. Ku “hlwela” loku ku vonakaka ku ri kona ku nyika nkarhi wa leswaku “tinyimpfu” leto tala ti hlengeletiwa eka masimu lawa ma ha ku sunguriwaka.—Yohane 10:16.
3. Ha yini ku twisisa ka hina loku lulamisiweke mayelana ni ‘xitukulwana lexi’ ku fanele ku hi khutaza leswaku hi endla ntirho wa Xikwembu hi xihatla?
3 “A yi nga hlweri,” ku vula muprofeta. Yesu u vule leswaku xitukulwana lexi xo homboloka lexi nga kona sweswi, a xi nge hundzi “ku nga si humelela swilo leswi hinkwaswo.” (Matewu 24:34) Xana ku twisisa ka hina loku lulamisiweke ka marito ya yena, ku vula leswaku ntirho wa hina wo chumayela a wa ha ri wa xihatla?a Ntiyiso wu komba leswi hambaneke ni sweswo! Xitukulwana lexi hi hanyaka enkarhini wun’we na xona xi ya xi mbombomela swinene eka vubihi ni vuhomboloki lebyi nga pimanisiwiki na nchumu ematin’wini hinkwawo lama hundzeke. (Ringanisa Mintirho 2:40.) Hi fanele hi tirha ntirho wa hina hi xihatla. (2 Timotiya 4:2) Vuprofeta hinkwabyo lebyi kombetelaka eka nhlomulo lowukulu byi komba leswaku wu ta ta hi xihatla, hi xitshuketa, hi ndlela leyi nga languteriwangiki—kukotisa khamba. (1 Vatesalonika 5:1-4; Nhlavutelo 3:3; 16:15) “Hikokwalaho na n’wina, tshamani mi tilunghisile, hikuva N’wana-wa-Munhu ú ta ta enkarhini lowu mi nga wu ehleketiki.” (Matewu 24:44) Tanihi leswi xitukulwana lexi xa vanhu lava nga chaviki Xikwembu xi nga ekusuhi ni ku lovisiwa, entiyisweni a hi fanelanga hi cukumeta ntshembo wa hina wa risima wo hanya hilaha ku nga heriki hi ku tlhela hi ya “puluvundza endzhopeni” wa swihambukisi swa misava!—2 Petro 2:22; 3:10; Luka 21:32-36.
4. Hi xihi xiyimo lexi vangeleke leswaku ku va ni ku engeteleka ka mphakelo wa “swakudya hi nkarhi lowu faneleke,” naswona xilaveko lexi ku hlangavetaniwe na xona hi ndlela yihi?
4 Hilaha vuprofeta bya Yesu byi vuleke hakona, hi 1914 a ku ri ni ku “sungula ka mahlomulo” tanihi leswi vanhu a va nghena enkarhini wa ku “hela ka [minkarhi].” Maxangu, swiendlakalo leswi nga ni khombo ni vuhomboloki swi andzile esikwini ra namuntlha. (Matewu 24:3-8, 12) Hi nkarhi lowu fanaka, Yehovha u lerise ntlawa lowu totiweke wa nandza lowo tshembeka ni wo tlhariha leswaku wu phamela “swakudya [swa moya] hi nkarhi wa kona” eka va ndyangu wa N’wini wa wona, Kreste. (Matewu 24:45-47) Yi ri exiluvelweni xa yona xa vuhosi etilweni, Hosi leyi ya Vumesiya sweswi yi kongomisa nongonoko lowu xiyekaka wo phamela swakudya swa moya emisaveni hinkwayo.
“Swakudya” Leswo Tala
5. Xana nchumu wo sungula eka nxaxamelo wa “swakudya” wu kuma nyingiso wihi?
5 Anakanya hi ku lunghiseleriwa ka “swakudya.” (Luka 12:42) Nchumu wo sungula eka nxaxamelo wa swakudya swa Vukreste i Rito ra Xikwembu, ku nga Bibele. Leswaku ku dyondzisiwa Bibele hi ndlela leyi humelelaka, xilaveko xo sungula i ku va ni vuhundzuluxeri lebyi hlayekaka kahle, lebyi kongomeke. Hi malembe layo tala lama hundzeke, xilaveko lexi a xi ri karhi xi hetisisiwa hakatsongotsongo, ngopfu-ngopfu ku sukela hi 1950 loko ku humesiwe New World Translation of the Christian Greek Scriptures hi Xinghezi. Hi 1961 Bibele hinkwayo ya New World Translation a yi kumeka, naswona ku nga ri kungani minkandziyiso leyi yi ve kona hi tindzimi tin’wana letikulu. Tivholumo ta 3 leti humesiweke hi lembe ra ntirho ra 1996 ti endla ntsengo wo fika eka 27, leti eka tona 14 ku nga Bibele leyi heleleke. Leswaku ku endliwa ntirho lowu wa Bibele, ku katsa ni wa swipfuneti swa Bibele, kwalomu ka 1174 wa Vakreste lava tinyiketeleke sweswi va tirha nkarhi hinkwawo eka vuhundzuluxeri ematikweni ya 77.
