Yehovha—Xikwembu Lexi Paluxaka Swihundla

“Ši kona Šikwembu e matilweni, le’ši hlav̌utelaka ŝihundla.”—DANIYELE 2:28.

1, 2. (a) Xana Yehovha u hambana njhani ni Nala wakwe lonkulu? (b) Xana vanhu va nyama va ku kombisa njhani ku hambana loku?

YEHOVHA, Xikwembu lexi tlakukeke ni xa rirhandzu ni xa vuako hinkwabyo, Muvumbi a ri un’we ntsena, i Xikwembu xa vutlhari ni xo lulama. A nga titumbeti, mintirho yakwe kumbe swikongomelo swa yena a nga swi fihli. Hi nkarhi wa yena n’wini na hi vutlhari bya yena wa tipaluxa. Hi ndlela leyi u hambana ni Nala wakwe Sathana Diyavulosi, loyi a ringetaka ku fihla leswi a nga xiswona ni ku navela ka yena.

² Tanihi leswi Yehovha na Sathana va nga faniki, ni vagandzeri va vona a va fani. Lava landzelaka vukongomisi bya Sathana va tikomba hi ku hanya vutomi byimbirhi ni ku va ni vuxisi. Va ringeta ku tikombisa va ri va ku vonakala, kasi va endla mintirho ya munyama. Vakreste va le Korinto va byeriwe leswaku a yi nga fanelanga yi va hlamarisa mhaka leyi. “Vanhu lavo tano, i vaapostola va mavunwa, i vatirhi lava xisaka, lava tiendlaka onge i vaapostola va Kriste. Kutani a swi hlamarisi, hikuva na yena Sathana, ú tiendla onge i ntsumi ya ku vonakala.” (2 Vakorinto 11:13, 14) Hihala tlhelo, Vakreste va languta eka Kreste tanihi Murhangeri wa vona. Loko a ha ri laha misaveni u byi kombise hilaha ku heleleke vumunhu bya Tata wakwe, Yehovha Xikwembu. (Vaheveru 1:1-3) Hikwalaho, hi ku landzela Kreste, Vakreste va tekelela Yehovha, Xikwembu xa ntiyiso lexi ntshunxekeke ni xa ku vonakala. Na vona a va fanelanga va tifihla, va fihla mintirho ya vona, kumbe swikongomelo swa vona.—Vaefesa 4:17-19; 5:1, 2.

3. Hi nga swi kombisa njhani leswaku a hi ntiyiso ku vula leswaku vanhu lava vaka Timbhoni ta Yehovha vo sindzisiwa ku hlanganyela eka “xihundla xo kwetsima”?

³ Eminkarhini leyi a yi vonaka yi fanerile, Yehovha u paluxa swikongomelo swa yena hi xitalo ni vumundzuku lebyi enkarhini lowu hundzeke a byi nga tiveki evanhwini. Hi ndlela leyi i Xikwembu lexi paluxaka swihundla. Xisweswo, vanhu lava lavaka ku n’wi tirhela va rhambiwa—ina va khutaziwa—ku ta dyondza rungula rero leri paluxiweke. Hi 1994 nkambisiso lowu endliweke eka Timbhoni to tlula 145 000 etikweni ra Yuropa wu komba leswaku, hi ku ya hi nhlayo-xikarhi munhu un’wana ni un’wana eka vona u kambisise tidyondzo ta Timbhoni ta Yehovha hi yexe ku ringana malembe manharhu emahlweni ko va a hlawula ku va Mbhoni. Va tihlawulele hi voxe handle ko sindzisiwa. Naswona va hambete va va ni ntshunxeko wo tiendlela swilo hi ku swi rhandza. Hi xikombiso, hikwalaho ka leswi nhlayo yitsongo yi nga pfumelelanangiki na yona mimpimanyeto leyi tlakukeke ya mahanyelo ya Vakreste, endzhakunyana va endle xiboho xo ka va nga ha yi emahlweni ni ku va Timbhoni. Hambiswiritano, lexi tsakisaka hileswaku emalembeni ya ntlhanu lama hundzeke, nhlayo leyikulu ya khale ka Timbhoni teto va teke magoza yo tlhela va hlanganyela eka xinakulobye xa vona ni ku tlhela va tirha tanihi Timbhoni.

4. I yini leswi nga fanelangiki swi pfumeleriwa swi kavanyeta Vakreste lavo tshembeka, naswona ha yini swi nga fanelanga?

