Ha Ma Tlangela Malunghelo Lawa Hi Nga Na Wona
1 Ematin’wini hinkwawo ya vanhu, Yehovha u nyike malandza ya yena malunghelo yo hambana-hambana. U ma nyike malunghelo ku nga khathariseki leswaku ma ni malembe mangani, hambi i ya xinuna kumbe i ya xisati kumbe ma ni xikhundlha kumbe a ma na xona. (Luka 1:41, 42; Mint. 7:46; Filp. 1:29) Hi wahi malunghelo lawa a hi nyikaka wona namuntlha?
2 Man’wana Ya Malunghelo Lawa Hi Nga Na Wona: Hi ni lunghelo ro dyondzisiwa hi Yehovha. (Mat. 13:11, 15) Lunghelo rin’wana leri hi nga na rona i ku dzunisa Yehovha hi tinhlamulo ta hina eminhlanganweni ya vandlha. (Ps. 35:18) Loko hi kuma nkarhi wo hlamula, hi hlamula hi ku hiseka. Hilaha ku fanaka, loko xiavelo xin’wana ni xin’wana lexi hi nyikiwaka xona evandlheni hi xi teka xi ri lunghelo, hi ta xi endla hi mbilu hinkwayo. Xana nkarhi hinkwawo ha hlanganyela eku basiseni ka Holo ya Mfumo ni ku yi lunghisa?
3 Hambileswi vanhu va timiliyoni va tivutisaka loko Xikwembu xi swi twa swikhongelo swa vona, hina hi tsakela nyiko yo hlawuleka ya ku va swikhongelo swa hina swi twiwa hi Munhu wa nkoka ngopfu evuakweni hinkwabyo. (Swiv. 15:29) Yehovha hi byakwe u yingisa swikhongelo swa malandza ya yena. (1 Pet. 3:12) A nga hi pimeli leswaku hi nga n’wi khongela kangani. Mawaku nyiko ya risima swonghasi leyi hi nga na yona, yo kota ku khongela “nkarhi hinkwawo”!—Efe. 6:18.
4 “Vatirhi-kulobye Ni Xikwembu”: Rin’wana ra malunghelo ya hina ya risima i ku chumayela mahungu lamanene ya Mfumo wa Xikwembu tanihi “vatirhi-kulobye ni Xikwembu.” (1 Kor. 3:9) Hakunene lowu i ntirho lowu enerisaka ni lowu phyuphyisaka. (Yoh. 4:34) Yehovha a swi n’wi bohi leswaku a tirhisa vanhu ku endla ntirho lowu, kambe u hi nyike wona hikuva wa hi rhandza. (Luka 19:39, 40) Yehovha a nga ri nyikanga mani na mani lunghelo leri. Lava va endlaka ntirho wo chumayela va fanele va va ni timfanelo to karhi ta moya va tlhela va hanya hi tona. (Esa. 52:11) Xana hi kombisa leswaku hi teka lunghelo leri ri ri ra nkoka hi ku huma nsimu vhiki ni vhiki?
5 Malunghelo lama humaka eka Yehovha ma endla leswaku vutomi bya hina byi va ni xikongomelo. (Swiv. 10:22) Hi nga tshuki hi ma tekela ehansi! Loko hakunene hi ma tlangela malunghelo lawa ya ntirho, hi tsakisa Tata wa hina la nga Munyiki wa “nyiko yin’wana ni yin’wana leyi hetisekeke.”—Yak. 1:17.