6. Sosayiti yi hlangavetane njhani ni xilaveko xa minkandziyiso ya Bibele?
6 Leswaku ku seketeriwa ntirho wa nhlayo leyi leyikulu ya vahundzuluxeri, marhavi yo gandlisela eka wona yo ringana 24 ya Sosayiti ya Watch Tower a ma ri karhi ma humesa minkandziyiso ya tibuku hi vunyingi. Ku ta fikela sweswi, michini leyi engetelekeke yo gandlisa leyi nga ni rivilo lerikulu, ya karhi ya simekiwa emarhavini lamakulu. Ku humesiwa ka timagazini ta Xihondzo xo Rindza ni Xalamuka! ka tlakuka n’hweti na n’hweti, ku fikelela ntsengo lowu hlanganisiweke wa 943 892 500 wa tikopi, loku ku nga ku engeteleka ka 13,4 wa tiphesente hi lembe rin’we. Ntsengo wa ku humesiwa ka Tibibele ni tibuku leti nga ni swifunengeto swo tsindziyela eUnited States, Brazil, Finland, Italy, Japani, Jarimani, Korea na le Mexico ntsena wu tlakuke hi 40 wa tiphesente ku sukela hi 1995 wu ya eka 76 760 098 wa tikopi hi 1996. Marhavi man’wana na wona ma hoxe xandla swinene eka ku engeteleka loku ka ku kandziyisiwa ka tibuku hinkwako.
7. Esaya 54:2 yi vonaka yi ri ya xihatla hi ndlela yihi sweswi?
7 Ku engeteleka ko tala ku vangiwe ngopfu-ngopfu hikwalaho ka leswi ku herisiweke minsivelo ya Timbhoni ta Yehovha eYuropa Vuxa ni le Afrika hi va-1990. Ndlala ya swakudya swa moya i yikulu etindhawini leti. Hikokwalaho, xirhambo lexi xi twala xi ri xa xihatla swinene: “Anamisa v̌uṭhamo bya nṭonga wa wena, u lehisa tinguv̌u ta tente ya wena: u nga feleli, lehisa tingoti ta wena, tiyisa timhanḍe ta wena.”—Esaya 54:2.
8. Hi wihi n’wangulo wa malwandla lowu pfunetaka eku kombiseni ka nseketelo wa swa timali?
8 Xisweswo, swi vonake swi fanerile leswaku ku ndlandlamuxiwa miako emarhavini yo tala ya Sosayiti, eka lawa ya 104. Hikwalaho ka xiyimo xo biha xa ikhonomi eka masimu lamantshwa lama ha ku sunguriwaka, xiphemu lexikulu xa timali ta ku ndlandlamuxa loku, xi hakeleriwa hi minyikelo leyi kongomisiwaka entirhweni wa misava hinkwayo, yo huma ematikweni lama fuweke. Lexi tsakisaka, mavandlha ni vanhu a va ri karhi va angula hi mbilu hinkwayo, hi moya lowu nga eka Eksoda 35:21: “Kutani munhu uṅwana ni uṅwana l’a ṭunḍušiweke hi mbilu ya yena, ni hikwav̌o la’v̌a ŝi ranḍeke, v̌a tisa le’ŝi v̌a ŝi nyikaka Yehova.” Hi tirhisa nkarhi lowu leswaku hi nkhensa hinkwavo lava hlanganyeleke eku nyikeni loku ka malwandla.—2 Vakorinto 9:11.
