Xiviko Xa Vahuweleri Va Mfumo

Ku Hangalasa Mbewu Ya Mfumo Minkarhi Hinkwayo

RITO ra Xikwembu, ku nga Bibele, ri khutaza ku gingiriteka. Hosi Solomoni u te: “Byala mbewu ya wena ka ha ri mišo; mav̌oko ya wena u nga ṭhuki u ma nyiketa nkari ni madyambu, hikuv̌a a ku tiv̌i leŝaku ku ta mila yihi, kumbe leyi, kumbe leya, kumbe loko ti ta mila ha timbiri.”—Eklesiasta 11:6.

Enkarhini wun’wana ni wun’wana lowu faneleke, Timbhoni ta Yehovha ti byala “mbewu” hi ku chumayela mahungu lamanene ya Mfumo wa Xikwembu. Ematikweni yo tlula 230 ni le swihlaleni, ti ya emahlweni ti “dyondzisa ni ku twarisa Evhangeli . . . [ti] ku: ‘Mesiya, hi yena Yesu.’” (Mintirho 5:42) Mintokoto leyi landzelaka yi kombisa ndlela leyi Timbhoni ta Yehovha ti nga ‘tshikiki’ ntirho wo chumayela ha yona.

◻ Le Riphabliki ra Cape Verde, un’wana wa Timbhoni ta Yehovha u hundze ekusuhi ni khotso loko a ri evutirhelini bya nsimu. Exivaveni xa khotso, vabohiwa van’wana a va tshame ehenhla ka murhi. Loko va vona Mbhoni, vabohiwa va huwelerile va lava timagazini. Mbhoni yi bohelele timagazini to hlayanyana ta Xihondzo xo Rindza na Xalamuka! eribyeni ivi yi ti hoxa hi le khumbini ra khotso. Hikwalaho ka ku tsakela loku ko sungula, ku sunguriwe tidyondzo ta Bibele ta 12. Vabohiwa vanharhu va nyiketele vutomi bya vona eka Xikwembu naswona va swi kombise hi nkhuvulo wa mati. Un’wana wa vabohiwa lava ana se sweswi swi tlula lembe a ri muvuri wa evhangeli wa nkarhi hinkwawo, kumbe phayona. Kambe, xana va yi tirha hi ndlela yihi nsimu ekhotsweni? Xo sungula khotso ri aviwe ri va masimu. Kutani nsimu yi averiwa Timbhoni tinharhu ivi yi tirhiwa ku sukela eka xitokisi xin’wana ku ya eka xin’wana. Vahuweleri lava va Mfumo va landzelela ku tsakela hi ndlela leyi fanaka ni leyi Timbhoni ta Yehovha emisaveni hinkwayo ti endlaka ha yona—hi ku endla maendzo yo vuyela. Hambiswiritano, ku hambana loku nga kona i minkarhi leyi tidyondzo ta Bibele ti fambisiwaka ha yona. Ematshan’weni yo dyondza Bibele kan’we kumbe kambirhi hi vhiki ku ringana awara kumbe ku tlula, vabohiwa van’wana va dyondza siku rin’wana ni rin’wana! Ku engetela kwalaho, Timbhoni ti nyikiwe mpfumelelo hi mulawuri-nkulu wa khotso leswaku ti khoma minhlangano hinkwayo ya vandlha ekhotsweni.

◻ Wansati wa le Portugal u kume minkandziyiso yo hlayanyana ya Watch Tower tanihi ndzhaka endzhaku ka rifu ra kokwa wakwe wa xisati. Tanihi leswi a a nga ri un’wana wa Timbhoni ta Yehovha, a a nga swi tsakeli ku hlayisa tibuku leti. Hambiswiritano, a a nga lavi ku ti cukumeta. Siku rin’wana u byele un’wana wa Timbhoni ta Yehovha la n’wi endzeleke loko a ri evutirhelini bya yindlu na yindlu malunghana ni layiburari leyi. Mbhoni yi n’wi vutise loko a tiva nkoka wa xiviri wa layiburari leyi. Wansati loyi u te: “Kahle-kahle, a ndzi wu tivi nkoka wa tona, kambe xana ndzi nga wu kumisa ku yini?” Wansati loyi u amukele dyondzo ya Bibele, naswona hi ku hatlisa u sungule ku tlangela layiburari ya kokwa wa yena wa xisati. Sweswi na yena i Mbhoni leyi khuvuriweke ya Yehovha. Ku tlula kwalaho, n’wana wa yena wa xisati ni munghana lonkulu wa ndyangu wa ka vona na vona va dyondza Bibele. Mawaku ndzhaka ya nkoka leyi nhlengeleto lowu wa tibuku wu tikombeke wu ri yona!