Gqweta Ri Kambisisa Tidyondzo Ta Timbhoni Ta Yehovha

LES CIVIN, gqweta tlhelo mukongomisi wa khampani ya timhaka ta nawu laha Afrika Dzonga, u ri: “A ndzi nga tivi swo tala hi Timbhoni ta Yehovha.” Ha yini a kambisise tidyondzo ta Timbhoni? I yini leswi a swi vuleke endzhaku ko ti kambisisa? Twana leswi a swi byeleke vatsari va Xalamuka!

Hi byihi vukhongeri lebyi u kuriseriweke eka byona?

Ndzi kuriseriwe evukhongerini bya Xiyuda, kambe eku sunguleni ka va-1970, ndzi tekane na Carol, loyi a a ri Muanglican. A a nga byi rhandzi vukhongeri naswona a hi nga hanyi hi milawu ya vukhongeri hi nkarhi wolowo. Hambiswiritano, loko n’wana wa hina Andrew a ri ni malembe ya nhungu, Carol u vone leswaku hi fanele hi endla swo karhi leswaku hi ta n’wi kurisa hi milawu ya vukhongeri. Rabi u ndzi byele leswaku loko Carol o nghena kereke ya Xiyuda, Andrew u ta namba a va xirho xa kona naswona u ta nyikiwa mintirho ekerekeni tanihi Bar Mitzvah loko a hlanganisa malembe ya 13. Kutani hi sungule ku ya eka titlilasi ta kereke ya Xiyuda ta vhiki na vhiki esinagogeni.

U hlangane njhani ni Timbhoni ta Yehovha?

Loko Timbhoni ti ta ekaya ra hina, minkarhi hinkwayo a ndzi tsema bulo. A ndzi ti byela ndzi ku: “Ndzi Muyuda naswona a ndzi pfumeli eka Testamente Leyintshwa.” Kutani Carol u ndzi byele leswaku un’wana wa vanghana vakwe a a ri Mbhoni naswona a a yi tiva ngopfu Bibele. Hiloko a ringanyeta leswaku hi dyondza leswi engetelekeke hi Bibele. Kutani ndzi pfumerile ku dyondza ni Timbhoni hambileswi a ndzi kanakana ku endla tano.

A wu yi teka njhani dyondzo ya Bibele?

A ndzi tikukumuxa swinene. Eka titlilasi ta kereke ya Xiyuda ndzi tsundzuxiwe hi vupfumeri bya mina bya Xiyuda naswona ndzi vone leswaku a ndzi ri wa rixaka leri hlawuriweke. Ndzi tivutise ndzi ku: ‘I yini leswi vanhu lava va nga ndzi dyondzisaka swona?’ Eka bulo ra hina ro sungula, ndzi byele Mbhoni leyi teke emutini wa hina ndzi ku: “Ndzi kurisiwe hi tidyondzo ta kereke ya Xiyuda. Ndzi ni vukhongeri bya mina, naswona ndzi ta fela eka byona. Ku hava lexi u nga xi vulaka lexi nga ta ndzi hundzula.” Mbhoni yoleyo yi amukele langutelo ra mina hi musa. Kutani hi Musumbhunuku ni hi Ravuntlhanu nimadyambu a hi ya eka titlilasi teto naswona loko ndzi nga yanga hi Tisonto nimixo a hi hlaya ni Timbhoni. Dyondzo ya tona a yi ri mahala ku hambana ni titlilasi ta le sinagogeni.

A ndzi tirhisa Bibele ya mina ya Xiyuda hikuva a ndzi ehleketa leswaku Timbhoni ti tirhisa Bibele leyi a yi fambisana ni tidyondzo ta tona. Hambiswiritano, ndzi hlamarisiwe hi ndlela leyi Tibibele letimbirhi a ti fana ha yona. Leswi swi endle leswaku ndzi tiyimisela swinene ku kombisa leswaku Timbhoni a ti nga swi tivi leswi a ti vulavula ha swona.

Endzhaku ko ya yingisela tinkulumo ti nga ri tingani ta rhabi, Carol u ndzi byele leswaku a a ehleketa leswaku rhabi a a nga yi tivi kahle Bibele. U ndzi byele leswaku u ta tshika ku ya eka titlilasi ta le sinagogeni naswona a nge n’wi landzuli Yesu leswaku i Kreste. Ndzi tsemeke nhlana lerova ndzi ehlekete hi ku dlaya vukati bya hina. Hambiswiritano, loko ndzi vohlile ndzi tibyele leswaku ndzi ta tirhisa kungu rin’wana—ndzi ta tirhisa ntokoto wa mina wa swa nawu ku komba Carol leswaku ‘vukhongeri lebyi lebyi nga ni khombo’ i bya mavunwa.