9. Varhoma 10:13, 18 yi hetiseka njhani namuntlha?
9 Hi 1996, minkandziyiso ya Sosayiti ya Watch Tower hakunene yi dzunise vito ra Yehovha ni swikongomelo swa yena ku ya fika emakun’wini ya misava. Swi hilaha muapostola Pawulo a vhumbeke hakona. Loko a tshaha vuprofeta bya Yuwele ni Pisalema ya vu-19, u tsarile: “‘Un’wana ni un’wana la khongelaka vito ra Hosi, ú ta ponisiwa.’ Kambe ndza vutisa ndzi ri: Xana va nga va va nga ri twanga ke? Hakunene va ri twile, hikuva: ‘Ku dyondzisa ka vona ku twakele emisaveni hinkwayo, ni marito ya vona ma fikile emakun’wini ya misava.’” (Varhoma 10:13, 18) Xisweswo hi ku tlakusa vito ra Yehovha, ra risima, vanhu va yena va hetisise xiphemu xa nkoka eku tateni ka yindlu ya yena ya vugandzeri hi ku kwetsima. Kambe, xana ku huwelela loku ku fambise ku yini ngopfu-ngopfu hi 1996? Hi kombela u kambisisa chati leyi landzelaka eka matluka 18 ku ya eka 21.
Ku Tshovela eMisaveni Hinkwayo
10. Hi swihi swivumbeko leswi xiyekaka leswi u swi vonaka entirhweni wa vanhu va Yehovha, hilaha swi katsakanyiweke hakona eka chati leyi nga eka matluka 18 ku ya eka 21?
10 Marito ya Yesu lama kumekaka eka Luka 10:2 a ma si tshama ma va ni matimba hi ndlela leyi: “Ku tshovela i kukulu, kambe vatirhi a va talanga; hikokwalaho, khongelani n’wini wa ntshovelo leswaku a rhuma vatirhi eku tshoveleni ka yena.” Xana wa xi amukela xirhambo xexo? Vanhu va timiliyoni emisaveni hinkwayo va xi amukela. Leswi swi kombisiwa hi nhlohlorhi leyintshwa ya 5413 769 wa vahuweleri va Mfumo lava vikeke ntirho wa nsimu hi 1996. Ku tlula kwalaho, vamakwerhu lavantshwa va xinuna ni va xisati vo ringana 366 579 va khuvuriwile. Mayana ndlela leyi hi swi tlangelaka ha yona swilo “le’ŝi ranḍekaka ŝa matiko hikwawo,” leswi sweswi swi hlanganyelaka eku ‘tateni ka yindlu ya Yehovha ya vugandzeri hi ku kwetsima’!—Hagayi 2:7.
11. Hikwalaho ka yini hinkwerhu ka hina hi ri ni xivangelo xo tsaka swinene?
11 Swiviko swa ku andza loku nga kona eka masimu lamantshwa swa hlamarisa swinene. Xana van’wana va hina va va ni mavondzo eka lava sweswi va nga ni ku andza koloko? Ematshan’wini yo va vondzoka, hi tsaka na vona. Matiko hinkwawo ma sungula hi swilo leswitsongo. Zakariya, muprofeta loyi a hanyeke enkarhini wun’we na Hagayi, u tsarile: “I mani l’a nga solaka siku ra timhaka le’tiṭongo?” (Zakariya 4:10) Hi tsaka swinene leswi ematikweni lawa eka wona ntirho wo nyikela vumbhoni wu simekiweke kahle, sweswi ku nga ni timiliyoni ta vahuweleri va Mfumo, naswona masimu ma tirhiwa nkarhi na nkarhi, naswona ma tirhiwa vhiki na vhiki emadorobeni yo tala lamakulu. Xana hi fanele hi loloha tanihi leswi sweswi Yehovha a va nyikaka nkarhi wo kuma ku pona lava nga etindhawini leti khale a ti ri ni minsivelo? Doo! Yesu u te: “Nsimu i misava.” (Matewu 13:38) Vumbhoni lebyi hetisekeke byi fanele ku hambeta byi nyikeriwa, hilaha vadyondzisiwa vo sungula va nyikeleke vumbhoni lebyi hetisekeke hakona emakun’wini ya mafambiselo ya swilo ya Xiyuda.—Mintirho 2:40; 10:42; 20:24; 28:23.
Ku Hambeta Hi Ya eMahlweni Hilaha Ku Nga Heriki
12. Hi wihi nsusumeto lowu hi nga na wona wa leswaku ‘hi ya emahlweni’? (Nakambe vona bokisi leri nge “Ku Tshovela ‘Ku Suka eMakun’wini Ya Misava.’”)