⁴ Kavula, a hi hinkwavo khale ka Timbhoni teto lava tlheleleke, naswona exikarhi ka vona ku ni van’wana lava tshameke va va ni vutihlamuleri evandlheni ra Vukreste. Leswi a swi fanelanga swi hlamarisa, hikuva hambi ku ri un’wana wa valandzeri va Yesu va le kusuhi swinene, muapostola Yudasi, u tlhelele endzhaku. (Matewu 26:14-16, 20-25) Kambe, xana lexi i xivangelo xo karhateka hi Vukreste hi byoxe? Xana leswi swi vula leswaku ku humelela loku endliwaka hi Timbhoni ta Yehovha entirhweni wa tona wo dyondzisa a ku pfuni nchumu? Nikatsongo, swi hilaha xiendlo xa Yudasi Iskariyota xa vuxengi xi nga swi sivelangiki swikongomelo swa Xikwembu hakona.

U Ni Matimba Hinkwawo Kambe U Ni Rirhandzu

5. Hi swi tivisa ku yini leswaku Yehovha na Yesu va va rhandza vanhu va nyama, naswona va ri kombise njhani rirhandzu leri?

⁵ Yehovha i Xikwembu xa rirhandzu. Wa va khathalela vanhu vakwe. (1 Yohane 4:7-11) Ku nga khathariseki xikhundla xa yena lexi tlakukeke, u rhandza leswaku vanhu va nyama va va vanghana va yena. Malunghana ni un’wana wa malandza yakwe ya le minkarhini ya khale, ha hlaya: “‘Abrahama ú pfumerile eka Xikwembu, kutani xi n’wi hlayile la lulameke hikwalaho ka swona.’ Kutani ú vuriwile nakulobye wa Xikwembu.” (Yakobo 2:23; 2 Tikronika 20:7; Esaya 41:8) Tanihi leswi vanhu va nyama va bulaka hi timhaka ta xihundla, kumbe hi swihundla, Yehovha na yena u endla tano ni vanghana vakwe. Emhakeni leyi Yesu u tekelele Tata wakwe, hikuva u endle vunghana ni vadyondzisiwa va yena naswona a a avelana na vona timhaka ta swihundla. U va byerile a ku: “A ndza ha mi vuri malandza, hikuva nandza a nga tivi lexi n’wini wa yena a xi endlaka; kambe ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tata wa mina.” (Yohane 15:15) Timhaka ta le xihundleni, kumbe “ŝihundla,” leti hi ntolovelo Yehovha ni N’wana wakwe va bulaka ha tona, swin’we ni vanghana va vona ti va hlanganisa exibohweni lexi nga tsemekiki xa rirhandzu ni le ku tinyiketeleni.—Vakolosa 3:14.

6. Hikwalaho ka yini Yehovha a nga swi lavi ku fihla ku rhandza ka yena?

⁶ Nhlamuselo ya vito leri nge Yehovha, “La Endlaka Leswaku Swi Va Kona,” yi kombisa vuswikoti bya yena byo endla leswaku xin’wana ni xin’wana xi va kona leswaku a kota ku hetisisa xikongomelo xa yena. Ku hambana ni vanhu va nyama, Yehovha a nga ku tumbeti ku navela ka yena hi ku chava leswaku van’wana va nga n’wi sivela ku ku hetisisa. A nge tsandzeki, kutani eRitweni ra yena, ku nga Bibele hi ku ntshunxeka u paluxa swo tala leswi a lavaka ku swi endla. Wa tshembisa a ku: “Rito ra mina . . . Ri nga ka ri nga tlheleri ka mina ri nga si tira ntšhumu, ri nga si endla ku ranḍa ka mina, ri nga si hetisisa makungu ya mina.”—Esaya 55:11.

7. (a) I yini leswi Yehovha a swi vhumbeke aEdeni, naswona Sathana u xi kombise njhani Xikwembu xi ri xa ntiyiso? (b) Xana nsinya wa nawu lowu nga eka 2 Vakorinto 13:8 wu tshame wu ri wa ntiyiso hi ndlela yihi?

