“Vutomi Byin’We Ntsena Eka Byo Tala Lebyi U Byi Khumbeke”

HI January 1996, Carol u khomiwe hi vuvabyi bya tshumba ra le byongweni. A a ri emalembeni ya va-60 naswona ku fika enkarhini wolowo a a tshama a tsakile, a ri wansati la tiyeke la khutazaka munhu un’wana ni un’wana. Kambe sweswi madokodela a ma wa ma pfuka leswaku ma hlula vuvabyi lebyi lebyi dlayaka. Eku karhatekeni ka yena lokukulu, Carol u kume papila leri landzelaka:

“Eka Carol:

“Ndza karhateka hikwalaho ka rihanyo ra wena leri tsaneke. Lexi tsakisaka, hi leswaku hi ni ntshembo wa xiviri lowu Bibele yi hi pfunaka leswaku hi wu tiva ni ku wu rhandza. Ntshembo lowu i wa Mfumo wa Yehovha lowu nga ta fuma misava ivi hi kota ku hanya endhawini leyi nga paradeyisi, nkarhi lowu hinkwerhu hi wu languteleke hi mahlo-ngati.

“Ndzi lava ku ku tiyisekisa leswaku ntirho wa wena wo chumayela wu ponise vanhu vo tala eka rifu ro fela makumu. Ndzi un’wana wa vanhu lava. A ndzi tiyiseki leswaku u nga va wa ha tsundzuka loko hi hlangana ro sungula. Enkarhini wolowo a ndzi ri ni malembe ya 20 hi vukhale. A ndzi ri ni misisi yo leha, a ndzi xavisa swidzidzirisi, naswona a ndzi tshama ni ntlawa wa titsotsi. Hinkwerhu a hi ri ni swibalesa naswona a hi nga rhandzi munhu loko ku nga ri ku rhandzana hi xihina.

“Mi gongondze erivantini ra yindlu ya mina u ri ni Mbhoni yin’wana naswona u ndzi fambisele Xihondzo xo Rindza ni Xalamuka! Ndzi ringete ku ku nyika dolara ivi ndzi ku byela leswaku a ndzi ti lavi timagazini. U ndzi byele leswaku a wu fambeli ku kuma minyikelo. U ndzi byele leswaku u le ku endleni ka ntirho wo pfuna vanhu leswaku va hlaya Bibele. A ndza ha tsundzuki loko ndzi ti tekile timagazini hambi ku ri ku ti hlaya. Hambiswiritano, u byale mbewu ya ntiyiso evuton’wini bya mina.

“Endzhaku ka malembe yo hlayanyana, Mbhoni yin’wana leyi vitaniwaka Gary, yi fike endlwini ya mana wa mina hi nkarhi lowu na mina a ndzi ri kona. Ndzi n’wi byele hi riendzo ra wena ra malembe lama hundzeke. Gary u dyondze na mina Bibele nkarhi wo leha ku kondza loko eku heteleleni ndzi khuvuriwa hi 1984. Sweswi ndzi dyondzisa vana va mina ntiyiso mayelana ni Mfumo wa Xikwembu.

“Ndza tshemba leswaku ndzo va vutomi byin’we ntsena eka byo tala lebyi u byi khumbeke emalembeni ya wena ya ku tirha hi ku tshembeka. Hambiswiritano, hikwalaho ka nsovo lowu, u ndzi pfunile mina ni ndyangu wa mina leswaku hi tiva Xikwembu Lexikulu, Yehovha, ni N’wana wa xona, Kreste Yesu. Ndzi ri langutele hi mahlo-ngati siku leri ndzi nga ta ku vona emafambiselweni lamantshwa ya swilo loko Yehovha a susa mihloti hinkwayo emahlweni ya hina, kutani ri nga ha vi kona.—Nhlavutelo 21:4.

“Mina ni ndyangu wa mina, hi tsakile leswi hi ku tiveke nileswi hi nga xiphemu xa ntirho wa wena wo chumayela. Ndza nkhensa.

“Hi rirhandzu ra vumakwerhu,

Peter”

Endzhaku ka loko a vabye tin’hweti ta tsevu, Carol u file hi March 1996, a byale timbewu to tala ta ntiyiso entirhweni wa yena wa 35 wa malembe tanihi muevhangeli la hisekaka. U dyondze leswaku munhu a nga swi tivi nikatsongo leswaku hi rini laha mbewu yi nga ta tswala mihandzu, hambiloko se ku hundze malembe yo hlayanyana.—Matewu 13:23.