Xiviko Xa Vahuweleri Va Mfumo
Ku Balekela eNhlengeletanweni Ya Yehovha Ya Swa Le Tilweni
KHALE swinene muprofeta Esaya u susumeteriwe ku vula leswaku: ‘Va fanele va dzunisa Yehovha eswihlaleni swa lwandle.’ (Esaya 24:15) Timbhoni ta Yehovha ti languta swihlala swa lwandle tanihi xiphemu xa ‘misava hinkwayo’ leyi Yesu a vulavuleke ha yona a ku, “Evhangeli yi fanele . . . yi twarisiwa.”—Matewu 24:14; Marka 13:10.
Swihlala swa le Marquesas swi kwalomu ka tikhilomitara ta 1400 en’walungu-vuxa bya Tahiti. I xiphemu xa ntlawa wa swihlala leswi nga ekule swinene le Pacific Dzonga leswi vuriwaka French Polynesia. Tanihi leswi swi nga ni misava leyi yo nona ni ku kufumela ya vholkheno, ni moya wo tsakama, swimilana swi kula kahle eswihlaleni leswi. Hambiswiritano, swihlala swa Marquesas swi tlhela swi tswala muxaka wun’wana wa mbhandzhu. Xiya mhaka ya ndyangu wun’wana lowu anguleke kahle eka rungula ra Mfumo exihlaleni xa Hiva Oa.
Jean ni nsati wakwe Nadine, a va nga tsakisiwi hi leswi vuriwaka tiko leri hluvukeke ra Yuropa Vupela-dyambu leri a va tshama eka rona. Kutani va endle xiboho xo tshika vutomi byo tshama va khomekile ivi va rhurha ni n’wana wa vona va ya eSwihlaleni swa Marquesas. Yindlu ya vona leyintshwa, leyi akiweke hi musengele, a yi ri enkoveni lowu a wu ri ekule. Leswaku va kota ku fikela vaakelani va vona va le kusuhi swinene va boheka ku famba endleleni ya le ntshaveni leyi nga ni magoji-goji ku ringana tiawara timbirhi. Ximutana xa le kusuhi lexi nga na dokodela, xikolo ni xitolo a xi ri endhawini leyi nga tiawara tinharhu ku suka kwalaho hi jipi.
Jean na Nadine a va nga byi tsakeli vukhongeri. Hambiswiritano, a va hlanganyela emabulweni lama vulavulaka hi masungulo ya vutomi. Hakanyingi, a va nyikela vuxokoxoko lebyi rharhanganeke bya tidyondzo ta hundzuluko. Kambe tidyondzo ta vona hinkwato a ti va tiselanga ku eneriseka.
Endzhaku ko tshama malembe ya tsevu va ri voxe, va hlamarile loko va endzeriwe hi Timbhoni ta Yehovha timbirhi. Timbhoni ti tive lomu Jean na Nadine va tshamaka kona loko ti ri eswimitanini swa le kusuhi. Hi ntolovelo, bulo ri yise eka mbulavurisano wa dyondzo ya hundzuluko. Lexi tsakiseke mpatswa lowu, hi leswaku Timbhoni a ti ri ni kopi ya buku leyi nge Life—How Did It Get Here? By Evolution or by Creation?, leyi kandziyisiweke hi Timbhoni ta Yehovha. Jean na Nadine a va tsakile ku va ni buku leyi nyikeleke nkambisiso lowu heleleke malunghana ni ndlela leyi vutomi byi veke kona ha yona.
Endzhakunyana ka nkarhi, ku sunguriwe dyondzo ya Bibele. Endzhaku ka nkarhi wa kwalomu ka malembe manharhu, Jean na Nadine va endle nhluvuko lowunene. Va khorwisekile leswaku ku nga ri khale misava hinkwayo yi ta endliwa paradeyisi. Endzhaku ka loko ndyangu wa vona wu kurile wu va ni vana vanharhu, ku famba mune wa tiawara leswaku va va kona eminhlanganweni ya Vukreste eHolweni ya Mfumo ku ve ntlhontlho lowukulu. Hambiswiritano, sweswo a swi va tshikisanga ku va kona. Eku heteleleni, Jean na Nadine va kombise ku tinyiketela ka vona eka Yehovha hi nkhuvulo wa mati. Leswi va swi endle entsombanweni lowu khomeriweke emutini-nkulu, laha nhlohlorhi ya lava veke kona a ku ri 38 wa vanhu!
Leswaku wu pfuna ntlawa lowutsongo wa vahuweleri va Mfumo, ndyangu lowu wu ehlekete ku suka ekaya ra wona ra le kule. Wu rhurhele emutini lowu nga ni vaaki va kwalomu ka gidi, laha Jean sweswi a nga nandza wa vutirheli evandlheni ra kwalaho ra Timbhoni ta Yehovha. Ndyangu lowu, lowu eku sunguleni wu balekeke eswihlaleni leswaku wu balekela nhluvuko, wu swi vona swi ri lunghelo ku va wu kume vutumbelo bya ntiyiso, nhlengeletano ya Yehovha ya swa le tilweni.