⁷ Endzhakunyana ka ku xandzuka ka le Edeni, Yehovha u paluxe vuyelo byo hetelela bya njhekanjhekisano lowu yaka emahlweni exikarhi ka yena ni Nala wakwe Sathana, hi vuenti. Mbewu ya Xikwembu leyi tshembisiweke a yi ta twisiwa ku vava, ku nga ri ku dlawela makumu, kambe Sathana u ta fela makumu. (Genesa 3:15) Hi 33 C.E., Diyavulosi u yi lumile Mbewu leyi hi xiviri, ku nga Kreste Yesu, hi ku endla leswaku a dlawa. Hi ndlela leyi, Sathana u hetisise Matsalwa naswona hi nkarhi lowu fanaka u kombise Yehovha a ri Xikwembu xa ntiyiso, hambileswi entiyisweni loku a ku nga ri ku navela ka yena Sathana. Ku venga ka yena ntiyiso ni vululami, swin’we ni ku tikukumuxa ka yena, langutelo ro pfumala ku hundzuka, swi n’wi vangele ku endla leswi hi ku kongoma Xikwembu a xi vhumbe leswaku xi ta swi endla. Ina, eka vakaneti va ntiyiso hinkwavo, ku katsa na Sathana hi yexe, nsinya lowu wa nawu wu vonaka wu ri wa ntiyiso: “Hi nga ka hi nga lwi ni ntiyiso, kambe hi ta yima entiyisweni.”—2 Vakorinto 13:8.

8, 9. (a) I yini leswi Sathana a swi tivaka, kambe, xana ku swi tiva koloko ku sivela Yehovha ku hetisisa swikongomelo swa yena? (b) I xitsundzuxo xihi lexi nga erivaleni lexi vakaneti va Yehovha va xi honisaka, naswona hikwalaho ka yini?

⁸ Tanihi leswi Mfumo wa Xikwembu wu simekiweke hi ndlela leyi nga vonakiki hi 1914, Nhlavutelo 12:12 yi sungule ku tirha: “Hikokwalaho, tsakani n’wina matilo, na n’wina lava akeke eka wona; kambe mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” Kambe, xana ku va Sathana a tiva leswaku nkarhi wa yena wu komile swi n’wi endla a hundzuka endleleni ya yena? Sweswo a swi ta vula leswaku Sathana wa swi xiya leswaku Yehovha i Xikwembu xa ntiyiso, ni leswaku tanihi Mulawuri La Tlakukeke, hi yena ntsena loyi a faneleke hi ku gandzeriwa. Hambiswiritano, Diyavulosi a nga swi lavi ku amukela leswaku u tsandzekile, hambiloko a swi tiva sweswo.

⁹ Yehovha u swi veka erivaleni leswi nga ta humelela loko Kreste a tela ku ta avanyisa mafambiselo ya misava ya Sathana. (Matewu 24:29-31; 25:31-46) Malunghana ni mhaka leyi, Rito ra yena ri vula leswi landzelaka hi vafumi va misava: “Siku vanhu va nga ta ku: ‘Ku rhulile, ku hava xo karhata’, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n’wana.” (1 Vatesalonika 5:3) Lava landzelaka vurhangeri bya Sathana va honisa xitsundzuxo lexi lexi nga lo dla, erivaleni. A va voni hikwalaho ka timbilu ta vona leto biha, kutani leswi swi va sivela ku hundzuka endleleni ya vona leyo biha ni ku cinca makungu ya vona lama nga ni khombo yo ringeta ku pfilunganya swikongomelo swa Yehovha.

10. (a) Xana 1 Vatesalonika 5:3 yi ta hetiseka njhani hilaha ku engetelekeke, kambe vanhu va Yehovha va fanele va angurisa ku yini? (b) Ha yini vanhu lava nga hava ripfumelo va ta ya va sihalala eku kaneteni ka vanhu va Xikwembu enkarhini lowu taka?

¹⁰ Ngopfu-ngopfu ku sukela hi 1986, loko Nhlangano wa Matiko wu twarise Lembe Ra Ku Rhula Ka Misava Hinkwayo, misava a yi vulavula ngopfu hi ku rhula ni nsirhelelo. Ku tekiwe magoza lamakulu yo ringeta ku hlayisa ku rhula ka misava hinkwayo, lama humelelekenyana. Xana loku i ku hetiseka hinkwako ka vuprofeta lebyi, kumbe, xana hi fanele hi rindzela xitiviso xo karhi lexi chavisaka enkarhini lowu taka? Yehovha u ta veka mhaka yoleyo erivaleni hi nkarhi wa yena. Hi nkarhi lowu fanaka, a hi tshameni hi xalamukile hi tlhelo ra moya, “[hi] ri karhi [h]i langutela siku ra Xikwembu.” (2 Petro 3:12) Loko nkarhi wu ri karhi wu famba naswona ku ri karhi ku vulavuriwa swinene hi ku rhula ni nsirhelelo, vanhu van’wana lava xi tivaka xitsundzuxo lexi, kambe va xi honisa, va nga ha tixisa swinene va anakanya leswaku Yehovha a nge swi endli, kumbe a nge swi koti ku hetisisa rito ra yena. (Ringanisa Eklesiasta 8:11-13; 2 Petro 3:3, 4.) Kambe Vakreste va ntiyiso va swi tiva leswaku Yehovha u ta xi hetisisa xikongomelo xakwe!

