“Mi Hundzule Langutelo Ra Mina Mayelana Ni Timbhoni Ta Yehovha”

YOLEYO i ndlela leyi mutirhi wa le khotsweni ra le Poland a anguleke ha yona malunghana ni xihloko lexi a xi vulavula hi ntirho wa Timbhoni ta Yehovha, lexi nga eka nkandziyiso wa hina wa October 15, 1998. Xihloko lexi nge, “Loko Timbilu To Nonon’hwa Ti Kombisa Ku Tsakela,” xi vulavula hi ndlela leyi Timbhoni ta Yehovha ti humeleleke ha yona hi ku pfuna vabohiwa le Wołów, ePoland.

Loko magazini wa Xihondzo xo Rindza lowu boxiweke laha henhla wu nga si humesiwa, ku lunghiseleriwe nhlangano wo hlawuleka leswaku wu nyikiwa vabohiwa ku sungula hi September 13, 1998, le khotsweni ra le Wołów. Lava rhambiweke a va katsa Timbhoni ta kwalaho, vabohiwa lava khuvuriweke ni van’wana lava tsakelaka ni vatirhi vo hlayanyana va le khotsweni. Marito lama landzelaka ma vuriwe hi lava a va ri kona enhlanganweni wolowo.

Jerzy, un’wana wa Timbhoni ta Yehovha la khuvuriweke ekhotsweni malembe yo tlula ntlhanu lama hundzeke, u te: “Ndzi tsake swinene, hileswi namuntlha ndzi hlayaka hi matshalatshala lawa vamakwerhu va le mavandlheni ya le kusuhi va ma endleke leswaku va hi pfuna.” U engeterile a ku: “Ndzi tshama ndzi ri karhi ndzi ringeta ku endla nhluvuko, naswona ndza yi vona ndlela leyi Yehovha a ndzi lulamisaka ha yona.”

Mubohiwa un’wana la vuriwaka Zdzisław, u vule leswi malunghana ni ntirho wo chumayela ekhotsweni: “Sweswi vabohiwa va mune va tilunghiselela nkhuvulo, naswona lava va ha ku tsakelaka va ya emahlweni va va kona eminhlanganweni eholweni ya hina. Xihloko lexi xi hi susumetela swinene ku endla ntirho lowu engetelekeke ensin’wini leyi.” Kunene rero i langutelo lerinene, loko ku xiyiwa leswaku Zdzisław wa ha saleriwe hi malembe ya 19 leswaku a heta xigwevo xa yena ekhotsweni!

Endzhaku ko hlaya xihloko lexi vulavulaka hi khotso ra le Wołów, mutirhi un’wana wa le khotsweni u te: “Hi fundzhiwe swinene. A ndzi nga anakanyi leswaku khotso leri ri ta bumabumeriwa emisaveni hinkwayo hi tindzimi ta 130. Ndza mi rhandza, naswona ndzi tlangela matshalatshala lawa mi ma endlaka hikwalaho ka vabohiwa.” Mutirhi un’wana u engeterile a ku: “Mi hundzule langutelo ra mina mayelana ni Timbhoni ta Yehovha. Enkarhini lowu hundzeke, a ndzi mi teka tanihi vanhu lava hisekelaka vukhongeri etlhelo. Sweswi ndza swi vona leswaku mi vanhu lava nga ni nawu.”

Mukongomisi wa khotso ra le Wołów, ku nga Marek Gajos, u n’wayiterile ivi a ku: “Eku sunguleni a hi ehleketa leswaku a mi nge humeleli. A hi anakanya leswaku mi vanhu va vukhongeri byin’wana lebyi nga ni moya wo pfuxelela vabohiwa hi ku tirhisa Bibele. Hambiswiritano, hi ku vona vuyelo bya ntirho wa n’wina wo sungula hi bohe ku tirhisana na n’wina swinene. Se swi endla malembe ya kaye mi ri karhi mi ta laha handle ko karhala, naswona ndzi swi tlangela swinene leswi mi swi endleke ku ta fikela sweswi.”

Kambe, xana vunyingi bya vanhu lava nga ekhotsweni ra le Wołów va titwise ku yini hi xihloko lexi? Ku tsakela ka vabohiwa a ku ri kukulu swinene lerova Timbhoni leti nga le khotsweni ti heleriwe hi timagazini leti a ti ri na tona. Vatirhi va le khotsweni na vona va kombise ku tsakela hi ku kombela tikopi leti engetelekeke ta 40. Leswaku ma hlangavetana ni xilaveko lexi lexikulu, mavandlha ya kwalaho ma pfunetile ivi ma nyika vamakwerhu lava nga ekhotsweni tikopi leti engetelekeke ta 100. Hi nkarhi lowu fanaka, lava vaka kona eminhlanganweni ekhotsweni va engetelekile.

Piotr Choduń, mutirhi wa le khotsweni loyi a tirhisaneke swinene ni Timbhoni ta Yehovha, u te: “Hi bohe ku veka xihloko lexi etindhawini ta nkombiso hinkwato ta khotso ra hina. Hi tshemba leswaku vabohiwa hinkwavo lava nga si sungulaka ku dyondza Bibele na n’wina va ta hlaya magazini lowu.”

Xikombiso lexinene xa Timbhoni ni matshalatshala ya tona ya ku tiyimisela ku chumayela swi hambeta swi humesa vuyelo lebyinene. Ku engetela eka vabohiwa va 15 lava endleke nhluvuko va kondza va khuvuriwa, ku ni vatirhi vambirhi va le khotsweni lava nyiketeleke vutomi bya vona eka Yehovha, kasi mutirhi un’wana u kombele dyondzo ya Bibele. Ina, vamakwerhu lava chumayelaka ekhotsweni ra le Wołów va yisa ku dzuneka hinkwako eka Yehovha Xikwembu hikwalaho ka ku humelela ka vona.—Ringanisa 1 Vakorinto 3:6, 7.

[Xifaniso lexi nga eka tluka 28]

Timbhoni tinharhu ni mubohiwa va ri laha ku vekiweke timagazini eholweni ya le khotsweni laha ku dyondziseriwaka kona