Bokisi Ra Swivutiso

◼ Hi swihi switsundzuxo leswi hi faneleke hi swi landzela loko hi chumayela vabohiwa?

Emisaveni hinkwayo ku ni vabohiwa va kwalomu ka nhungu wa timiliyoni naswona van’wana va vona va kombisa ku tsakela mahungu lamanene. (1 Tim. 2:4) Rhavi rin’wana, ri kuma mapapila ya kwalomu ka 1 400 n’hweti yin’wana ni yin’wana, lama humaka eka vabohiwa swin’we ni swirho swa mindyangu ya vona, va kombela minkandziyiso kumbe ku endzeriwa. Hambileswi vabohiwa vo tala va kombisaka ku tsakela ka xiviri, mintokoto yi kombisa leswaku ku tsakela kun’wana ku va ku ri ka vukanganyisi, kumbe ku ri hi xikongomelo xo lava ku tirhisa vanhu va Xikwembu hi ndlela ya makwanga leyi vuyerisaka vona ntsena. Hikwalaho ka leswi, hinkwerhu hi fanele hi landzelela xitsundzuxo lexi landzelaka malunghana ni ku chumayela vabohiwa.

Hi xitalo vabohiwa va chumayeriwa hi ku tsalelana na vona mapapila. Hi kombela leswaku vamakwerhu va xisati va nga tsaleli vabohiwa va xinuna mapapila, hambi ku ri hi xikongomelo xo va pfuna hi tlhelo ra moya. Vutihlamuleri byebyo byi fanele byi endliwa hi vamakwerhu va xinuna lava fanelekaka. Vamakwerhu va xisati lava fanelekaka va nga averiwa ku tsalela vabohiwa va xisati, lava kombisaka ku tsakela ntiyiso wa Bibele hi xiviri. Mali kumbe tinyiko a swi fanelanga swi nyikiwa vabohiwa, hambiloko vo kombela.

Loko mubohiwa a kombisa ku tsakela, vito ra yena swin’we ni adirese swi fanele swi rhumeriwa eka vandlha leri mubohiwa a tshamaka ekusuhi na rona. Hakanyingi vamakwerhu lava fanelekaka endhawini yoleyo, va swi tiva ku langutana ni swiyimo swo hambana-hambana leswi nga tshukaka swi humelerile. Loko vandlha leri mubohiwa a welaka eka rona ri nga tiviwi, ku fanele ku rhumeriwa tiadirese ta yena erhavini.

A swi hoxanga leswaku vamakwerhu lava averiweke, va khoma minhlangano ni vabohiwa leswaku va ta kota ku hlaya na vona hi nkarhi wun’we. Hambiswiritano vahuweleri a va fanelanga va endla swinkhubyana kumbe minhlangano yo karhi ekhotsweni, leyi nga va endlaka va hlanganahlanga ni vabohiwa. Ku tlula kwalaho, a swi sasekanga leswaku vahuweleri va tolovelana swinene ni vabohiwa lerova va kala va va endzela nkarhi wihi na wihi.

Onge hi nga va ni “vuxiyaxiya kukota tinyoka naswona [h]i kala nandzu kukota matuva” loko hi ri karhi hi chumayela mahungu lamanene eka vabohiwa.—Mat. 10:16.