Xichavo Lexi Faneleke Eka Switirho Leswi Yehovha A Swi Tirhisaka

11. Xana Daniyele na Yosefa va dyondze yini malunghana na Yehovha?

¹¹ Loko Hosi Nebukadnetsara mulawuri wa Mfumo wa Babilona Lontshwa, a ve ni norho lowu karhataka lowu a nga ha wu tsundzuki, u kombele mpfuno. Vaprista va yena, vavhumbi ni vangoma a va swi kotanga ku n’wi byela leswi norho wa kona a wu ri xiswona hambi ku ri ku hlamusela leswi a wu vula swona. Hambiswiritano, nandza wa Xikwembu Daniyele u swi kotile ku endla sweswo, kambe u swi amukele hi mbilu yo basa leswaku ku va a kote ku hlamusela norho wolowo a ku nga ri hikwalaho ka vutlhari bya yena n’wini. Daniyele u te: “Ši kona Šikwembu e matilweni, le’ši hlav̌utelaka ŝihundla, kutani ši tiv̌isile hosi Nebukadnetsar le’ŝi nga ta humelela e mikarini le’yi nga ta ta.” (Daniyele 2:1-30) Malembe-xidzana ma nga ri mangani emahlweni ka sweswo, Yosefa muprofeta un’wana wa Xikwembu, hilaha ku fanaka u swi vonile leswaku Yehovha i Mupaluxi wa swihundla.—Genesa 40:8-22; Amosi 3:7, 8.

12, 13. (a) I mani loyi a a ri muprofeta lonkulu wa Xikwembu, naswona hikwalaho ka yini u hlamula tano? (b) I vamani lava namuntlha va tirhaka tanihi “valanguteri va swihundla swa Xikwembu,” naswona hi fanele hi va languta njhani?

¹² Muprofeta wa Yehovha lonkulu loyi a tirheke emisaveni a ku ri Yesu. (Mintirho 3:19-24) Pawulo u hlamuserile a ku: “Xikwembu xi vulavurile khale na vatatana, hi milomo ya vaprofeta. Kambe emasikwini lawa yo hetelela, xi vulavurile na hina hi N’wana, loyi xi n’wi vekeke ku va mudyandzhaka wa swilo hinkwaswo, loyi naswona xi tumbuluxeke tilo ni misava ha yena.”—Vaheveru 1:1, 2.

¹³ Yehovha u vulavule ni Vakreste vo sungula hi ku tirhisa N’wana wakwe Yesu, loyi a va tiviseke swihundla swa Xikwembu. Yesu u te eka vona: “N’wina, mi nyikiwile ku tiva swihundla swa Mfumo wa Xikwembu.” (Luka 8:10) Endzhaku Pawulo u vulavule hi Vakreste lava totiweke tanihi “malandza ya Kriste, ni valanguteri va swihundla swa Xikwembu.” (1 Vakorinto 4:1) Namuntlha, Vakreste lava totiweke va ya emahlweni va tirha tano, va vumba ntlawa wa nandza lowo tshembeka ni wo tlhariha loyi hi ku tirhisa Huvo ya yena leyi Fumaka a phamelaka swakudya swa moya hi nkarhi lowu faneleke. (Matewu 24:45-47) Loko hi va xixima swinene vaprofeta va Xikwembu lava huhuteriweke va le minkarhini leyi hundzeke, ngopfu-ngopfu N’wana wa Xikwembu, xana a hi fanelanga ku tlhela hi xixima xitirho lexi Yehovha a xi tirhisaka namuntlha leswaku xi paluxa rungula ra Bibele leri nga ra nkoka swonghasi eka vanhu va yena eminkarhini leyi yo nonon’hwa?—2 Timotiya 3:1-5, 13.

I Ku Ntshunxeka Kumbe I Xihundla?

