Xana Wa Swi Navela Ku Endla Vutirheli Hi Xitalo?

LAURA u ri: “A ndzi n’wi hlundzukele ngopfu Yehovha. A ndzi tshamela ku khongela leswaku a hi pfuna hi ololoxa swiphiqo swa hina swa timali leswaku ndzi ta hambeta ndzi phayona—kambe a ndzi humelelanga. Eku heteleleni ndzi boheke ku tshika ntirho wa vuphayona. Ndzi fanele ku tlhela ndzi pfumela leswaku a ndzi va vondzoka lava a va kota ku ya emahlweni va phayona.”

Nakambe, xiya mhaka ya Michael, nandza wa vutirheli evandlheni ra Timbhoni ta Yehovha. A a ri karhi a tikarhatela ku fanelekela ntirho wa ku va mulanguteri. (1 Timotiya 3:1) Loko ku hundze malembe yo hlayanyana ku navela kakwe ku nga hetiseki, u sungule ku hlundzuka swinene lerova a nga ha ri lavi lunghelo leri. U ri: “A ndzi nga ha swi koti ku tiyisela ku hela matimba loku a ndzi ri na kona.”

Xana u tshame u humeleriwa hi mhaka leyi fanaka? Xana u boheke ku tshika lunghelo ra le tilweni leri u ri rhandzaka? Hi xikombiso, xana u tshame u boheka ku tshika ku va phayona, ku nga mutwarisi wa Mfumo wa nkarhi hinkwawo? Kumbe xana u navela vutihlamuleri byo karhi bya le vandlheni lebyi nyikiweke van’wana? Swi nga ha endleka u swi navela ngopfu ku tirha eBethele kumbe ku va murhumiwa, kambe swiyimo swa wena swi nga ku pfumeleli.

“Ku langutela lo’ku hlwelaka ka v̌av̌isa timbilu,” ku vula buku ya Swivuriso. (Swivuriso 13:12) Leswi swi nga ha va tano ngopfu-ngopfu loko van’wana va kuma malunghelo lawa u ma navelaka. Xana Rito ra Xikwembu ri nyika vutlhari, nchavelelo ni ntshembo eka mani na mani la vaka ni ku hela matimba loko tano? Ina, ri endla tano. Entiyisweni, Pisalema ya vu-84 yi phofula marito ya nandza wa Yehovha la veke ni ku navela loku fanaka loku nga hetisekangiki malunghana ni ntirho wa Yehovha.

Ku Tlangela Ka Mulevhi

Vatsari va Pisalema ya vu-84 a ku ri vana va Kora, Valevhi lava tirheke etempeleni ya Yehovha ni lava xiximeke malunghelo ya vona ya ntirho swinene. Un’wana wa vona u ri: “A hi ku nanḍiha ku ṭhama e ndlwini ya wena, Yehova wa tinyimpi! Moya wa mina wa hisekela ni ku nav̌ela rikupakupa ra yindlu ya Yehova, mbilu ni nyama ya mina ŝi huwelela e ka Šikwembu le’ši hanyaka.”—Pisalema 84:1, 2.

Mulevhi loyi a a ri ni ku navela lokukulu ko tirha etempeleni ya Yehovha lerova hambi ti ri tindhawu leti tolovelekeke leti a hundza eka tona loko a ya eYerusalema a ti n’wi koka mahlo. U ri: “Loko v̌a hunḍa e nkov̌eni wa Baka, wu hunḍuka šihlov̌o.” (Pisalema 84:6) Ina, eka yena ndhawu leyi tivekaka yi ri yo oma a yi fana ni ndhawu leyi nga na mati lama eneleke.