12 Ina, hi fanele hi ya emahlweni, hi “famba e mahlweni” ni golonyi ya Yehovha ya le tilweni ya tintsumi. (Ezekiyele 1:12) A hi tsundzukeni marito ya Petro: “Hosi a yi hlweli ku endla leswi yi nga tshembisa swona, hilaha van’wana va twisisaka ‘ku hlwela’ hakona, kambe yi lehisa mbilu hikwalaho ka n’wina; a yi lavi leswaku ni un’we wa n’wina a lova, kambe yi lava leswaku hinkwavo va ta eku hundzukeni.” (2 Petro 3:9) Onge xikombiso lexinene xa ku chivirika ka vamakwerhu lava nga ematikweni lama sweleke hi tlhelo ra timali, xi nga hi khutaza. Ku hlwela kwihi na kwihi loku nga ha vaka kona ka Armagedoni, ku endla leswaku vanhu va madzana ya magidi va hlengeletiwa ematikweni lawa ni leswaku vo tala va hlengeletiwa emasin’wini lama tirhiwaka kahle. U nga tshuki u endla xihoxo: “Siku ra Yehova le’rikulu ri ṭhinele, ri ṭhinerile, ri v̌uya ri hatlisa hi ku tlurisa.” (Sofoniya 1:14) Na hina hi fanele hi hatlisa eku nyikeleni ka vumbhoni byo hetelela hi rixaladza!
13, 14. (a) I yini leswi nga vuriwaka malunghana ni ku hangalasiwa ka tibuku hi 1996? (b) Hi wahi malunghiselelo yo hlawuleka lawa mavandlha ma nga ha ma endlaka lembe na lembe, naswona u kunguhata ku hlanganyela eka wona hi ndlela yihi?
13 Hambileswi vuxokoxoko bya kona byi nga humeleriki eka chati ya ntirho, ku ve ni ku andza loku xiyekaka eku hangalasiweni ka Tibibele, tibuku ni timagazini n’wexemu. Hi xikombiso, ku fambisiwa ka timagazini emisaveni hinkwayo ku kombisa ku andza ka 19 wa tiphesente, ku nga ntsengo wa 543 667 923 wa tikopi. Timagazini ta hina hi toxe ti endla swi olova ku chumayela hi tindlela to hambana-hambana—eswitarateni, emintangeni, eswiticini swa tibazi, etindhawini ta mabindzu. Swiviko swi komba leswaku emasin’wini lawa eka wona rungula ra Mfumo ri tolovelekeke ngopfu, vanhu lava dyondzekeke va tsakisiwa hi nkoka lowu timagazini ta hina ti nga na wona, naswona va ti amukela tidyondzo ta Bibele.
14 Lembe rin’wana ni rin’wana hi n’hweti ya April, hi ntolovelo mavandlha ma lunghiselela ntirho wo hlawuleka wa timagazini, lowu vaka tsima ra siku hinkwaro ra yindlu na yindlu ni le tindhawini ta mani na mani. Xana vandlha ra ka n’wina ri ta hlanganyela eka wona hi April 1997? Hi April ku lunghiseleriwe minkandziyiso yo tala swinene leyi xiyekaka, ya Xihondzo xo Rindza ni Xalamuka! emisaveni hinkwayo naswona ya tsakisa! Le xihlaleni xa Kipra, mavandlha lawa ma tirhisaka xiga lexi nge, “fikelela un’wana ni un’wana hi rungula ra Mfumo hilaha swi nga kotekaka hakona,” ma landzele xiyimiso xo tano xa ntirho wa timagazini n’hweti na n’hweti, naswona ma fikelele nhlohlorhi leyintshwa ya 275 359 wa timagazini leti fambisiweke elembeni leri, ku nga ku engeteleka ka 54 wa tiphesente.
Marungula Ya Hagayi Yo Hetelela
15. (a) Hikwalaho ka yini Yehovha a rhumele marungula lama engetelekeke hi ku tirhisa Hagayi? (b) Hi yihi dyondzo leyi rungula ra vunharhu ra Hagayi ri faneleke ri hi nyika yona?