14. Hi rini laha Vakreste va hlayisaka timhaka ta xihundla, va ri karhi va tekelela xikombiso xa mani hi ku endla tano?

¹⁴ Xana ku ntshunxeka ka Yehovha eku paluxeni ka swilo swi vula leswaku minkarhi hinkwayo ni le swiyin’weni hinkwaswo Vakreste va fanele va paluxa nchumu wun’wana ni un’wana lowu va wu tivaka? Phela, Vakreste va landzela xitsundzuxo xa Yesu lexi yaka eka vaapostola vakwe xo va va “[tlhariha] kukota tinyoka, [va] va lavo rhula kukota matuva.” (Matewu 10:16) Loko va byeriwa leswaku a va nge swi koti ku gandzela Xikwembu hilaha ripfalo ra vona ri va pfumelelaka hakona, Vakreste va ya emahlweni va “yingisa Xikwembu,” hikuva va swi xiya leswaku ku hava xitirho xa munhu lexi nga ni mfanelo yo sivela vugandzeri bya Yehovha. (Mintirho 5:29) Yesu hi yexe u kombise ku faneleka ka leswi. Ha hlaya: “Endzhaku ka sweswo Yesu a famba-famba eGaleliya; a nga lavanga ku famba-famba eYudiya hikuva Vayuda a va lava ku n’wi dlaya. Nkhuvo wa Vayuda wo endleriwa emintsongeni a wu ri kusuhi. Hiloko Yesu a ku ka vona [vamakwavo va yena va nyama lava nga riki vapfumeri]: . . . ‘N’wina tlhandlukelani enkhubyeni, mina a ndzi yi enkhubyeni wolowo, hikuva nkarhi wa mina a wu si fika swinene.’ Loko a vurile sweswo, a tisalela eGaleliya. Kambe loko vamakwavo wa yena va tlhandlukerile enkhubyeni, na yena a tlhandlukela kona, ku nga ri erivaleni, kambe exihundleni.”—Yohane 7:1, 2, 6, 8-10.

Xana Swi Fanele Swi Boxiwa Kumbe A Swi Fanelanga?

15. Xana Yosefa u swi kombise ku yini leswaku minkarhi yin’wana ku hlayisa xihundla i nchumu lowu kombisaka rirhandzu lowu faneleke wu endliwa?

¹⁵ Minkarhi yin’wana, ku hlayisa timhaka ti ri xihundla a hi vutlhari ntsena kambe swi tlhela swi kombisa rirhandzu. Hi xikombiso, xana Yosefa, tata wa Yesu wa muwundli, u endlise ku yini loko a twe leswaku Mariya ku nga nsati wa yena loyi a n’wi vutile loyi a ri kusuhi ni ku n’wi teka, a a tikile? Ha hlaya: “Leswi Yosefa nuna wa yena a a ri munhu wo lulama, naswona a nga lavi ku n’wi khomisa tingana, a endla makungu ya ku n’wi tshika exihundleni.” (Matewu 1:18, 19, xiitaliki i xerhu.) Vona ndlela leyi a swi ta kombisa tihanyi ha yona ku n’wi endla xihlekiso eka mani na mani!

16. I vutihlamuleri byihi lebyi vakulu, ku katsa ni swirho hinkwaswo swa vandlha swi nga na byona malunghana ni timhaka ta xihundla?

¹⁶ Timhaka ta xihundla leti nga nyumisaka kumbe ku twisa munhu ku vava a ti fanelanga ti paluxiwa eka vanhu lava ti nga va faneriki. Vakulu va Vukreste va swi tsundzuka leswi loko va fanele va nyikela ndzayo ya munhu hi xiyexe kumbe nchavelelo eka Vakreste-kulobye kumbexana hambi ku ri ku va nyika ndzayo loko va endla swidyoho leswikulu eka Yehovha. Ku tamela timhaka leti hi ndlela ya Matsalwa i swa nkoka; ku paluxa timhaka ta xihundla eka lava nga katsekiki a swi laveki naswona a swi kombisi rirhandzu. Entiyisweni, swirho swa vandlha ra Vukreste a swi nge ringeti ku xokola mhaka ya xihundla eka vakulu kambe swi ta xixima vutihlamuleri bya vakulu byo hlayisa timhaka ta xihundla ti tshama ti fihlekile. Swivuriso 25:9 ya hlamusela: “Hambi u tenga ni warikwenu, u nga boši makungu ya uṅwana.”

17. Hikwalaho ka yini hakanyingi Vakreste va hlayisa timhaka ta xihundla ti fihlekile, kambe ha yini va nga fanelanga va endla tano minkarhi hinkwayo?