Ku ve ni vuyelo byihi?

Rhabi u ndzi nyike buku leyi a yi tsaleriwe ku kaneta leswaku vuprofeta bya Mesiya byi hetiseke eka Yesu. Ku ringana tin’hweti ta 18, mina na Carol hi hlaye buku yoleyo. Nakambe hi ye emahlweni hi dyondza ni Timbhoni vhiki ni vhiki. Hambiswiritano, loko hi ri karhi hi kambisisa vuprofeta byin’wana ni byin’wana lebyi a byi tlhuvutsiwa ebukwini yoleyo, ndzi sungule ku vilela. Ku hambana ni leswi a swi vuriwa hi buku liya, minkarhi hinkwayo vuprofeta lebyi vulavulaka hi Mesiya lebyi nga eBibeleni a byi kombetela eka munhu un’we ntsena—Yesu Kreste. Mhaka yi humele erivaleni loko hi hlaye vuprofeta lebyi nga eka Daniyele 9:24-27, lebyi profeteke leswaku Mesiya a a ta humelela hi lembe ra 29 C.E.a Timbhoni ti kandziyise Bibele ya Xiheveru leyi nga ni vuhundzuluxeri bya Xinghezi ehansi ka bya Xiheveru. Ndzi kambisise mavekelo ya marito, kutani ndzi hlayela minkarhi ivi ndzi ku: “Ina, vuprofeta lebyi byi kombetela eka 29 C.E. Kutani Yesu u nghena njhani eka lembe leri?”

Mbhoni yi te: “Rero i lembe leri Yesu a khuvuriweke ha rona.”

Ndzi tsemeke nhlana! Ndzi tlhele ndzi hlamarisiwa hi ndlela leyi vuprofeta bya Bibele byi pakanisaka ni ku pfumelelana ha yona.

Vanghana va wena va titwe njhani loko u cince mavonelo ya wena?

Van’wana a va karhateke swinene naswona va ndzi tshembise leswaku mina ni nsati wa mina va nga hi hlanganisa ni vanhu lava nga hi kombaka leswaku Timbhoni to hi xisa. Kambe ripfumelo ra hina a ri sekeriwe eka ndzavisiso lowu dzikeke ni swivangelo leswi twalaka—ku nga nchumu lowu hambaneke swinene ni ku xisiwa.

I yini lexi ku susumeteleke ku va Mbhoni?

Eku sunguleni ndzi sungule ku ya eminhlanganweni yi nga ri yingani eHolweni ya Mfumo ni nsati wa mina, loyi hi nkarhi wolowo se a a ri Mbhoni.b Ndzi kokiwe rinoko hi xinghana ni rirhandzu leri Timbhoni ti nga na rona, ku nga khathariseki leswaku u wa rixaka rihi. A ndzi nga si tshama ndzi vona sweswo ekerekeni ya mina. Kutani endzhaku ka kwalomu ka malembe manharhu ndzi ri karhi ndzi dyondza swinene, ndzi khuvuriwile.

U titwa njhani hileswi u endleke xiboho xo va Mbhoni?

I lunghelo ku va ndzi tivitana Mbhoni ya Yehovha. Kambe loko ndzi ehleketa ndlela leyi ndzi lwisaneke ni ntiyiso ha yona, ndzi vona leswaku mikateko leyi Yehovha a ndzi nyikeke yona a yi ndzi faneli. A ndzi nge pfuki ndzi tisorile hi xiboho lexi ndzi xi tekeke.

Hi yihi mikateko leyi u yi tsakelaka?

Yi tele. Nkateko wun’wana lowu ndzi wu tsakelaka swinene i ku va nkulu kumbe murisi tlhelo mudyondzisi evandlheni ra ka hina. Nakambe ndzi pfuna Ndzawulo ya swa le Nawini erhavini ra Timbhoni ta Yehovha laha Afrika Dzonga. Kambe handle ko kanakana, nkateko lowukulu swinene i ku tiva Yehovha ni N’wana wakwe swin’we ni ku twisisa nhlamuselo leyi kongomeke ya minkarhi leyi hi hanyaka eka yona ni swiendlakalo swa nkoka leswi humelelaka emisaveni.

[Tinhlamuselo ta le hansi]

[Marito lama tshahiweke exihlokweni lama nga eka tluka 11]

Ndzi hlamarisiwa hi ndlela leyi vuprofeta bya Bibele byi pakanisaka ni ku pfumelelana ha yona