Leswi mupisalema loyi a a ri Mulevhi la nga riki muprista, a a ta tirha etempeleni vhiki rin’we ntsena endzhaku ka tin’hweti tin’wana ni tin’wana ta tsevu. (1 Tikronika 24:1-19; 2 Tikronika 23:8; Luka 1:5, 8, 9) Nkarhi wa yena lowun’wana a a wu heta a ri ekaya ka yena eka yin’wana ya miti ya Valevhi. Hikwalaho u yimbelerile a ku: “Ŝi ṭanḍa ni šidzingiri ši ni šisaka, ni mbewulana yi ni yindlu, laha yi v̌ekaka mav̌ondlo ya yona kona. . . . Oho Yehova wa tinyimpi, tialtari ta wena! Hosi ya mina ni Šikwembu ša nga!” (Pisalema 84:3) Vona ndlela leyi Mulevhi a ta va a tsake ha yona loko a a fana ni tinyanyana toleto leti a ti ri ni vutshamo bya nkarhi hinkwawo etempeleni!

A swi ta olova eka Mulevhi ku va a karhateka hileswi a a nga ta swi kota minkarhi hinkwayo ku tirha etempeleni. Hambiswiritano, ntirho lowu a kota ku wu endla a wu n’wi tsakisa, naswona entiyisweni u swi xiyile leswaku ku tinyiketela eka Yehovha hi mbilu hinkwayo hi swona swi nga swa nkoka swinene. I yini lexi pfuneke Mulevhi loyi wo tshembeka leswaku a tshama a enerisekile hi malunghelo yakwe ya ntirho?

Dyondza Ku Eneriseka

Mulevhi u ri: “E ku ṭhama siku riṅwe e ndlwini ya wena, ŝi tlula khume ra madzana e kuṅwana. Nḍi ranḍa e ku ṭhama e rikupakupeni ra yindlu ya Šikwembu ša nga, ku tlula ku ṭhama e miṭongeni ya la’v̌o biha.” (Pisalema 84:10) U swi vonile leswaku ku tshama hambi ko va siku rin’we endlwini ya Yehovha i lunghelo leri nga ringanisiwiki na nchumu. Naswona Mulevhi loyi a a tirha etempeleni ku tlula siku rin’we. Ku eneriseka kakwe hi malunghelo yakwe swi n’wi endle a yimbelela hi ntsako.

Ku vuriwa yini hi hina? Xana ha yi vona mikateko leyi hi nga na yona, kumbe hi tala ku rivala leswi ana se hi nga na swona laha ntirhweni wa Yehovha? Hikwalaho ka ku tinyiketela ka vona eka yena, Yehovha u byarhise vanhu vakwe malunghelo ni mintirho yo tala. Malunghelo lawa ma katsa vutihlamuleri byo tika swinene bya vulanguteri, ku risa, ku dyondzisa ni swiyenge swo hambana-hambana swa ntirho wa nkarhi hinkwawo. Kambe ma tlhela ma katsa ni swilo swin’wana swa risima leswi nga malunghana ni vugandzeri bya Yehovha.

Hi xikombiso, anakanya hi vutirheli bya Vukreste. Muapostola Pawulo u fanisa lunghelo ra hina ra ku chumayela mahungu lamanene ni ku va ni “xuma lexi nga eswibyeni swa vumba.” (2 Vakorinto 4:7, NW) Xana u languta ntirho wo tano tanihi rifuwo ra risima swinene? Yesu Kreste, la sunguleke ntirho wa ku chumayela hi Mfumo, u wu vone tano, a siya ntila lowunene. (Matewu 4:17) Pawulo u te: “A hi heli matimba, hileswi hi nga ni vutirheli lebyi.”—2 Vakorinto 4:1, NW.

Minhlangano ya Vukreste na yona i lunghiselelo ro kwetsima leri nga fanelangiki ku languteriwa ehansi. Eminhlanganweni ya hina, hi kuma ndzetelo wa nkoka ni ku tiphina hi xinakulobye lexinene. Eminhlanganweni hi nga tlhela hi phofula ripfumelo ni ntshembo wa hina erivaleni hi ku hlamula nkarhi na nkarhi ni ku hlanganyela enongonokweni hi tindlela tin’wana. (Vaheveru 10:23-25) Minhlangano ya hina i lunghelo leri faneleke ku tlangeriwa hakunene!