¹⁷ Nsinya lowu wa nawu wu tlhela wu tirha ni le ka swirho swa ndyangu kumbe vanghana va le kusuhi. Ku hlayisa timhaka tin’wana ti ri xihundla i swa nkoka leswaku ku papalatiwa swidoledole ni ku onha vuxaka bya vanhu. “Moya wa ḍonga wu humesa mpfula, ririmi le’ri ṭhiv̌elaka e šihundleni ri humesa mombo lo’wo kariha.” (Swivuriso 25:23) Kavula, vutshembeki eka Yehovha ni milawu ya yena leyo lulama, swin’we ni ku rhandza vanhu lava dyohaka, swi ta va swi fanerile ku byela vatswari, vakulu va Vukreste kumbe van’wana lava faneleke hambiloko timhaka ta kona ti ri xihundla.a Kambe hakanyingi Vakreste va hlayisa timhaka ta van’wana leti nga ta munhu hi xiyexe hi vutshembeki, va ti hlayisa hilaha va hlayisaka ta vona hakona.

18. Hi tihi timfanelo tinharhu ta Vukreste leti nga ta hi pfuna ku vona leswi hi faneleke hi swi vula ni leswi hi nga fanelangiki hi swi vula?

¹⁸ Hi ku angarhela, Mukreste u tekelela Yehovha hi ku hlayisa timhaka tin’wana ti ri xihundla loko swi fanerile, a ti paluxa ntsena loko swi fanerile. Leswaku a endla xiboho xa loko swi fanerile leswaku a ti paluxa kumbe a nga ti paluxi, u fanele a kongomisiwa hi ku titsongahata, ripfumelo ni rirhandzu. Ku titsongahata swi n’wi sivela ku titlakusa, a ringeta ku tsakisa van’wana hi ku va byela nchumu wun’wana ni wun’wana lowu a wu tivaka kumbe hi ku va xisetela hi timhaka ta xihundla leti a nga taka a nga va byeli. Ku va ni ripfumelo eRitweni ra Yehovha ni le vandlheni ra Vukreste swi n’wi susumetela ku chumayela rungula ra Bibele leri humaka eka Xikwembu kambe a ri karhi a tivonela ku vula swilo leswi nga khunguvanyisaka van’wana a ha sungula. Ina, rirhandzu ri n’wi susumetela ku vula swilo leswi dzunisaka Xikwembu hi ku ntshunxeka ni leswi vanhu va swi lavaka leswaku va ta kota ku kuma vutomi. Hi hala tlhelo, a nga ti paluxi timhaka ta munhu hi xiyexe leti nga ta xihundla, hi ku xiya leswaku hakanyingi ku ti paluxa swi ta va swi kombisa ku pfumala rirhandzu.

19. Hi swihi swiendlo leswi nga ta kombisa leswi Vakreste va ntiyiso va nga xiswona, naswona swi va ni vuyelo byihi?

¹⁹ Langutelo leri leri ringaniseriweke ri pfuna ku vona Vakreste va ntiyiso. A va byi fihli vumunhu bya Xikwembu hi xihundla lexi nga hava vito, dyondzo leyi nga hlamuselekiki ya Vunharhu-un’we. Swikwembu leswi nga tiviwiki i swa vukhongeri bya mavunwa, ku nga ri bya ntiyiso. (Vona Mintirho 17:22, 23.) Timbhoni ta Yehovha leti totiweke ti ri tlangela swinene lunghelo ro va “valanguteri va swihundla swa Xikwembu.” Hi ku paluxa swihundla leswi hi ku ntshunxeka eka van’wana, ti pfuna vanhu va timbilu letinene hi ku va tisa leswaku va ta va ni xinakulobye na Yehovha.—1 Vakorinto 4:1; 14:22-25; Zakariya 8:23; Malakiya 3:18.

[Nhlamuselo ya le hansi]

Xana U Nga Hlamurisa Ku Yini?

◻ Ha yini Yehovha a nga swi lavi ku fihla ku rhandza ka yena?

◻ Xana Yehovha u swi paluxela vamani swihundla swa yena?

◻ I vutihlamuleri byihi lebyi Vakreste va nga na byona malunghana ni timhaka ta xihundla?

◻ Hi tihi timfanelo tinharhu leti nga ta pfuna Vakreste leswaku va tiva leswi va faneleke va swi vula ni leswi va nga fanelangiki va swi vula?

[Swifaniso leswi nga eka tluka 8, 9]

Yehovha u paluxa swihundla hi ku tirhisa Rito ra yena