15 Yehovha u rhume Hagayi, masiku ya 63 endzhaku ka loko a hundzisele rungula ra yena ra vumbirhi, a ri ni rungula ra vunharhu leri hi nga ta va hi endla kahle namuntlha loko ho ri hlayisa etimbilwini. Hagayi u vulavule onge hi loko ku ri kona Vayuda va akaka masungulo ya tempele, kasi entiyisweni ana se a va ma akile emalembeni ya 17 lama hundzeke. Nakambe Yehovha u tlhele a vona swi fanerile ku endla mbhasiso. Vaprista swin’we ni vanhu lavan’wana a va sungule ku honisa swilo, xisweswo a va nga ha tenganga emahlweni ka Yehovha. Xana swi nga endleka leswaku van’wana va vanhu va Yehovha va honisa ku endla ntirho wa vona namuntlha, lerova va kala va tipeta eka tindlela ta misava ta vutilawuri, ni ku hlongorisa swilo leswi vonakaka? I swa xihatla leswaku hinkwerhu ka hina hi veka timbilu ta hina ‘ku sukela esikwini leri ku ya emahlweni’ eku kwetsimiseni ka vito ra Yehovha, hi ri karhi hi tiyiseka hi xitshembiso xa yena lexi nge: “Ku suka siku leri, nḍi ta mi katekisa.”—Hagayi 2:10-19; Vaheveru 6:11, 12.
16. Hi kwihi ku “ṭekaṭekisa” loku tshineleke, naswona ku ta va ni vuyelo byihi?
16 Hi siku rero, rito ra “Yehova wa mav̌andla” ri te eka Hagayi ra vumune naswona ku ri ro hetelela. U hlamusele leswi a swi katseka loko Yena a ta “ṭekaṭekisa tilo ni misav̌a,” a ku: “Nḍi [ta] lov̌isa matimba ya ku fuma ka matiko, nḍi andlala magolonyi ni l’av̌a fambaka ha wona; e mahantši ni v̌akhanḍiyi v̌a wona v̌a ta wa uṅwana ni uṅwana hi fumu ra warikwav̌o.” (Hagayi 2:6, 21, 22) Xisweswo ku “ṭekaṭekisa” ku ta fika emakun’wini ya kona loko Yehovha a basisa misava hi ku helela eArmagedoni. Enkarhini wolowo “le’ŝi ranḍekaka ŝa matiko hikwawo” swi ta va se swi nghenile, leswaku swi ta vumba xisekelo xa vandla ra misava leyintshwa. Mayana swivangelo swonghasi swa ku tsaka ni swa ku dzunisa Yehovha ha swona!—Hagayi 2:7; Nhlavutelo 19:6, 7; 21:1-4.
17. Yesu u vekiwe tanihi “šingwav̌ila ša mfungo” hi ndlela yihi?
17 Loko a gimeta vuprofeta bya yena, Hagayi wa tsala: “E sikwini lero, ku v̌ula Yehova wa mav̌andla, nḍi ta ku teka, wena Zorobabel . . . , kutani nḍi ta ku endla u kotisa šingwav̌ila ša mfungo, hikuv̌a nḍi ku hlawurile, ku v̌ula Yehova wa mav̌andla.” (Hagayi 2:23) Sweswi, Kreste Yesu i Hosi ya Vumesiya yo fanekisela ni Muprista Lonkulu wa Yehovha, loyi ematilweni a nga ni xikhundlha xa Ndhuna-nkulu Zerubabele ni xa Yoxuwa Muprista Lonkulu eYerusalema wa laha misaveni. Kukotisa xingwavila xa ximfumo xa mfungho lexi nga evokweni ra xinene ra Yehovha, Yesu hi yena loyi a veke “Ina” tanihi xitirho xa Yehovha lexi nga ta endla leswaku ‘switshembiso swa Xikwembu’ leswo tala swi hetiseka. (2 Vakorinto 1:20; Vaefesa 3:10, 11; Nhlavutelo 19:10) Rungula ra Bibele hinkwaro ra vuprofeta ri kombetela eka lunghiselelo ra Yehovha ra Kreste tanihi Hosi ni Mukutsuri loyi a nga muprista.—Yohane 18:37; 1 Petro 1:18, 19.