Michael, la boxiweke eku sunguleni, u langute mikateko leyi yi ri ya nkoka swinene naswona u yi tlangele hilaha ku enteke. Kambe ku hetiwa ka yena matimba hikwalaho ka leswi a nga kotangiki ku va nkulu swi n’wi endle a nga ha swi tsakeli swa nkarhinyana. Hi ku tlhela a anakanyisisa ha swona, u tlhele a kota ku ringanisela ni ku rindzela Yehovha hi ku lehisa mbilu.

Ematshan’weni yo titwa hi nga eneriseki hikwalaho ka leswi hi nga riki na rona lunghelo ro karhi, hi ta va hi endla kahle loko hi tlhela hi kambisisa tindlela leti Yehovha a hi katekisaka ha tona, hilaha mupisalema a endleke hakona.a Loko hi nga koti ku vona kahle, hi fanele hi langutisa nakambe, hi kombela Yehovha leswaku a pfula mahlo ya hina leswaku hi ta kota ku vona malunghelo ya hina ni tindlela leti a hi katekisaka ha tona ni leti a hi tirhisaka ha tona leswaku a dzunisiwa.—Swivuriso 10:22.

Nakambe i swa nkoka ku tiva leswaku malunghelo yo hlawuleka, yo tanihi ntirho wa vulanguteri, ma lava timfanelo to karhi. (1 Timotiya 3:1-7; Tito 1:5-9) Hikwalaho hi fanele hi tikambisisa, hi languta laha hi nga antswisaka kona ivi hi tikarhatela swinene ku antswisa.—1 Timotiya 4:12-15.

U Nga Hetiwi Matimba

Loko hi nga ri kumi lunghelo ro karhi ra ntirho, a hi fanelanga hi gimeta hi ku vula leswaku Yehovha u rhandza ngopfu lava nga na wona kumbe leswaku u hi tsona swilo leswinene. Hakunene, a hi fanelanga hi va ni mavondzo yo ehleketa leswaku vanhu lava va nyikiwe malunghelo lawa swi nga fanelanga hikwalaho ka xin’wana-manana ematshan’weni ya ku hlawuriwa hi ndlela ya le tilweni. Ku tshamela ku ehleketisisa hi swilo leswi swi nga vanga mavondzo, ku holova hambi ku ri ku hetelela hi lan’wile.—1 Vakorinto 3:3; Yakobo 3:14-16.

Laura, la boxiweke eku sunguleni, a nga lan’wanga. Eku heteleleni u swi kotile ku hlula mintlhaveko yakwe yo hlundzuka ni mavondzo. Laura u khongele eka Xikwembu hi ku phindha-phindha leswaku xi n’wi pfuna ku hlula swiendlo swakwe leswo biha hikwalaho ka leswi a a nga swi koti ku phayona. Nakambe u kombele mpfuno lowu humaka eka vavanuna lava fanelekaka evandlheni ivi a titwa a tiyisekisiwa hi rirhandzu ra Xikwembu. U te: “Yehovha u ndzi nyike ku rhula ka mianakanyo. Hambileswi mina na nuna wa mina hi nga riki maphayona sweswi, ha wu tlangela nkarhi lowu a hi phayona ha wona naswona hi kuma matimba eka mintokoto leyi hi veke na yona. Hi tlhela hi pfuna jaha ra hina lerikulu entirhweni wa rona wa vuphayona.” Hikwalaho ka ku eneriseka, sweswi Laura u kota ku “tsak[a] ni lava tsakaka” entirhweni wa vona wa vuphayona.—Varhoma 12:15.

Tivekele Tipakani Leti U Nga Ti Fikelelaka

Ku eneriseka ka hina hi malunghelo lawa hi nga na wona sweswi a swi vuli swona leswaku hi fanele hi tshika ku tivekela tipakani tin’wana ta swa le tilweni. Loko a hlamusela hi ku pfuxeriwa etilweni, Pawulo u vulavule hi “ku ringeta hi matimba ku ya fika eka leswi nga le mahlweni.” U tlhele a ku: “A hi khomeni hi tiya eka leswi hi nga fika eka swona.” (Vafilipiya 3:13-16) Tipakani ta swa le tilweni ti nga hi pfuna leswaku hi lwela ku ya emahlweni. Hambiswiritano, mhaka ya nkoka i ku ti hlayisa ti ri ta xiviri.

Tipakani ta xiviri ta twisiseka naswona ta fikeleleka. (Vafilipiya 4:5) Leswi a swi vuli swona leswaku pakani leyi lavaka malembe yo hlayanyana ya ku tirha hi matimba a hi ya xiviri. Pakani yo tano ya nkarhi wo leha yi nga fikeleriwa hakatsongo-tsongo hi ku veka tipakani kumbe magoza lama nghenelelaka hi ku tlhandlamana. Leswi swi nga hi pfuna ku endla nhluvuko emoyeni. Ku hetisisa goza rin’wana ni rin’wana hilaha ku humelelaka swi ta ku enerisa hi ku famba ka nkarhi ematshan’weni yo ku heta matimba.

Langutelo Lerinene

Hambiswiritano, i swa nkoka ku tiva leswaku, hikwalaho ka swiyimo ni swipimelo swa hina, malunghelo man’wana a ma nge kumiwi. Ku ma veka tanihi tipakani swi nga hetelela hi ku hetiwa matimba ni ku tshoveka ka mbilu ntsena. Enkarhini lowu tipakani to tano ti fanele ti vekeriwa etlhelo. Ku endla leswi a swi nge nonon’hwi loko hi khongelela leswaku Xikwembu xi hi pfuna ku eneriseka ni ku endla ku rhandza ka Yehovha ku va nchumu wa nkoka swinene. Loko hi fanelekela malunghelo, ku dzuneka ka Yehovha—ku nga ri ku themendheriwa eka leswi hi nga swi endla—hi kona ku nga ka nkoka. (Pisalema 16:5, 6; Matewu 6:33) Bibele yi hi byela leswi hilaha ku faneleke: “Nyiketa Yehova e timhaka ta wena hikwato, kutani makungu ya wena ma ta tiya.”—Swivuriso 16:3.

Loko hi kambisisa Pisalema ya vu-84, hi nga swi vona leswaku mupisalema u kombise langutelo ro tano ehenhleni ka malunghelo ya ntirho, naswona Yehovha u n’wi katekisile swinene. Tlhandla-kambirhi, pisalema leyi yi hambeta yi pfuna vanhu va Yehovha ku fikela ni namuntlha.

Hi xikhongelo xa ku titshega hi Yehovha, u nga ringanisela ku navela ka wena malunghelo lama engetelekeke hi ku eneriseka hi lawa u nga na wona sweswi. U nga tshuki u pfumelela ku navela ku endla leswi engetelekeke ku ku endla u nga ha swi koti ku tlangela leswi u nga na swona sweswi ni ntsako wo tirhela Yehovha hilaha ku nga heriki. Tshemba Yehovha, hikuva leswi swi tisa ntsako, hilaha swi kombisiweke hakona eka marito ya Mulevhi lama nge: “Oho Yehova wa tinyimpi, [wa tsaka, NW] l’a ku ṭhembaka.”—Pisalema 84:12.

[Nhlamuselo ya le hansi]

[Bokisi leri nga eka tluka 11]

Tipakani Leti Hi Nga Tivekelaka Tona

Ku hlaya Bibele siku na siku.—Yoxuwa 1:8; Matewu 4:4

Ku antswisa matimba ya hina yo anakanya hi ku tirhisa ndzetelo wa Matsalwa.—Vaheveru 5:14

Ku endla vuxaka lebyikulu ni Xikwembu.—Pisalema 73:28

Ku hlakulela wun’wana ni wun’wana wa mihandzu ya moya.—Vagalatiya 5:22, 23

Ku antswisa ntikelo wa swikhongelo swa hina.—Vafilipiya 4:6, 7

Ku va lava humelelaka swinene eku chumayeleni ni le ku dyondziseni.—1 Timotiya 4:15, 16

Ku hlaya ni ku anakanyisisa hi nkandziyiso wun’wana ni wun’wana wa magazini wa Xihondzo xo Rindza ni Xalamuka!—Pisalema 49:3

[Swifaniso leswi nga eka tluka 9]

Loko u tivekela tipakani, rhangisa ku endla ku rhandza ka Xikwembu