18. Xana marito yo hetelela ya “Yehova wa mav̌andla” ma ta hetiseka njhani hi ndlela leyi phyuphyisaka?
18 Ina, esikwini ra hina ku dzuneka lokukulu swinene i ku kumiwa u ri etempeleni ya Yehovha leyi vangamaka ya moya! Naswona ku nga ri khale, endzhaku ka loko Yehovha a suse mafambiselo ya Sathana hinkwawo, Hagayi 2:9 yi ta ya emahlweni yi hetiseka hi ndlela leyi tsakisaka swinene: “E šiv̌andleni leši, nḍi ta v̌eka ku rula, ku v̌ula Yehova wa mav̌andla.” Ku rhula eku heteleleni!—ku rhula loku nga heriki, ka misava hinkwayo, loku tiyisekisiwaka hi “šingwav̌ila ša mfungo,” xa Yehovha, ku nga Kreste Yesu, “Hosi ya ku rula,” loyi ha yena ku tsariweke leswaku: “Ku tala ka vulawuri bya vuhosi ni ku rhula a ku nga vi na makumu . . . Ku hiseka ka Yehovha wa mavandla ku ta endla sweswo.” (Esaya 9:6, 7, NW) Ku kwetsima ka yindlu ya Yehovha ya vugandzeri ku ta kombisiwa exivandleni hinkwaxo xa ku rhula xa vuhosi bya yena bya vuako hinkwabyo, hilaha ku nga heriki. Onge hi nga tshama hi ri endlwini yoleyo!—Pisalema 27:4; 65:4; 84:10.
[Nhlamuselo ya le hansi]
a Vona xihloko lexi nge “Ku Ponisiwa Eka ‘Xitukulwana Lexo Homboloka’” ni lexi nge “Nkarhi Wo Tshama Hi Xalamukile” enkandziyisweni wa November 1, 1995, wa Xihondzo xo Rindza.
Xana U Nga Hlamusela?
◻ Xana yindlu ya Yehovha yi ‘tatiwa hi ku kwetsima’ hi ndlela yihi namuntlha?
◻ Hikwalaho ka yini ku chumayeriwa ka mahungu lamanene ku ri ka xihatla swinene ku tlula rini na rini?
◻ Hi wihi nsusumeto wo chumayela hi xihatla lowu Xiviko xa Ntirho xa 1996 xi wu nyikaka?
◻ Xana Kreste u tirha tanihi “šingwav̌ila ša mfungo” xa Yehovha hi ndlela yihi?
[Bokisi leri nga eka tluka 15]
Ku Tshovela ‘Ku Suka eMakun’wini Ya Misava’
EKA Esaya 43:6, hi hlaya xileriso xa Yehovha lexi nge: “U nga arisi! V̌uyisa v̌ana v̌a mina e matikweni ya le kule, ni v̌anhwana v̌a mina hi le makuṅwini ya misav̌a.” Tsalwa leri ri hetiseka hi ndlela leyi hlamarisaka namuntlha le Yuropa Vuxa. Hi xikombiso, anakanya hi khale ka tiko ra Vukhomonisi ra Moldova. Ku ni swimitana leswi hafu ya vaaki va nga Timbhoni sweswi. Va boheka ku famba mimpfhuka yo leha leswaku va ta kuma nsimu leyi va nga ta chumayela eka yona, kambe va endla matshalatshala! Vahuweleri vo tala emavandlheni lawa i vana va vatswari lava hlongoleriweke eSiberia eku sunguleni ka va-1950. Sweswi mindyangu ya vona yi rhangela ntirho wo tshovela. Eka vahuweleri va 12 565 ku khuvuriwe 1917 wa vona n’wexemu. Eka mavandlha lama nga kona, 43 wa wona ma ni vahuweleri va kwalomu ka 150, naswona swifundzha swi andze swi suka eka mune swi ya eka nhungu eka lembe lerintshwa ra ntirho.
Nakambe, xin’wana lexi xiyekaka i ku andza loku nga eAlbania. Ku ni Timbhoni ti nga ri tingani to tshembeka leti tiyiseleke tihanyi letikulu ta mimfumo yo tshikelela hi malembe lama nga vaka 50. Vo tala va vona va dlayiwile. Leswi swi hi tsundzuxa xitshembiso xa Yesu lexi nge: “U nga chavi leswi nga kusuhi ni ku ku twisa ku vava. Vona, Diyavulosi ú lava ku hoxa van’wana va n’wina ekhotsweni, leswaku mi ta ringetiwa . . . U va la tshembekaka ku fikela eku feni, kutani mina ndzi ta ku nyika harhi ya vutomi.” (Nhlavutelo 2:10; nakambe vona Yohane 5:28, 29; 11:24; 25.) Xana hi vona yini sweswi le Albania? Hi vona ku hetiseka loku tsakisaka ka xitshembiso xa Yehovha lexi kumekaka eka Esaya 60:22, lexi nge: “Lo’nṭongo o ta v̌a khume ra madzana”! Hi 1990 i muhuweleri un’we ntsena la vikeke ntirho le Albania. Hambiswiritano, “vatirhi” lava engetelekeke vo huma le Italy ni le matikweni man’wana va hlamule xirhambo xa Yesu lexi nge: “Hikwalaho, yanani eka vamatiko . . . mi va endla vadyondzisiwa . . . mi va khuvula.” (Matewu 28:19; Luka 10:2) Hi nkarhi wa Xitsundzuxo xa rifu ra Yesu hi 1996, vahuweleri va 773 a va hiseka ensin’wini, naswona vahuweleri lava va hlengelete vanhu va 6523 eminhlanganweni ya vona ya Xitsundzuxo, ku nga nhlayo leyi tlulaka nhlayo ya vahuweleri yi andzisiwe ka nhungu! Ku vikiwe tinhlayo leti hlamarisaka ta lava veke kona va le tindhawini ta le kule. Hambileswi a ku nga ri na vahuweleri va vandlha, emadorobeni-nkulu ya Kukës na Divjakë vanhu lava veke kona a va ri 192 na 230 hi ku hambana ka wona. Le Krujë, laha ku nga ni muhuweleri un’we ntsena, ku ve ni vanhu va 212. Vahuweleri va 30 va le Korçë, va hirhe miako leyi nga rhurhelaka vanhu lava tlulaka 300. Endzhaku ka loko vanhu lava ringanaka nhlayo yoleyo va hlengeletanile endzeni ka holo, van’wana va 200 va boheke ku tlherisiwa tanihi leswi ndhawu a yi nga ha ri kona. Hakunene leyi i nsimu leyi vupfeleke ku tshoveriwa!
Xiviko lexi humaka le Romania xi ri: “Loko hi ri karhi hi endla ntirho wa yindlu ni yindlu, hi hlangane ni munhu loyi a vuleke leswaku a a ri un’wana wa Timbhoni ta Yehovha naswona a tshama edorobeni leritsongo leri hi ku tiva ka hina, a ri nga ri na Timbhoni. U hi byele leswaku handle ka yena ku ni vanhu van’wana va 15, lava hi malembe yo tala a va khoma minhlangano hi Ravumune na hi Sonto ni leswaku a va sungule ni ku chumayela hi yindlu ni yindlu. Hi siku leri landzeleke hi yile edorobeni rero. Lava a va hi rindzerile emakamareni mambirhi a ku ri vavanuna, vavasati ni vana va 15 lava tekeke tibuku ta 20 ni 20 wa timagazini ta sweswinyana. Hi va kombe ndlela yo fambisa tidyondzo ta Bibele. Hi yimbelele swin’we hi tlhela hi hlamula swivutiso swa vona leswi a swi lava ku hlamuriwa hi xihatla. Loyi a rhangelaka ntlawa lowu u te: ‘Emasikwini ma nga ri mangani lama hundzeke, ndzi khongele eka Yehovha ndzi ri karhi ndzi xiririka mihloti leswaku a hi rhumelela murisi, kutani xikhongelo xa mina xi hlamuriwile.’ A hi tsake ngopfu, naswona loko hi suka a fana ni n’wana la feriweke hi vatswari loyi eku heteleleni a kumeke tatana, a ku: ‘Hi kombela leswaku mi nga hi rivali. Mi tlhela mi vuya mi ta hi vona!’ Hi swi endlile sweswo, naswona sweswi ku fambisiwa tidyondzo ta Bibele ta nkombo edorobeni rero. Emasin’wini yo tala lamantshwa, ntirho wu sungula hi ndlela leyi hlamarisaka swinene hi tibuku ta Bibele leti ti tsakeriwaka ngopfu, naswona leswi swi kombisa leswaku ntirho lowu wu huma eka Xikwembu.”
[Chati leyi nga eka tluka 18]
XIVIKO XA NTIRHO WA LEMBE RA 1996 WA TIMBHONI TA YEHOVHA EMISAVENI HINKWAYO
(See bound volume)
[Swifaniso leswi nga eka tluka 16, 17]
“Le’ŝi ranḍekaka ŝa matiko hikwawo” swa karhi swa hlengeletiwa eSwihlaleni swa Lwandle (1), Amerika Dzonga (2), Afrika (3), Asia (4), Amerika N’walungu (5) na Yuropa (6)